Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2009-02-01

Imokot Fi ke Ofụri Esịt

Imokot Fi ke Ofụri Esịt

EKEME ndidi emesisan̄a ebe Ufọkmbono Obio Ubọn̄ Mme Ntiense Jehovah ke edem mbufo onyụn̄ ekere m̀mê ẹsinam nso do. Ndi ama ọfiọk ke owo ekededi ekeme ndidụk mme mbono esop mmọ, oro ẹsinịmde kpukpru urua? Ẹsinen̄ede ẹdara isenowo.

Nte ededi, ekeme ndidi emenyene mme mbụme ndibụp. Ntak emi Mme Ntiense Jehovah ẹsisopde idem ọtọkiet? Nso ke ẹsikpep ke mme mbono esop oro? Ndien nso ke mbon oro ẹsidụkde, emi mîdịghe Mme Ntiense Jehovah ẹtịn̄ ẹban̄a mme mbono esop emi?

“Bon Kpukpru Owo Ọtọ Kiet”

Toto ke eset, mme owo ẹma ẹsisop idem ọtọkiet man ẹtuak ibuot ẹnọ ẹnyụn̄ ẹkpep n̄kpọ ẹban̄a Abasi. Ke se ikperede ndisịm isua 3,500 emi ẹkebede, ẹma ẹdọhọ nditọ Israel ẹte: “Bon kpukpru owo ọtọ kiet, iren-owo ye iban, ye nditọwọn̄, ye esen owo fo emi odude ke obio fo, man mmọ ẹkop, man mmọ ẹnyụn̄ ẹkpep, ẹnyụn̄ ẹbak Jehovah Abasi mbufo, ẹnyụn̄ ẹkpeme ndinịm kpukpru ikọ mbet emi.” (Deuteronomy 31:12) Ntem, ke Israel, ẹma ẹkpep n̄kpri ye ikpọ owo ndituak ibuot nnyụn̄ n̄kop uyo nnọ Jehovah Abasi.

Ke n̄kpọ nte isua 1,500 ẹma ẹkebe, ke ini emi ẹketọn̄ọde esop Christian, mme mbono esop ẹma ẹka iso ndidi akpan ikpehe utuakibuot akpanikọ. Apostle Paul ekewet ete: “Ẹyak nnyịn ikere nte ikpedemerede kiet eken inọ ima ye nti utom, ikûsịn ndisop idem ọtọkiet, nte ido ndusụk owo edide, edi isịn udọn̄ inọ kiet eken.” (Mme Hebrew 10:24, 25) Kpa nte ubon esinen̄erede adiana kiet ke ini mbonubon ẹdade ini ẹtie ọtọkiet, kpasụk ntre ke mbon oro ẹyomde ndinam n̄kpọ Abasi ẹsinen̄erede ẹma kiet eken ke ini mmọ ẹsopde idem ọtọkiet man ẹtuak ibuot ẹnọ Abasi.

Mme Ntiense Jehovah ẹsisop idem ọtọkiet ikaba ke urua ke mme Ufọkmbono Obio Ubọn̄ mmọ man ẹnam se mme itie N̄wed Abasi emi ẹdọhọde. Mme mbono esop emi ẹsinam mbon oro ẹsidụkde ẹfiọk mme edumbet Bible, ẹnam mme edumbet emi ẹn̄wan̄a mmọ, ẹnyụn̄ ẹnam mmọ ẹda mme edumbet emi ẹsịn ke edinam. Ke ebiet oro ẹkemede, nte ẹtịmde mbono esop esidi ukem ke ofụri ererimbot, ndien mme mbono esop kiet kiet ẹnyene uduak. Mbemiso ye ke mbono esop asuanade, mbon oro ẹsidụkde ẹsibọ “nsịnudọn̄” ẹto kiet eken ke ini mmọ ẹnemede nti nneme ọtọkiet. (Rome 1:12) Nso ke ẹsikpep ke mbono esop kiet kiet?

Utịn̄ikọ Bible

Akpa mbono esop oro ata ediwak owo ẹsidụkde edi utịn̄ikọ Bible oro ẹnyenede kpukpru owo, esịnede mbon oro mîdịghe Mme Ntiense Jehovah, ndien ẹsiwak ndinịm enye ke utịturua. Jesus Christ ama esiwak ndinọ utịn̄ikọ an̄wa—kiet ke otu mmọ edi ọwọrọetop Ukwọrọikọ Oro ke Obot. (Matthew 5:1; 7:28, 29) Apostle Paul ama etịn̄ ikọ ọnọ mbon Athens. (Utom 17:22-34) Mme Ntiense Jehovah ẹkpebe Jesus Christ ye apostle Paul ke afan̄ emi ke ndinịm mme mbono esop emi ẹsinọde utịn̄ikọ oro ẹtịmde akpan akpan ẹnọ kpukpru owo, esịnede mbon oro mîdịghe Mme Ntiense Jehovah, ndien ekeme ndidi akpa ini oro ndusụk mmọ ẹdụkde mbono esop edi emi.

Ẹsida ikwọ ke n̄wed ikwọ Sing Praises to Jehovah * ẹtọn̄ọ mbono esop emi. Ẹsidọhọ kpukpru mbon oro ẹmade ẹdaha ẹdada ẹtiene ẹkwọ ikwọ emi. Ke ẹma ẹkebọn̄ ibio ibio akam, etịn̄ikọ oro odotde esinọ utịn̄ikọ ke minit 30. (Se ekebe  “Mme Utịn̄ikọ Oro Ẹnyenede Ufọn Ẹnọ Kpukpru Owo.”) Utịn̄ikọ esie esinen̄ede oto Bible. Etịn̄ikọ esidọhọ otuowo ediwak ini ete  ẹtiene ẹkụbọde mme akpan itie N̄wed Abasi ẹnyụn̄ ẹse nte imọ ikotde mme ufan̄ikọ oro. Ke ntre, emekeme ndida okwommọ Bible ndi, mîdịghe ọdọhọ kiet ke otu Mme Ntiense Jehovah ọnọ fi mbemiso ẹtọn̄ọde mbono esop emi.

Ukpepn̄kpọ Enyọn̄-Ukpeme

Ke ata ediwak esop Mme Ntiense Jehovah, ẹsinịm Ukpepn̄kpọ Enyọn̄-Ukpeme ke ẹma ẹkekụre utịn̄ikọ an̄wa. Ukpepn̄kpọ emi esidi edineme ibuotikọ emi ẹdade ẹto Bible ke mbụme ye ibọrọ ke hour kiet. Mbono esop emi esisịn udọn̄ ọnọ mbon oro ẹdụkde ete ẹkpebe uwụtn̄kpọ mbon Beroea eyo Paul, emi “ẹkebọde ikọ ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi.”—Utom 17:11.

Ẹsida ikwọ ẹtọn̄ọ Ukpepn̄kpọ Enyọn̄-Ukpeme. N̄kpọ oro ẹnemede ye mme mbụme oro ada ukpepn̄kpọ obụpde ẹto nsiondi eke ukpepn̄kpọ magazine emi. Emekeme ndibọ nsiondi eke ukpepn̄kpọ emi nto kiet ke otu Mme Ntiense Jehovah. Mme ibuotikọ oro ẹnemede ndondo emi esịne: “Mme Ete ye Eka—Ẹkpep Nditọ Mbufo N̄kpọ ke Ima,” “Ẹkûda Idiọk Ẹsio Owo Usiene Idiọk,” ye “Ntak Emi Kpukpru Ndutụhọ Ẹditrede ke Mîbịghike.” Okposụkedi emi mbono esop emi esidide mbụme ye ibọrọ, mbon oro ẹmade ẹsibọrọ mbụme, ndien mbon oro ẹkebemde iso ẹkot ẹnyụn̄ ẹtiede ẹkere ibuotikọ oro ye mme itie N̄wed Abasi oro ẹdude ẹsinọ ibọrọ. Ẹsida ikwọ ye akam ẹberi mbono esop emi.—Matthew 26:30; Ephesus 5:19.

Ukpepn̄kpọ Bible Esop

Mme Ntiense Jehovah ẹsifiak ẹsop idem ke Ufọkmbono Obio Ubọn̄ ke mbubreyo kiet kpukpru urua man ẹdụk mbono esop emi edide ikpehe ita, ndien emi esibịghi hour kiet ye minit 45. Akpa ikpehe edi Ukpepn̄kpọ Bible Esop emi edide minit 25. Enye an̄wam mbon oro ẹsidụkde ẹnen̄ede ẹfiọk Bible, ẹkpụhọde  ekikere ye edu mmọ, ẹnyụn̄ ẹnam n̄kọri nte mme mbet Christ. (2 Timothy 3:16, 17) Ẹsinịm mbono esop emi se ẹnemede otode Bible mi ke mbụme ye ibọrọ ukem nte Ukpepn̄kpọ Enyọn̄-Ukpeme. Mbon oro ẹmade ẹsibọrọ mbụme. Un̄wam ukpepn̄kpọ Bible oro ẹsidade esiwak ndidi n̄wed m̀mê ediye uduot ekpri n̄wed emi Mme Ntiense Jehovah ẹsiode.

Ntak emi ẹsidade n̄wed un̄wam ukpep Bible ẹnịm mbono esop emi? Ke eyo oro ẹkewetde Bible, ndikokot Ikọ Abasi kpọt ikekemke. “[Ẹma] ẹtat enye ẹnyụn̄ ẹtịn̄ se enye ọwọrọde; mmọ ẹnyụn̄ ẹka iso ndinam se ẹkotde an̄wan̄a.” (Nehemiah 8:8, NW) Ke mme isua ndondo emi, mme n̄wed oro ẹnemede n̄wed Isaiah, Daniel, ye Ediyarade ẹn̄wam mbon oro ẹsidụkde mbono esop emi ẹfiọk se mme n̄wed Bible emi ẹwọrọde.

Ufọkn̄wed Utom Ukara Abasi

Ẹsinịm Ufọkn̄wed Utom Ukara Abasi ke ẹma ẹkekụre Ukpepn̄kpọ Bible Esop. Ẹtịm mbono esop emi edide minit 30 mi man an̄wam mme Christian ẹfori “usọ unọ ukpep.” (2 Timothy 4:2) Ke uwụtn̄kpọ, ndi akanam eyen fo m̀mê ufan fo obụp fi mbụme aban̄a Abasi m̀mê Bible edi ukemeke ndinọ akpan ibọrọ? Ufọkn̄wed Utom Ukara Abasi ekeme ndikpep fi nte akpadade Bible ọbọrọ n̄kpọsọn̄ mbụme inem inem. Ntem, imekeme nditịn̄ ukem nte prọfet Isaiah eketịn̄de, ete: “Ọbọn̄ Jehovah ọmọnọ mi edeme mmọ eke ẹkpepde n̄kpọ, man mfiọk ndida ikọ n̄n̄wam mmọ eke ẹkpade mba.”—Isaiah 50:4.

Ẹsida utịn̄ikọ oro otode akpan itie Bible oro ẹsidọhọde mbon oro ẹsidụkde ẹkot urua kiet mbemiso, ẹtọn̄ọ Ufọkn̄wed Utom Ukara Abasi. Ke etịn̄ikọ ama okokụre utịn̄ikọ esie, enye esidọhọ mme andidụk ẹtịn̄ mbio mbio akpan n̄kpọ oro mmọ ẹkpepde ke itie Bible oro ẹkenọde ẹkot. Ẹma ẹkụre emi, nditọ ufọkn̄wed oro ẹsịnde enyịn̄ ke ufọkn̄wed emi ẹsinọ utịn̄ikọ mmọ.

Ẹsinọ nditọ ufọkn̄wed itie Bible ẹda ke mbot utịn̄ikọ ẹkot, mîdịghe ẹdọhọ mmọ ẹnam ẹwụt nte ẹkpepde owo en̄wen Bible. Ẹma ẹkụre utịn̄ikọ kiet kiet, ọnọitem oro enyenede mbufiọk ada se idude ke n̄wed Bọ Ufọn to Ukpepn̄kpọ  Ufọkn̄wed Utom Ukara Abasi otoro eyen ufọkn̄wed ke se enye akanamde ọfọn. Ekem, enye ekeme ndinọ eyen ufọkn̄wed oro ekikere ke ndịbe aban̄a nte enye ekemede ndinam n̄kọri.

Mbio mbio ikpehe mbono esop emi ẹn̄wam eyen ufọkn̄wed ye kpukpru mbon oro ẹsidụkde, emi ẹyomde ndifori usọ ukotn̄wed, utịn̄ikọ, ye ukpepn̄kpọ. Ufọkn̄wed Utom Ukara Abasi ama okụre, ẹsida ikwọ oro ẹdade ẹto Bible ẹtọn̄ọ Esoputom.

Esoputom

Akpatre ikpehe mbono esop emi edi Esoputom. Mme andidụk ẹsikpep nte ẹkpepde owo akpanikọ Bible uforo uforo ke utịn̄ikọ, nnamn̄wụt, ndụn̄ọde, ye ibọrọ otuowo. Mbemiso Jesus okosion̄ode mme mbet esie ọdọn̄ ẹkekwọrọ ikọ, enye ama osop mmọ ọtọkiet onyụn̄ enen̄ede ọnọ mmọ item. (Luke 10:1-16) Sia emi ekenen̄erede etịm mmọ idem ọnọ utom ukwọrọikọ, utom ukwọrọikọ mmọ ama enen̄ede enem. Ekem, mme mbet Jesus ẹma ẹnyọn̄ ẹdi ẹdinọ enye mbụk utom mmọ. (Luke 10:17) Mmọ ẹma ẹsibụk se mmọ ẹkesobode ẹnọ kiet eken.—Utom 4:23; 15:4.

Ndutịm Esoputom oro esidide minit 35 odu ke ekpri babru oro ẹkotde Utom Obio Ubọn̄ Nnyịn, emi ẹsinọde kpukpru ọfiọn̄. Ibuotikọ oro ẹnemede ndondo emi ẹdi: “Ndituak Ibuot Nnọ Jehovah nte Ubon,” “Ntak Emi Isifiakde Ika Ndien Ndien,” ye “Kpebe Christ ke Utom Ukwọrọikọ Fo.” Ẹsida ndutịm emi ẹkeberi ke ikwọ ẹnyụn̄ ẹdọhọ owo esop ọbọn̄ akam ediberi.

Se Mbon Oro Mîdịghe Mme Ntiense Ẹtịn̄de

Mme esop ẹsidomo ndinam kpukpru owo ẹkop inem. Ke uwụtn̄kpọ, Andrew ama esikop ekese ndiọi mbụk aban̄a Mme Ntiense Jehovah. Edi idem ama akpa enye nte ẹkedarade enye ke akpa ini oro enye okodụkde mbono esop. Enye ọdọhọ ete: “Ekedi ata edinem ebiet oro owo okpodude. Nte mme owo ẹketiede ufan ufan ye nte mmọ ẹkenyenede udọn̄ ke idem mi ama akpa mi idem.” Ashel ke Canada, emi edide isua 17 ọdọhọ n̄ko ete: “Mbono esop oro ama enem-e! Se ẹkekpepde ama an̄wan̄a owo.”

Ẹkesidiọn̄ọ José emi odụn̄de ke Brazil nte owo ikọ ke n̄kann̄kụk mmọ. Kpa ye oro, ẹma ẹkot enye edidụk mbono esop ke Ufọkmbono Obio Ubọn̄ edem mmọ. Enye ọdọhọ ete: “Mbon oro n̄kokụtde ke Ufọkmbono Obio Ubọn̄ ẹma ẹnen̄ede ẹdara mi, okposụkedi oro mmọ ẹkediọn̄ọde akani edu mi.” Atsushi, emi odụn̄de ke Japan, ọdọhọ ete: “Ke nditịn̄ akpanikọ, akpa ini oro n̄kodụkde mbono esop Mme Ntiense Jehovah, eketie mi ke idem ntre ntre. Kpa ye oro, mma ndikụt ke mmọ ẹdi ata owo. Mmọ ẹma ẹnen̄ede ẹdomo ndinam mi nnyene ifụre.”

Emedi-o!

Se mme owo ẹtịn̄de emi owụt ke emekeme ndinen̄ede mbọ ufọn edieke odụkde mme mbono esop ke Ufọkmbono Obio Ubọn̄. Afo eyekpep n̄kpọ aban̄a Jehovah Abasi, ndien enye ayada ukpepn̄kpọ Bible emi afo ọbọde do eteme fi “usụn̄ udori.”—Isaiah 48:17.

Mbono esop Mme Ntiense Jehovah ẹdi ke mfọn, owo itan̄ke etịbe. Nte afo akpama ndidụk mbono esop ke Ufọkmbono Obio Ubọn̄ oro odude ke edem mbufo? Imokot fi ke ofụri esịt ite edidụk.

^ ikp. eki. 10 Mme Ntiense Jehovah ẹsio kpukpru n̄wed oro ẹsiakde ke ibuotikọ emi.