Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2009-01-01

  Mbụme Oro Mme Andikot Ẹbụpde

Ntak Emi Abasi Mîsiyereke Ndusụk Akam?

Ntak Emi Abasi Mîsiyereke Ndusụk Akam?

Abasi edi Owo emi ẹkemede ndinen̄ede nsan̄a n̄kpere. Jehovah esiyom nnyịn ibọn̄ akam inọ imọ kpa nte edima ete esiyomde nditọ esie ẹtịn̄ ikọ ifụre ifụre ye enye. Edi Abasi enyene mme ntak nditre ndibọrọ ndusụk akam ukem nte ete ekededi emi enyenede eti ibuot. Ndi mme ntak emi ẹdi n̄kpọ oro owo mîkemeke ndifiọk, mîdịghe ndi enye ayararede mme ntak emi ke Bible ọnọ nnyịn?

Apostle John ọdọhọ ete: “Uko eke nnyịn inyenede iban̄a enye edi emi, ite, se ededi oro nnyịn iben̄ede ekekem ye uduak esie, enye ọbiọn̄ utọn̄ ke eben̄e nnyịn.” (1 John 5:14) Ana akam nnyịn ẹkem ye uduak Abasi. Ndusụk owo ẹsibọn̄ akam ẹyom mme n̄kpọ oro mîsan̄ake baba n̄kpọ kiet ye uduak Abasi—ke uwụtn̄kpọ, man ẹkan ke mbre mfọniso m̀mê ẹkan ata oro ẹmiade. Ndusụk owo ẹsibọn̄ akam ye ndiọi uduak. James mbet Jesus ama odụri owo utọn̄ aban̄a edibọn̄ akam ke idiọk usụn̄ ntre, ete: “Mbufo ẹben̄e, edi ibọhọ, koro mbufo ẹben̄ede kaban̄a idiọk uduak, man ẹda enye ẹnam mme udọn̄ mbufo kaban̄a inemesịt obụkidem.”—James 4:3.

Ke uwụtn̄kpọ, kere nte otu iba emi ẹbrede bọl ẹbọn̄de akam man ẹkan. Ọsọsọn̄ ndidori enyịn ke Abasi ọyọbọrọ orụk akam oro. Kpasụk ntre mfịn, obio iba emi ẹn̄wanade ẹkọn̄ ẹsibọn̄ akam ẹyom edikan.

Ufọn akam mbon oro ẹsede ibet Abasi ke ndek idụhe. Ini kiet ko, mbubịk mbon oro ẹketuakde ibuot ẹnọ Jehovah ama anam enye ọdọhọ mmọ ete: “Ndien n̄ko ke ini mbufo ẹwakde ndibọn̄ akam, ami n̄kopke: iyịp ọmọyọhọ mbufo ke ubọk.” (Isaiah 1:15) Bible ọdọhọ ete: “Owo eke ọwọn̄ọrede utọn̄ esie man okûkop mbet, idem akam esie edidi n̄kpọ ndek.”—Mme N̄ke 28:9.

Edi Jehovah esikpan̄ utọn̄ kpukpru ini okop akam mme andituak ibuot nnọ enye, emi ẹsịnde ofụri ukeme man ẹnam n̄kpọ esie nte ekemde ye uduak esie. Edi ndi oro ọwọrọ ke enye ọyọnọ kpukpru n̄kpọ oro mmọ ẹben̄ede? Baba. Kere ban̄a ndusụk uwụtn̄kpọ N̄wed Abasi.

Moses ama ekpere Abasi akan owo ekededi; edi enye n̄ko ekenyene ndiben̄e n̄kpọ “ekekem ye uduak [Abasi].” Moses ndikeben̄e Abasi ete enye ayak imọ idụk isọn̄ Canaan ikekemke ye uduak Abasi. Enye ọkọdọhọ ete: “Mbọk, yak mbe n̄kokụt eti isọn̄ emi odude ke edem Jordan oko.” Edi mbemiso ini emi, Abasi ama ọdọhọ ke enye ididụkke isọn̄ oro ke ntak idiọkn̄kpọ esie. Mmọdo, utu ke Jehovah ndikọnọ se Moses ekeben̄ede, Enye ọkọdọhọ enye ete: “Yak ekem fi; kûtọn̄ọ aba ntak udọhọ mi uban̄a n̄kpọ emi.”—Deuteronomy 3:25, 26; 32:51.

Apostle Paul ama ọbọn̄ akam ete ẹnam imọ ibọhọ se enye okokotde “n̄kukịm ke obụkidem.” (2 Corinth 12:7) Ekeme ndidi “n̄kukịm” emi ekedi uyịre uyịre udọn̄ọ enyịn m̀mê mfiomo oro mme andibiọn̄ọ ye “nditọete abian̄a” ẹkesifiomode enye ofụri ini. (2 Corinth 11:26; Galatia 4:14, 15) Paul ekewet ete: “Mma n̄kpe Ọbọn̄ ubọk utịm ikata nte enye [oro edi, n̄kukịm emi] adaha ọkpọn̄ mi.” Edi Abasi ama ọfiọk ke edieke Paul akade iso ọkwọrọ ikọ kpa ye uyịre uyịre “n̄kukịm ke obụkidem” oro, emi eyenen̄ede owụt nte odudu Abasi anamde utom ke idem Paul ye nte enye enen̄erede ọbuọt idem ke Abasi. Ntre, utu ke ndinam se Paul ekeben̄ede, Abasi ọkọdọhọ enye ete: “Ẹnam odudu mi ọfọn ama ke mmemidem.”—2 Corinth 12:8, 9.

Ke akpanikọ, Abasi enen̄ede ọfiọk m̀mê imọ ndinam ndusụk n̄kpọ oro nnyịn iben̄ede enye ọyọfọn ye nnyịn. Jehovah esiyere akam nnyịn oro ẹkemde ye ndima uduak esie oro ẹwetde ke Bible, ke usụn̄ oro ọfọnde ye nnyịn.