Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2008-12-01

 Kpep Nditọ Fo

Ntak Emi Ndịk Mîkanamke David

Ntak Emi Ndịk Mîkanamke David

NDI akanam ndịk anam fi?— * Ndịk esinam ata ediwak nnyịn ndusụk ini. Nso ke afo ekeme ndinam ke ini ndịk anamde fi?— Afo emekeme ndifehe n̄kada ye akwaowo emi enen̄erede enyene odudu. Ekeme ndidi ete m̀mê eka fo. Nnyịn imekeme ndikpep ekese nto David ke afan̄ emi. Enye ọkọkwọ ke ikwọ ọnọ Abasi ete: “Nyọbuọt idem mi ye afo. . . . Mmọbuọt idem mi ye Abasi: ndịk idinamke mi.”—Psalm 56:3, 4.

Afo ekere ke anie ekekpep David ete okusufehe ndịk? Ndi ete ye eka esie ẹkekpep enye?— Anaedi. Jesse ete esie ekedi ete ete Jesus Christ, kpa “Ọbọn̄ Emem” oro Abasi ọkọn̄wọn̄ọde. (Isaiah 9:6; 11:1-3, 10) Ete ete David ekekere Obed. Enyene n̄wed Bible oro ẹkotde ẹdian eka Obed. Ndi ọmọfiọk enyịn̄ esie?— Enye ekere Ruth, kpa anam-akpanikọ an̄wan emi Boaz ekemende ọdọ.—Ruth 4:21, 22.

Ruth ye Boaz ẹma ẹkpan̄a ẹbịghi mbemiso David edimana. Ekeme ndidi afo ọmọfiọk enyịn̄ eka Boaz, eka eka David. Enye okodụn̄ ke Jericho onyụn̄ anyan̄a nditọ Israel emi ẹkedide ndiyep Jericho. Ke ini ibibene Jericho ọkọduọde, enye ama anyan̄a ubon esie ke nditebe ididuot urụk ke window esie. Enye ekere didie?— Rahab, emi akakabarede edi andituak ibuot nnọ Jehovah, ndien mme Christian ẹkpenyene ndikpebe uko esie.—Joshua 2:1-21; 6:22-25; Mme Hebrew 11:30, 31.

Nnyịn imenịm ke ete ye eka David ẹma ẹkpep enye ẹban̄a kpukpru mme anam-akpanikọ asan̄autom Jehovah oro, koro ẹma ẹdọhọ mme ete ye eka ẹsikpep nditọ mmọ utọ n̄kpọ oro. (Deuteronomy 6:4-9) Ama odu ini oro ẹkedọhọde Samuel prọfet Abasi aka ekemek David, akpatre eyeneren Jesse, ndidi edidem Israel.—1 Samuel 16:4-13.

Usen kiet, Jesse ama ọdọhọ David ada udia ọsọk ikpọ nditọeka esie ita emi ẹken̄wanade ekọn̄ ye mme Philistine emi ekedide mme asua Abasi. Ke David ama ekesịm do, enye ama efehe aka an̄waekọn̄ okokop Goliath esịnde  “mbon-ekọn̄ Abasi uwem” ke ndek. Ndịk ama anam kpukpru owo ndin̄wana ye Goliath. Ke Edidem Saul ama okokop ke David enyịme ndika n̄kan̄wana ye Goliath, enye ọdọhọ ẹkot David ẹnọ imọ. Ndien ke David ama ekedi, Saul ọdọhọ enye ete: ‘Afo edi eyenọwọn̄.’

David ama ọdọhọ Saul ke imọ ima iwot ekpe ye bear oro ẹkeyomde ndita erọn̄ mmimọ, onyụn̄ ọdọhọ ke ‘Goliath edinyụn̄ ebiet mmọ.’ Saul ama ọbọrọ ete: “Ka; Jehovah onyụn̄ osụk odu ye afo.” David ama emen ndọnọ itiat ition ọdọn̄ ke ekpat ukpeme erọn̄ esie, emen utop-itiat esie, onyụn̄ aka ndin̄wana ye Goliath. Ke ini Goliath okụtde ekpri eyenọwọn̄ edide, enye ofiori ete: “Diken, ndien nyada obụkidem fo nnọ mme inuen.” David ọbọrọ ete: ‘Ami nda enyịn̄ Jehovah ntiene fi,’ onyụn̄ ofiori ete: “Nyowot fi.”

Ekem David efehe ebịne Goliath, osio itiat ke ekpat esịn ke utop-itiat esie, onyụn̄ otop enye nnennen nnennen ọtọ Goliath ke ọkpọiso. Ke ini mme Philistine ẹkụtde ke Goliath akpa, mmọ ẹfen̄e. Nditọ Israel ẹbịne mmọ ẹnyụn̄ ẹkan ke ekọn̄. Mbọk tie ye ubon fo kot ofụri mbụk emi ke 1 Samuel 17:12-54.

Nte uyen, emekeme ndikop ndịk ndusụk ini ndinam se Abasi ọdọhọde. Jeremiah ekedi ekpri akparawa ndien ndịk ama anam enye n̄ko, edi Abasi ọkọdọhọ enye ete: “Kûfehe . . . koro ami ndude ye afo.” Jeremiah ama enyene uko onyụn̄ ọkwọrọ ikọ nte Abasi eketemede enye. Edieke ọbuọtde idem ye Jehovah nte David ye Jeremiah, ndịk idinamke fi n̄ko.—Jeremiah 1:6-8.

^ ikp. eki. 3 Edieke okotde ibuotikọ emi ye nditọwọn̄, n̄kpri udịm oro ẹdụride ẹwụt ke ana ebet onyụn̄ obụp mmọ mbụme oro.