Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2008-08-01

 Kpep Nditọ Fo

Samuel Ama Aka Iso Anam Se Inende

Samuel Ama Aka Iso Anam Se Inende

NDI akanam omokụt mme owo ẹnamde ndiọi n̄kpọ?— * Samuel ama okụt. Enye okodụn̄ ke ebiet oro afo mûkpekereke ke utọ n̄kpọ emi ekpetịbe. Oro ekedi ke ataya Abasi, m̀mê ebiet oro ẹkesituakde ibuot ẹnọ Abasi ke Shiloh. Ẹyak ise nte Samuel akasan̄ade edidụn̄ ke ataya Abasi ke se ikande isua 3,000 oro ẹkebede.

Hannah ama enen̄ede oyom eyen mbemiso enye ekedimande Samuel. Enye ama ọbọn̄ akam ọnọ Abasi aban̄a n̄kpọ emi ke ini enye akakade ataya. Enye ama enen̄ede ọbọn̄ akam tutu n̄kpọkinua esie enyek. Emi ama anam Eli akwa oku ekere ke enye akpa mmịn. Edi ke ini Eli ọkọfiọkde ke enyene se inen̄erede ifịna enye, Eli ama ọdiọn̄ enye ete: “Abasi Israel [akpakam] ọnọ fi eben̄e emi afo ekeben̄ede enye.”—1 Samuel 1:17.

Nte ini akakade, Hannah ama ediman Samuel, ndien esịt ama enen̄ede enem enye tutu enye ọdọhọ Elkanah ebe esie ete: ‘Ke ndondo oro Samuel adahade ke eba, mmọn̄ mmen enye n̄ka ataya man enye akanam n̄kpọ Abasi do.’ Ndien se enye akanamde ekedi oro! Anaedi Samuel ekedi isua inan̄ m̀mê ition ini oro.

Eli ama ọsọn̄, ndien nditọ esie, Hophni ye Phinehas, ikokponoke Jehovah ke nnennen usụn̄. Mmọ ẹma ẹkam ẹnyene oburobụt ebuana ye iban ke ataya Abasi! Afo ekere ke nso ke ete mmọ akpakanam?— Ih, akpakana enye otụnọ mmọ onyụn̄ ọdọhọ mmọ ẹtre ndiọi n̄kpọ oro.

Samuel ọkọkọri okpon ke ataya emi, ndien anaedi enye ama ọfiọk ndiọi n̄kpọ oro nditọ Eli ẹkesinamde. Ndi Samuel ama ekpebe ndiọi uwụtn̄kpọ mmọ?— Baba, enye ama aka iso anam se inende, kpa nte ete ye eka esie ẹkekpepde enye. Imokụt ndien se ikanamde Jehovah ayat esịt ye Eli. Enye ama  akam ọdọn̄ prọfet esie ọkọdọhọ Eli ke imọ iyọnọ ufọk esie ufen, akpan akpan ndiọi nditọ esie.—1 Samuel 2:22-36.

Samuel ama aka iso odu ke ataya ye Eli. Ekem ke okoneyo kiet ke ini Samuel okosụk edede idap, enye ama okop ẹkotde imọ. Ntre, enye ama aka ebịne Eli, edi Eli ọdọhọ ke idịghe imọ ikot enye. Ẹma ẹfiak ẹkot Samuel. Ntre, ke ini ẹkefiakde ẹkot enye ọyọhọ utịm ikata, enye ama afiak ebịne Eli, ndien Eli eteme Samuel ete ọdọhọ ete: “O Jehovah, dọhọ; koro owo fo ọmọn̄ okop.” Ke Samuel ama akanam emi, Jehovah ama etịn̄ ikọ ọnọ enye. Ndi ọmọfiọk se Jehovah ọkọdọhọde Samuel?—

Abasi ama onyụn̄ asian Samuel ke imaduak ndinọ ufọk Eli ufen. Ke eyo ama ekesiere, ndịk ikayakke Samuel asian Eli se Jehovah eketịn̄de. Edi Eli ama ekpe Samuel ubọk ete: “Mbọk kûdịp mi.” Ntre, ke akpatre, Samuel ama asian Eli kpukpru se Jehovah ọkọdọhọde ke iyanam—ukem se prọfet Esie ekebemde iso asian Eli. Eli ama ọbọrọ ete: “Yak [Jehovah] anam se ifọnde enye ke enyịn.” Ẹma ẹwot Hophni ye Phinehas ke akpatre, Eli onyụn̄ akpa n̄ko.—1 Samuel 3:1-18.

“Ekem Samuel okpon, Jehovah onyụn̄ odu ye enye.” Anaedi Samuel ekedi ekpri akparawa ini oro, kpa ini emi edide ata akpan ini ọnọ mme uyen. Ndi emekere ke ama emem utom ọnọ Samuel ndika iso nnam se inende idem ke ini mbon en̄wen mîkanamke?— Okposụkedi mîkememke utom, Samuel ama ọsọn̄ọ ada anam n̄kpọ Jehovah ke ofụri eyo uwem esie.—1 Samuel 3:19-21.

Nso kaban̄a fi? Ndi ayaka iso ekpebe uwụtn̄kpọ Samuel? Ndi afo ayaka iso anam se inende? Ndi ayaka iso anam se Bible etemede ye se ete ye eka fo ẹkpepde fi? Edieke anamde emi, afo ayanam Jehovah ye ete ye eka fo ẹnem esịt.

^ ikp. eki. 3 Edieke okotde ibuotikọ emi ye nditọwọn̄, ekpri udịm oro ẹwetde owụt ke ana ebet onyụn̄ obụp mmọ mbụme oro.