Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME 2008-08-01

 Ukpọhọde Inemesịt Ubon

Ndineme Nneme ye Mme Uyen

Ndineme Nneme ye Mme Uyen

“Mma nsineme nneme ifụre ifụre ye eyen mi, edi ke emi enye edide isua 16 mi, imemke utom ami ye ete esie ndifiọk se enye ekerede. Enye ama ndidu ikpọn̄ ke ubet esie, isinyụn̄ imaha ndineme nneme ye nnyịn!”—MIRIAM KE MEXICO.

“Odu ini emi nditọ mi ẹkesiyomde-yom nneme nneme ye mmimọ, ẹnyụn̄ ẹnam se ededi oro ntịn̄de. Edi ke emi mmọ ẹma ẹkekponi mi, etie mmọ nte ke mfiọkke aba se ikade iso ke ererimbot.”—SCOTT KE AUSTRALIA.

EDIEKE enyenede eyen, anaedi se iwọrọde ete ye eka oro itịn̄de iban̄a ke enyọn̄ emi etiene ọwọrọ fi. Ekeme ndidi ama esinen̄ede eneme nneme ye eyen fo ke ini enye ekedide eyenọwọn̄. Edi etie nte ukemeke aba ndineme nneme ye enye idahaemi. Mma kiet ke Italy oro ekerede Angela ọdọhọ ete: “Eyen mi ama esibụp mi ekese mbụme ke ini ekedide eyenọwọn̄, edi idahaemi, ami nsikam ntọn̄ọ nneme. Mmentọn̄ọke nneme, ediwak usen ẹkeme ndibe nnyịn inyeneke akpan n̄kpọ oro inemede.”

Ukem nte Angela, ekeme ndidi eyen fo emi ekesitịn̄de ikọ nte inịm editie idop idop idahaemi. Emekeme ndisịn ukeme ndineme nneme ye enye, edi enye ọbọrọ fi eto eto. Ke uwụtn̄kpọ, yak idọhọ ke obụp eyen fo ete: “Etie didie?” Enye awamade fi inikiet inikiet ete, “Idiọkke.” Mîdịghe, ekeme ndidi obụp m̀mê ufọkn̄wed eketie didie? Enye ọbọrọ isa isa ete, “Idiọkke.” Edieke odomode ndibụp enye mbụme efen, oro ekeme ndinam enye isioroke-sioro fi aba uyo.

Nte ededi, ndusụk uyen oro ẹkam ẹmade ndisioro uyo isibọrọke mme ete ye eka ikọ ọfọn. Mma kiet ke Nigeria emi ekerede Edna ọdọhọ ke eyen imọ esiwak ndidọhọ “kpọn̄ mi” ini ekededi oro idọn̄de enye utom. Ramón ke Mexico ọdọhọ ke eyen imọ emi edide isua 16 esinyụn̄ anam ntre. Enye ọdọhọ ke iwakke usen emi mmimọ mîsifan̄ake mfan̄a. Ini ekededi oro idọn̄de enye utom, ana enye afan̄a.

Ekeme ndinen̄ede mbiak ete m̀mê eka oro odomode ndineme nneme ye eyen, edi eyen inọhọ enye iso. Bible ọdọhọ ke unana item m̀mê editie ọtọkiet nneme nneme esisịn uduak okpu. (Mme N̄ke 15:22) Anna, n̄wan Russia emi ọbọkde nditọ ikpọn̄ ọdọhọ ke esịt esiyat imọ tutu iyom ndifiori n̄kpo ke ini imọ mîfiọkke se eyen imọ ekerede. Ntak esisọn̄de mme ete ye eka ndineme nneme ye nditọ ke ini enen̄erede oyom mmọ ẹneme nneme-e?

  Ndifiọk Se Idide Mfịna

Nneme idịghe ikpîkpu editịn̄ ikọ. Jesus ọkọdọhọ ke “oto ke uyụhọ esịt inua etịn̄ ikọ.” (Luke 6:45) Ntre ima ineme nneme edifọn edifọn, nnyịn iyekpep n̄kpọ ito mbon en̄wen, inyụn̄ inam mmọ ẹfiọk se nnyịn ikerede. Esisọn̄ mme uyen nditịn̄ se mmọ ẹkerede nnọ mbon en̄wen. Idem mme uyen oro ẹkesimade ndineme nneme ẹkeme nditie idop idop ẹnyụn̄ ẹkop bụt ke ẹma ẹkekponi. Ntaifiọk ẹdọhọ ke mme uyen ẹsikere ke kpukpru owo ẹsise se mmimọ inamde inyụn̄ itịn̄de. Ntre, mme uyen oro ẹsikopde bụt ẹsima ndidu ikpọn̄.

Udọn̄ nda-ke-idem edi n̄kpọ efen oro mîsiyakke mme uyen ẹneme nneme ye ete ye eka mmọ. Eyen mbufo ke ọkọri ndien se isitịbede edi oro ke ini eyenọwọn̄ ọkọride. Emi iwọrọke ke enye ọmọn̄ ọkpọn̄ mbufo. Idahaemi ke enye akam oyom mbufo akan. Udọn̄ nda-ke-idem emi esitọn̄ọ ke ini mmọ ẹsụk ẹdide uyen. Ke ini nditọwọn̄ ẹsụk ẹkọride, ediwak mmọ isimaha ndisọsọp ntịn̄ se mmọ ẹyomde ndinam nnọ mbon en̄wen.

Mma kiet ke Mexico oro ekerede Jessica ọdọhọ ke mme uyen isiwakke ndidịp ubọkn̄ka mmọ n̄kpọ. Enye ọdọhọ ete: “Eyen mi ama esitịn̄ mfịna esie ọnọ mi ke ini enye ekedide eyenọwọn̄, edi idahaemi editịn̄ ọnọ mme ufan.” Edieke eyen fo anamde ntem, kûkere ke enye idaha fi aba nte ete m̀mê eka. Ndụn̄ọde oro ẹnamde ẹwụt ke mme uyen ẹsinen̄ede ẹma item mme ete ye eka ẹkan eke mme ufan, kpa ye oro mmọ mîsisioho itịn̄. Nso ndien ke akpanam man eyen fo esineme nneme ye afo?

Se Akpanamde

Yak idọhọ ke awat ubomisọn̄ ke usụn̄ mbakara oro anade ata nnennen nnennen. Amawat oyom usụn̄ uwọn̄ọkede iso. Edi emedisịm inụk usụn̄. Ana ọtọn̄ọ ndiwọn̄ọde iso do ndien mbak ududụk ikọt. Ntre ke edi ye eyenọwọn̄ oro ọtọn̄ọde ndikọri n̄wọrọ owo. Ekeme ndidi enyene akpan usụn̄ oro ekesidade eneme nneme ye eyen fo ke ediwak isua. Edi ke emi enye ama ọkọtọn̄ọ ndikpon mi, oyoyom anam mme ukpụhọde. Bụp idemfo mme mbụme emi:

‘Ndi mmesinyịme ndineme nneme ye eyen mi ke ini enye oyomde ineme nneme?’ Bible ọdọhọ ete: “Ikọ eke ẹtịn̄de ke ekem ini, edi apple o-gold ke usan e-silver.” (Mme N̄ke 25:11) Nte itien̄wed emi owụtde, enen̄ede edi akpan n̄kpọ nditịn̄ ikọ ke ekemini. Ke uwụtn̄kpọ, ọtọin̄wan̄ ikemeke ndisịk ini idọk n̄ka iso m̀mê ndisịk n̄ka edem. Ini idọk mîkemke, enye ikemeke ndidọk n̄kpọ. Kpasụk ntre, eyen fo ekeme ndinyene akpan ini oro enye oyomde ndineme nneme ye afo. Nyịme ndineme nneme ye enye ini oro. Frances, n̄wan Australia emi ọbọkde nditọ ikpọn̄ ọdọhọ ete: “Eyen mi esiwak ndidi ubet mi okoneyo, ndien ndusụk ini enye esitie esịm hour kiet. Edi ikememke utom inọ mi sia mmensimaha nditaba idap, edi ima isineme kpukpru se ikoyomde ndineme.”

NAM EMI ISE: Edieke eyen fo mîsimaha ndineme nneme, domo ndinam n̄kpọ ọtọkiet—da enye ka n̄kpọ, bre mbre ye enye, mîdịghe nam n̄kpọ ye enye ke ufọk. Mme uyen ẹsima ndineme nneme ke utọ idaha emi.

‘Ndi mmọfiọk se ikọ eyen mi ọwọrọde?’ Job 12:11 ọdọhọ ete: “Nte utọn̄ idomoke ikọ, kpa nte nsịn̄ atabide udia ke idem esie?” Enen̄ede oyom ‘odomo ọfiọk se ikọ’ eyen fo ọwọrọde. Mme uyen ẹsinam nte ke kpukpru se itịn̄de enen. Ke uwụtn̄kpọ, eyen fo ekeme ndidọhọ ete, “Esisụk ada mi nte eyenọwọn̄!” mîdịghe, “Akananam ukpan̄ke utọn̄ unọ mi!” Utu ke ndidọhọ ke se eyen fo etịn̄de idịghe akpanikọ, fiọk ke ekeme ndidi enye etịn̄ ebetọ ikọ. Ke uwụtn̄kpọ, ke ini enye ọdọhọde ke ‘esisụk ada imọ nte  eyenọwọn̄,’ ekeme ndidi ikọ esie ọwọrọ ke “afo unyeneke mbuọtidem ke idem imọ.” Ke ini enye ọdọhọde ke ‘akananam ukpan̄ke utọn̄ unọ imọ,’ emi ekeme ndiwọrọ ke enye “oyom ndisian fi nte etiede imọ ke idem.” Domo ndifiọk se ikọ esie enen̄ede ọwọrọ.

NAM EMI ISE: Edieke eyen fo etịn̄de ikọ uyat uyat, dọhọ ete: “Mmokụt ke esịt inemke fi, ke n̄kpan̄ utọn̄ ndikop se oyomde nditịn̄. Mbọk tịn̄ se inamde ekere ke nda fi nte eyenọwọn̄.” Ekem kpan̄ utọn̄ nọ enye, kûnyụn̄ ubọ enye ikọ ke inua.

‘Ndi ami nsikam nnam ọsọn̄ ndineme nneme ye eyen mi ke ndinyịk enye etịn̄ ikọ?’ Bible ọdọhọ ete: “Ẹtọ mfri edinen ido ke mme emem emem idaha ẹnọ mbon oro ẹnamde emem.” (James 3:18) Tịn̄ ikọ nyụn̄ nam n̄kpọ oro edinamde ‘emem’ odu, man eyen fo ekeme ndineme nneme ye afo. Ti ete ke oyom ndin̄wam eyen fo. Ntre, ke ini enemede nneme ye enye, kûtie nte ebiereikpe oro oyomde ndibiere ikpe nnọ enye. Ete kiet ke Korea oro ekerede Ahn ọdọhọ ete: “Eti ete isitịn̄ke mme utọ ikọ nte, ‘Ini ewe ke afo edidiọn̄ọ idem?’ m̀mê, ‘Ndi eyịre utọn̄ ke isịn?’ Mma nsitịn̄ mme utọ ikọ emi ye nditọ mi, edi mma ndifiọk ke idịghe nte nsitịn̄de ikọ kpọt esibiak mmọ, ke se nsitịn̄de esibiak mmọ n̄ko.”

NAM EMI ISE: Edieke eyen fo mîmaha ndibọrọ fi ikọ, domo nditịn̄ ikọ ye enye ke usụn̄ efen. Ke uwụtn̄kpọ, utu ke ndibụp eyen fo m̀mê n̄kpọ eketie didie ye enye mfịn, bem iso tịn̄ nte n̄kpọ eketiede ye afo nyụn̄ se m̀mê enye ọyọbọrọ. Mîdịghe, edieke oyomde ndifiọk se eyen fo ekerede aban̄a se enemede, bụp enye se mbon en̄wen ẹkerede, nyụn̄ bụp m̀mê mme ufan esie ẹkpese didie n̄kpọ oro. Ekem bụp m̀mê nso item ke enye ọkpọnọ mme ufan esie.

Ke akpanikọ, afo emekeme ndineme nneme ye mme uyen. Kpụhọ usụn̄ oro esinemede nneme ye nditọ fo. Nyene nneme ye mme ete ye eka oro ẹkụtde unen ke afan̄ emi. (Mme N̄ke 11:14) Ke ini enemede nneme ye eyen fo, ‘sọp ndikop ikọ, kûsọp nditịn̄ ikọ, kûsọp ndiyat esịt.’ (James 1:19) Ke akande kpukpru, kûkpa mba ke ndikama nditọ fo “ke ntụnọ ye ke usụn̄ ukere n̄kpọ Jehovah.”—Ephesus 6:4..

BỤP IDEMFO ETE: . . .

  • Nso ukpụhọde ke n̄kụt ke idem eyen mi tọn̄ọ enye okokpon?
  • Didie ke n̄keme ndinam n̄kọri ke nte nsinemede nneme?