Nte oyomde okụbọde

Mek usem

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME 2008-06-01

 Kpep Nditọ Fo

Enye Okoyom Ndinyan̄a Naaman

Enye Okoyom Ndinyan̄a Naaman

NDI akanam omokụt owo emi enen̄ede ọdọn̄ọ?— Ndi ama ọdọn̄ fi ndinam n̄kpọ man anyan̄a enye?— Nso ke akpanam edieke enye otode idụt efen m̀mê esikade ido ukpono efen? Ndi okposụk an̄wam enye okop nsọn̄idem?— Ekpri eyenan̄wan oro okodude ke idụt Israel ke n̄kpọ nte isua 3,000 emi ẹkebede ama oyom ndin̄wam owo okop nsọn̄idem. Yak itịn̄ se iketịbede.

Ekpri eyenan̄wan emi odụn̄ ke Israel, ndien ekọn̄ esidu ke ufọt mbon Syria ye nditọ Israel. (1 Ndidem 22:1) Usen kiet, mbon Syria ẹdi Israel ẹdimụm ekpri eyenan̄wan oro. Ẹda enye ẹka obio Syria, ndien enye akabade edi eyenufọk an̄wan Naaman, emi ebe esie edide akwa owoekọn̄ Syria. Naaman ọdọn̄ọ ata idiọk udọn̄ọ oro ẹkotde akpamfia, ndien udọn̄ọ emi ekeme ndinam obụkidem owo owụbede.

Eyenan̄wan emi asian n̄wan Naaman ekaufọk esie nte ẹkemede ndikọk udọn̄ọ ebe esie. Enye ọdọhọ ete: ‘Edieke Naaman akpakade Samaria, Elisha prọfet Jehovah akpanam akpamfia okụre enye.’ Nte ekpri eyenan̄wan emi etịn̄de n̄kpọ aban̄a Elisha anam Naaman enịm ke prọfet oro ekeme ndinam imọ ikop nsọn̄idem. Ntre, Naaman ọbọ unyịme oto Ben-hadad edidem Syria onyụn̄ ada mme isụn̄utom esie adaha isan̄ emi oyomde usụn̄ ke n̄kpọ nte kilomita 150 man okokụt Elisha.

Mmọ ẹbem iso ẹka ẹbịne Jehoram edidem Israel, ẹnyụn̄ ẹwụt enye n̄wed oro Edidem Ben-hadad ewetde ọnọ enye eben̄e ete anyan̄a Naaman. Edi Jehoram ibuọtke idem ye Jehovah inyụn̄ ibuọtke ye prọfet Elisha. Jehoram ekere ke Ben-hadad odomo nditọn̄ọ en̄wan ye imọ. Ke ini Elisha okopde n̄kpọ emi, enye ọdọhọ Edidem Jehoram ete: “Yak enye etiene mi.” Elisha oyom ndiwụt Naaman ke Abasi enyene odudu ndinam idiọk udọn̄ọ esie okụre.—2 Ndidem 5:1-8.

Ke ini Naaman asan̄ade ke horse ye chariot esie edisịm ufọk Elisha, Elisha ọdọn̄ isụn̄utom esie ọdọhọ Naaman ete: ‘Ka keyere mmọn̄ ke Jordan utịm ikatiaba, ndien udọn̄ọ fo oyokụre.’ Naaman ayat esịt. Enye oyom Elisha ọwọrọ edifụn̄ ubọk ke ọtọ akpamfia oro man okụre. Edi etise, ẹdikụt isụn̄utom Elisha! Ntre, Naaman akabade ọnyọn̄ ke ikpahaesịt.—2 Ndidem 5:9-12.

Nso ke afo akpakanam edieke ekpekedide kiet ke otu isụn̄utom Naaman?—  Ọfọn, ikọt esie ẹbụp enye ẹte: ‘Edieke Elisha ọkpọdọhọde fi anam akamba n̄kpọ, ndi ukpanamke? Ntre, nso idi ntak mûnamke ekpri n̄kpọ emi—ndikeyere idem kpọt nnyụn̄ nsana?’ Naaman akpan̄ utọn̄ ọnọ mmọ. “Enye osụhọde, [odụk] ke Jordan utịm ikatiaba, . . . ndien obụk esie akabade nte obụk ekpri eyenọwọn̄.”

Naaman afiak ebịne Elisha onyụn̄ ọdọhọ ete: “Mbọk, sese, mmọfiọk nte ke baba Abasi kiet idụhe ke ofụri ererimbot, ke mîbọhọke ke Israel.” Enye ọn̄wọn̄ọ ọnọ Elisha ete ke imọ “[idiwaha] aba edifọp uwa ye uwa ekọm inọ [abasi] efen, ke mîbọhọke Jehovah.”—2 Ndidem 5:13-17.

Ndi akpama ndin̄wam owo ekpep n̄kpọ aban̄a Jehovah ye se enye ekemede ndinam, ukem nte ekpri eyenan̄wan oro akanamde?— Ke ini Jesus okodude ke isọn̄, owo emi ọkọdọn̄ọde akpamfia ama ọbuọt idem ye enye onyụn̄ ọdọhọ ete: ‘Edieke afo amade, emekeme ndinyan̄a mi.’ Ndi ọmọfiọk se Jesus ọkọbọrọde?— “Mmama.” Jesus ama anam udọn̄ọ esie okụre, kpa nte Jehovah akanamde udọn̄ọ okụre Naaman.—Matthew 8:2, 3.

Ndi ọmọfiọk ke Jehovah oyobot obufa ererimbot emi kpukpru owo ẹdikopde nsọn̄idem ẹnyụn̄ ẹdụn̄ ke nsinsi?— (2 Peter 3:13; Ediyarade 21:3, 4) Edieke ọfiọkde, ke akpanikọ afo ayama ndisian mbon en̄wen mme utịbe n̄kpọ emi!