Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) DECEMBER 2015

Nte Afo Emeti?

Nte Afo Emeti?

Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Ndusụk n̄kpọ ewe mîdidụhe ke ini ererimbot emi esịmde utịt?

Ukara owo, ekọn̄, ufịk, ufọkabasi emi ẹkpepde mme owo nsu mînyụn̄ inamke se Abasi ọdọhọde, ye mbon oro ẹnamde ererimbot ọdiọk ntem.—5/1, p. 3-5.

Anie edi Gog isọn̄ Magog oro ẹtịn̄de ẹban̄a ke n̄wed Ezekiel?

Idịghe Satan edi Gog isọn̄ Magog. Etie nte Gog isọn̄ Magog ada aban̄a mme idụt emi ẹdidianade kiet in̄wana ye ikọt Abasi ke akwa ukụt ama ọkọtọn̄ọ.—5/15, p. 29-30.

N̄kpọ itiokiet ewe ẹkeme ndin̄wam owo okop inemesịt ke ini usọn̄?

Bible ọdọhọ ke n̄kpọ itiokiet emi ẹkeme ndin̄wam: (1) Nam se ekemede, (2) kama idem ọfọn, (3) kop inemesịt, (4) tat ubọk, (5) dian idem ye mme owo, nyụn̄ (6) wụt esịtekọm. Ndinam mme n̄kpọ emi ayanam owo okop inemesịt ke ini usọn̄.—6/1, p. 8-10.

Didie ke mme utịben̄kpọ oro Jesus ekesinamde ẹkewụt ke enye atat ubọk?

Jesus ama anam mmọn̄ emi ekekperede ndisịm lita 380, akabade wine ke itie usọrọ ndọ ke Cana. Isan̄ en̄wen, enye ama ọnọ se ibede owo 5,000 udia ke utịbe utịbe usụn̄. (Matt. 14:14-21; John 2:6-11) Utịben̄kpọ iba emi ẹwụt ke Jesus esitat ubọk nte Ete esie.—6/15, p. 4-5.

Ntak emi inịmde ke imekeme ndinem Abasi esịt kpa ye oro nnyịn mîfọnke ima?

Job, Lot, ye David ẹma ẹnam ndudue. Edi sia mmọ ẹkeyomde ndinem Abasi esịt, mmọ ẹma ẹtua n̄kpọfiọk ẹnyụn̄ ẹkabade esịt. Emi ama anam Abasi ama mmọ. Nnyịn n̄ko imekeme ndinem Abasi esịt.—7/1, p. 12-13.

Ndi ẹyesobo kpukpru mbon oro ẹsikade nsunsu ido ukpono ke ini ẹdisobode Akwa Babylon?

Etie nte owo idisoboke. Se Zechariah 13:4-6 etịn̄de owụt ke etie nte idem mme etubom ufọkabasi ẹyefehe ẹkpọn̄ ufọkabasi mmọ, ẹkan̄ inua asat ke akanam mmimọ ikaha utọ ufọkabasi oro.—7/15, p. 15-16.

Ntak emi Barak ekenyịmede ndika ekọn̄ edieke Deborah etienede enye aka?

Barak ama enyene mbuọtidem. Enye ikọdọhọke Jehovah ọnọ imọ ediwak n̄kpọekọn̄, edi akakam oyom Deborah emi ekedide prọfet Abasi etiene mmimọ, sia enye ama ọfiọk ke enye ndidu do ọyọsọn̄ọ imọ ye mbonekọn̄ imọ idem. (Judg. 4:6-8; 5:7)—8/1, p. 13.

Nso idi ndusụk n̄kpọ emi ikpetiede ikere?

Ọfọn itie ikere mme n̄kpọ oro Jehovah obotde, ufọn oro ibọde ke ndikot Ikọ esie, ifet oro inyenede ndibọn̄ akam, ye nte enye ọkọnọde eyen esie edikpa man afak nnyịn.—8/15, p. 10-13.

Didie ke ndifep idiọk nsan̄a ekeme ndin̄wam nnyịn ifiọk owo emi ikpoyomde ima?

Kpa ye oro oyomde ifọn ido ye mbon oro mîkponoke Jehovah, Jehovah akpan asan̄autom esie ndiyom ima ye owo emi mîyakke idem inọ enye mînyụn̄ inamke n̄kpọ esie. (1 Cor. 15:33)—8/15, p. 25.

Nso ikanam mbuọtidem Peter emem, edi nso ke enye akanam man mbuọtidem esie afiak ọsọn̄?

Mbuọtidem akanam apostle Peter asan̄a ke enyọn̄ mmọn̄ ebịne Jesus. (Matt. 14:24-32) Edi ke ini Peter ekesede oyobio, ndịk ama anam enye. Ekem enye ama ọwọn̄ọde enyịn ese Jesus onyụn̄ ọdọhọ Jesus an̄wam imọ.—9/15, p. 16-17.

Utom 28:4 ọdọhọ ke mbon Malta ẹkekere ke apostle Paul edi owotowo. Ntak emi mmọ ẹkekerede ntre?

Ke ini ibọm okodomde Paul, mmọ ẹkekere ke Dike, abasi-an̄wan unenikpe, akamia enye ufen.—10/1, p. 9.

Martha ndikayak ediwak n̄kpọ ada ini esie ekpep nnyịn nso?

Ini kiet, Martha ama esịn idem etem nsio nsio udia. Edi Jesus ama ọdọhọ ke Mary eyeneka esie ama emek eti udeme, ke enye ndikenen̄ede n̄kpan̄ utọn̄ n̄kop se imọ ikpepde enye. Ana inen̄ede ikpeme mbak mme n̄kpọ oro mîdịghe akpan n̄kpọ, ẹdibọ nnyịn ini oro ikpadade inam n̄kpọ Abasi.—10/15, p. 18-20.