Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) DECEMBER 2015

Edikabade Eke Obufa Ererimbot Ikọmbakara eke 2013

Edikabade Eke Obufa Ererimbot Ikọmbakara eke 2013

ẸKPỤHỌDE n̄kpọ ke Edisana N̄wed Abasi—Edikabade Eke Obufa Ererimbot Ikọmbakara ediwak ini. Edi, se ẹkpụhọde ke eke 2013 awak akan. Ke uwụtn̄kpọ, ndusụk itien̄wed ke Bible emi iwakke ikọ aba nte ẹkesiwakde, ẹnyụn̄ ẹkpụhọde nte ẹsiwetde ndusụk ikọ Bible. Ẹwet ndusụk ibuot ke Bible emi idahaemi nte uto, ẹnyụn̄ ẹdọn̄ mme ikọ idakisọn̄ oro ẹnamde se ẹtịn̄de an̄wan̄a owo. Ke ibuotikọ emi, nnyịn idikemeke nditịn̄ kpukpru n̄kpọ oro ẹkpụhọde ke Edikabade Eke Obufa Ererimbot Ikọmbakara eke 2013 emi. Edi ẹyak ineme ndusụk n̄kpọ oro ẹkpụhọde.

Mme ikọ Bible ewe ke ẹkpụhọde? Nte ẹnemede ke ibuotikọ oro, “Bible Emi Ọsọpde An̄wan̄a Owo,” idahaemi ẹsịn “Udi” ke mme itie oro “Sheol” ye “Hades” ẹkedude, ẹnyụn̄ ẹkabade ikọ Hebrew ye ikọ Greek emi ọwọrọde “ukpọn̄,” ẹtiene se ẹtin̄de ẹban̄a. Ẹma ẹkpụhọde ediwak ikọ en̄wen n̄ko.

Ke uwụtn̄kpọ, idahaemi ẹkabade ikọ Greek oro ẹkesikabarede “obukpo ido” nte “emiom emiom ido,” sia ikọ Greek emi ọwọrọ ndinam idiọkn̄kpọ ke ido emiom. Ndien “ima-mfọnido” edidi “ima-nsọn̄ọnda.” “Ima-nsọn̄ọnda” enen̄ede enen, sia Bible esiwak nditịn̄ mban̄a enye ye “edinam akpanikọ.”—Ps. 36:5; 89:1.

Ẹkabade ndusụk ikọ oro ẹkesikabarede usụn̄ kiet, ke nsio nsio usụn̄ idahaemi. Ke uwụtn̄kpọ, ẹkesikabarede ikọ Hebrew emi ʽoh·lamʹ, nte “nsinsi nsinsi” ke ata ediwak itie. Edi se nte ẹkabarede enye idahaemi ke nsio nsio usụn̄ ke Psalm 90:2 ye Micah 5:2.

Ikọ Hebrew ye Greek emi ẹsikabarede nte “mfri” odu ediwak ini ke Bible. Enye esida aban̄a “eyen” m̀mê “nditọ,” ke ndusụk itie. N̄kani Edikabade Eke Obufa Ererimbot ẹkesikabarede ikọ Hebrew ye ikọ Greek oro nte “mfri,” ke kpukpru itie oro enye odude, esịnede Genesis 3:15. Edi mfịn, mbon Ikọmbakara iwakke ndikot “eyen” m̀mê “nditọ,” mfri. Ntak edi oro Edikabade Eke Obufa Ererimbot Ikọmbakara eke 2013, esịnde “eyen” ke Genesis 3:15, ye ke mme itien̄wed oro ẹnamde Genesis 3:15 an̄wan̄a. (Gen. 22:17, 18; Edi. 12:17) Ẹkabade ikọ emi ke mme itien̄wed eken ẹtiene se ẹtịn̄de ẹban̄a.—Gen. 1:11; Ps. 22:30; Isa. 57:3.

 Ntak emi ẹkpụhọde ediwak ikọ oro ẹkesikabarede ẹtiene nte ẹsibonde ikọ ke mme usem oro ẹkedade ẹwet Bible? Appendix A1 ke Edikabade Eke Obufa Ererimbot Ikọmbakara eke 2013, ọdọhọ ke eti akabade Bible “esikabade se ikọ ọwọrọde, edieke ndikabade ntiene nte ẹsibonde ikọ ke mme usem oro ẹkedade ẹwet Bible mîdin̄wan̄ake owo, m̀mê ediwọrọde n̄kpọ en̄wen.” Ẹkabade ndusụk ebetọ ikọ mme usem oro ẹkedade ẹwet Bible ẹtiene nte ẹsibonde ikọ ke mme usem emi, edi edieke ndikabade mmọ ntre mîdin̄wan̄ake owo, ẹtịn̄ se mmọ ẹwọrọde. Ke uwụtn̄kpọ, ‘ndidụn̄ọde esịt’ oro ẹtịn̄de ẹban̄a ke Ediyarade 2:23 an̄wan̄a owo ke ediwak usem. Edi ufan̄ikọ oro etịn̄ n̄ko aban̄a ‘ndidụn̄ọde ekpụt.’ Ediwak owo ifiọkke se ndidụn̄ọde ekpụt ọwọrọde, ntak edi oro ẹtịn̄de se enye ọwọrọde, oro edi, ndidụn̄ọde “ekikere esịt owo.” N̄ko ke Deuteronomy 32:14, ebetọ ikọ oro, “ikpọn̄ emi odude ke ekpụt wheat,” in̄wan̄ake ediwak owo, ntre ẹtịn̄ se enye ọwọrọde, oro edi, “ata eti wheat.” Uwụtn̄kpọ ebetọ ikọ en̄wen edi enye oro Moses eketịn̄de ke Exodus 6:12 ete, “Ami nnaha mbobi ke n̄kpọkinua.” Edi idahaemi, itien̄wed oro ọdọhọ, “ami n̄kemeke nditịn̄ ikọ ọdọnọ.”

Ntak emi ẹkabarede “nditọ irenowo Israel” ye “nditọ irenowo emi ete akpade ọkpọn̄” nte “nditọ Israel” ye “nditọakpa” idahaemi? Usem Hebrew enyene ikọ ọnọ erenowo ye n̄wan. Edi, ẹkeme ndida ndusụk ikọ oro mmọ ẹnyenede ẹnọ erenowo ẹtịn̄ ẹban̄a erenowo ye n̄wan. Ke uwụtn̄kpọ, ndusụk ufan̄ikọ oro ẹtịn̄de n̄kpọ ẹban̄a “nditọ irenowo Israel,” esịne iban n̄ko. Ntak edi oro ẹwakde ndikabade “nditọ irenowo Israel” idahaemi nte “nditọ Israel.”—Ex. 1:7; 35:29; 2 Ndi. 8:12.

N̄kani Edikabade Eke Obufa Ererimbot ẹkekabade ikọ Hebrew oro ọwọrọde “nditọiren,” nte “nditọ” ke Genesis 3:16. Edikabade Eke Obufa Ererimbot Ikọmbakara eke 2013, akabade ikọ Hebrew oro ọwọrọde “nditọiren,” nte “nditọ” ke Exodus 22:24. Itien̄wed oro ọdọhọ ete: “Nditọ fo ẹyenana ete.” Idahaemi ẹnyụn̄ ẹkabade “eyeneren emi ete akpade ọkpọn̄,” nte “eyenakpa.” (Deut. 10:18; Job 6:27) Nte Septuagint usem Greek akakabarede ikọ Hebrew oro edi oro. Emi anam n̄ko ẹkpụhọde nte ẹkesikabarede Ecclesiastes 12:1. Akpa, itien̄wed emi ekesidọhọ, “ke ini afo edide akparawa,” edi idahaemi edidọhọ, “ke ini afo edide uyen.”

Ntak emi ẹkpụhọde nte ẹkesikabarede ediwak ikọedinam Hebrew? Usem Hebrew enyene akpan ikọedinam iba, enye oro owụtde ke edinam ke aka iso ye enye oro owụtde edinam oro ama okokụre. N̄kani Edikabade Eke Obufa Ererimbot ẹkesida ikọ nte “aka iso” m̀mê “ama aka iso” ndiwụt edinam oro akade iso m̀mê n̄kpọ oro owo mîkanamke ini kiet. * Ẹkesida ikọ Hebrew oro ẹkabarede nte “iditreke-tre,” “ana,” ye “ke akpanikọ,” ẹwụt n̄kpọ emi ẹma ẹkenam ẹma.

Owo isịnke mme utọ ikọedinam Hebrew emi ke Edikabade Eke Obufa Ererimbot Ikọmbakara eke 2013, ibọhọke ke itie oro mmọ ẹnamde se ẹtịn̄de an̄wan̄a. Ke uwụtn̄kpọ, ufọn idụhe ndidọhọ ete: “Abasi aka iso ọdọhọ ete yak un̄wana odu,” nte n̄kpọ eke ẹdọhọde ke Abasi eketịn̄ ikọ emi ndien ndien. Edikabade Eke Obufa Ererimbot Ikọmbakara eke 2013 ọdọhọ idahaemi ete: “Abasi ọdọhọ ete yak un̄wana odu.” (Gen. 1:3) Edi, sia Jehovah okokotde Adam ediwak  ini, owo ikpụhọke nte ẹkekabarede Genesis 3:9, emi ọdọhọde ete, “ndien Jehovah aka iso okot” Adam. Sia ẹkabarede ikọedinam usem Hebrew ke mmemmem usụn̄ oro an̄wan̄ade owo, emi anam Edikabade Eke Obufa Ererimbot Ikọmbakara eke 2013 iwakke ikọ ikaha, koro usem Hebrew iwakke ikọ.

Ẹwet ediwak ibuot ke Bible emi nte uto man ẹtie nte mbon oro mme andiwet Bible ẹkewetde

Ntak emi ẹwetde ediwak ibuot ke Bible idahaemi nte uto? Mme andiwet Bible ẹkewet ediwak ikpehe Bible nte uto. Ediwak usem idahaemi ẹda ikọ oro ẹnyenede ukem uyo, ẹwet uto mmọ. Edi owo ikesidaha ikọ oro enyenede ukem uyo iwet uto ke usem Hebrew, ẹkesida n̄kpọ iba emi ẹdide ukem ẹdomo ye kiet eken, mîdịghe ẹda n̄kpọ iba emi ẹkpụhọde ye kiet eken, ẹdomo.

Ke n̄kani Edikabade Eke Obufa Ererimbot, ẹkewet n̄wed Job ye Psalm ke usụn̄ oro owụtde ke mme andiwet Bible ẹkeyom ẹkwọkwọ m̀mê ẹtetịn̄ ke ibuot. Ndiwet mme n̄wed Bible emi ntem ama anam mmọ ẹtie nte uto, onyụn̄ anam owo okûsọp efre se okotde. Ke Edikabade Eke Obufa Ererimbot Ikọmbakara eke 2013, ẹwet Mme N̄ke, Ikwọ Solomon, ye ediwak ibuot ke mme n̄wed Bible oro mme prọfet ẹkewetde, nte uto; ndien emi anam ẹkeme ndikụt nte ẹdade n̄kpọ iba emi ẹdide ukem ẹdomo ye kiet eken, ye nte ẹdade n̄kpọ iba emi ẹkpụhọrede ye kiet eken, ẹdomo. Ke uwụtn̄kpọ, udịmikọ kiet kiet ke Isaiah 24:2 owụt nte ẹdade n̄kpọ iba emi ẹkpụhọrede ye kiet eken ẹdomo, onyụn̄ owụt ke idụhe owo ndomokiet emi Abasi mîdikpehe ikpe inọ. Ndifiọk ke ẹkewet mme utọ itien̄wed emi nte uto ayanam nnyịn ifiọk ke idịghe nte mme andiwet Bible ẹkewet ikọ kiet kiet ediwak ini, edi ẹkewet enye nte uto man owo okûsọp efre etop Abasi.

Owo isisọpke ifiọk n̄kpọ emi ẹwetde nte uto ke usem Hebrew, ntak edi oro ediwak mbon oro ẹkekabarede Bible mîkọfiọkke mme itie N̄wed Abasi oro ẹkewetde nte uto. Mme akabade Bible ẹsibiere mme itien̄wed oro mmọ ẹkerede ke ẹdi uto. Sia ẹdade n̄kpọ ẹdomo ye n̄kpọ ke ndusụk itien̄wed, man se ẹtịn̄de enen̄ede an̄wan̄a owo, emi esinam mmọ ẹkere ke mme itien̄wed ntem ẹdi uto, kpa ye oro mmọ mîdịghe uto.

Obufa n̄kpọ kiet emi odude ke Edikabade Eke Obufa Ererimbot Ikọmbakara eke 2013 edi, “Se Isịnede ke Ibuot Kiet Kiet.” Enye an̄wam nnyịn idiọn̄ọ nsio nsio owo oro ẹtịn̄de ikọ ke n̄wed Ikwọ Solomon.

Didie ke ndụn̄ọde oro ẹnamde ke ata n̄kani ikpan̄wed Bible akan̄wam ke ini ẹkekpụhọde mme n̄kpọ ke Bible emi? Ẹkeda se idude ke ikpan̄wed Hebrew oro mme Masorete ẹkesion̄ode ẹwet, ye se idude ke ikpan̄wed Greek eke Westcott ye Hort, ẹkabade ata akpa Edikabade Eke Obufa Ererimbot Ikọmbakara. Ẹka iso ndidụn̄ọde n̄kani ikpan̄wed Bible, ndien emi anam ndusụk ufan̄ikọ Bible ẹtetịm ẹn̄wan̄a. Ẹma ẹfiọhọ ndusụk n̄kani ikpan̄wed Bible ke Inyan̄ Inụn̄, ẹnyụn̄ ẹda ini ẹdụn̄ọde ediwak n̄kani ikpan̄wed Bible usem Greek. Ẹdọn̄ ediwak n̄kani ikpan̄wed Bible oro ẹkụtde idahaemi ke kọmputa, ndien emi anam ẹkeme ndida mme ikpan̄wed emi ndomo ye kiet eken, man ẹkụt enye emi enende akan. Kọmiti Ukabade Bible Obufa Ererimbot ẹma ẹda ini ẹdụn̄ọde mme ikpan̄wed oro ẹdọn̄de ke kọmputa mi, ndien emi akanam ẹkpụhọde ediwak n̄kpọ ke Edikabade Eke Obufa Ererimbot Ikọmbakara eke 2013.

Ke uwụtn̄kpọ, Septuagint usem Greek ọdọhọ ntem ke 2 Samuel 13:21: “Edi enye ikayatke esịt ye Amnon eyen esie, koro enye amade enye, sia enye edi akpan esie.” N̄kani Edikabade Eke Obufa Ererimbot ikakabakede itien̄wed emi ntem, sia idịghe se idude edi oro ke ikpan̄wed Hebrew oro mme Masorete ẹkesion̄ode ẹwet. Edi se idude edi oro ke n̄kani ikpan̄wed Bible oro ẹkefiọhọde ke Inyan̄ Inụn̄. Ntak edi oro ẹkabarede itien̄wed oro ntre ke Edikabade Eke Obufa Ererimbot Ikọmbakara eke 2013. Se ẹkekụtde ke n̄kani ikpan̄wed oro ẹkefiọhọde ke Inyan̄ Inụn̄ onyụn̄ anam ẹsịn enyịn̄ Abasi ke itie ition en̄wen ke Akpa N̄wed Samuel. Ndụn̄ọde oro ẹkenamde ke n̄kani ikpan̄wed usem Greek anam ẹkpụhọde n̄kpọ ke Matthew 21:29-31. Se ẹkekụtde ke nsio nsio n̄kani ikpan̄wed Bible akanam ẹnam mme ukpụhọde emi, utu ke nditiene se idude ke akani ikpan̄wed usem Greek kiet kpọt, emi ẹdọhọde nte enende akan.

Ndusụk n̄kpọ oro ẹkpụhọde ke Edikabade Eke Obufa Ererimbot Ikọmbakara eke 2013 ke ineme emi. Emi anam Bible emi enem ndikot, onyụn̄ anam enye ọsọp an̄wan̄a owo. Ndien ediwak owo ẹnịm ke Abasi ada enye etịn̄ ikọ ọnọ mmimọ.

^ ikp. 10 Se Appendix 3C ke New World Translation of the Holy Scriptures—With References, emi ibuotikọ edide, “Hebrew Verbs Indicating Continuous or Progressive Action.”