Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) NOVEMBER 2015

 OTO ITIEUTOM UBON N̄KANI N̄KPỌ NNYỊN

“Ẹkûyak N̄kpọ Ndomokiet Akpan Mbufo!”

“Ẹkûyak N̄kpọ Ndomokiet Akpan Mbufo!”

KE 1931, ikpọ moto ẹma ẹmen mme owo emi ẹsịnede ndiye ọfọn̄ ẹnyụn̄ ẹtode idụt 23 ẹdisụk ke iso ọwọrọetop ufọkmbre Pleyel ke Paris. Ẹkesisio fim ẹnyụn̄ ẹbre ikwọ ke ufọkmbre emi. N̄kpọ nte owo 3,000 ẹma ẹyọhọ ufọkmbre oro. Mmọ ikedịghe ndise fim m̀mê ndikop ikwọ, edi ẹkedi ndikop utịn̄ikọ Brọda Joseph F. Rutherford, emi akadade usụn̄ ke utom ukwọrọikọ ini oro. Ẹma ẹkabade utịn̄ikọ esie ẹsịn ke usem French, German, ye Polish. Kpukpru owo ke ufọkmbre oro ẹma ẹkop se enye eketịn̄de.

Mbono oro ẹkenyenede do ke Paris ama anam ẹtọn̄ọ ndinen̄ede n̄kwọrọ ikọ ke France. Brọda Rutherford ama ọdọhọ kpukpru owo oro ẹkedụkde mbono oro, akpan akpan mme uyen, ete ẹdinam utom nte mme colporteur ke France. Ẹkesikot mme asiakusụn̄ “colporteur” ini oro. John Cooke, uyen kiet emi okotode England edidụk mbono oro, ikefreke se Brọda Rutherford ọkọdọhọde mmọ ete: “Ẹkûyak n̄kpọ ndomokiet akpan mbufo ndisiak usụn̄!” *

Idịghe John Cooke ikpọn̄, emi akakabarede edi isụn̄utom, akaka France ọkọkwọrọ ikọ. Ediwak mbon eken ẹma ẹnyụn̄ ẹka France ‘ẹketan̄a eti mbụk ẹnọ mme owo’ do. (Utom 16:9, 10) Owo 27 ẹkesiak usụn̄ ke France ke 1930. Edi ke 1931, ke ufan̄ isua kiet kpọt, mbon oro ẹkesiakde usụn̄ ẹma ẹsịm owo 104. Sia ata ediwak mme asiakusụn̄ mîkọfiọkke ndisem French ini oro, mmọ ẹkenam didie ẹkwọrọ ikọ, ẹkeda m̀mọ̀n̄ okụk ẹdu uwem, nso ikonyụn̄ in̄wam mmọ ke ini mmọ ẹkekopde ndobo?

MMỌ IKAYAKKE USEM AKPAN MMỌ NDIKWỌRỌ IKỌ

Mme asiakusụn̄ oro ẹketode nsio nsio idụt ẹdikwọrọ ikọ ke France, ẹkesida kad unọ ikọ ntiense ẹkwọrọ ikọ. Eyenete kiet emi okotode Germany aka ọkọkwọrọ ikọ ke Paris, ọdọhọ ete: “Nnyịn ima idiọn̄ọ ke Abasi nnyịn enyene odudu. Ntre, nnyịn ikesikopke ndịk ndika ukwọrọikọ, edi ikesikop ndịk ke imekeme ndifre ikọ ifan̄ emi: ‘Voulez-vous lire cette carte, s’il vous plaît? [Mbọk kot kad emi.]’ Nnyịn ima idiọn̄ọ ke utom ukwọrọikọ nnyịn edi ata akpan utom.”

Mme asiakusụn̄ ẹkesiwat ke enan̄ukwak ye masịn ẹkwọrọ eti mbụk ke France

Ke ini mme asiakusụn̄ ẹkesikwọrọde ikọ ke ikpọ ufọk, mme ekpemeufọk oro ẹma ẹsiwak ndibịn mmọ. Usen kiet, nditọete iban iba emi ẹtode England, emi mîkọdiọn̄ọke ndisem French, ẹma ẹsobo ekpemeufọk emi akayatde esịt etieti. Enye ama obụp mmọ m̀mê mmọ ẹyom anie. Ke ini mmọ ẹkedomode ndinam esịt osụhọde ekpemeufọk oro, kiet ke otu mmọ ama okụt nte ẹwetde n̄kpọ ke usụn̄ ẹte: “Tournez le bouton [Mia n̄kanika emi].” Sia enye ekekerede ke enyịn̄ enyeneufọk edi oro, enye ama atuak  inua imam onyụn̄ ọdọhọ ete: “Nnyịn iyom Mma ‘Tournez le bouton.’” Ndisida n̄kpọ emi akpayatde mmọ nnam mbubru ama esinen̄ede an̄wam mmọ!

NSỌN̄ỌN̄KPỌ YE NDOBO IKAKPANKE MMỌ NDIKWỌRỌ IKỌ

Ọtọn̄ọde ke 1930 ekpere ndisịm 1940, n̄kpọ ama ọsọn̄ ye ata ediwak owo ke France, esịnede mme asiakusụn̄ do. Eyenete an̄wan emi ekerede Mona Brzoska ama etịn̄ nte n̄kpọ eketiede ye enye ye asiakusụn̄ oro enye okodụn̄de kiet ete: “Ufọk oro nnyịn ye mme asiakusụn̄ eken ikodụn̄de eketie nte ufọk eset, ndien ama esinen̄ede ọsọn̄ ndinam enye ofiop ke ini etuep. Ufọk ama esibịt ke okoneyo tutu kpukpru mmọn̄ ke ufọk akabade ice. Ima isibom ice oro ke usenubọk man inyene mmọn̄ ida iyet iso.” Ndi emi ama anam mme asiakusụn̄ oro ẹkûkop inemesịt? Ikanamke! Kiet ke otu mmọ ọkọdọhọ ete: “Nnyịn ikenyeneke n̄kpọ ndomokiet, edi nnyịn ikananake n̄kpọ.”—Matt. 6:33.

Mme asiakusụn̄ England emi ẹkedụkde mbono ke 1931 ke Paris

Mfịna en̄wen ekedi ke mme asiakusụn̄ emi ẹma ẹsikop ndobo. Ọtọn̄ọde ke 1930 esịm n̄kpọ nte 1933, n̄kpọ nte mme asuanetop 700 ẹkedu ke France, ndien ata ediwak mmọ ikodụn̄ke ikpere kiet eken. Nso ikan̄wam mme asiakusụn̄ ẹka iso ẹkop inemesịt kpa ye oro mmọ ẹkesikopde ndobo? Sista Mona etịn̄ se ikan̄wamde enye ye asiakusụn̄ oro enye okodụn̄de kiet, ete: “Nnyịn ima isitie kiet ikpep n̄wed esop Abasi. Sia nnyịn mîkesinamke mfiakn̄ka inyụn̄ inịmke ukpepn̄kpọ Bible ini oro, ima isida mbubreyo iwet mme ifiọkutom oro ikenyenede inọ ẹsọk ubon nnyịn. Ima isinyụn̄ iwak ndiwet nnọ ẹsọk mme asiakusụn̄ eken, man isọn̄ọ kiet eken idem.”—1 Thess. 5:11.

Mme asiakusụn̄ oro ẹma ẹkop inemesịt ndiwa idem nnam n̄kpọ Abasi kpa ye oro mmọ ẹkesobode mme mfịna. Leta oro mmọ ẹkewetde ẹnọ n̄kọk itieutom France, ke mmọ ẹma ẹkesiak usụn̄ do ke ediwak isua, owụt ke mmọ ẹma ẹkop inemesịt. Annie Cregeen, eyenete an̄wan emi ẹyetde aran, emi akasan̄ade ye ebe esie ọkwọrọ ikọ ke ofụri France, ọtọn̄ọde ke 1931 esịm 1935, ọdọhọ ete: “Ama enen̄ede enem nnyịn ndikwọrọ ikọ ini oro. Nnyịn mme asiakusụn̄ ima idiana kiet ikwọrọ ikọ. Ikọ apostle Paul emi ama osu nnyịn ke idem: ‘Ami n̄kọtọ, Apollos ọduọk mmọn̄, edi Abasi anam enye ọkọri.’ Nte Abasi anamde n̄kọri odu ke France anam esịt enen̄ede enem nnyịn emi ikasiakde usụn̄ do ediwak isua ko.”—1 Cor. 3:6.

Mbon oro ẹyomde ndinam ekese ke utom ukwọrọikọ ẹkeme ndikpebe ime ye ifịk oro mme asiakusụn̄ oro ẹkenyenede. Mfịn, n̄kpọ nte mme asiakusụn̄ 14,000 ẹdu ke France. Ediwak mmọ ẹdu ke otu m̀mê ke mme esop emi ẹsemde esen usem. * Mmọ n̄ko iyakke n̄kpọ ndomokiet akpan mmọ ndikwọrọ ikọ!—Oto Itieutom Ubon N̄kani N̄kpọ Nnyịn ke France.

^ ikp. 4 Edieke oyomde ndifiọk nte mbon Poland ẹkekwọrọde ikọ ke France, kot ibuotikọ oro, “Jehovah Akada Mbufo Edi France Man Ẹdikpep Akpanikọ,” ke Enyọn̄-Ukpeme eke August 15, 2015.

^ ikp. 13 Ke 2014, n̄kọk itieutom France ẹkese ẹban̄a se ibede esop ye otu 900 oro ẹsemde nsio nsio usem 70. Mme esop ye otu emi ẹn̄wam mme owo ẹkpep ẹban̄a Jehovah.