Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) NOVEMBER 2015

Jehovah Edi Abasi Ima

Jehovah Edi Abasi Ima

“Abasi edi ima.”—1 JOHN 4:8, 16.

IKWỌ: 18, 91

1. Nso idi ata akpan edu Abasi, ndien etie fi didie ke idem ndifiọk emi?

BIBLE ọdọhọ ke “Abasi edi ima.” (1 John 4:8) Ima edi ata akpan edu esie. Jehovah inyeneke-nyene ima, edi ededi ima. Enem nnyịn ndifiọk ke Abasi emi okobotde ofụri ekondo ye kpukpru n̄kpọ emi ẹdude uwem, edi ima. Ima esinam enye anam kpukpru n̄kpọ.

2. Nso ke Abasi edinam inọ nnyịn ke ntak emi enye amade nnyịn? (Se akpa ndise ibuotikọ emi.)

2 Ima oro Abasi amade nnyịn anam nnyịn inịm ke enye ayanam kpukpru se enye ọn̄wọn̄ọde ndinam nnọ mme owo, ndien emi ayanam mbon oro ẹkopde uyo esie ẹnen̄ede ẹkop inemesịt. Ke uwụtn̄kpọ, ima anam Jehovah enịm “usen eke enye aduakde ndikpe ikpe nnọ isọn̄ ke edinen ido.” Enye edida Jesus Christ emi enye emekde anam emi. (Utom 17:31) Nnyịn imenịm ke emi eyetịbe, ndien mbon oro ẹmade se inende ẹnyụn̄ ẹkopde item ẹyedu uwem ke nsinsi ẹnyụn̄ ẹkop inemesịt.

 SE UKARA OWO ADADE EDI

3. Afo ekere ke uwem ekpetie didie edieke Abasi mîkpamaha nnyịn?

3 Kere nte uwem nnyịn ekpetiede edieke Abasi mîkpamaha nnyịn. Ediwak ndiọi n̄kpọ ẹtịbe tọn̄ọ owo ọkọtọn̄ọ ndikara idem, nnyụn̄ nnyịme Satan emi abakde ibak, edi abasi mmọ. (2 Cor. 4:4; 1 John 5:19; kot Ediyarade 12:9, 12.) Emi owụt nte ini iso ọkpọdiọkde eketre edieke Abasi mîkpamaha nnyịn!

4. Ntak emi Jehovah mîkosoboke mbon emi ẹkesọn̄de ibuot ye enye?

4 Devil ama ọsọn̄ ibuot ye Jehovah, onyụn̄ anam Adam ye Eve ẹtiene ẹsọn̄. Enye ama ọdọhọ ke Jehovah inyeneke unen ndikara mme owo, n̄ko ke enye ikarake ke usụn̄ oro ọfọnde. Ikọ esie ọkọwọrọ ke imọ imekeme ndikara mme owo ọfọn akan nte Jehovah akpakarade. (Gen. 3:1-5) Jehovah ama ayak Satan akara man ẹse m̀mê ikọ esie edi akpanikọ; edi Satan idikarake ke nsinsi. Sia Jehovah enen̄erede enyene ọniọn̄, enye ayak anyan ini ebe man kpukpru owo ẹkụt ke idụhe owo ndomokiet emi ekemede ndikara nnyịn ọfọn nte imọ. Nte n̄kpọ etiede ke ererimbot owụt ke owo ndomokiet m̀mê Satan ke idemesie, ikemeke ndikara nnyịn ọfọn akan nte Jehovah akpakarade.

5. Se itịbede ke ererimbot owụt nso?

5 Ke ufan̄ isua 100 oro ẹbede mi, ẹwot se ibede owo miliọn 100 ke ekọn̄. Mfịn, ererimbot ke enen̄ede ọdiọk akan nte ekedide. Ikọ Abasi ọkọdọhọ ke se iditịbede edi oro ke “mme akpatre usen” emi, ndien ke “mme idiọkowo ye mbon abian̄a ẹyedọdiọn̄ ẹdiọk ẹka iso.” (2 Tim. 3:1, 13) Se itịbede ke ererimbot tọn̄ọ Satan akanam Adam ye Eve ẹsọn̄ ibuot ye Abasi owụt ke se Bible etịn̄de emi edi akpanikọ: “O Jehovah, mmetịm mfiọk nte ke usụn̄ owo isịneke enye ke ubọk. Ikam isịneke ke ubọk owo eke asan̄ade ndinen̄ede ikpatisan̄ esiemmọ.” (Jer. 10:23) Itien̄wed emi owụt ke Jehovah ikobotke mme owo man ẹkara idemmọ.

6. Ntak emi Jehovah ayakde idiọkn̄kpọ aka iso tutu esịm emi?

6 Jehovah Abasi ndiyak idiọkn̄kpọ aka iso tutu esịm emi owụt n̄ko ke ukara esie kpọt ọfọn ke nsinsi nsinsi. Jehovah oyosio idiọkn̄kpọ efep onyụn̄ osobo mme idiọkowo efep. Ndien edieke owo ekededi afiakde ọdọhọ ke ukara esie ifọnke, enye idinọhọ utọ owo oro ini aba akara idemesie. Jehovah idiyakke owo ndomokiet afiak ọtọn̄ọ idiọkn̄kpọ. Enye ọyọsọsọp osobo utọ owo oro efep, koro ofụri ini oro enye ọkọnọde mme owo ẹkara idemmọ ikadaha eti n̄kpọ ndomokiet idi.

NTE JEHOVAH OWỤTDE KE IMAMA NNYỊN

7, 8. Nso ye nso ke Jehovah anam ndiwụt ke imenen̄ede ima nnyịn?

7 Jehovah anam ediwak n̄kpọ ndiwụt ke imama nnyịn. Ke uwụtn̄kpọ, kere ban̄a nte enye obotde ekondo nnyịn. Ediwak biliọn uyọ ntantaọfiọn̄ ẹdu. Uyọ kiet kiet enyene ediwak ekondo ye biliọn ntantaọfiọn̄. Utịn edi kiet ke otu ntantaọfiọn̄ emi ẹdude ke ekondo nnyịn, ndien utịn anam uwem odu ke isọn̄. Kpukpru se Jehovah okobotde emi ẹwụt ke enye edi Abasi, ẹnyụn̄ ẹnam nnyịn ikụt mme edu esie, utọ nte, odudu, ọniọn̄, ye ima. Ke akpanikọ, “tọn̄ọ nte ẹkebot ererimbot, ẹtịm ẹkụt mme edu esie oro enyịn mîkwe, oro edi, nsinsi odudu esie ye idaha esie nte Abasi, koro ẹkụt mmọ ebe ke mme n̄kpọ oro enye anamde.”—Rome 1:20.

 8 Jehovah okobot kpukpru n̄kpọ ke isọn̄ ke ufọn mme owo ye mme unam. Enye ama anam ediye Paradise ọnọ mme owo, onyụn̄ anam mmọ ẹfọn ẹma ẹnyụn̄ ẹkeme ndidu uwem ke nsinsi. (Kot Ediyarade 4:11.) Ke adianade do, ‘enye ọnọ kpukpru obụkidem udia, koro ima-mfọnido esie odude ke nsinsi.’—Ps. 136:25.

9. Nso ke Jehovah asua?

9 Kpa ye oro Jehovah edide Abasi ima, enye asasua se idiọkde. Ke uwụtn̄kpọ, Psalm 5:4-6 ọdọhọ ntem aban̄a Jehovah: ‘Afo udịghe Abasi emi idiọkido adatde fi esịt. Afo asasua kpukpru mbon ibak, onyụn̄ asasua ọduọkiyịp ye owo abian̄a.’

IDIỌKN̄KPỌ IDIDỤHE ABA KE MÎBỊGHIKE

10, 11. (a) Nso ke Jehovah edinam ndiọi owo? (b) Nso ke Jehovah edinam ọnọ ndinen owo?

10 Sia Jehovah edide Abasi ima onyụn̄ asuade se idiọkde, enye ọn̄wọn̄ọ ndisobo Satan ye mme angel esie ye kpukpru mme anamidiọk mfep ke edikem ini. Ikọ esie ọdọhọ ete: ‘Ẹyesịbe mme anamidiọk ẹfep, edi mmọ eke ẹdoride enyịn ke Jehovah ẹyeda isọn̄ ẹnyene. Ndien ayak esisịt, idiọkowo ididụhe aba. Ndien mme asua Jehovah ẹyesịm utịt mmọ.’—Ps. 37:9, 10, 20.

11 Ikọ Abasi ọdọhọ n̄ko ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Ps. 37:29) “Ediwak emem oyonyụn̄ adat mmọ esịt.” (Ps. 37:11) Imenịm ke emi eyetịbe, sia edima Abasi nnyịn esima ndinam se ifọnde nnọ ikọt esie. Bible ọdọhọ ete: “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. N̄kani n̄kpọ ẹma ẹbe ẹfep.” (Edi. 21:4) Emi owụt ke n̄kpọ eyenen̄ede ọfọn ke ini iso ye mbon oro ẹmade Jehovah ẹnyụn̄ ẹnyịmede enye akara mmimọ.

12. Afo ọkpọdọhọ ke anie edi “owo eke mînyeneke nduduọhọ”?

12 Ikọ Abasi ọdọhọ ete: “Se owo eke mînyeneke nduduọhọ nyụn̄ wụk enyịn ke owo eke enende, koro ini iso owo oro editie emem emem. Edi ẹyesobo kpukpru mme abiatibet; ẹyesịbe ini iso mme idiọkowo ẹfep.” (Ps. 37:37, 38) “Owo eke mînyeneke nduduọhọ” ọdiọn̄ọ Jehovah ye eyen esie onyụn̄ anam uduak Abasi. (Kot John 17:3.) Utọ owo emi enen̄ede enịm se 1 John 2:17 ọdọhọde ete: “Ererimbot ke ebebe efep ye mme udọn̄ esie, edi owo eke anamde uduak Abasi ododu ke nsinsi.” Nte utịt ererimbot emi asan̄ade ekpere, enen̄ede oyom nnyịn ‘idori enyịn ke Jehovah inyụn̄ itiene usụn̄ esie.’—Ps. 37:34.

AKAKAN N̄KPỌ EMI ABASI ANAMDE NDIWỤT KE IMAMA NNYỊN

13. Nso idi akakan n̄kpọ emi Jehovah anamde ndiwụt ke imama nnyịn?

13 Kpa ye oro nnyịn mîfọnke ima, imekeme ndisụk ‘ntiene usụn̄ Jehovah.’ Nnyịn imekeme n̄ko ndinen̄ede nsan̄a n̄kpere Jehovah ke ntak akakan n̄kpọ emi enye anamde ndiwụt ke imama nnyịn, oro edi, ndinọ eyen esie edikpa ke ibuot nnyịn. Jehovah ọkọnọ eyen esie edikpa man mbon oro ẹkopde uyo esie ẹbọhọ idiọkn̄kpọ ye n̄kpa oro mmọ ẹkedade ẹto Adam. (Kot Rome 5:12; 6:23.) Jehovah ama enen̄ede enịm ke Jesus ayanam se imọ idọn̄de enye ke isọn̄, sia enye ama ọsọn̄ọ ada ye imọ ke anana-ibat isua emi enye okodude ke Heaven. Ama enen̄ede abiak Jehovah ndikụt nte ẹketụhọrede eyen esie mi ke  isọn̄. Edi Jesus ama ọsọn̄ọ ada owụt ke ete esie ikpọn̄ odot ndikara mme owo, onyụn̄ owụt ke owo emi ọfọnde ama ekeme ndisọn̄ọ nda nnam n̄kpọ Jehovah idem ke ini ẹtụhọrede enye.

Abasi ama ọnọ eyen esie edi isọn̄ ke ntak emi enye amade nnyịn (Se ikpehe 13)

14, 15. Nso ufọn ke n̄kpa Jesus enyene ọnọ mme owo?

14 Kpa ye oro ẹkenen̄erede ẹtụhọde Jesus, enye ama ọsọn̄ọ ada owụt ke Jehovah enyene unen ndikara ofụri ekondo, onyụn̄ anam se Abasi ọkọdọn̄de enye tutu esịm ini emi ẹkewotde enye. Imọkọm Abasi ke enye ndikọnọ eyen esie edikpa man afak nnyịn onyụn̄ anam ikeme ndidu nsinsi uwem ke obufa ererimbot oro Abasi ọn̄wọn̄ọde. Apostle Paul owụt adan̄a nte Jehovah ye Jesus ẹmade nnyịn. Enye ọdọhọ ete: “Ke akpanikọ, ke adan̄aemi nnyịn ikosụk idide mbon mmemidem, Christ akpa ke ibuot mbon unana uten̄e Abasi ke edikem ini. Koro ọsọsọn̄ owo ekededi ndikpa ke ibuot edinen owo; edi, owo akam ekeme ndinyịme ndikpa ke ibuot eti owo. Edi Abasi owụt ima eke enye amade nnyịn ke emi Christ akakpade ke ibuot nnyịn ke adan̄aemi nnyịn isụk idide mme anamidiọk.” (Rome 5:6-8) Apostle John ekewet ete: “Ẹkeda emi ẹwụt ima oro Abasi amade nnyịn, koro Abasi okosiode ikpọn̄-ikpọn̄ edibon Eyen esie ọdọn̄ edi ke ererimbot man nnyịn ikpenyene uwem ebe ke enye. Ima odu ke orụk usụn̄  emi, idịghe koro nnyịn ikamade Abasi, edi koro enye akamade nnyịn okonyụn̄ osiode Eyen esie ọdọn̄ nte uwa usio-isop kaban̄a mme idiọkn̄kpọ nnyịn.”—1 John 4:9, 10.

15 Jesus ama etịn̄ nte Abasi amade nnyịn ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Sia Abasi enen̄erede ama nnyịn, enye ama ọnọ ikpọn̄-ikpọn̄ edibon Eyen esie edikpa ke ibuot nnyịn, kpa ye oro akatakde enye akamba n̄kpọ. Abasi ayaka iso ama nnyịn ke nsinsi. Paul ekewet ete: “Mmetịm mfiọk nte ke n̄kpa m̀mê uwem m̀mê mme angel m̀mê mme ukara m̀mê mme n̄kpọ eke ẹdude ke emi m̀mê mme n̄kpọ eke ẹdidide m̀mê mme odudu m̀mê uniọn̄ m̀mê utụn̄ọ m̀mê edibotn̄kpọ efen ekededi idikemeke ndidian̄ade nnyịn ke ima Abasi oro odude ke Christ Jesus Ọbọn̄ nnyịn.”—Rome 8:38, 39.

OBIO UBỌN̄ ABASI KE AKARA IDAHAEMI

16. Nso idi Obio Ubọn̄ Messiah, ndien anie ke Jehovah emek edi Edidem Obio Ubọn̄ emi?

16 Abasi ndinam ndutịm man Obio Ubọn̄ esie, emi onyụn̄ edide Obio Ubọn̄ Messiah, akara isọn̄ owụt n̄ko ke enye ama nnyịn. Jehovah Abasi emek Jesus Christ edi Edidem Obio Ubọn̄ oro, ndien Jesus ama mme owo, oyonyụn̄ akara nnyịn ke ata eti usụn̄. (N̄ke 8:31) Ke ini ẹdinamde owo 144,000 ẹset ẹketiene Jesus ẹkara ke heaven, mmọ n̄ko ẹyekara nnyịn ọfọn, sia mmọ ẹma ẹdu ke isọn̄ ẹnyụn̄ ẹfiọk mme n̄kpọ oro ẹsifịnade nnyịn. (Edi. 14:1) Jesus ekesiwak ndikwọrọ mban̄a Obio Ubọn̄ Abasi, enye ama onyụn̄ ekpep mme mbet esie ndibọn̄ akam ntem: “Ete nnyịn emi odude ke heaven, yak ẹnam enyịn̄ fo asana. Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 6:9, 10) Mbon emi ẹkopde item Abasi ẹyebọ ediwak edidiọn̄ ke ini ẹdibọrọde akam emi!

17. Ntak emi ukara Jesus okpụhọrede ye ukara owo?

17 Obio Ubọn̄ Abasi emi Jesus akarade ke heaven enen̄ede okpụhọde ye ukara owo emi anamde ata ediwak miliọn owo ẹkpan̄a ke ekọn̄. Jesus enen̄ede ekere aban̄a mbon emi enye akarade, onyụn̄ owụt ke imama mmọ ukem nte Abasi amade mmọ. (Edi. 7:10, 16, 17) Jesus ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde idem, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.” (Matt. 11:28-30) Emi owụt ke enye enen̄ede ekere aban̄a nnyịn.

18. (a) Nso ke Obio Ubọn̄ Abasi anam tọn̄ọ enye ọkọtọn̄ọ ndikara? (b) Nso ke idineme ke ibuotikọ oro etienede?

18 Prọfesi Bible owụt ke Obio Ubọn̄ Abasi ama ọtọn̄ọ ndikara ke heaven toto ke 1914. Toto ke ini oro, Abasi aka iso nditan̄ nsụhọ mbon oro ẹditienede Jesus ikara ke heaven ye “akwa otuowo” mbon. “Akwa otuowo” ẹdi mbon emi ẹdibọhọde nsobo idiọk ererimbot emi ẹdụk obufa ererimbot. (Edi. 7:9, 13, 14) Akwa otuowo emi ẹwak didie idahaemi? Nso ke mmọ ẹnyene ndinam? Ẹyebọrọ mme mbụme emi ke ibuotikọ oro etienede.