Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  October 2015

Ọfọn Mi Ndisan̄a N̄kpere Abasi

Ọfọn Mi Ndisan̄a N̄kpere Abasi

MMA ntre n̄kọri ke ini n̄kedide isua usụkkiet. Emi eketịbe ke n̄kpọ nte isua 34 emi ẹkebede, ke ini ikesidụn̄de ke Côte d’Ivoire. Idahaemi ndi isua 43, nnyụn̄ nniọn̄ ikpat ita m̀mê mita kiet kpọt. Ke ini ete ye eka emi ẹkekụtde ke n̄kọrike aba, mmọ ẹma ẹdọhọ nyom n̄kpọ nnam mbak nditak ke ekikere. Mma ntọn̄ọ ndinyam mfri ke iso ufọk nnyịn, nnyụn̄ nsinịm itieurua mi asana. Emi ama anam ediwak owo ẹsibọ mi n̄kpọ ẹdep.

Edi, ndiyom n̄kpọ nnam ikọkọkke kpukpru mfịna mi. N̄kosụk nniọn̄ke n̄kan nte n̄kedide, ndien ama esisọn̄ mi ndinam n̄kpri n̄kpọ oro mme owo ẹsinamde. Ubọk mi ikọniọn̄ke isịm okpokoro oro nsidoride mfri nnyam. Eketie nte ẹkenam kpukpru n̄kpọ ẹnọ mbon oro ẹniọn̄de ẹkan mi. Esịt ikenemke mi nte n̄ketiede. Edi n̄kpọ ama okpụhọde ke ini n̄kedide isua 14.

Usen kiet, iban iba emi ẹdide Mme Ntiense Jehovah ẹma ẹdibọ mi mfri ẹdep. Ekem mmọ ẹma ẹtọn̄ọ ndikpep mi Bible. Ikebịghike, mma ndikụt ke ndifiọk Jehovah ye uduak esie enen̄ede edi akpan n̄kpọ akan ndikere mban̄a nte ami ntiede. Oro ama anam esịt ọtọn̄ọ ndisinem mi. Mma ndinen̄ede mma Psalm 73:28. Akpa udịmikọ ke itien̄wed oro ọdọhọ ete: “Ọfọn mi ndisan̄a n̄kpere Abasi.”

Ima ikpọn̄ Côte d’Ivoire ke unana idotenyịn ikodụn̄ ke Burkina Faso. N̄kpọ ama enen̄ede okpụhọde ke Burkina Faso. Ke ini ikodụn̄de ke Côte d’Ivoire, ediwak owo ẹma ẹdiọn̄ọ mi, ntre idem ikesikpaha mmọ ke ini ẹkụtde mi. Edi ke ini ikedide ididụn̄ mi obufa, ediwak owo ẹkesise mi ke n̄kpaidem. Emi ama anam nsịne ke ufọk ediwak urua. Ekem mma nti nte ekesinemde mi ndikpep Bible ye Mme Ntiense Jehovah. Ntre, mma n̄wet n̄kọk itieutom Mme Ntiense Jehovah do ke Burkina Faso ndọhọ ẹnọ owo edikpep mi Bible. Mmọ ẹma ẹnọ Sista Nani, emi ekedide isụn̄utom edi. Enye akawat ke masịn iban edi ufọk nnyịn.

Usụn̄ nnyịn ama esidọrọ etieti onyụn̄ etie okpụk okpụk ke ukwọ edịm. Sista Nani ama esiduọ ke masịn esie ediwak ini oro enye ekesidide edikpep mi n̄kpọ. Edi emi ikanamke idem emem enye. Enye ama ọdọhọ ntiene imọ n̄ka mbono esop. Mma ndiọn̄ọ ke mme owo ẹyese mi tutu akak mmọ. Mma nnyụn̄ ndiọn̄ọ ke nditie ke masịn esie n̄ka mbono esop ayanam enen̄ede ọsọn̄ enye ndiwat. Edi mma nti udiana udịmikọ ke itie N̄wed Abasi oro nsimade ndikot, emi ọdọhọde ete: “Ami mmada Jehovah, Akakan Ọbọn̄ Andikara, ke ebiet ubọhọ mi.” Ntre mma nnyịme nditiene enye n̄ka.

 Ndusụk ini ami ye Nani ima isiduọ inyịne ke okpụk, edi oro ikanamke nnyịn itre ndisidụk mbono esop. Nte nditọete ẹkesidarade mi ke Ufọkmbono Obio Ubọn̄ ama enen̄ede okpụhọde ye nte mbon ererimbot ẹkesisede mi. Mma nna baptism ke ufan̄ ọfiọn̄ usụkkiet.

Ọyọhọ udịmikọ ita ke itien̄wed Psalm oro nsimade ndikot ọdọhọ: “Man ntan̄a kpukpru utom fo.” Mma ndiọn̄ọ ke idimemke ye ami mma ntọn̄ọ ndika ukwọrọikọ. Ke nteti akpa ini emi n̄kakade ukwọrọikọ ke ufọk ke ufọk. Nditọwọn̄ ye ikpọ owo ẹma ẹse mi ke n̄kpaidem, ẹtiene mi, ẹnyụn̄ ẹdomo ndisan̄a nte nsisan̄ade. N̄kpọ oro ama anam mi nnen̄ede mfụhọ, edi mma mfiọk ke oyom n̄n̄wam mmọ ẹtiene mi ẹnyene idotenyịn ndidụk Paradise. Ntre, n̄kayakke nte mme owo ẹnamde n̄kpọ ye ami anam mi ntre ndikwọrọ ikọ.

Mma ndep enan̄-ukwak emi enyenede ikpat ita, emi ẹsiwatde ke ubọk, man n̄keme ndisiwat n̄ka ukwọrọikọ. Eyenete emi n̄kesisan̄ade kiet ke an̄wautom ama esinụk mi ke ini idọkde obot. Ekem ke ini iyomde ndisụhọde obot, enye ama esidọk odoro ke enan̄-ukwak oro, ndien enye emen nnyịn mbiba osụhọde. Ke nsonso oro, eketie nte eyenen̄ede ọsọn̄ mi ndikwọrọ ikọ, edi nte ini akakade, ukwọrọikọ ama enen̄ede enem mi tutu ntọn̄ọ ndisiak usụn̄ ke 1998.

Mma nsikpep Bible ye ediwak owo, ndien owo inan̄ ke otu oro ẹma ẹna baptism. Ke adianade do, udun̄wan eka mi ama edifiọk akpanikọ. Ke ini n̄kopde nte mbon en̄wen ẹsịnde idem ẹnam n̄kpọ Jehovah, oro esinọ mi odudu. Inikiet emi n̄kọdọn̄ọde utoenyịn, eyen ufọkn̄wed ntaifiọk kiet ke Côte d’Ivoire ama ọnọ leta ẹsọk mi. N̄kọtọn̄ọ ndikpep enye n̄kpọ mi ke Burkina Faso, edi mma ndọhọ eyenete eren kiet aka iso ekpep enye n̄kpọ. Ekem enye ama ọwọrọ okodụn̄ ke Côte d’Ivoire. Esịt ama enen̄ede enem mi ndikop ke enye akabade edi asuanetop oro mînaha baptism.

Nso ke nsida n̄n̄wam idem? N̄ka kiet emi ẹsin̄wamde mbon n̄kpọnnam ẹma ẹkpep mi ndikịm ọfọn̄. Andikpep kiet ama okụt nte nsisịnde idem nnam utom, onyụn̄ ọdọhọ ete: “Akpana ikpep fi ndinam suọp.” Mmọ ẹma ẹkpep mi. Mmesinam suọp uyetọfọn̄ ye suọp uyetusan. Mme owo ẹsima suọp mi, ẹsinyụn̄ ẹdọhọ mbon en̄wen ẹdidep. Mmesiwat masịn emi enyenede ukot ita nsan̄a nnyam suọp emi.

Ke 2004, ọkpọ asakedem ama abiak mi tutu n̄kekemeke ndisiak usụn̄ aba. Kpa ye oro, ke nsesịn idem n̄kwọrọ ikọ.

Mme owo ẹnen̄ede ẹdiọn̄ọ mi ke ntak oro nsimade ndisak imam. Ke akpanikọ, ndisan̄a n̄kpere Abasi ọfọn ye ami onyụn̄ anam esịt enen̄ede enem mi.—Nte Sarah Maiga obụkde.