Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) OCTOBER 2015

“Nam Mbuọtidem Nnyịn Etetịm Okpon”

“Nam Mbuọtidem Nnyịn Etetịm Okpon”

“N̄wam mi ke ebiet oro nnanade mbuọtidem!”—MARK 9:24.

IKWỌ: 81, 135

1. Ntak emi oyomde inyene mbuọtidem? (Se akpa ndise ibuotikọ emi.)

NDI akanam emekere m̀mê Jehovah ayanyan̄a fi ke ini enye edisobode idiọk ererimbot emi? Ediwak n̄kpọ ẹdu oro anade inam man Jehovah anyan̄a nnyịn, edi apostle Paul ama etịn̄ ata akpan n̄kpọ oro edinamde ẹnyan̄a nnyịn. Enye ọkọdọhọ ete: “Mbuọtidem mîdụhe owo ikemeke nditịm nnem [Abasi] esịt.” (Heb. 11:6) Ekeme nditie nte isọn̄ke owo ndibuọt idem ye Abasi, edi Bible ọdọhọ ke “idịghe kpukpru owo ẹnyene mbuọtidem.” (2 Thess. 3:2) Itien̄wed iba emi ẹnam nnyịn ifiọk ke enen̄ede oyom inyene mbuọtidem.

2, 3. (a) Nso ke Peter etịn̄ emi owụtde ke enen̄ede oyom inyene mbuọtidem? (b) Mme mbụme ewe ke idineme?

2 Apostle Peter ama owụt ke enen̄ede oyom inyene mbuọtidem. Enye ọkọdọhọ ke ‘mbuọtidem oro ẹma ẹkedomo ẹse edidi n̄kpọ itoro ye ubọn̄ ye ukpono ke ini ẹdiyararede Jesus Christ.’ (Kot 1 Peter 1:7.) Sia akwa ukụt enen̄erede ekpere, oyom nnyịn inyene orụk mbuọtidem emi edinamde Edidem nnyịn otoro nnyịn ke ini ẹdiyararede enye. Ana idi “orụk mbon oro ẹnyenede mbuọtidem tutu ẹsịm edinyan̄a ukpọn̄.” (Heb. 10:39) Man ikeme ndinyene orụk mbuọtidem emi, oyom nnyịn owo kiet kiet iben̄e Abasi ite: “N̄wam mi ke ebiet oro nnanade mbuọtidem!” (Mark 9:24) Mîdịghe imekeme ndiben̄e Abasi  ukem se mme apostle Jesus ẹkeben̄ede enye ẹte: “Nam mbuọtidem nnyịn etetịm okpon.”—Luke 17:5.

3 Imekeme ndibụp idem nnyịn ite: Nso ke ikpanam man mbuọtidem nnyịn ọsọn̄? Didie ke ikeme ndiwụt ke imenyene mbuọtidem? Nso inam inịm ke Abasi ayanam inyene ọkpọsọn̄ mbuọtidem ke ini iben̄ede enye?

NDINAM MBUỌTIDEM NNYỊN ỌSỌN̄

4. Uwụtn̄kpọ mmanie ekeme ndin̄wam nnyịn inam mbuọtidem nnyịn ọsọn̄?

4 “Kpukpru n̄kpọ oro ẹkewetde ke ini edem, ẹkewet mmọ ndida nteme nnyịn.” Ntre, nnyịn imekeme ndikpep ekese n̄kpọ nto mbon oro Bible ọdọhọde ke ẹma ẹnyene mbuọtidem. (Rome 15:4) Ke ini ikotde iban̄a Abraham, Sarah, Isaac, Jacob, Moses, Rahab, Gideon, Barak, ye ediwak mbon eken, mbụk mmọ ekeme ndinam nnyịn itie ikere m̀mê imenyene mbuọtidem nte mmọ. (Heb. 11:32-35) N̄ko, ke ini ikotde iban̄a nditọete eyo nnyịn emi ẹnyenede ọkpọsọn̄ mbuọtidem, emi ekeme ndinam nnyịn isịn idem inam mbuọtidem nnyịn ọsọn̄. *

5. Didie ke Elijah okowụt ke imenen̄ede ibuọt idem ye Jehovah, ndien nso ke uwụtn̄kpọ esie anam nnyịn ikere?

5 Yak ineme iban̄a uwụtn̄kpọ prọfet Elijah. Bible etịn̄ nte Elijah okowụtde ke imọ imenen̄ede ibuọt idem ye Jehovah. Ke ini Elijah ọkọdọhọde Edidem Ahab ke Jehovah ayanam edịm okûdep, enye ama etịn̄ uko uko ete: “Ma uwem Jehovah Abasi . . . mbara m̀mê edịm ididepke . . . ibọhọke ami ndọhọ edep!” (1 Ndi. 17:1) Elijah ama enịm ke Jehovah ọyọnọ imọ ye mme asan̄autom Abasi eken, se idiyomde ke ofụri ini oro edịm mîdidepke do. (1 Ndi. 17:4, 5, 13, 14) Enye ama enịm ke Jehovah ayanam eyen ubuene ebeakpa kiet eset. (1 Ndi. 17:21) Enye ama onyụn̄ enịm ke Jehovah ayanam ikan̄ oto heaven edita uwa imọ ke Obot Carmel. (1 Ndi. 18:24, 37) Ke ama ekekem ini Jehovah ndinam edịm edep, idem ke ini Elijah mîkekwe idiọn̄ọ ke edịm ọmọn̄ edep, enye ama ọdọhọ Ahab ete: “Dọk ka, kadia udia nyụn̄ n̄wọn̄ n̄kpọ; koro edịm ke oyomo ke enyọn̄.” (1 Ndi. 18:41) Ndi uwụtn̄kpọ Elijah inamke nnyịn ikere m̀mê mbuọtidem nnyịn ọsọn̄ ntre?

NSO KE IKPANAM MAN MBUỌTIDEM NNYỊN ỌSỌN̄?

6. Nso ke ikpeben̄e Jehovah ọnọ nnyịn man inam mbuọtidem nnyịn ọsọn̄?

6 Nnyịn ikemeke ndinam mbuọtidem nnyịn ọsọn̄ ke odudu idem nnyịn. Mbuọtidem edi ikpehe mbun̄wụm edisana spirit Abasi. (Gal. 5:22) Ntre, oyom nnyịn ibọn̄ akam iben̄e Abasi aka iso ọnọ nnyịn spirit esie kpa nte Jesus eketemede. Jesus ọkọdọhọ ke Abasi iditreke ndinọ “mbon oro ẹben̄ede enye edisana spirit!”—Luke 11:13.

7. Nọ uwụtn̄kpọ emi ekemede ndin̄wam nnyịn inam mbuọtidem nnyịn etetịm ọsọn̄.

7 Ke ini inyenede mbuọtidem, ana ika iso inam enye ọsọn̄. Imekeme ndimen mbuọtidem nnyịn ndomo ye ikan̄. Ke ini idade ediwak ifia ibara ikan̄, enye esinen̄ede asak. Edi edieke ifia oro idọn̄de asakde okụre, ikan̄ oro ọyọtọn̄ọ ndinịme, ndien mbubek ikan̄ ye ntọn̄ kpọt ẹdisụhọ. Edi edieke ikade iso ndidọn̄ ifia ke ikan̄ oro, ikan̄ oro ayaka iso ndinen̄ede nsak. Kpasụk ntre ke edi ye mbuọtidem. Edieke ikotde Ikọ Abasi kpukpru usen, mbuọtidem nnyịn ayaka iso ndisọn̄. Ndika iso n̄kpep Bible ayanam inen̄ede ima Bible inyụn̄ ima Jehovah emi akanamde ẹwet Bible, emi oyonyụn̄ anam itetịm inyene mbuọtidem.

8. Nso ke ikpanam man mbuọtidem nnyịn ọsọn̄?

 8 Nso en̄wen ke ikpanam man ika iso inam mbuọtidem nnyịn ọsọn̄? Kûkere ke se ekekpepde mbemiso anade baptism ekem. (Heb. 6:1, 2) Tie kere mme prọfesi Bible oro ẹsude, sia emi ekeme ndinam fi etetịm enyene mbuọtidem. Emekeme ndida Ikọ Abasi ndụn̄ọde idem fo nse m̀mê emenyene orụk mbuọtidem oro Bible etịn̄de aban̄a.—Kot James 1:25; 2:24, 26.

9, 10. Didie ke n̄kpọ ita emi ẹkeme ndin̄wam nnyịn itetịm inyene mbuọtidem: (a) eti nsan̄a? (b) mbono esop? (c) ukwọrọikọ?

9 Apostle Paul ọkọdọhọ mme Christian ete: “Nnyịn ikpada mbuọtidem nnyịn, . . . isịn udọn̄ inọ kiet eken.” (Rome 1:12) Ke ini idude ye nditọete nnyịn, akpan akpan ye mbon oro ẹma ‘ẹkedomo mbuọtidem mmọ ẹse,’ oro ekeme ndinam mbuọtidem nnyịn ye eke mmọ ọsọn̄. (Jas. 1:3) Idiọk nsan̄a esinam mbuọtidem owo emem, edi eti nsan̄a esinam mbuọtidem owo etetịm ọsọn̄. (1 Cor. 15:33) Ntak edi oro Bible ọdọhọde “ikûsịn ndisop idem ọtọkiet,” edi ika iso “isịn udọn̄ inọ kiet eken.” (Kot Mme Hebrew 10:24, 25.) Se isikopde ke mme mbono esop esinyụn̄ anam mbuọtidem nnyịn etetịm ọsọn̄. Ntak edi oro Paul ọkọdọhọde ete: “Mbuọtidem oto ke n̄kpọ oro ẹkopde.” (Rome 10:17) Ndi nnyịn imesidomo ndidụk mbono esop kpukpru ini?

10 Ke ini ikwọrọde ikọ, nnyịn imesinam mbon oro ikwọrọde ikọ inọ ẹnyene mbuọtidem, inyụn̄ inam mbuọtidem nnyịn etetịm ọsọn̄. Nnyịn imekpep ndibuọt idem ye Jehovah nnyụn̄ n̄kwọrọ ikọ ye uko, ukem nte mme Christian eyo mme apostle ẹkesinamde.—Utom 4:17-20; 13:46.

11. Ntak emi Joshua ye Caleb ẹkenyenede ọkpọsọn̄ mbuọtidem, ndien nso idin̄wam nnyịn inyene utọ mbuọtidem oro?

11 Ke ini ikụtde nte Jehovah an̄wamde nnyịn ye nte enye ọbọrọde akam nnyịn, oro esinam itetịm inyene mbuọtidem. Se ikan̄wamde Joshua ye Caleb edi oro. Mmọ ẹma ẹwụt ke mmimọ imọbuọt idem ye Jehovah ke ini mmọ ẹkekade ẹkeyep Isọn̄ Un̄wọn̄ọ. Edi mbuọtidem mmọ ama etetịm ọsọn̄ ke ini mmọ ẹkekụtde nte Jehovah ẹkesin̄wamde mmọ. Ntak edi oro Joshua eketịn̄de uko uko ọnọ nditọ Israel ete: “Baba ikọ kiet ke otu kpukpru nti ikọ emi Jehovah Abasi mbufo eketịn̄de ọnọ mbufo ikpụhu.” Ekem enye ama ọdọhọ mmọ ete: “Ke emi, mbufo ẹbak Jehovah ẹnyụn̄ ẹnam n̄kpọ esie ke edinen ido ye ke akpanikọ. . . . Edi amaedi ami ye mbonufọk mi, nnyịn iyanam n̄kpọ Jehovah.” (Josh. 23:14; 24:14, 15) Ke ini nnyịn itabide ise nte Jehovah ọfọnde, nnyịn n̄ko iyọbuọt idem ye enye nte Joshua ọkọbuọtde.—Ps. 34:8.

DIDIE KE IKEME NDIWỤT KE IMENYENE ỌKPỌSỌN̄ MBUỌTIDEM?

12. James ọdọhọ ke nso idiwụt ke imenyene ọkpọsọn̄ mbuọtidem?

12 Didie ke ikeme ndiwụt ke imenyene ọkpọsọn̄ mbuọtidem? Se James eketịn̄de anam ifiọk ibọrọ mbụme oro. Enye ọkọdọhọ ete: “Nyada utom n̄wụt fi mbuọtidem mi.” (Jas. 2:18) Se nnyịn inamde ediwụt ke imenyene ọkpọsọn̄ mbuọtidem. Ẹyak ineme ndusụk n̄kpọ oro ikpanamde.

Mbon oro ẹsịnde idem ẹkwọrọ ikọ ẹwụt ke imenen̄ede inyene mbuọtidem (Se ikpehe 13)

13. Didie ke utom ukwọrọikọ ekeme ndin̄wam nnyịn ifiọk m̀mê imenen̄ede inyene mbuọtidem?

13 Nditiene n̄kwọrọ ikọ edi akpan n̄kpọ kiet oro ikemede ndinam man iwụt ke imenyene mbuọtidem. Ntak idọhọde ntre? Edieke inịmde ke utịt idiọk ererimbot emi enen̄ede ekpere nte Jehovah ọdọhọde, oro ayanam nnyịn isịn idem ikwọrọ ikọ inọ mme owo. (Hab. 2:3) Ndidụn̄ọde idem nnyịn nse m̀mê imesisịn ifịk ikwọrọ ikọ, ayan̄wam nnyịn ifiọk m̀mê imenen̄ede inyene mbuọtidem. Ndi imesinam se  ededi oro ikemede man inen̄ede isịn idem ikwọrọ ikọ? (2 Cor. 13:5) Ke akpanikọ, ndikwọrọ etop edinyan̄a nnọ mme owo edi akpan n̄kpọ kiet oro ikemede ndinam man iwụt ke imenyene mbuọtidem.—Kot Rome 10:10.

14, 15. (a) Didie ke nte idude uwem ke usen ke usen ekeme ndiwụt ke imenyene mbuọtidem? (b) Tịn̄ se ubon kiet ẹkenamde ndiwụt ke imenen̄ede inyene mbuọtidem.

14 Nnyịn ndisọn̄ọ nda nyọ mfịna uwem emi oyowụt ke imenyene mbuọtidem. Edide nnyịn idọdọn̄ọ, ikop mmemidem, ifofụhọ, idi ubuene, m̀mê isobo mfịna en̄wen ekededi, nnyịn imenịm ke Jehovah ye Eyen esie ẹyen̄wam nnyịn “ke nnennen ini oro nnyịn iyomde un̄wam.” (Heb. 4:16) Nnyịn ndibọn̄ akam mben̄e Jehovah ọnọ nnyịn se inanade nnyịn owụt ke imọbuọt idem ye enye. Jesus ama ọdọhọ ke imekeme ndibọn̄ akam mben̄e Jehovah ọnọ nnyịn ‘udia ke usen ke usen.’ (Luke 11:3) Mme mbụk oro ikotde ke Bible ẹnam inịm ke Jehovah ọyọnọ nnyịn se iyomde. Ke uwụtn̄kpọ, ke ini edịm mîkedepke ke ediwak isua ke Israel, Jehovah ama ọnọ Elijah udia ye mmọn̄. Jehovah ama ọdọn̄ “mme raven ẹsida uyo ye unam ẹsọk enye ke usenubọk ye mbubreyo, enye onyụn̄ ọn̄wọn̄ mmọn̄ itịghede oro.” (1 Ndi. 17:3-6) Nnyịn n̄ko imenịm ke Jehovah ekeme ndinọ nnyịn se iyomde.

Nnyịn ndisọn̄ọ nda nyọ mfịna uwem emi owụt ke imenyene mbuọtidem (Se ikpehe 14)

15 Nnyịn imonyụn̄ inịm ke ndinam se Bible ọdọhọde ekeme ndinam inyene se idiade. Eyenete an̄wan nnyịn emi ekerede Rebecca, onyụn̄ odụn̄de ke Asia ama okụt ke emi edi akpanikọ. Mmọ ẹma ẹbem iso ẹyom Obio Ubọn̄ ẹnyụn̄ ẹsịn idem ẹnam utom nte Matthew 6:33 ye Mme N̄ke 10:4 ẹdọhọde. Rebecca ọdọhọ ke ebe imọ ama ọkpọn̄ utom oro enye ekesinamde, sia utom oro ikesiyakke enye esịn idem anam n̄kpọ Abasi. Mmọ ẹma ẹnyene nditọ inan̄. Rebecca ọdọhọ ete: “Nnyịn ima itọn̄ọ ndisitem udia nnyam. Se idade in̄wam idem edi emi ke ediwak isua, imonyụn̄ ikụt ke Jehovah ikpọn̄ke nnyịn. Idụhe usen emi nnyịn mînyeneke se idiade.” Ndi nte afo anamde n̄kpọ owụt ke emenịm ke Bible ọnọ nnyịn ata eti ndausụn̄ mfịn?

16. Nso ke Abasi edinam ọnọ nnyịn edieke ibuọtde idem ye enye?

 16 Ẹyak nnyịn ikûdedei ikere ke ufọn idụhe ndinam se Abasi ọdọhọde nnyịn inam. Paul ama okot oto se Habakkuk ekewetde ete: “Edinen owo edidu uwem oto ke mbuọtidem.” (Gal. 3:11; Hab. 2:4) Ntre, ọfọn ibuọt idem ye Jehovah, koro enye ikpọn̄ ekeme ndin̄wam nnyịn. Paul ama ewet n̄ko ete ke Abasi “[ekeme] ndinam n̄kpọ etịm awak akan kpukpru se nnyịn iben̄ede m̀mê ikerede, nte odudu esie eke anamde utom ke idem nnyịn edide.” (Eph. 3:20) Ikọt Abasi ẹsisịn ofụri ukeme mmọ ẹnam uduak Abasi, edi mmọ ẹfiọk ke mmimọ ikemeke ndinam emi ke odudu idem mmimọ. Mmọ ẹnịm ke Abasi ọyọnọ mmimọ odudu ndika iso nnam uduak esie. Esịt enen̄ede enem nnyịn ndifiọk ke Abasi odu ye nnyịn.

ABASI ỌYỌBỌRỌ AKAM ORO IBỌN̄DE IBEN̄E MBUỌTIDEM

17. (a) Didie ke Jesus akanam se mme apostle esie ẹkeben̄ede enye? (b) Ntak emi ikpenịmde ke Abasi ọyọbọrọ akam oro ibọn̄de iben̄e enye anam itetịm inyene mbuọtidem?

17 Se isụk inemede emi ikụre ekeme ndinam nnyịn itịn̄ se mme apostle Jesus ẹketịn̄de ẹte: “Nam mbuọtidem nnyịn etetịm okpon.” (Luke 17:5) Ke Pentecost isua 33, Jesus ama anam se mme apostle esie ẹkeben̄ede enye. Ke usen Pentecost oro, ẹma ẹn̄wan̄a edisana spirit ẹduọk mmọ ẹnyụn̄ ẹnam uduak Abasi etetịm an̄wan̄a mmọ. N̄kpọ emi ama anam mbuọtidem mmọ etetịm ọsọn̄, onyụn̄ anam mmọ ẹsịn idem ẹkwọrọ ikọ akan nte akanam ẹkwọrọde ini oro. (Col. 1:23) Ndi Abasi ọyọbọrọ akam oro ibọn̄de iben̄e enye anam itetịm inyene mbuọtidem? Bible ndidọhọ ke Abasi ayanam “se ededi oro nnyịn iben̄ede nte ekemde ye uduak esie” owụt ke enye ọyọbọrọ.—1 John 5:14.

18. Didie ke Jehovah esidiọn̄ mbon oro ẹbuọtde idem ye enye?

18 Jehovah esima mbon oro ẹbuọtde idem ye enye. Enye ọyọbọrọ akam oro ibọn̄de iben̄e enye anam itetịm inyene mbuọtidem. Emi ayanam mbuọtidem nnyịn etetịm ọsọn̄, ndien ‘ẹyebat ẹte ke nnyịn imodot ndidụk obio ubọn̄ Abasi.’—2 Thess. 1:3, 5.

^ ikp. 4 Kot ban̄a nditọete eyo nnyịn oro ẹkenyenede ọkpọsọn̄ mbuọtidem: Charlotte Müller (Enyọn̄-Ukpeme, May 1, 1997, page 24-29), Enelesi Mzanga (Enyọn̄-Ukpeme, September 1, 2003, page 23-28), ye Leopold Engleitner (Enyọn̄-Ukpeme, May 1, 2005, page 23-28).