Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) OCTOBER 2015

Ndi Omokụt Ubọk Abasi ke Uwem Fo?

Ndi Omokụt Ubọk Abasi ke Uwem Fo?

‘Ẹyenam mme asan̄autom Jehovah ẹkụt ubọk esie.’ —ISA. 66:14.

IKWỌ: 65, 26

1, 2. Nso ke ndusụk owo ẹsikere ẹban̄a Abasi?

EDIWAK owo ẹkere ke Abasi idọn̄ke enyịn ke se mmimọ inamde. Ndusụk owo ẹkam ẹkere ke se itịbede inọ mme owo ibeheke Abasi. Ke November 2013, ata idiọk oyobio emi ẹkotde Typhoon Haiyan ama abiat n̄kpọ etieti ke Philippines, ndien ọbọn̄ obio kiet do ama ọdọhọ ete: “Anaedi enyene ebiet emi Abasi akakade.”

2 Ndusụk owo ẹsinam n̄kpọ nte ẹdọhọ ke Abasi ikwe se mmimọ inamde. (Isa. 26:10, 11; 3 John 11) Mmọ ẹtie nte mbon emi apostle Paul ọkọdọhọde ke ‘mmọ inyịmeke ndinyene nnennen ifiọk Abasi.’ Utọ mbon oro ‘ẹkeyọhọ ye kpukpru ukwan̄ido, idiọkido, edisịn esịt ke n̄kpọ owo, ye idiọkn̄kpọ.’—Rome 1:28, 29.

3. (a) Nso ke ikpobụp idem nnyịn? (b) Nso ke “ubọk” Jehovah esiwak ndida mban̄a ke Bible?

3 Nso kaban̄a nnyịn? Nnyịn itiehe nte mbon oro isụk itịn̄de ikụre do; imọfiọk ke Jehovah esikụt kpukpru se inamde. Edi, ndi nnyịn imenịm ke enye esikere aban̄a nnyịn onyụn̄ an̄wam nnyịn? Ndi nnyịn imesịne ke otu mbon oro Jesus ọkọdọhọde ke “ẹyekụt Abasi”? (Matt. 5:8) Man ifiọk se ikọ Jesus emi ọwọrọde,  ẹyak ibem iso ineme iban̄a mbon oro ẹkekụtde ubọk Abasi ye mbon oro mîkamaha ndikụt. Ekem iyeneme nte mbuọtidem ekemede ndin̄wam nnyịn ikụt ubọk Jehovah ke uwem nnyịn. Nte inemede n̄kpọ emi, ti ete ke ediwak ini oro Bible etịn̄de aban̄a “ubọk” Jehovah, emi esida aban̄a odudu esie oro enye esidade an̄wam ikọt esie onyụn̄ adade akan mme asua esie.—Kot Deuteronomy 26:8.

MMO IKAMAHA NDIKUT UBOK ABASI

4 Ke eset, mme owo ema ekut enyun ekop nte Abasi akanwanade ono ndito Israel. Ke uwutnkpo, Jehovah ama anyana ikot esie osio ke Egypt, onyun anam mmo enwana ekan ediwak ndidem. (Josh. 9:3, 9, 10) Kpa ye oro ediwak ndidem emi ekedude ke edem Jordan, ekekopde enyun ekutde se Jehovah akanamde ono ndito Israel, “mmo [ema] esop idem otokiet ye esit kiet ndinwana ekon ye Joshua ye Israel.” (Josh. 9:1, 2) Idem ke ini ndidem oro eketonode ndinwana ekon ye Israel, akpakana mmo ekut ke Jehovah ke anwana ono Israel. Jehovah ama anam “utin ebet, ofion onyun atuak ada, tutu idut oro osio mme asua esie usiene.” (Josh. 10:13) Edi Jehovah ama anam “esit [ndidem oro] oson man mmo enwana ekon ye Israel.” (Josh. 11:20) Mme asua Israel ikamaha ndikut ke Abasi akanwana ono Israel, ndien oro akanam ndito Israel ekan mmo.

5 Nkpo ama etibe oro akpakanamde idiok Edidem Ahab nko okut ubok Jehovah. Elijah okodoho enye ete: “Mbara ˋmmê edim ididepke . . . ibohoke ami ndoho edep!” (1 Ndi. 17:1) Jehovah eketin iko emi, edi Ahab ikamaha ndinim. Nte ini akakade, Ahab ama okut nte Jehovah okoborode akam Elijah, ke ndinam ikan oto heaven edita uwa Elijah. Ekem, Elijah ama etin ke Jehovah omon anam edim edep, onyun odoho Ahab ete: “Suhode nyon mbak okposon edim edikuk fi esin!” (1 Ndi. 18:22-45) Ahab ama okut kpukpru nkpo emi, edi enye ikosuk imaha ndinim ke Jehovah akada akwa odudu esie anam mme nkpo emi. Mme uwutnkpo oro inemede mi ekpep nnyin akpan nkpo, oro edi, ke ana nnyin idomo ndikut ubok Jehovah ke uwem nnyin.

MMỌ ẸMA ẸKỤT UBỌK JEHOVAH

6, 7. Ke eyo Joshua, didie ke mbon Gibeon ye Rahab ẹkewụt ke imokụt ubọk Jehovah?

6 Mbon en̄wen ẹma ẹkụt ubọk Jehovah. Mmọ iketiehe nte ndiọi ndidem oro isụk itịn̄de iban̄a do. Ke uwụtn̄kpọ, ke eyo Joshua, ediwak idụt ẹma ẹn̄wana ekọn̄ ye Israel. Edi mbon Gibeon iketiehe ntre, mmọ ẹma ẹnam emem ye nditọ Israel. Ntak-a? Mmọ ẹkedọhọ ẹte: “Mme asan̄autom fo ẹto ata anyan idụt ẹdi ke ntak enyịn̄ Jehovah Abasi mbufo, koro nnyịn imokop etop esie ye kpukpru se enye akanamde.” (Josh. 9:3, 9, 10) Mmọ ẹma ẹdiọn̄ọ ke ata Abasi akan̄wana ọnọ nditọ Israel.

7 Rahab n̄ko ama okụt ubọk Jehovah ke eyo esie. Ke ini enye okokopde nte Jehovah akanyan̄ade Israel, enye ama ọdọhọ nditọ Israel iba oro ẹkekade ẹkeyep obio mmọ ete: “Mmọfiọk nte ke Jehovah iditreke ndinọ mbufo isọn̄ emi.” Okposụkedi emi enye ọkọfiọkde ke se imọ itịn̄de emi ekeme ndisịn imọ ke afanikọn̄, enye ama enịm ke Jehovah ekeme ndinyan̄a imọ ye mbonufọk mmimọ.—Josh. 2:9-13; 4:23, 24.

8. Nso ke ndusụk nditọ Israel ẹkenam ndiwụt ke imokụt odudu Abasi?

8 Ndusụk nditọ Israel ikebietke idiọk  Edidem Ahab. Ke ini mmọ ẹkekụtde nte ikan̄ otode heaven edita uwa Elijah, mmọ ẹma ẹfiọk ke ikan̄ oro okoto Jehovah. Ntak edi oro mmọ ẹkedọhọde ẹte: “Jehovah edi ata Abasi!” (1 Ndi. 18:39) Mmọ ẹma ẹfiọk ke Jehovah kpọt ekenyene odudu ndinam utọ n̄kpọ oro!

9. Nso ikeme ndin̄wam nnyịn ikụt Jehovah m̀mê ndikụt ubọk esie mfịn?

9 Nti ye ndiọi uwụtn̄kpọ oro isụk inemede ikụre do ẹn̄wam nnyịn ifiọk se ọwọrọde ndikụt Abasi m̀mê ndikụt ubọk esie. Ke ini nnyịn itịmde ifiọk Jehovah, mme edu esie, ye nte enye esinamde n̄kpọ, emi ayanam ‘enyịn esịt nnyịn an̄wan̄a,’ oro edi, ayan̄wam nnyịn ikụt ubọk m̀mê odudu Abasi. (Eph. 1:18) Oyom nnyịn ikpebe ikọt Abasi eke eset ye ikọt Abasi mfịn, oro ẹkụtde nte Jehovah an̄wamde mme asan̄autom esie. Edi, nso inam inen̄erede inịm ke Abasi ekere aban̄a mme owo mfịn?

NTE IKEMEDE NDIKỤT UBỌK ABASI MFỊN

10. Nso inam inịm ke Jehovah ke an̄wam mme owo mfịn? (Se akpa ndise ibuotikọ emi.)

10 Enyene ediwak n̄kpọ oro anamde inịm ke Jehovah aka iso ndin̄wam ikọt esie mfịn. Ediwak ini, nnyịn imesikop ke mme owo ẹsibọn̄ akam ẹben̄e Abasi an̄wam mmimọ idiọn̄ọ enye, ndien enye esibọrọ akam mmọ. (Ps. 53:2) Ke uwụtn̄kpọ, ke ini Allan ọkọkwọrọde ikọ ke ufọk ke ufọk ke ekpri isuo kiet ke Philippines, enye ama okosobo mma kiet. Ke ini mma oro okokụtde Allan, enye ama ọtọn̄ọ nditua. Allan ọdọhọ ete: “Mma oro ama ọbọn̄ akam usenubọk oro eben̄e Jehovah ete ọnọ Mme Ntiense esie ẹdiyom imọ. Ke ini enye ekedide n̄kaiferi, enye ama esikpep Bible ye Mme Ntiense. Edi ke ini enye ọkọdọde ebe, enye ama ọkpọn̄ do edidụn̄ ke isuo emi. Nte Abasi ọkọsọpde-sọp ọbọrọ akam esie akanam enye atua.” Ke ufan̄ isua kiet, enye ama ana baptism.

Ndi omokụt se inamde inịm ke Jehovah ke an̄wam ikọt esie mfịn? (Se ikpehe 11-13)

11, 12. (a) Didie ke Jehovah an̄wam ikọt esie mfịn? (b) Tịn̄ nte Jehovah akan̄wamde Amy.

11 Ediwak ikọt Abasi mfịn ẹkụt ke Jehovah akan̄wam mmimọ itre ndusụk ndiọi n̄kpọ oro ẹkemehede mmimọ, utọ nte edin̄wọn̄ sika, edida n̄kpọsọn̄ ibọk, m̀mê edise ndise idan̄. Ndusụk mmọ ẹdọhọ ke mmimọ ima isidomo nditre mme n̄kpọ emi ke idem mmimọ, edi ikekemeke. Edi ke ini mmọ ẹkedọhọde Jehovah an̄wam mmimọ, enye ama ọnọ mmọ “odudu eke ebede ukeme owo,” ndien emi ama anam mmọ ẹtre ndiọi mbumehe emi.—2 Cor. 4:7; Ps. 37:23, 24.

12 Jehovah an̄wam ediwak ikọt esie ẹkan mme n̄kpọ emi ẹkpenamde idem emem owo. Enye ama an̄wam eyenete an̄wan emi ekerede Amy. Ẹma ẹdọhọ Amy eketiene ọbọp Ufọkmbono Obio Ubọn̄ ye ufọkidụn̄ isụn̄utom ke ekpri isuo kiet ke Pacific. Amy ọdọhọ ete: “Nnyịn ikodụn̄ ke ekpri ufọkisen. Kpukpru usen, ima isisan̄a ke mme efak emi mmọn̄ okokponde ekpere ndisịm owo edọn̄ ibe ika utom.” Akana enye odomo n̄ko ndimehe ye ido mbon isuo oro; ikan̄ ilektrik ye mmọn̄ ikesidụhe kpukpru ini. Edi se ikakam idiọkde ikan oro ama etịbe usen kiet. Enye ọdọhọ ete: “Mma ntịn̄ ikọ nyat esịt ye eyenete an̄wan kiet emi akanamde utom ye nnyịn. Esịt ama enen̄ede afịna mi ke se n̄kanamde oro. Ke ini n̄kọnyọn̄de nsịm ufọk, mma nna ke n̄kịmn̄kịm ubet mi ntua n̄kpe Jehovah ubọk nte an̄wam mi.” Ke ini ẹkefiakde ẹnọ ikan̄, Amy ama emen Enyọn̄-Ukpeme okot ibuotikọ oro akaban̄ade edinam ukụre ukpep Ufọkn̄wed Gilead. Ibuotikọ oro ama eneme mme n̄kpọ oro ẹkefịnade enye, utọ nte, ndimehe ye ido obufa obio, ufọk ndidọn̄ owo itọn̄, ye ndimehe ye isenowo. Amy ọdọhọ ete: “Eketie nte Jehovah etịn̄ ikọ ye ami okoneyo oro. Se n̄kokotde oro ama ọnọ mi odudu ndika  iso nnam utom mi.”—Ps. 44:25, 26; Isa. 41:10, 13.

13. Nso iwụt ke Jehovah an̄wam ikọt esie ‘ẹda ibet ẹnam eti mbụk ọsọn̄ọ ada’?

13 Nnyịn ndikeme ‘ndida ibet nnam eti mbụk ọsọn̄ọ ada,’ edi n̄kpọ en̄wen oro owụtde ke Jehovah ada ọkpọsọn̄ ubọk esie an̄wam nnyịn. (Phil. 1:7) Ndusụk ukara ẹsidomo nditre utom nnyịn ofụri ofụri, edi nnyịn imesika esopikpe ikọbọ unen ndika iso n̄kwọrọ ikọ. Nnyịn imakan ke n̄kpọ nte ikpe 268 ke nsio nsio akwa esopikpe ke ofụri ererimbot, ndien emi esịne ikpe 24 oro ikakande ke Esopikpe Europe Oro Ẹsede Ẹban̄a Unen Owo toto ke isua 2000. Emi owụt ke idụhe owo ndomokiet emi ekemede ndimụm Abasi ubọk okûnam uduak esie.—Isa. 54:17; kot Isaiah 59:1.

14. Nso ye nso en̄wen ẹnam inịm ke Abasi odu ye nnyịn?

14 Nnyịn ndikeme ndikwọrọ ikọ ke ofụri ererimbot owụt n̄ko ke Abasi an̄bwam nnyịn. (Matt. 24:14; Utom 1:8) Nnyịn ndikeme ndidiana kiet nte nditọete ke ererimbot emi mme owo ẹsuade kiet eken mi, owụt n̄ko ke Abasi odu ye nnyịn. Idem esikpa mbon ererimbot ndikụt nte nnyịn idianade kiet ntem, tutu mmọ ẹdọhọ ẹte: “Ke akpanikọ Abasi odu ke otu mbufo.” (1 Cor. 14:25) Nnyịn imokụt ediwak n̄kpọ oro ẹwụtde ke Abasi odu ye nnyịn. (Kot Isaiah 66:14.) Edi, ndi afo emenịm ke Abasi odu ye afo? Ndi emenen̄ede okụt ubọk Abasi ke uwem fo?

NDI OMOKỤT UBỌK JEHOVAH KE UWEM FO?

15. Nso isinam ọsọn̄ nnyịn ndusụk ini ndikụt ubọk Abasi ke uwem nnyịn?

15 Nso isinam ọsọn̄ nnyịn ndusụk ini ndikụt ubọk Abasi ke uwem nnyịn? Mfịna uwem ekeme ndimen nnyịn mmen. Ke ini emi etịbede, nnyịn imekeme ndifre nte Jehovah esin̄wamde nnyịn. Ke ini Jezebel, idiọk ọbọn̄ an̄wan, ekedịghede prọfet Elijah uwem, Elijah iketịghi aba nte Jehovah ekesin̄wamde enye. Bible ọdọhọ ke n̄kpọ emi ama anam Elijah ‘eben̄e Jehovah ete anam imọ ikpa.’ (1 Ndi. 19:1-4) Nso  ikpakan̄wam enye akan mfịna emi? Akpakana enye eben̄e Jehovah an̄wam imọ utu ke ndidọhọ Jehovah anam imọ ikpa.—1 Ndi. 19:14-18.

16. Nso ke ikeme ndinam man ikụt Abasi nte Job okokụtde?

16 Job ama ayak mfịna esie emen enye emen tutu enye ikekemeke ndise n̄kpọ nte Jehovah esede. (Job 42:3-6) Ukem nte Job, oyom nnyịn inen̄ede itịn̄ enyịn man ikụt ubọk Abasi ke uwem nnyịn. Didie ke ikeme ndinam emi? Ke ini ikotde Bible inyụn̄ itiede ikere se ikotde, iyọfiọk ntak emi ibọde ufen, iyonyụn̄ ikụt nte Jehovah an̄wamde nnyịn. Ndien emi ayanam inen̄erede ikpere enye. Nnyịn iyekeme nditịn̄ se Job eketịn̄de ete: “N̄kokokop mban̄a fi, edi, ke emi, enyịn mi okụt fi.”

Ndi Jehovah esida fi an̄wam mbon en̄wen? (Se ikpehe 17, 18)

17, 18. (a) Nso idinam nnyịn ifiọk ke Jehovah an̄wam nnyịn? (b) Nọ uwụtn̄kpọ oro owụtde nte Jehovah an̄wamde nnyịn mfịn.

17 Nso idin̄wam nnyịn ikụt ubọk Jehovah ke uwem nnyịn? Kere ban̄a uwụtn̄kpọ ifan̄ emi: Anaedi nte okokụtde akpanikọ anam enịm ke Jehovah akanam fi edifiọk akpanikọ. Ndi akanam omokop n̄kpọ ke mbono esop emi etiede nte ke ẹtịn̄ ẹnọ fi tutu afo ọdọhọ, “se n̄koyomde edi emi”? Ekeme ndidi emeti nte Abasi ọkọbọrọde akam fo. Anaedi emeti nte Jehovah akan̄wamde fi ke ini ekebierede ndisịn idem n̄kwọrọ ikọ n̄kan nte ekesikwọrọde. Mîdịghe, ndi emeti nte ọkọkpọn̄de utom oro mîkesiyakke enyene ini anam n̄kpọ Abasi, ndien okụt nte Abasi osude un̄wọn̄ọ esie emi: “Ndidehedei n̄kpọn̄ fi”? (Heb. 13:5) Edieke itịn̄de enyịn, nnyịn iyokụt nsio nsio usụn̄ emi Jehovah an̄wamde nnyịn.

18 Sarah emi otode Kenya ọdọhọ ete: “Mma mbọn̄ akam nnọ Jehovah mban̄a eyen ukpepn̄kpọ Bible mi oro mîkesimaha ndikpep n̄kpọ. Mma mbụp Jehovah m̀mê ntre ndikpep enye n̄kpọ. Owo ama okot mi ke fon ke ndondo oro n̄kọbọn̄de akam n̄kụre. Eyen ukpepn̄kpọ mi oro ke ekedi! Enye ama obụp m̀mê imekeme nditiene ndi mbono esop. Idem ama akpa mi.” Edieke afo enen̄erede etịn̄ enyịn, afo n̄ko oyokụt nte Abasi an̄wamde fi. Rhonna emi odụn̄de ke Asia ọdọhọ ete: “Oyom inen̄ede itịn̄ enyịn man ifiọk nte Jehovah adade nnyịn usụn̄. Ke ini ifiọkde emi, oro ayanam inịm ke enye enen̄ede ekere aban̄a nnyịn.”

19. Nso efen ke oyom inam man ikeme nditiene n̄kụt Abasi?

19 Jesus ọkọdọhọ ete: “Mmọ oro esịt asanade ẹkop inemesịt, koro mmọ ẹyekụt Abasi.” (Matt. 5:8) Nso ke ikpanam man ‘esịt nnyịn asana’? Ana nnyịn isikere nti n̄kpọ inyụn̄ itre ndinam se idiọkde. (Kot 2 Corinth 4:2.) Edieke nnyịn inen̄erede ima Abasi inyụn̄ inamde se inende, nnyịn iyekeme nditiene n̄kụt Abasi. Ke ibuotikọ oro etienede, iyeneme nte mbuọtidem ekemede ndin̄wam nnyịn inen̄ede ikụt ubọk Abasi ke uwem nnyịn.