Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  September 2015

Se Jehovah Anamde Ndiwụt ke Imama Nnyịn

Se Jehovah Anamde Ndiwụt ke Imama Nnyịn

“Ẹse orụk ima emi Ete amade nnyịn.”—1 JOHN 3:1.

IKWỌ: 91, 13

1. Apostle John ọkọdọhọ nnyịn itie ikere nso, ndien ntak-a?

ỌFỌN inen̄ede itie ikere ikọ oro apostle John eketịn̄de ke 1 John 3:1. Enye ọkọdọhọ ete: “Ẹse orụk ima emi Ete amade nnyịn.” Apostle John eketịn̄ ikọ emi man anam mme Christian ẹtie ẹkere adan̄a nte Abasi amade mmọ. Nditie n̄kere se ikọ apostle John oro ọwọrọde ayanam nnyịn inen̄ede ima Jehovah inyụn̄ ika iso idi ufan esie.

2. Ntak emi ọsọn̄de ndusụk owo ndifiọk ke Abasi ama mmimọ?

2 Edi, enen̄ede ọsọn̄ ndusụk owo ndinịm ke Abasi ekeme ndima owo. Mmọ ẹkere ke ẹkpebabak Abasi ẹnyụn̄ ẹkpono enye. Nsunsu ukpepn̄kpọ oro ẹkpepde ndusụk owo ẹban̄a Abasi ke ediwak isua anam mmọ ẹkere ke Abasi imaha nnyịn, ke owo inyụn̄ ikemeke ndima enye. Edi mbon en̄wen ẹkere ke Abasi edi Abasi ima, ndien ke enye ama mme owo inamke n̄kpọ m̀mê mmọ ẹnam eti m̀mê idiọk. Ndikpep Bible anam ọfiọk ke ima edi ata akpan edu Jehovah, ke ima okonyụn̄ anam enye ọnọ Eyen esie edikpa ke ibuot nnyịn. (John 3:16; 1 John 4:8) Kpa ye oro, nte ẹkebọkde fi ye ebiet emi ẹkebọkde fi ẹkeme ndinam afo enịm ke Abasi ama fi, onyụn̄ ekeme ndinam ekere ke enye imaha fi.

3. Nso in̄wam nnyịn ifiọk nte Jehovah amade nnyịn?

3 Didie ke Jehovah ama nnyịn? Ndifiọk nte Jehovah  Abasi adade nnyịn ayanam nnyịn ikeme ndibọrọ mbụme emi. Jehovah okobot kpukpru owo. (Kot Psalm 100:3-5.) Ntak edi oro Bible okotde Adam “eyen Abasi,” Jesus okonyụn̄ ekpepde mme mbet esie ete ẹkot Abasi “Ete nnyịn emi odude ke heaven.” (Luke 3:38; Matt. 6:9) Sia Jehovah ọnọde nnyịn uwem, enye edi Ete nnyịn, nnyịn inyụn̄ idi nditọ esie. Jehovah ama nnyịn ukem nte edima ete esimade nditọ esie.

4. (a) Didie ke Jehovah okpụhọde ye mme ete nnyịn? (b) Nso ke idineme ke ibuotikọ emi ye ke ibuotikọ oro etienede?

4 Edi, mme ete nnyịn ifọnke ima. Ọkpọkọm mmọ ẹtịme didie, mmọ idikemeke ndima nnyịn nte Ete nnyịn eke heaven, Jehovah, amade nnyịn. Ndusụk owo isikopke inemesịt ke ini mmọ ẹtide idiọk usụn̄ oro ete mmọ akakamade mmọ ke ini mmọ ẹkedide n̄kpri. Utọ n̄kpọ emi esinam owo atua onyụn̄ ofụhọ. Edi, Jehovah Abasi nnyịn idịghe utọ ete oro. (Ps. 27:10) Ndifiọk nte Jehovah amade onyụn̄ ekerede aban̄a nnyịn ayanam nnyịn inen̄ede isan̄a ikpere enye. (Jas. 4:8) Ke ibuotikọ emi, iyeneme n̄kpọ inan̄ oro Jehovah anamde ndiwụt ke imama nnyịn. Ndien ke ibuotikọ oro etienede, iyeneme n̄kpọ inan̄ oro nnyịn ikemede ndinam ndiwụt ke imama Jehovah.

JEHOVAH ỌNỌ NNYỊN SE IYOMDE

5. Nso ke apostle Paul akanam mbon Athens ẹfiọk ẹban̄a Abasi?

5 Ke ini apostle Paul okodude ke obio Athens ke Greece, enye ama okụt ke ndem ye mme abasi oro mbon Athens ẹkenịmde ke mmọ ẹnọ mmimọ uwem ye se idade idu uwem, ẹma ẹyọhọ obio oro. N̄kpọ emi ama anam Paul ọdọhọ mmọ ete: “Abasi emi akanamde ererimbot ye kpukpru n̄kpọ emi ẹdude ke esịt, . . . ọnọ kpukpru owo uwem ye ibifịk ye kpukpru n̄kpọ. . . . Koro ebe ke enye ke nnyịn inyene uwem inyụn̄ isan̄a inyụn̄ idu uwem.” (Utom 17:24, 25, 28) Jehovah ọnọ nnyịn “kpukpru n̄kpọ” oro iyomde man ika iso idu uwem, sia enye amade nnyịn. Nso ke emi ọwọrọ?

6. Didie ke nte Jehovah Abasi obotde isọn̄ owụt ke enye ama nnyịn? (Se akpa ndise ibuotikọ emi.)

6 Kere ban̄a isọn̄ nnyịn emi Jehovah akanamde ‘ọnọ nditọ owo.’ (Ps. 115:15, 16) Ntaifiọk ẹbiat ediwak okụk ẹka ọfiọn̄ ẹnyụn̄ ẹyom mme ekondo en̄wen oro ẹtiede nte isọn̄ nnyịn. Okposụkedi emi ntaifiọk ẹkụtde ata ediwak ekondo en̄wen, mmọ ikwe ndomokiet emi mme owo ẹkemede ndidụn̄ nte ẹdụn̄de ke isọn̄. Isọn̄ kpọt ke mme owo ẹkeme ndidụn̄ ke otu kpukpru ekondo oro Jehovah Abasi obotde. Kam kere ise, ke otu anana-ibat ekondo oro ẹdude, Jehovah anam isọn̄ nnyịn eye, onyụn̄ edi se mme owo ẹkemede ndidụn̄ nnyụn̄ n̄kop idem inem. (Isa. 45:18) Emi owụt adan̄a nte Jehovah amade nnyịn.—Kot Job 38:4, 7; Psalm 8:3-5.

7. Ntak emi idọhọde ke nte Abasi obotde nnyịn owụt ke enye enen̄ede ama nnyịn?

7 Kpa ye oro Jehovah okobotde ediye isọn̄ emi ọnọ nnyịn idụn̄, enye ọfiọk ke ndinọ nnyịn se idade idu uwem kpọt idinamke nnyịn inen̄erede ikop inemesịt. Eyen esinen̄ede okop inemesịt ke ini enye ọfiọkde ke ete imọ ama onyụn̄ ekere aban̄a imọ. Jehovah okobot mme owo ke mbiet esie, onyụn̄ anam mmọ ẹkeme ndifiọk ke imọ imama inyụn̄ ikere iban̄a mmọ. Enye ama onyụn̄ anam mme owo ẹkeme ndima imọ. (Gen. 1:27) Jesus ama ọdọhọ ete: “Mmọ oro ẹkerede ẹban̄a unana mmọ ke n̄kan̄ eke spirit ẹkop inemesịt.” (Matt. 5:3) Sia Jehovah amade nnyịn, enye ọnọ “nnyịn kpukpru n̄kpọ uwak uwak ete ida ikop inemesịt,”  esịnede se idade idu uwem ye se idin̄wamde nnyịn inam n̄kpọ esie.—1 Tim. 6:17; Ps. 145:16.

JEHOVAH EKPEP NNYỊN AKPANIKỌ

8. Ntak emi ikpenịmde ke “Abasi akpanikọ” ama nnyịn?

8 Ete oro amade nditọ esie esikpeme mmọ, mbak owo idibian̄a mmọ m̀mê nditụn mmọ usụn̄. Edi, ediwak ete ye eka ikemeke ndinọ nditọ mmọ eti ndausụn̄, sia mmọ ke idemmọ imaha ndinam se Ikọ Abasi etịn̄de. Ntak edi oro ndutịme ye afanikọn̄ ẹsiwakde ndidu ke ubon. (N̄ke 14:12) Edi, Jehovah edi “Abasi akpanikọ.” (Ps. 31:5) Enye ama nditọ esie onyụn̄ oyom akpanikọ esie emi etiede nte un̄wana ayama ọnọ mmọ, man ada mmọ usụn̄ ke kpukpru se mmọ ẹnamde, akpan akpan man an̄wam mmọ ẹfiọk nte ẹkpetuakde ibuot ẹnọ enye. (Kot Psalm 43:3.) Ewe akpanikọ ke Jehovah anam nnyịn ifiọk, ndien didie ke emi owụt ke enye ama nnyịn?

Mme ete ẹkpenyene ndikpebe Jehovah ke ndikpep nditọ mmọ akpanikọ nnyụn̄ n̄n̄wam mmọ ẹdi ufan Jehovah (Se ikpehe 8-10)

9, 10. (a) Ntak emi Jehovah anamde nnyịn ifiọk n̄kpọ iban̄a imọ? (b) Nso ke enye ekpep nnyịn aban̄a uduak esie?

9 Akpa, Jehovah anam nnyịn ifiọk owo emi imọ idide. Enye anam nnyịn ifiọk enyịn̄ esie, ndien enyịn̄ emi awak ke Bible akan enyịn̄ en̄wen ekededi. Emi anam Jehovah enen̄ede ekpere nnyịn onyụn̄ anam nnyịn idiọn̄ọ orụk Abasi emi enye edide. (Jas. 4:8) Jehovah anam nnyịn idiọn̄ọ n̄ko mme edu esie. Mme n̄kpọ emi Jehovah obotde ẹnam nnyịn ifiọk ke enye enyene odudu ye ọniọn̄; Ikọ esie n̄ko anam nnyịn ifiọk ke enye enen̄ede ama nnyịn onyụn̄ ama se inende. (Rome 1:20) Enye etie nte ete emi enyenede odudu ye ọniọn̄, ọfọn ido, onyụn̄ ama nditọ esie; ndien emi esinam nditọ esie ẹkeme ndinen̄ede nsan̄a n̄kpere enye.

10 Jehovah onyụn̄ anam nnyịn ifiọk uduak esie. Enye anam nnyịn ifiọk ke nnyịn n̄ko imetiene isịne ke ubon imọ. Enye eteme nnyịn se ikpanamde man emem ye edidianakiet ẹdu ke ubon imọ. Bible ekpep nnyịn ke Abasi ikobotke nnyịn ndibiere se ifọnde ye se idiọkde, ndinyụn̄ nda ke idem n̄kpọn̄ enye. Edieke nnyịn mîtieneke ndausụn̄ esie, oro esida afanikọn̄ edi. (Jer. 10:23) Enen̄ede oyom iyak Abasi ada nnyịn usụn̄ edieke iyomde n̄kpọ ọfọn ye nnyịn. Ndisụk ibuot nnọ Abasi kpọt edinam inyene emem inyụn̄ idiana kiet. Jehovah ndinam nnyịn ifiọk kpukpru emi owụt ke enye ama nnyịn!

11. Nso ke Jehovah ọn̄wọn̄ọ ndinam nnọ nnyịn ke ini iso, ndien didie ke oro owụt ke enye ama onyụn̄ ekere aban̄a nnyịn?

11 Ete emi amade nditọ esie esinen̄ede ekere aban̄a nte n̄kpọ editiede ye mmọ ke ini iso, onyụn̄ oyom mmọ ẹda uwem mmọ ẹnam se ifọnde. Ata ediwak owo ifiọkke nte n̄kpọ editie ke ini iso, mîdịghe mmọ ẹda ofụri uwem mmọ ẹnam n̄kpọ oro mîdinyeneke ufọn inọ mmọ ke ini iso. (Ps. 90:10) Edi, Jehovah ọn̄wọn̄ọ ndinam nti n̄kpọ nnọ nnyịn ke ini iso sia nnyịn idide nditọ esie. Oro anam nnyịn ida uwem nnyịn inam se inemde enye esịt.

JEHOVAH ESITỤNỌ ONYỤN̄ ỌNỌ NDITỌ ESIE ITEM

12. Didie ke Jehovah ndikọnọ Cain ye Baruch item okowụt ke enye ama onyụn̄ ekere aban̄a mmọ?

12 Jehovah ama ọdọhọ Cain ete: “Nso inam esịt enen̄erede ofụt fi, nso inyụn̄ inam iso okpụhọrede fi? Edieke akpakabarede esịt anam se ifọnde, nte owo ikpemenekede fi ke enyọn̄? . . . Ndi afo eyekeme ndikan [idiọkn̄kpọ]?” (Gen. 4:6, 7) Jehovah ọkọnọ Cain item emi ke ini enye  okokụtde ke Cain ọmọn̄ anam ata idiọkn̄kpọ, onyụn̄ etịn̄ se Cain akpanamde. Edi Cain ikokopke item emi, ntre enye ama ọbọ ufen. (Gen. 4:11-13) Ke ini Baruch emi ekewetde n̄wed ọnọ Jeremiah, okofụhọde onyụn̄ akpade mba, Jehovah ama ọnọ enye item man an̄wam enye okụt se ikedide mfịna esie. Baruch iketiehe nte Cain, enye ama okop item Jehovah, ndien ẹma ẹnyan̄a enye.—Jer. 45:2-5.

13. Ntak emi Jehovah akayakde ẹdomo ndusụk mme asan̄autom esie?

13 Apostle Paul ekewet ete: “Jehovah [esitụnọ] owo eke enye amade; ndien enye amia kpukpru owo eke enye adarade nte eyen.” (Heb. 12:6) Idịghe kpukpru ntụnọ esidi ndimia owo ufen. Ẹsitụnọ owo ke nsio nsio usụn̄. Bible etịn̄ aban̄a ediwak mme anam-akpanikọ asan̄autom Jehovah oro ẹkeyọde ikpọ idomo oro ẹketiede nte ntụnọ, ndien emi ama ekpep mmọ n̄kpọ. Kere ban̄a Joseph, Moses, ye David. Mmọ ẹdi ndusụk mbon oro Bible etịn̄de n̄kpọ aban̄a akan. Ndikot nte Jehovah okodude ye mmọ ke ofụri ini oro mmọ ẹkesobode idomo, ye nte Jehovah akadade mmọ anam ikpọ n̄kpọ, anam nnyịn itetịm ikụt adan̄a nte Jehovah amade onyụn̄ ekerede aban̄a ikọt esie.—Kot Mme N̄ke 3:11, 12.

14. Ntak emi idọhọde ke Jehovah nditụnọ nnyịn owụt ke enye ama nnyịn?

14 Ntụnọ oro Jehovah ọnọde nnyịn anam nnyịn ikụt usụn̄ en̄wen oro enye amade nnyịn. Ke ini Jehovah otụnọde mbon oro ẹnamde idiọkn̄kpọ, ndien mmọ ẹtua n̄kpọfiọk ẹnyụn̄ ẹkabade esịt, enye ‘esifen mmọ ke akamba usụn̄.’ (Isa.  55:7) Nso ke emi ọwọrọ? David ama etịn̄ nte Jehovah esifende ọnọ owo ete: “Enye emi efende kpukpru ndudue fo, emi ọkọkde kpukpru mme udọn̄ọ fo, emi afakde uwem fo osio ke obube, emi adade ima-mfọnido ye mbọm ayara fi ke ibuot. Kpa nte edem usiahautịn oyomde usụn̄ ọkpọn̄ edem usoputịn, ntre ke enye enịm mme ndudue nnyịn oyom usụn̄ ọkpọn̄ nnyịn.” (Ps. 103:3, 4, 12) Ẹyak nnyịn isisọp ndikop item Jehovah inyụn̄ ibọ ntụnọ esie, sia imọfiọk ke enye anam emi ke ntak oro enye enen̄erede ama nnyịn.—Ps. 30:5.

JEHOVAH EKPEME NNYỊN

15. Ntak emi Jehovah esikpemede ikọt esie?

15 Kiet ke otu n̄kpọ emi edima ete esinamde esidi ndikpeme ubon esie mbak n̄kpọ idinam mmọ. Jehovah, ete nnyịn eke heaven, esikpeme nnyịn n̄ko. Andiwet Psalm ọkọdọhọ ntem aban̄a Jehovah: “Enye ekpeme ukpọn̄ mbon oro ẹsọn̄ọde ẹda ye enye; anyan̄a mmọ osio ke ubọk mme idiọkowo.” (Ps. 97:10) Ke uwụtn̄kpọ, kpa nte afo mûsudaha enyịn fo ubre mbre, Jehovah isidaha ikọt esie ibre mbre. (Kot Zechariah 2:8.) Jehovah esikpeme ikọt esie mbak n̄kpọ idinam mmọ.

16, 17. Tịn̄ nte Jehovah ekekpemede ikọt esie ke eset onyụn̄ ekpemede ke eyo nnyịn.

16 Jehovah esida mme angel esie ekpeme nnyịn. (Ps. 91:11) Angel kiet ama anyan̄a Jerusalem osio mbon Assyria ke ubọk, onyụn̄ owot mbonekọn̄ mmọ 185,000 ke okoneyo kiet. (2 Ndi. 19:35) Angel ama osio apostle Peter ye Paul ye mbon en̄wen ke ufọk-n̄kpọkọbi. (Utom 5:18-20; 12:6-11) Jehovah osụk ekpekpeme ikọt esie mfịn n̄ko. Eyenete kiet emi ibuot itieutom ọkọnọde ekese n̄kọk itieutom kiet ke Africa, ọdọhọ ke en̄wan ukara ye en̄wan ido ukpono ama abiat idụt oro etieti. Ndutịme ye afai ẹma ẹdu ke idụt oro ke ntak emi ẹken̄wanade en̄wan, ẹyịpde n̄kpọ mme owo, ẹdan̄de mme owo ke n̄kanubọk, ẹnyụn̄ ẹwotde mme owo. Edi owo ikowotke nditọete nnyịn ndomokiet, kpa ye oro ediwak mmọ ẹketabade kpukpru inyene mmọ ye se mmọ ẹkesidade ẹdu uwem. Ke ini ẹkebụpde mmọ nte n̄kpọ etiede, kpukpru mmọ ẹma ẹtuak inua imam ẹnyụn̄ ẹdọhọ ẹte: “N̄kpọ idiọkke. Jehovah ikpọn̄ke nnyịn!” Mmọ ẹma ẹkụt ke Abasi ama mmimọ.

17 Ndusụk ini, Jehovah esiyak mme asua ẹwot asan̄autom esie, nte enye akayakde ẹwot Stephen. Edi enye ekpeme kpukpru ikọt esie ke ndinam mmọ ẹfiọk n̄kari Satan. (Eph. 6:10-12) Enye esida Ikọ esie ye mme n̄wed Ikọ Abasi oro esop esie ewetde, an̄wam nnyịn ifiọk ke ifọnke ima inyene, oburobụt ye afai afai unọ idem inemesịt, ida Intanet inam idiọkn̄kpọ, ye mme n̄kpọ ntre. Emi owụt ke Jehovah ekpeme ikọt esie mbak n̄kpọ idinam mmọ, ukem nte edima ete esikpemede nditọ esie.

AKWA EDIDIỌN̄

18. Etie fi didie ke idem ndifiọk ke Jehovah ama fi?

18 Nnyịn imeneme ndusụk n̄kpọ oro Jehovah anamde ndiwụt ke imama nnyịn. Ke Moses ama eketie ekere aban̄a ofụri isua oro enye akadade anam n̄kpọ Jehovah, enye ọkọdọhọ ete: “Da ima-mfọnido fo yụhọ nnyịn ke usenubọk, man nnyịn isio n̄kpo idara inyụn̄ idat esịt ke ofụri usen uwem nnyịn.” (Ps. 90:14) Nnyịn imenyịme ye se Moses eketịn̄de emi. Ndifiọk ke Jehovah ama nnyịn edi kiet ke otu akwa edidiọn̄ oro inyenede mfịn. Emi anam nnyịn itiene apostle John idọhọ ite: “Ẹse orụk ima emi Ete amade nnyịn.”—1 John 3:1.