Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) AUGUST 2015

 OTO ITIEUTOM UBON N̄KANI N̄KPỌ NNYỊN

“Jehovah Akada Mbufo Edi France Man Ẹdikpep Akpanikọ”

“Jehovah Akada Mbufo Edi France Man Ẹdikpep Akpanikọ”

ANTOINE SKALECKI ama enyene ekpri enan̄-mbakara ke ini enye ekedide ekpri. Enye ama esisan̄a ye enan̄-mbakara esie ke n̄kịmn̄kịm usụn̄ idakisọn̄ ekemen ediwak ekpat ukan̄ ke itie udọk ukan̄, emi okotụn̄ọde ke ikpat 1,600. Itie udọk ukan̄ ama esịbe efịk ete Antoine ekpere ndiwot; kpa ye oro, ẹma ẹdọhọ Antoine akanam utom ke itie udọk ukan̄ oro sia mmọ mîkenyeneke okụk se ẹdade ẹdu uwem. Enye ama esinam utom do hour usụkkiet kpukpru usen. Isan̄ kiet, itie udọk ukan̄ oro ama esịbe efịk Antoine ekpere ndiwot.

Se mbon Poland ẹkesikamade ẹdọk ukan̄; itie udọk ukan̄ ke Dechy emi odude ekpere Sin-le-Noble; mi ke Antoine Skalecki ekesinam utom

Antoine ekedi kiet ke otu nditọ emi ẹkemanade ke 1920 esịm 1930 ke France, ke ini mme ete ye eka mmọ ẹkewọrọde ke Poland ẹkedụn̄ ke France. Nso ikanam mbon Poland ẹwọrọ ẹkedụn̄ ke France? Mme owo ẹma ẹwak etieti ke Poland ke ini ẹkenyịmede idụt oro ẹkara idem mmọ, ke akpa ekọn̄ ererimbot ama okokụre. Edi se iwakde ibe irenowo miliọn kiet ẹma ẹkpan̄a ke ekọn̄ oro ke France, ndien emi ama anam ẹnen̄ede ẹyom mme ọdọk ukan̄ ke France. Ntre ukara Poland ama odụk ediomi ye ukara France ke September 1919 ndinọ mbon Poland ẹkenam utom udọk ukan̄ ke France. Etisịm 1931, mbon Poland 507,800 ẹkedụn̄ ke France, ndien ata ediwak mmọ ẹkedụn̄ ke Nord-Pas-de-Calais, n̄kan̄ oro ẹsidọkde ukan̄.

Mbon Poland oro ẹkesisịnde idem ẹnam utom do ikefreke ido obio mmọ ye ima oro mmọ ẹkemade n̄kpọ Abasi. Antoine oro edide isua 90 idahaemi ọdọhọ ete: “Joseph, ete-eka mi ama enen̄ede ama onyụn̄ okpono Bible nte ete esie ekekpepde enye.” Mbon Poland oro ẹkesidọkde ukan̄ ye ubon mmọ ẹma ẹsisịne ndiye ọfọn̄ ẹka ufọkabasi kpukpru Sunday, kpa nte mmọ ẹkesinamde ke Poland. Emi ama esinen̄ede ayat mbon France oro mîkesikaha ufọkabasi.

Nditọ Ukpepn̄kpọ Bible ẹketọn̄ọ ndikwọrọ ikọ ke Nord-Pas-de-Calais toto ke 1904, edi ediwak mbon Poland ẹkedifiọk mmọ ke ini ẹkedide obio oro. Ke 1915, ẹma ẹtọn̄ọ ndimịn̄ Enyọn̄-Ukpeme ke usem Polish kpukpru ọfiọn̄, ẹma ẹnyụn̄ ẹtọn̄ọ ndimịn̄ The Golden Age (emi edide Ẹdemede! idahaemi) ke 1925. Ediwak mbon Poland ẹma ẹnen̄ede ẹma mme magazine ikọ Abasi emi ye n̄wed oro, The Harp of God ke usem Polish.

Eyeneka eka Antoine emi okodụkde mbono esop ke akpa ini ke 1924, akanam ubon mme Antoine  ẹdifiọk Nditọ Ukpepn̄kpọ Bible. Kpa ke 1924 oro ke Nditọ Ukpepn̄kpọ Bible ẹkenịm akpa mbono mmọ ke usem Polish ke obio Bruay-en-Artois. Ke n̄kpọ nte urua ifan̄ ẹma ẹkebe, ibuot itieutom ẹma ẹnọ Brọda Joseph F. Rutherford ekenịm mbono esop ofụri owo ke obio oro, ndien owo 2,000 ẹkedụk. Esịt ama enen̄ede enem Brọda Rutherford ndikụt ata ediwak mbon Poland ẹdụkde mbono esop oro. Ntre enye ama ọdọhọ mmọ ete: “Jehovah akada mbufo edi France man ẹdikpep akpanikọ. Ana mbufo ye nditọ mbufo ẹn̄wam mbon France! Akwa utom osụk ododu ndinam, Jehovah oyonyụn̄ ọnọ mme ọkwọrọ ikọ ẹnam utom emi.”

Jehovah Abasi ama anam oro! Nditọete oro ẹtode Poland mi ẹma ẹsịn idem ẹkwọrọ ikọ kpa nte mmọ ẹkesisịnde idem ẹdọk ukan̄! Ndusụk mmọ ẹma ẹkam ẹfiak ẹnyọn̄ọ obio mmọ, Poland, ẹkekpep mme owo akpanikọ Bible. Teofil Piaskowski, Szczepan Kosiak, ye Jan Zabuda ẹdi ndusụk mbon emi ẹkekpọn̄de France ẹfiak ẹnyọn̄ Poland ẹkekwọrọ eti mbụk.

Edi, ediwak nditọete oro ẹtode Poland ẹkesụk ẹdodu ke France, ẹnyụn̄ ẹtiene nditọete mmọ do ẹsịn idem ẹkwọrọ ikọ. Ke akamba mbono oro ẹkenịmde ke 1926 ke obio Sin-le-Noble, owo 1,000 ẹkedụk eke usem Polish, ke ini owo 300 ẹkedụkde eke usem French. N̄wedisua 1929 Ikọmbakara ọkọdọhọ ete: “Ke 1926, mbon Poland 332 ẹma ẹyak idem ẹnọ Abasi ẹnyụn̄ ẹna baptism.” Mbemiso ẹken̄wanade ọyọhọ ekọn̄ ererimbot iba, ke otu esop 84 oro ẹkedude ke France, 32 ẹkedi esop usem Polish.

Nditọete Poland emi ẹdụn̄de ke France ẹdaha mbono. Se ẹwetde ke moto emi edi: “Mme Ntiense Jehovah”

Ke 1947, ukara Poland ama ọdọhọ mbon Poland ke France ẹfiak ẹnyọn̄ ẹdi, ndien ediwak Mme Ntiense Jehovah ẹma ẹnyịme ndifiak nnyọn̄ Poland. Idem ke mmọ ẹma ẹkenyọn̄ọ, ẹkesụk ẹkokụt utịp ọkpọsọn̄ utom oro mmọ ye nditọete mmọ ke France ẹkenamde, koro mme asuanetop ke France ẹma ẹwak ẹsịm 2,380 isua oro. Ndien ọtọn̄ọde ke 1948 esịm 1950, ibat mme asuanetop ama ekpere ndisịm 7,000! N̄kọk itieutom France ẹma ẹtọn̄ọ ndimek mme esenyịn circuit ke 1948 man ẹn̄wam mbufa mme asuanetop emi. Ke otu mme esenyịn circuit ition oro ẹkemekde ini oro, inan̄ ẹkedi mbon Poland, ndien Antoine Skalecki ekedi kiet ke otu mmọ.

Ediwak Mme Ntiense Jehovah ke France ẹsụk ẹkekere enyịn̄ mme ete-ete mmọ, kpa mbon Poland oro ẹkesịnde idem ẹdọk ukan̄ ẹnyụn̄ ẹkwọrọ ikọ ke France. Mfịn, ediwak mbon oro ẹwọrọde ẹkedụn̄ ke France ke ẹkpep akpanikọ. Edide mme ọkwọrọikọ oro ẹtode esenidụt ẹyenyọn̄ obio emana mmọ ẹkekwọrọ ikọ m̀mê idinyọn̄ke, mmọ ke ẹsịn idem ẹkwọrọ ikọ kpa nte mbon Poland oro ekedụn̄de ke France ẹkenamde.—Oto Itieutom Ubon N̄kani N̄kpọ Nnyịn ke France.