Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JULY 2015

“Edinyan̄a Mbufo ke Asan̄a Ekpere”!

“Edinyan̄a Mbufo ke Asan̄a Ekpere”!

“Ẹnen̄ede ẹda ẹnyụn̄ ẹmenede ibuot mbufo ke enyọn̄, koro edinyan̄a mbufo ke asan̄a ekpere.”LUKE 21:28.

IKWỌ: 133, 43

1. Nso iketịbe ke isua 66 eyo mme apostle? (Se akpa ndise ibuotikọ emi.)

DA NTE ke edi Christian, odụn̄ ke Jerusalem, ndien isua 66 eyo mme apostle edi emi. Ata ediwak n̄kpọ ke etịbe. Akpa kan̄a, Florus, owo ukara Rome kiet, eyịp okụk emi odobide esịm talent 17 ke itie unịm okụk temple. N̄kpọ emi ayat mme Jew esịt tutu mmọ ẹwot mbonekọn̄ Rome ke Jerusalem, inyụn̄ inyịmeke mbon Rome ẹkara mmimọ aba. Edi mbon Rome idopke-dop ise mmọ; ẹdọn̄ idem ẹbịne mmọ! Ọfiọn̄ ita ete ibe, Cestius Gallus, owo emi mbon Rome ẹkemekde akara Syria, obiom mbonekọn̄ 30,000 edi Jerusalem. Mbonekọn̄ ẹkan ofụri Jerusalem ẹkụk, ndien mme Jew ẹfen̄e ẹkedịbe ke temple. Ekem, mbonekọn̄ ẹtọn̄ọ ndiwụri ibibene temple. Kpukpru owo ke obio ẹkama nsia ke ubọk! Ndi idem etiene enyek fi?

2. Nso ke mme Christian ẹkenyene ndinam ke ini mmọ ẹkụtde mbonekọn̄ Rome ẹkande obio ẹkụk, ndien nso ikan̄wam mmọ ẹkeme ndinam emi?

2 Anaedi emeti se Jesus eketịn̄de emi Luke ekewetde: “Ke ini mbufo ẹkụtde nte mbonekọn̄ ẹkande Jerusalem ẹkụk, ẹfiọk  ndien ẹte n̄wụre esie asan̄a ekpere. Adan̄aoro yak mbon oro ẹdude ke Judea ẹfehe ẹka ikpọ obot, n̄ko yak mmọ eke ẹdude ke esịt esie ẹwọn̄ọ, yak mmọ eke ẹdude ke in̄wan̄ ẹkûnyụn̄ ẹdụk esịt esie.” (Luke 21:20, 21) Edi emekeme ndikere ete, ‘Ndisan̄a didie n̄wọrọ ke obio emi mbonekọn̄ ẹkande ẹkụk?’ Edi etise, n̄kpọ emi mûkpukereke etịbe. Mbonekọn̄ Rome ẹtọn̄ọ nditan̄ n̄kpọ nnyọn̄. Ẹsịbe mme usen afanikọn̄ oro omụhọ nte Jesus ọkọdọhọde! (Matt. 24:22) Ufan̄ odu ndien ndinam se Jesus ọkọdọhọde ẹnam. Usọp usọp, afo ye nditọete eken ke obio ẹtan̄ n̄kpọ ẹwọrọ ke Jerusalem, ẹsan̄a ẹfehe, tutu ẹkesịm ikpọ obot. * Isua inan̄ ẹkebe, obufa akwa owoekọn̄ Rome asan̄a ye udịmekọn̄ esie ẹdisobo Jerusalem. Afo ọbọhọ ke ntak emi anamde se Jesus ọkọdọhọde ẹnam.

3. Nso idisịm mme Christian ke mîbịghike, ndien nso ke idineme ke ibuotikọ emi?

3 Ibịghike, idọhọ-o ke idibịghike, se ikọwọrọde mme Christian oro ọmọn̄ ọwọrọ nnyịn kiet kiet. Jesus ama etịn̄ ke ẹyesobo Jerusalem, afiak etịn̄ ke mme n̄kpọ emi ẹketịbede ini oro ayafiak etịbe ke ini “akwa ukụt.” (Matt. 24:3, 21, 29) Edi se inemde nnyịn edi ke “akwa otuowo” ẹyebọhọ ndiọkn̄kan afanikọn̄ emi oyomde ndisịm ekondo mi. (Kot Ediyarade 7:9, 13, 14.) Ọfọn inen̄ede idiọn̄ọ mme n̄kpọ emi Bible ọdọhọde ke ẹyetịbe sia mmọ ẹdi n̄kpọ n̄kpa ye uwem. Yak ise nte se iditịbede edibehede nnyịn kiet kiet.

NTỌN̄Ọ AKWA UKỤT

4. Nso ke idida idiọn̄ọ ke akwa ukụt ọtọn̄ọ, ndien emi editịbe didie?

4 Akwa ukụt editọn̄ọ didie? Akwa ukụt editọn̄ọ ke ini ẹdisobode kpukpru nsunsu ido ukpono. Bible okot kpukpru nsunsu ido ukpono “Akwa Babylon, eka mme akpara.” (Edi. 17:5-7) Ntak emi ẹkotde nsunsu ido ukpono akpara? Mme ọkwọrọ ederi ẹnam n̄kpọ nte akpara, ke ẹsan̄a ẹbụrọde idem ye mme ada ukara. Mmọ ẹma ukara owo etieti, idaha inọ Jesus ye Obio Ubọn̄ Abasi, isinyụn̄ imaha ndinam se Bible ekpepde man ẹsụk ẹdi n̄kpọ ke ererimbot Satan emi. Mme Christian emi ẹyetde aran itiehe nte mmọ. Mmọ ẹsana nte n̄wan emi mîfiọkke erenowo. (2 Cor. 11:2; Jas. 1:27; Edi. 14:4) Edi anie edisobo Akwa Babylon? Bible etịn̄ aban̄a “ididuot idiọk unam” emi enyenede “nnụk duop.” “Ididuot idiọk unam” emi ada aban̄a Esop Edidiana Mme Idụt, ndien “nnụk duop” ada aban̄a kpukpru mme idụt emi ẹnọde esop emi ibetedem. Jehovah Abasi eyesịn ‘ekikere esie’ ke esịt “nnụk duop” oro, onyụn̄ anam mmọ ẹsobo Akwa Babylon.Kot Ediyarade 17:3, 16-18.

5, 6. Isan̄a didie ifiọk ke owo idisoboke kpukpru mme aka ufọkabasi ke ini ẹdisobode Akwa Babylon?

5 Edi ndi emi ọwọrọ ke ẹyesobo kpukpru mbon oro ẹkesikade nsunsu ido ukpono ke ini ẹdisobode Akwa Babylon? Ihih, iwọrọke ntre. Jehovah ama anam prọfet Zechariah etịn̄ se iditịbede ini oro. Zechariah ama ewet se mbon emi ẹkesikade nsunsu ido ukpono ẹditịn̄de, ete: “Enye ọyọdọhọ ete, ‘Ami ndịghe prọfet. Ami ndi ofụn̄isọn̄, koro owo ekedepde mi toto ke uyen.’ Ndien owo oyobụp enye ete, ‘Nso unan edi emi ke idem fo?’ Ndien enye ọyọbọrọ ete, ‘Edi unan oro n̄kadade ke ini ẹkemiade mi ke ufọk mbon oro ẹnen̄erede ẹma mi.’” (Zech. 13:4-6) Ikọ esie ọwọrọ ke idem mme etubom ufọkabasi ẹyefehe ẹkpọn̄ ufọkabasi mmọ,  ẹkan̄ inua asat ke akanam mmimọ ikaha utọ ufọkabasi oro.

6 N̄kpọ editie didie ye ikọt Abasi ini oro? Jesus ọkọdọhọ ete: “Ke akpanikọ, ke owo mîkpesịbeke mme usen oro ẹmụhọ, baba owo kiet ikpọbọhọke; edi ke ntak ndimek ikọt Abasi ẹyesịbe mme usen oro ẹmụhọ.” (Matt. 24:22) Nte ima iketetịn̄, ẹma ẹsịbe mme usen afanikọn̄ ẹmụhọ ke isua 66 eyo mme apostle. “Ndimek ikọt Abasi,” oro edi, mme Christian oro ẹyetde aran, ẹma ẹda ifet oro ẹfehe ẹwọrọ ke Jerusalem. Kpasụk ntre, ke ẹma ẹkesobo Akwa Babylon, ẹyesịbe usen afanikọn̄ oro omụhọ ke ntak “ndimek ikọt Abasi.” Abasi idiyakke “nnụk duop” oro osobo ikọt esie ẹfep. Ekpri ini emem oyodu.

INI IDOMO YE IKPE

7, 8. Nso ifet ke kpukpru nnyịn idinyene ke ẹma ẹkesobo Akwa Babylon, ndien didie ke ikọt Abasi ẹdikpụhọde ye kpukpru mbon eken ini oro?

7 Nso iditịbe ke ẹma ẹkesobo kpukpru nsunsu ido ukpono? Ini emi ke ẹdinen̄ede ẹdiọn̄ọ se idude owo nnyịn kiet kiet ke esịt. Ata ediwak owo ke ererimbot ẹyedụk nsio nsio n̄ka man ẹkpeme mmọ. Ẹmen mme n̄ka emi ẹdomo ye “ikpọ itiat emi ẹdude ke obot.” (Edi. 6:15-17) Edi ikọt Jehovah ẹdibuọt idem ye Jehovah, sia enye ikpọn̄ ekeme ndikpeme mmọ. Ke eyo mme apostle, ekpri ini emem ama odu ke ini mbonekọn̄ Rome ẹkefiakde ẹnyọn̄ọ. Edi mme Jew ikadaha ini emi iwọrọ ikpọn̄ ido ukpono mmọ ikabade idi Christian. Mbet Jesus ẹkekam ẹtetie ẹbet utọ ini oro. Mmọ ẹma ẹsọsọp ẹnam se Jesus ọkọdọhọde mmọ. Kpasụk ntre, nnyịn ikereke ke mme owo ẹyebụn̄ọ ẹdụk esop Abasi ke ini oro ekpri emem edidude ke ẹma ẹkesobo Akwa Babylon. Edi ini emi edidi ata eti ini ọnọ kpukpru ikọt Abasi ndiwụt adan̄a nte mmimọ imade Jehovah, edinyụn̄ edi ini mmọ ndika iso n̄n̄wam nditọete Christ.Matt. 25:34-40.

8 Kpa ye oro nnyịn mîdiọn̄ọke kpukpru se iditịbede ini oro, imọdiọn̄ọ ke n̄kpọ ayatak nnyịn. Ke eyo mme apostle, mme Christian ẹma ẹfehe ẹkpọn̄ inyene mmọ man ẹbọhọ, edi n̄kpọ ama ọsọn̄ ye mmọ. (Mark 13:15-18) Ndi eyenyịme ndiyak inyene fo atak man aka iso anam akpanikọ ọnọ Abasi? Ndi eyenyịme ndinam se ededi oro ẹdidọhọde nnyịn inam man owụt ke ida inọ Jehovah? Kûfre ke nnyịn kpọt idisọn̄ọ ida inam n̄kpọ Abasi ini oro nte prọfet Daniel akanamde.Dan. 6:10, 11.

9, 10. (a) Nso utọ etop ke ikọt Abasi ẹditan̄a ini oro? (b) Nso ke mme asua ikọt Abasi ẹdinam ke ini ẹkopde etop emi?

9 Ini akwa ukụt ididịghe ini ndikwọrọ “eti mbụk obio ubọn̄.” Utọ ini oro ama ebe. “Utịt” edisesịm ama! (Matt. 24:14) Ikọt Abasi ẹditan̄a n̄kpọsọn̄ etop ubiereikpe emi editụkde kpukpru owo. Ekeme ndidi mmọ ẹdidọhọ mme owo ke ẹmọn̄ ẹsosobo ererimbot Satan ofụri ofụri. Bible emen etop emi mmọ ẹdikwọrọde mi odomo ye edịm itiat onyụn̄ ọdọhọ ete: “Akwa edịm itiat ye kpukpru itiat emi ẹdobide n̄kpọ nte talent kiet ẹsụhọde ẹto enyọn̄ ẹditọ mme owo, mme owo oro ẹnyụn̄ ẹsụn̄i Abasi ke ntak ufen edịm itiat oro, koro ufen oro [okponde] etieti.”Edi. 16:21.

10 Mme asua ikọt Abasi ẹyekop kpukpru emi. Abasi ama anam prọfet Ezekiel etịn̄ se mme idụt emi Bible okotde Gog isọn̄ Magog ẹdidianade kiet ẹnam. Prọfet Ezekiel ọkọdọhọ ete: “Ntem ke Jehovah Akakan Ọbọn̄ Andikara ọdọhọ ete, ‘Ndien ama ekem ke usen oro, mme n̄kpọ ẹyedụk fi esịt, afo oyonyụn̄ aduak idiọk  uduak; ndien afo ọyọdọhọ ete: “Ami nyọdọk n̄kan̄wana ye obio-in̄wan̄ emi mînyeneke ibibene. Nyodụk mbịne mbon oro mînyeneke afanikọn̄, emi ẹdụn̄de ke ifụre, kpukpru mmọ ẹdụn̄ inyeneke ibibene, inyeneke eto usịnusụn̄ inyụn̄ inyeneke usụn̄ufọk.” Afo edinam emi man obụme ediwak mbụme onyụn̄ owo n̄wo, man ọwọn̄ọde ubọk fo odori ke mme n̄wụre ebiet emi ẹfiakde ẹdụn̄ onyụn̄ odori mbon oro ẹtan̄de ke otu mme idụt ẹbon ọtọkiet, mbon oro ẹkọde inyene ye ediwak n̄kpọ, mmọ oro ẹdụn̄de ke ufọt isọn̄.’” (Ezek. 38:10-12) Ikọt Abasi ẹdida ata san̄asan̄a nte n̄kpọ eke “ẹdụn̄de ke ufọt isọn̄.” Mme idụt idikemeke ndiwan̄ ubọk ntie nse mmọ. Mmọ ẹyebụmede ẹka ndin̄wana ye mme Christian oro ẹyetde aran ye mbon eken oro ẹdianade ye mmọ ẹnam n̄kpọ Abasi.

11. (a) Nso ke mîkpanaha ifre ke ini ikerede iban̄a n̄kpọ kiet kiet emi ẹditịbede ke ini akwa ukụt? (b) Idem editie didie mme owo ke ini mmọ ẹdikụtde mme idiọn̄ọ ke ikpaenyọn̄?

11 Nso iditịbe ke oro ebede? Bible itịn̄ke n̄kpọ kiet kiet emi ẹditịbede ke adiana ke adiana, edi etie nte ndusụk n̄kpọ ẹditịbe ke ukem ini. Jesus ama etịn̄ se iditịbede ke utịt ererimbot emi ete: “Mme idiọn̄ọ ẹyedu ke utịn ye ọfiọn̄ ye ntantaọfiọn̄, ndien editịmede esịt oyomụm mme idụt isọn̄, owo idifiọkke usụn̄ ubọhọ ke ntak emi inyan̄ ye mbufụt esie ẹyomode, ke adan̄aemi idem [eyemerede] mme owo oto ke ndịk ye editie mbet mme n̄kpọ eke ẹdiwọrọde ẹnọ isọn̄; koro ẹyenyen̄e mme odudu ikpaenyọn̄. Ndien adan̄aoro mmọ ẹyekụt Eyen owo asan̄ade ke obubịt enyọn̄ edi ye odudu ye akwa ubọn̄.” (Luke 21:25-27; kot Mark 13:24-26.) Ndi mme owo ẹyekụt ata ata idiọn̄ọ ke ikpaenyọn̄ ke ini ikọ Jesus emi edisude? Iyọdiọn̄ọ ini ama ekem. Se idiọn̄ọde edi ke nsia eyeyemede mme asua Abasi ke ini ikọ Jesus emi edisude.

Idem idinyekke nnyịn sia imenen̄ede inịm ke Jehovah ayanyan̄a nnyịn! (Se ikpehe ekikere 12, 13)

12, 13. (a) Nso iditịbe ke ini Jesus edide “ye odudu ye akwa ubọn̄”? (b) Nso ke ikọt Abasi ẹdinam ini oro?

12 Nso iditịbe ke ini Jesus edide “ye odudu ye akwa ubọn̄”? Ini oro ke enye edinọ mbon oro ẹkenamde akpanikọ utịp, onyụn̄ ọnọ mbon emi mîkanamke ufen. (Matt. 24:46, 47, 50, 51; 25:19, 28-30) Enye ama etịn̄ nte enye edinamde emi ke ini enye ọkọnọde uwụtn̄kpọ erọn̄ ye ebot. Enye ọkọdọhọ ete: “Ke ini Eyen owo edidide ke ubọn̄ esie, kpukpru mme angel ẹnyụn̄ ẹsan̄a ye enye, ndien enye oyosụhọde etetie ke ebekpo ubọn̄ esie. Ndien ẹyebon kpukpru mme idụt ke iso esie, enye oyonyụn̄ abahade mme owo kiet ye eken, kpa nte ekpemerọn̄ abaharede erọn̄ ye ebot. Enye oyonyụn̄ enịm erọn̄ ke ubọk nnasia, edi eyenịm ebot ke ufien esie.” (Matt. 25:31-33) Nso iditịbe inọ erọn̄ ye ebot? Ẹyebiere ikpe mmọ. Mbon emi mîkanamke akpanikọ inọ Abasi ẹdi ebot. “Ẹyesịbe mmọ emi ẹfep ke nsinsi.” Edi ẹyenọ erọn̄ “nsinsi uwem.”Matt. 25:46.

13 Nso ke mme ebot ẹdinam ke ini mmọ ẹdiọn̄ọde ke ẹmọn̄ ẹsịbe mmimọ ẹfep ke nsinsi? Bible ọdọhọ ke mmọ “ẹyeyịbi idemmọ ke eseme.” (Matt. 24:30) Edi nso ke nditọete Christ ye mbon eken emi ẹnamde akpanikọ ẹnọ Abasi ẹdinam ini oro? Mmọ ẹyenen̄ede ẹbuọt idem ye Jehovah Abasi ye Jesus Christ Eyen esie, ẹyenyụn̄ ẹnam item Jesus emi: “Nte mme n̄kpọ emi ẹtọn̄ọde nditịbe, ẹnen̄ede ẹda ẹnyụn̄ ẹmenede ibuot mbufo ke enyọn̄, koro edinyan̄a mbufo ke asan̄a ekpere.” (Luke 21:28) Se idinamde edi emi. Nte idinamde n̄kpọ oyowụt ke imenen̄ede inịm ke Jehovah ọmọn̄ anyanyan̄a nnyịn.

 NDINEN OWO ẸYEYAMA KE OBIO UBỌN̄

14. Nso ke nditan̄ ndimek ikọt Abasi mbon ọtọkiet ke Gog isọn̄ Magog ama ọkọtọn̄ọ en̄wan ye ikọt Abasi ọwọrọ?

14 Nso iditịbe ke ini Gog isọn̄ Magog editọn̄ọde en̄wan ye ikọt Abasi? Bible ọdọhọ ete: “[Eyen owo] oyosio mme angel ọdọn̄ oyonyụn̄ atan̄ ndimek ikọt esie ke ikpehe ofụm mbinan̄ obon ọtọkiet, ọtọn̄ọde ke utịt isọn̄ tutu esịm utịt ikpaenyọn̄.” (Mark 13:27; Matt. 24:31) Nso ke Jesus eketịn̄ aban̄a ke ini enye ọkọdọhọde ke ẹyetan̄ ndimek ikọt Abasi ẹbon ọtọkiet? Enye iketịn̄ke iban̄a ini emi ẹditọn̄ọde ndiyet ndusụk mme Christian aran man ẹka heaven, m̀mê ini emi ẹdifịkde mmọ akpatre idiọn̄ọ. (Matt. 13:37, 38) Itịn̄ emi sia Bible owụt ke ẹdifịk mme Christian emi ẹyetde aran akpatre idiọn̄ọ mbemiso akwa ukụt ọtọn̄ọde. (Edi. 7:1-4) Nso ndien ke Jesus eketịn̄ aban̄a? Enye eketịn̄ aban̄a ini oro ẹditan̄de mme Christian oro ẹyetde aran emi ẹdisụhọde ke isọn̄ ika heaven. (1 Thess. 4:15-17; Edi. 14:1) N̄kpọ emi editịbe ke Gog isọn̄ Magog ama ọkọtọn̄ọ en̄wan ye ikọt Abasi. (Ezek. 38:11) Ini oro ke ikọ Jesus emi edisu: “Adan̄aoro ndinen owo ẹyeyama nte utịn ke obio ubọn̄ Ete mmọ.”Matt. 13:43. *

15. Nso ke nditan̄ ndimek ikọt Abasi mbon ọtọkiet mîwọrọke?

15 Ndi se mme aka ufọkabasi ẹsikotde “rapture” edi emi? Ediwak mbon ufọkabasi ẹdọhọ ke “rapture” edi ini emi ẹdikụtde nte ndusụk mme Christian ẹdidade ata ata idem mmọ ẹfe ẹdọk heaven. Mmọ ẹdọhọ ke mme owo ẹyekụt nte Jesus osụhọrede ke heaven edi edikara isọn̄ emi. Edi Bible ọdọhọ ke ‘idiọn̄ọ Eyen owo ediwọrọ owụt idem ke enyọn̄,’ ye nte ke Jesus ‘edisan̄a ke obubịt enyọn̄ edi.’ (Matt. 24:30) Ndidọhọ “idiọn̄ọ Eyen owo” ye  “ndisan̄a ke obubịt enyọn̄” owụt ke owo ididaha ata ata enyịn ikụt Christ ke ini enye edidide. Bible ọdọhọ n̄ko ke “obụk ye iyịp ikemeke ndida obio ubọn̄ Abasi nnyene.” Ntem, ẹyebem iso “[ẹkpụhọde mbon emi ẹdikade heaven], ke idaha kiet, ke ediyịp enyịn, ke ini ẹfride akpatre obukpon̄.” * (Kot 1 Corinth 15:50-53.) Nnyịn isikotke se iditịbede ini oro “rapture” ke ntak se mbon ufọkabasi ẹkpepde ẹban̄a “rapture.” Edi imọfiọk ke ẹyetan̄ mbon oro ẹyetde aran emi ẹdidude ke isọn̄ isịm ini oro ke ediyịp enyịn ẹdọk heaven.

16, 17. Nso iditịbe mbemiso ẹnamde ndọ eyenerọn̄ ke heaven?

16 Ndondo oro owo 144,000 ẹkemde ibat ke heaven, ẹyetọn̄ọ ndiben̄e idem nnọ ndọ Eyenerọn̄. (Edi. 19:9) Edi enyene n̄kpọ en̄wen emi editịbede mbemiso ndọ emi. Kûfre ke Gog ọtọtọn̄ọ en̄wan ye ikọt Abasi mbemiso ẹmende kpukpru mme Christian oro ẹyetde aran emi ẹdidude ke ison̄ ini oro ẹdọk heaven. (Ezek. 38:16) Nso ke ikọt Abasi emi ẹdidude mi ke isọn̄ ẹdinam? Editie nte idụhe eke anyan̄ade mmọ. Mmọ ẹyenam item emi ẹkenọde ikọt Abasi ke eyo Edidem Jehoshaphat. Ẹkedọhọ mmọ ẹte: “Idiyomke mbufo ẹn̄wana isan̄ enye emi. Ẹdu ke itie mbufo, ẹtuak ẹda ẹnyụn̄ ẹkụt edinyan̄a emi Jehovah edinọde mbufo. O Judah ye Jerusalem, ẹkûfehe ndịk ẹkûnyụn̄ ẹyak idem enyek mbufo.” (2 Chron. 20:17) Mbon heaven ẹdinam nso ke ini Gog edin̄wanade ye ikọt Abasi mi ke isọn̄? N̄wed Ediyarade 17:14 etịn̄ se mme asua ikọt Abasi ẹdinamde ke ini kpukpru mbon oro ẹyetde aran edikemde ibat ke heaven. Itien̄wed oro ọdọhọ ete: “Mmọ emi ẹyen̄wana ekọn̄ ye Eyenerọn̄, edi, sia enye edide Ọbọn̄ mbọn̄ ye Edidem ndidem, Eyenerọn̄ ayakan mmọ. N̄ko, mbon oro ẹkotde ẹnyụn̄ ẹmekde emi ẹnyụn̄ ẹnamde akpanikọ ye enye ẹyekan mmọ.” Jesus ye owo 144,000 ẹyeto heaven ẹdin̄wana ye mme asua Abasi ẹyenyụn̄ ẹnyan̄a ikọt Abasi mi ke isọn̄.

17 Ẹkot ekọn̄ emi mmọ ẹdin̄wanade mi Armageddon. Enye ayanam ẹtoro enyịn̄ Jehovah. (Edi. 16:16) Ini oro ke ẹdisịbe mme ebot ẹfep ke nsinsi, edi akwa otuowo ẹyebọhọ Armageddon. Ke kpukpru emi ama ekebe, ẹyenam ndien ndọ eyenerọn̄—akpatre n̄kpọ emi ẹtịn̄de ẹban̄a ke n̄wed Ediyarade. (Edi. 21:1-4) * Abasi ọyọdiọn̄ kpukpru mbon emi ẹdibọhọde ẹdu uwem ke isọn̄ ini oro. Ndi akpama ndọ eyenerọn̄ edi n̄kpọn̄ emi edisierede mi? Ata akwa usọrọ ndọ ke edidi!Kot 2 Peter 3:13.

18. Nso ke ikpanam ke ntak se iditịbede ke mîbịghike?

18 Nso ke nnyịn kiet kiet ikpanam idahaemi ke ini ikerede iban̄a se iyomde nditịbe ke mîbịghike? Abasi ama anam apostle Peter ewet ete: “Sia kpukpru n̄kpọ emi ẹditarade ntem, nso orụk owo ke mbufo ẹkpedi ke edisana ido uwem ye ke mme edinam uten̄e Abasi, mbufo emi ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere, . . . Ntem, ndima, sia mbufo ẹtiede ẹbet mme n̄kpọ emi, ẹsịn ofụri ukeme man ke akpatre enye okpokụt mbufo nte ẹnanade ntọi ẹnyụn̄ ẹnanade ndo ẹnyụn̄ ẹdude ke emem.” (2 Pet. 3:11, 12, 14) Yak inen̄ede ibiere ndision̄o idem ofụri ofụri n̄kpọn̄ nsunsu ido ukpono, inyụn̄ ika iso ida inọ Jesus Christ, Edidem Emem.

^ ikp. eki. 2 Se Enyọn̄-Ukpeme, April 15, 2012, page 25 esịm 26.

^ ikp. eki. 15 Mbon oro ẹyetde aran emi ẹdidude uwem ini oro ididaha ata ata idem mmọ idọk heaven. (1 Cor. 15:48, 49) Ekeme ndidi se Jehovah akanamde ye idem Jesus ke enye edinam ye eke mmọ.

^ ikp. eki. 17 Psalm 45 etịn̄ nsio nsio n̄kpọ oro ẹditịbede ke adiana ke adiana. Akpa kan̄a, Edidem ayan̄wana ekọn̄. Ke oro ebede, ẹyenam ndọ eyenerọn̄.