Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JULY 2015

Tiene Nam Ndamban̄a Paradise Nnyịn Etetịm Eye Onyụn̄ Enem

Tiene Nam Ndamban̄a Paradise Nnyịn Etetịm Eye Onyụn̄ Enem

“Ami nyọnọ ebiet ikpat mi ubọn̄.”ISA. 60:13.

IKWỌ: 102, 75

1, 2. Nso ye nso ke N̄wed Abasi Usem Hebrew okot “udoriukot” Abasi?

JEHOVAH ABASI ọkọdọhọ ete: “Mme heaven ẹdi ebekpo mi, isọn̄ onyụn̄ edi udoriukot mi.” (Isa. 66:1) Enye eketịn̄ ntem aban̄a “udoriukot” esie: “Ami nyọnọ ebiet ikpat mi ubọn̄.” (Isa. 60:13) Didie ke enye ọnọ udoriukot esie ubọn̄, oro edi, anam enye eye? Ndien, didie ke se enye anamde ọfọn ye nnyịn emi idụn̄de ke isọn̄, “udoriukot” esie?

2 Idịghe isọn̄ kpọt edi “udoriukot” Abasi. N̄wed Abasi Usem Hebrew okot temple emi okodude ke Jerusalem n̄ko “udoriukot” Abasi. (1 Chron. 28:2; Ps. 132:7) Temple emi ama eye Jehovah etieti sia do ke kpukpru owo ẹkesika ẹketuak ibuot ẹnọ enye.

3. Nso idi ndamban̄a temple Abasi, ndien ini ewe ke enye ọkọtọn̄ọ?

Ndi enyene temple ndomokiet emi kpukpru owo ke ererimbot ẹkpesikade ẹketuak ibuot ẹnọ Abasi mfịn? Ihih, utọ temple oro idụhe. Edi enyene se ẹkotde ndamban̄a temple emi an̄wamde mme owo ẹtoro Jehovah. Nso idi ndamban̄a temple? Enye edi ndutịm emi Abasi anamde man mme owo ẹkeme ndifiak ndi ufan esie ẹnyụn̄ ẹkeme ndituak ibuot nnọ enye. Ndutịm emi ọkọtọn̄ọ ke isua 29 ke ini Jesus akanade baptism. Ẹma ẹyet enye aran ẹmek enye Akwa Oku ke ndamban̄a temple Jehovah. Mbon emi ẹbuọtde idem ke ufak emi  Jesus ekekpede ẹbọ ufọn ẹto ndutịm emi.Heb. 9:11, 12.

4, 5. (a) Psalm 99 ọdọhọ ke nso ke ikọt Abasi ẹnen̄ede ẹyom ndinam? (b) Nso ke ikpobụp idem nnyịn?

4 Imọkọm Jehovah etieti ke ndutịm oro enye anamde mi man ituak ibuot inọ enye. Ntak edi oro isinamde mme owo ẹdiọn̄ọ enyịn̄ esie ye ufak oro Christ ekekpede. Esịt enem nnyịn ndikụt se ibede Mme Ntiense Jehovah miliọn itiaita ke ofụri ererimbot ẹsịnde idem ẹtoro enyịn̄ Jehovah. Ediwak mme aka ufọkabasi ẹkere ke ima ikesịm heaven ke mmimọ idikotoro Abasi, edi kpukpru Mme Ntiense Jehovah ẹdiọn̄ọ ke ana itoro Jehovah idahaemi ke isọn̄.

5 Edieke inamde emi, ọwọrọ ikpebe se ikọt Abasi ẹkenamde ke eset, emi ẹtịn̄de ẹban̄a ke Psalm 99:1-3, 5. (Kot.) Psalm emi owụt ke Moses, Aaron, ye Samuel ẹma ẹtiene nti ikọt Abasi eken ẹtuak ibuot ẹnọ Abasi nte enye oyomde. (Ps. 99:6, 7) Mfịn, nditọete Christ oro ẹyetde aran ke ẹsịn idem ẹnam n̄kpọ Abasi ke ndamban̄a temple Jehovah mi ke isọn̄ mbemiso kpukpru mmọ ẹkade ẹketiene Jesus ẹdi oku ke heaven. “Mme erọn̄ en̄wen” ke ẹsịn idem ẹn̄wam mmọ. (John 10:16) Otu mbiba emi ke ẹdiana kiet ẹnam n̄kpọ Jehovah mi ke udoriukot esie kpa ye oro mme erọn̄ en̄wen mîditieneke mmọ ika heaven. Edi ọfọn nnyịn kiet kiet ibụp idem nnyịn ite, ‘Ndi ke ntiene ikọt Abasi eken ntuak ibuot nnọ Jehovah nte enye oyomde?’

MBON ORO ẸDUDE KE NDAMBAN̄A TEMPLE ABASI

6, 7. Nso mfịna ikọtọn̄ọ ke otu mme Christian ke eyo mme apostle, ndien nso iketịbe ọtọn̄ọde ke 1914 esịm 1919?

6 Mbon mfiakedem ẹma ẹtọn̄ọ ndiwak ke esop ke n̄kpọ nte isua ikie ke ẹma ẹketọn̄ọ esop Christian. (Utom 20:28-30; 2 Thess. 2:3, 4) Nte ini akakade, ama ọsọn̄ ndidiọn̄ọ m̀mê mmanie ẹtuak ibuot ẹnọ Abasi ke ndamban̄a temple esie. N̄kpọ nte isua 1,800 ama ebe mbemiso Jehovah akanamde Jesus Christ, Edidem emi enye emekde, anam n̄kpọ emi an̄wan̄a ikọt esie mi ke isọn̄.

7 Ke 1919, Jehovah ama anam ẹnen̄ede ẹdiọn̄ọ mbon emi ẹtuakde ibuot ẹnọ enye ke ndamban̄a temple esie. Mmọ ẹma ẹkpụhọde ediwak n̄kpọ emi mmọ ẹkesinamde, ndien emi ama anam Jehovah enyịme utuakibuot mmọ. (Isa. 4:2, 3; Mal. 3:1-4) Se apostle Paul okokụtde ke n̄kukụt ke n̄kpọ nte isua 1,800 emi ẹkebede ama ọtọn̄ọ ndisu.

8, 9. Nso idi “paradise” emi apostle Paul okokụtde ke n̄kukụt?

8 Ẹwet n̄kukụt emi apostle Paul okokụtde ke 2 Corinth 12:1-4. (Kot.) Jehovah okowụt enye n̄kpọ emi editịbede ke ini iso, n̄kpọ emi mîkodụhe ke eyo mme apostle. Nso idi “paradise” oro Paul okokụtde ke ini “ẹkemende enye ẹdọk ọyọhọ heaven ita”? Akpa, paradise emi ekeme ndida mban̄a ata ata Paradise emi edidude mi ke isọn̄ ke ini iso. (Luke 23:43) Udiana, enye ekeme ndida mban̄a emem ye edidianakiet emi idinyenede ke obufa ererimbot. Ọyọhọ ita, enye ekeme ndida mban̄a nte uwem edinemde ke heaven ke “paradise Abasi.”Edi. 2:7.

9 Edi ntak emi apostle Paul ọkọdọhọde ke “[imokop] ikọ emi mînaha ẹtịn̄, emi owo mînyụn̄ inyịmeke ẹtịn̄”? Koro ini ikekemke kan̄a ndinam akwa n̄kpọ emi enye okokụtde mi an̄wan̄a mme owo. Edi idahaemi, Abasi ayak nnyịn itịn̄ inọ mbon en̄wen nte enye ọdiọn̄de ikọt esie.

10. Didie ke “ndamban̄a paradise” okpụhọde ye “ndamban̄a temple”?

 10 Imesiwak nditịn̄ mban̄a “paradise eke spirit” emi ikotde idahaemi “ndamban̄a paradise.” Nso ke enye edi? Enye edi emem ye edidianakiet emi odude ke otu ikọt Abasi kpọt ke ofụri ererimbot. Edi ndi “ndamban̄a paradise” edi ukem ye “ndamban̄a temple”? Ihih, idịghe. Ndamban̄a temple edi ndutịm oro Abasi anamde man ẹtuak ibuot ẹnọ enye nte enye oyomde. Edi ndamban̄a paradise ke ẹda ẹdiọn̄ọ mbon oro Abasi emekde ete edi ikọt imọ. Mmọ ẹtuak ibuot ẹnọ enye ke ndamban̄a temple esie.Mal. 3:18.

11. Nso ke ikeme nditiene nnam man ndamban̄a paradise nnyịn enen̄ede okpon?

11 Esịt enen̄ede enem nnyịn ndifiọk ke toto ke 1919 ke Jehovah ọkọtọn̄ọ ndinam mme anana-mfọnmma owo ẹkot mme owo, ẹsọn̄ọ mmọ idem, ẹnyụn̄ ẹnam ndamban̄a paradise nnyịn etetịm okpon. Ndi ke etiene anam utom emi? Ndi esịt enem fi nditiene nnọ Jehovah Abasi ubọn̄ ke isọn̄ emi?

ESOP JEHOVAH KE EYE ONYỤN̄ ENEM NTE EYO ESIEREDE

12. Nnyịn isan̄a didie ifiọk ke Isaiah 60:17 osu? (Se akpa ndise ibuotikọ emi.)

12 Prọfet Isaiah ama etịn̄ ke ẹyekpụhọde ata ediwak n̄kpọ ke ikpehe esop Abasi eke isọn̄ ke Isaiah 60:17. (Kot.) Mme uyen ye mbon emi ẹdụkde esop obufa ẹkot mîdịghe ẹkop nte n̄kpọ ekesitiede ke esop Abasi ye mme ukpụhọde oro ẹkenamde. Edi afo ekere ke eketie didie nditọete emi ẹkedade enyịn mmọ ẹkụt mme ukpụhọde emi? Ama anam mmọ ẹnen̄ede ẹnịm ke Edidem emi Jehovah emekde ada esop emi usụn̄. Mmọ ẹkụt ke se mmimọ inịmde edi ata akpanikọ, ndien ke imekeme nditịn̄ uko uko nnọ owo ekededi emi amade ndikop. Ndikop mbụk nditọete emi ayanam inen̄ede ibuọt idem ye Jehovah.

13. Nso ke Psalm 48:12-14 ọdọhọ kpukpru nnyịn inam?

13 M̀mê emebịghi ke esop m̀mê ubịghike, ana esitịn̄ n̄kpọ aban̄a esop Abasi ọnọ mme owo. Ata akwa utịben̄kpọ ke Abasi anam ke ndinam ndamban̄a paradise odu ke utọ idiọk ererimbot emi ima mîdụhe mi! Ana itịn̄ se ifiọkde iban̄a esop Jehovah m̀mê “Zion,” ye se N̄wed Abasi etịn̄de aban̄a ndamban̄a paradise inọ “emana ini iso.”Kot Psalm 48:12-14.

14, 15. Nso ukpụhọde ke ẹkenam ke esop Abasi ke 1970 ama ekebe, ndien nso ufọn ke mme ukpụhọde emi ẹnyene?

14 Ediwak n̄kani owo ke esop mfịn ẹma ẹdu ke ini ẹkenamde ukpụhọde man esop Abasi etetịm eye onyụn̄ enem. Mmọ ke ẹteti ini emi esop mîkenyeneke otu mbiowo; eyenete emi ẹkesikotde asan̄autom esop (congregation servant) ekesise aban̄a esop kiet kiet. Mmọ ifreke ke enyene ini emi Kọmiti N̄kọk Itieutom mîkodụhe, ke eyenete emi ẹkotde asan̄autom n̄kọk itieutom ekesise aban̄a kpukpru se ẹnamde do. Mmọ ẹti n̄ko ini emi Otu Emi Ẹsede Ẹban̄a Utom Mme Ntiense Jehovah mîkodụhe; etieibuot Watch Tower Bible Society ekesibiere se ẹkpenamde. Owo kiet kpọt ekesibiere n̄kpọ ke esop kiet kiet, ke n̄kọk itieutom, ye ke ibuot itieutom nnyịn, ndien mmọ kiet kiet ẹma ẹnyene mbon emi ẹn̄wamde mmọ. Edi ke 1970 ama ekebe, ẹma ẹnam akamba ukpụhọde. Ẹma ẹyak utom emi ebiowo kiet ekesinamde do ẹsịn otu mbiowo ke ubọk.

15 Ndi mme ukpụhọde emi ẹma ẹfọn?  Ih, ẹma ẹfọn. Ntak emi idọhọde ntre edi ke ẹkenam mmọ ke ntak emi Ikọ Abasi ekedinen̄erede an̄wan̄a nnyịn. Utu ke owo kiet kpọt ndise mban̄a esop, mbiowo emi ẹnyenede nsio nsio nti edu, emi Jehovah ọnọde nnyịn nte enọ, ẹse ẹban̄a esop Abasi idahaemi.Eph. 4:8; N̄ke 24:6.

Jehovah ke ọnọ mme owo ke kpukpru ebiet se mmọ ẹnen̄erede ẹyom (Se ikpehe ekikere 16, 17)

16, 17. Ewe ukpụhọde emi esop Abasi ẹnamde ke ndondo emi ke afo ama akan, ndien ntak-a?

16 Kere n̄ko ban̄a ukpụhọde en̄wen emi ẹnamde ndondo emi. Ndi umaha nte ẹnamde mme n̄wed nnyịn etie idahaemi, se ẹwetde ke esịt, ye nte ẹnọde mme owo n̄wed nnyịn ke an̄wautom? Ndi esịt isinemke fi ndisio ata ediye n̄wed emi enemede mme mfịna emi mme owo ẹnyenede mfịn nnọ owo ke ini akade ukwọrọikọ? Kere n̄ko nte idade mbufa n̄kpọ oro ẹsion̄ode ẹdi ikwọrọ eti mbụk. Ke uwụtn̄kpọ, ikpehe Intanet nnyịn jw.org anam mme owo ke kpukpru ebiet ẹnyene ndausụn̄ emi mmọ ẹyomde. Mme ukpụhọde oro ẹnamde ke esop Abasi anam ikụt adan̄a nte Jehovah amade mme owo ke ofụri ererimbot.

17 Nnyịn ifreke ukpụhọde oro esop Abasi ẹkenamde ke isua ifan̄ emi ẹbede man inyene ini inim utuakibuot ubon m̀mê ida ikpep idem nnyịn n̄kpọ. Imama n̄ko nte ẹnịmde n̄kpri ye ikpọ mbono nnyịn idahaemi. Mme ukpụhọde oro ẹnamde anam mbono nnyịn enem akan nte ekesidide. Esịt enem kpukpru nnyịn ndikụt nsio nsio ufọkn̄wed emi esop Abasi ẹdade ẹnọ nnyịn ukpep. Imokụt ubọk Jehovah ke kpukpru emi. Nte eyo esierede, Jehovah ke anam ndamban̄a paradise nnyịn etetim eye onyụn̄ enem.

 TIENE NAM NDAMBAN̄A PARADISE NNYỊN ETETỊM EYE ONYỤN̄ ENEM

18, 19. Nso ke ikpanam man ndamban̄a paradise nnyịn etetịm eye onyụn̄ enem?

18 Jehovah ọnọ kpukpru nnyịn ifet nditiene nnam ndamban̄a paradise nnyịn etetịm eye onyụn̄ enem. Usụn̄ kiet emi ikemede ndinam emi edi ndisịn idem n̄kwọrọ eti mbụk Obio Ubọn̄ Abasi nnyụn̄ nnam mme mbet. Ini ekededi emi ikpepde owo n̄kpọ tutu enye ayak idemesie ọnọ Abasi, ọwọrọ imanam ndamban̄a paradise nnyịn okpon akan nte ekedide.Isa. 26:15; 54:2.

19 Imekeme n̄ko ndinam ndamban̄a paradise nnyịn etetịm eye onyụn̄ enem edieke ikade iso ikpụhọde edu nnyịn, idu eti uwem. Eti uwem nnyịn esiye mbon emi mîdịghe Mme Ntiense tutu anam esop Jehovah ọdọn̄ mmọ itọn̄. Idịghe Ikọ Abasi emi isisan̄ade ikwọrọ kpọt esinam mme owo ẹdụk ẹdi esop, edi eti edu uwem nnyịn ye nte itiede emem emem esibem iso odụri mme owo ẹdi, ndien mmọ ẹsidifiọk Jehovah Abasi ye Jesus Christ nte ini akade.

Emekeme nditiene nnam ndamban̄a paradise nnyịn etetịm okpon (Se ikpehe ekikere 18, 19)

20. Nso ke Mme N̄ke 14:35 ọdọhọ inam?

20 Esịt esinen̄ede enem Jehovah ye Jesus nditie ke heaven n̄kụt nte ndamban̄a paradise nnyịn eyede. Inemesịt emi isikopde ke ini itienede inam ndamban̄a paradise nnyịn emi etetịm eye onyụn̄ enem edi ata ekpri ke ẹmende ẹdomo ye nte esịt edinemde nnyịn ke ini iditienede inam isọn̄ emi edi ata ata Paradise. Ẹkûfre ke Mme N̄ke 14:35 ọdọhọ ke “asan̄autom emi adade ikike anam n̄kpọ edi inemesịt edidem.” Ntre, yak ida ikike isịn idem inam ndamban̄a paradise nnyịn etetịm eye, enem, onyụn̄ okpon!