Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JUNE 2015

“Oyom Mbufo Ẹyọ”

“Oyom Mbufo Ẹyọ”

KE Anita * ama akana baptism, ebe esie ama ọkọbọ enye ata idiọk idiọk. Anita ọdọhọ ete: “Ebe mi ikesiyakke ndụk mbono esop, ikesinyụn̄ iyomke-yom ndikop enyịn̄ Abasi ke inua mi. Enye ekeme ndiwot mi edieke ntịn̄de ikọ n̄kasiak Jehovah.”

N̄kpọ en̄wen emi ebe Anita akasuade ekedi ndikụt enye ekpepde nditọ mmọ Ikọ Abasi. Anita ọdọhọ ete: “Ebe mi ikenyịmeke ntuak ibuot nnọ Jehovah. N̄kesidedịbe n̄kpep nditọ mi Ikọ Abasi, n̄konyụn̄ n̄kemeke ndida mmọ n̄ka Ufọkmbono Obio Ubọn̄.”

Mbụk emi owụt ke idụhe se isọn̄de Christian ndiyọ nte ndiyọ ukọbọ ke esịt ufọk esie. Idomo en̄wen emi esisọn̄de ndiyọ edi idiọk udọn̄ọ, mîdịghe eyen, m̀mê n̄wan, m̀mê ebe owo ndikpa, ye owo owo ndikpọn̄ Jehovah. Edi nso ikeme ndin̄wam nnyịn iyọ mme n̄kpọ emi inyụn̄ ika iso inam n̄kpọ Jehovah?

Nso ke afo akpanam edieke se ibatde emi ọkpọwọrọde fi? Apostle Paul ọkọdọhọ ete: “Oyom mbufo ẹyọ.” (Heb. 10:36) Edi nso ikeme ndin̄wam fi aka iso ọyọ?

BEN̄E JEHOVAH AN̄WAM FI

N̄kpọ kiet emi ekemede ndin̄wam nnyịn iyọ se ededi emi ọwọrọde nnyịn edi akam. Ke uwụtn̄kpọ, ata n̄kpọ mmọn̄eyet ama ọwọrọ sista nnyịn emi ekerede Ana uwemeyo Monday kiet. Ebe esie ama akpa ọkpọn̄ enye. Tọn̄ọ mmọ ẹkedọ ndọ, isua 30 ẹbe. Ana ọdọhọ ete: “Enye akaka utom, edi inyọn̄ke idi tutu esịm emi. Ebe mi ekedi isua 52 kpọt.”

Ana akanam didie ọyọ se iwọrọde enye? Enye ama ọtọn̄ọ utom, ndien emi ama ọfọn ye enye ekpri sia utom emi ikayakke enye ekere n̄kpọ akaha; akana enye enen̄ede etịn̄ enyịn ke se enye anamde. Edi utom oro ikanamke enye efre ebe esie. Ana ọdọhọ ete: “Mma nnen̄ede mbọn̄ akam n̄kpe Jehovah ubọk nte an̄wam mi nyọ se iwọrọde mi.” Ndi Jehovah ama okop akam esie? Ana enen̄ede enịm ke Jehovah ama okop. Enye ọdọhọ ete: “Esịt ama ana mi sụn̄, mma nnyụn̄ n̄keme ndikere n̄kpọ ọfọn; sụk Abasi ikpọn̄ ekeme ndinam oro nnọ mi. Mmọdiọn̄ọ ke Jehovah iditreke-tre ndinam ebe mi eset.”—Phil. 4:6, 7.

Jehovah ọn̄wọn̄ọ ọnọ ikọt esie ke imọ iyokop akam mmọ iyonyụn̄ inọ mmọ se ededi emi edin̄wamde mmọ ẹka iso ẹtuak ibuot ẹnọ imọ. (Ps. 65:2) Ndi ukereke ke enye ekeme ndin̄wam fi ọyọ ke ini enyenede akamba mfịna?

NDITỌETE KE ESOP ẸKEME NDIN̄WAM FI

Yak ineme iban̄a usụn̄ en̄wen emi Jehovah esin̄wamde ikọt esie ẹyọ. Enye esida nditọete ke esop an̄wam nnyịn. Imekeme ndikpep n̄kpọ nto se iketịbede ke ini ẹkekọbọde nditọete ke Thessalonica idiọk idiọk. Apostle Paul ama eteme mmọ ete ẹka iso ẹdọn̄ kiet eken esịt ẹnyụn̄ ẹn̄wam kiet eken, nte mmọ ẹsisụk ẹnamde. (1 Thess. 2:14; 5:11) Mmọ ẹma ẹnam item emi. Ke ini mmọ ẹkesopde idem ọtọkiet, mmọ ẹma ẹn̄wam kiet eken aka iso anam akpanikọ ọnọ Jehovah, ẹkenyụn̄ ẹdi nti ufan. Se ikan̄wamde mmọ ẹyọ edi emi. Se mmọ ẹkenamde ekpep nnyịn ata akpan n̄kpọ—n̄kpọ emi ekemede ndin̄wam nnyịn iyọ mfịna mfịn.

Enen̄ede ọfọn ikpere nditọete nnyịn ke esop inyụn̄ in̄wam kiet eken, akpan akpan ke ini afanikọn̄. (Rome 14:19) Apostle Paul ama osobo ediwak afanikọn̄, edi Jehovah ama an̄wam enye ọyọ. Enye ama anam nditọete ẹn̄wam Paul ndusụk ini. Ke uwụtn̄kpọ, ke ini Paul ọkọdọn̄de ekọm ọnọ nditọete ke esop Colossae, enye ọkọdọhọ ke ‘mmọ ẹdi mme andin̄wam emi ẹsọn̄ọde imọ idem.’ (Col. 4:10, 11) Nditọete ke esop emi ẹma ẹma Paul etieti, ẹnyụn̄ ẹsọn̄ọ enye idem ke ini afanikọn̄. Ekeme ndidi mbon esop mbufo ẹn̄wan̄wam fi n̄ko.

YAK MBIOWO ẸN̄WAM FI

Abasi ọnọ nnyịn mbiowo n̄ko ke esop man ẹn̄wam nnyịn. Bible ọdọhọ ke mmọ “ẹtie nte ebiet eke ẹdịbede ẹbọhọ ofụm ye ọtọ udak edịm, ẹtie nte ediwak idịm ke edisat isọn̄, ẹtie nte mfụt akwa itiat ke isọn̄ oro akpade mba.” (Isa. 32:2) Enem nnyịn ndidiọn̄ọ ke nditọete emi ẹkeme ndin̄wam nnyịn. Ntre, sika bịne mmọ ke ini enyenede mfịna. Mbiowo ẹdiọn̄ọ ndidọn̄ owo esịt ẹsinyụn̄ ẹn̄wam owo aka iso anam n̄kpọ Jehovah.

Edi imọdiọn̄ọ ke mbiowo idikemeke ndikọk kpukpru mfịna nnyịn. Mmọ ifọnke ima, ẹnyụn̄ ẹnyene mmeme nte kpukpru nnyịn. (Utom 14:15) Kpa ye oro, akam emi mmọ ẹsibọn̄de ẹnọ owo esinen̄ede enyene odudu. (Jas. 5:14, 15) Eyenete nnyịn kiet ke Italy emi ọdọn̄ọde idiọk udọn̄ọ emi esimemde-mem owo esịp ke ata ediwak isua ọdọhọ ete: “Ndiọn̄ọke nte n̄kpakasan̄ade nyọ se iwọrọde mi ekpedi nditọete emi ikesisan̄ake ise mi inyụn̄ iwụt ke imama mi.” Ke ini enyenede mfịna ekededi, mbọk tịn̄ nọ mbiowo; Jehovah emek mmọ man ẹn̄wam fi.

KA ISO SỊN IDEM NAM N̄KPỌ JEHOVAH

Mme n̄kpọ en̄wen do emi ẹkemede ndin̄wam nnyịn iyọ. Kere ban̄a se ikọwọrọde eyenete nnyịn kiet emi ekerede John. Enye ekedi isua 39 ke ini ẹkediọn̄ọde ke enye enyene ata esen esen kansa. Brọda emi ọdọhọ ete: “Ama abiak mi ke akparawa nte ami ọkpọdọn̄ọ utọ udọn̄ọ emi; ntọn̄ọke-ntọn̄ọ uwem kan̄a.” Akpan esie ekedi isua inan̄ kpọt ini oro. Enye ọdọhọ ete: “Akana n̄wan mi ese aban̄a ekpri eyen nnyịn, ese aban̄a mi, afiak esimen mi aka ufọkibọk.” Usọbọ oro ẹkenọde enye akpakakam owot enye; ama esifịna enye etieti onyụn̄ esinam idem emem enye. Kpa ke ukem ini oro, ete brọda John ama ọtọn̄ọ udọn̄ọ—udọn̄ọ ada owo ibuot—ndien akana ẹse ẹban̄a enye n̄ko.

Nso ikan̄wam brọda John ọyọ utọ afanikọn̄ emi? Enye ọdọhọ ete: “Kpa ye oro idem esimemde mi kpukpru ini, mma ndomo ndikụt nte ke imanam ofụri se isinamde man ika iso ikpere Jehovah. Ima isidomo ndidụk mbono esop kpukpru ini, iwọrọ an̄wautom kpukpru urua, inyụn̄ inịm utuakibuot ubon kpukpru urua idem ke ini idem ekenen̄erede emem mi.” John ama okụt ke ndisịn idem nnam n̄kpọ Abasi ekeme ndin̄wam owo ọyọ afanikọn̄. Enye etịn̄ se imọ ikpọdọhọde mbon oro ẹnyenede ikpọ mfịna ete: “Esịt esinen̄ede etịmede owo ke nsonso oro afanikọn̄ esịmde enye, edi oyokụt ke Jehovah ayan̄wam fi nte ini akade, oyonyụn̄ okụt adan̄a nte enye amade fi. Jehovah ayanam fi ọsọn̄ idem, kpa nte enye anamde mi nsọn̄ idem.”

Imokụt ke Abasi ekeme ndin̄wam nnyịn iyọ se ededi oro esịmde nnyịn idahaemi, m̀mê se ededi oro ekemede ndisịm nnyịn ke ini iso. Mmọdo, sibọn̄ akam kpukpru ini dọhọ enye an̄wam fi. Nen̄ede sịk kpere nditọete ke esop. Sika bịne mbiowo ke ini enyenede mfịna, nyụn̄ ka iso sịn idem nam n̄kpọ Jehovah. Jehovah ayan̄wam fi ọyọ afanikọn̄ ekededi oro esịmde fi idahaemi, ye se ededi oro ekemede ndisịm fi ke ini iso.

^ ikp. eki. 2 Ẹkpụhọ ndusụk enyịn̄.