Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JUNE 2015

“Edieke Kingsley Ekemede Ndinam, Ọwọrọ Mmọn̄ Nnam”

“Edieke Kingsley Ekemede Ndinam, Ọwọrọ Mmọn̄ Nnam”

ẸTỤK Kingsley afara, enye ọtọn̄ọ ndikot Bible. Akpa ini enye anamde n̄kpọ ke Ufọkn̄wed Utom Ukara Abasi edi emi. Kingsley okot se ẹwetde ketket, ata ediye ediye, isioho ikọ ndomokiet iduọk. Edi bet ise! Ntak emi enye mîsehe Bible?

Kingsley odụn̄ ke Sri Lanka. Enye edi nnan afiak enyene mfịna ke utọn̄, inyụn̄ ikemeke ndisan̄a ke idemesie, esitie ke n̄kpọitie mbon n̄kpọnnam. Edi enye akasan̄a didie ekpep Ikọ Abasi tutu edi se esịnde enyịn̄ ke Ufọkn̄wed Utom Ukara Abasi? Yak ntịn̄ nnọ fi.

Idem ama enen̄ede akpa mi akpa ini emi n̄kọkwọrọde ikọ nnọ enye. Mma n̄kụt ke enye enen̄ede oyom ndifiọk Ikọ Abasi. Ediwak nditọete nnyịn ẹma ẹkpekpep enye Bible. N̄wed Ifiọk Oro Adade Osịm Nsinsi Uwem eke mme nnan emi enye ekenyenede ama ataha aka anyan. * Enye ama enyịme ndifiak ntọn̄ọ n̄kpep n̄kpọ, edi ima inyene mfịna iba.

Akpa mfịna emi ikenyenede edi ke Kingsley okodụn̄ ke ufọk emi n̄kani iren ye n̄kani iban ye mbon n̄kpọnnam ẹsidụn̄de. Uyom ama esikpon do etieti, ndien Kingsley ke idemesie ama enyene mfịna n̄ko ke utọn̄, ntre akana mmenede uyo ntịn̄ ikọ uyo ọsọn̄. Uyo mi ama esisọn̄ tutu kpukpru owo ke ufọk oro ẹkop ofụri se inemede.

 Ọyọhọ mfịna iba emi ikenyenede edi ke Kingsley isisọpke imụm n̄kpọ, ntre ikesikpep n̄kpọ n̄kpri n̄kpri. Kingsley ama esinen̄ede etịm idem man ukpepn̄kpọ nnyịn enyene ibuot. Enye ama esikot afiak okot se idikpepde, ada Bible mme nnan ese mme itie N̄wed Abasi emi ẹsiakde ẹsịn ke ikpehe ekikere onyụn̄ omụm se enye edibọrọde esịn ke ibuot. Emi ama esifọn ye ukpepn̄kpọ nnyịn etieti. Ke ini ikpepde n̄kpọ, enye ekesitie ke isọn̄ akpan̄ ukot. Ama emehe enye ndimia isọn̄ mmenede uyo ntịn̄ se enye ekpepde. Nte ini akade, ima itọn̄ọ ndisikpep n̄kpọ ikaba ke urua, isitie isịm hour iba ke ebe kiet.

ỌTỌN̄Ọ NDIDỤK MBONO ESOP ONYỤN̄ ỌBỌRỌ MBỤME

Kingsley ye Paul

Kingsley ama enen̄ede oyom ndisidụk mbono esop, edi emi ikedịghe ekpri utom. Akana ẹmemen enye ẹdori ke n̄kpọitie mbon n̄kpọnnam ẹwere ẹkemenede ẹsịn ke moto. Ẹma ẹsịm Ufọkmbono Obio Ubọn̄, akana ẹmen enye ẹdụk ẹnyụn̄ ẹfiak ẹmen enye ntem sụn̄ ẹnyọn̄ ufọk esie. Edi ediwak nditọete ẹkekam ẹmama ndin̄wam enye, ẹda nte inam inọ Abasi. Kingsley ekesitie ekpere spika ke Ufọkmbono Obio Ubọn̄ man enen̄ede okop se ẹkpepde, onyụn̄ etiene ọbọrọ mbụme.

Ke Kingsley ama ekekpep n̄kpọ ke ọfiọn̄ ifan̄, enye ama esịn enyịn̄ ke Ufọkn̄wed Utom Ukara Abasi. Urua iba mbemiso enye anamde akpa n̄kpọ emi ẹkenọde enye ke Ufọkn̄wed Utom Ukara Abasi, mma mbụp enye m̀mê enye ke okot itie N̄wed Abasi oro ẹkenọde enye. Enye ama ọdọhọ, “Ke n̄kot, mmokot nyọhọ n̄kpọ nte utịm ike-30.” Mma ndọhọ enye ke enye anam etieti, nnyụn̄ ndọhọ enye okot yak n̄kop. Enye ama okụbọde Bible esie, odori nnuenubọk esie onyụn̄ ọtọn̄ọ ndikot. Edi mma n̄kụt ke enye ekenịm ubọk ebiet kiet, idaha ubọk isan̄a ke Bible nte mme nnan ẹsinamde. Ete mbon ama omụm ofụri itien̄wed oro ọdọn̄ ke ibuot!

Idem ama akpa mi tutu mmọn̄eyet asiaha mi ke enyịn. Mma mbụp enye nte enye akasan̄ade omụm ofụri itien̄wed oro ke ini edide enye okokot itie oro ike-30 kpọt. Enye ama ọdọhọ mi ete, “Oh, idịghe ike-30 kpọt ke n̄kot, nsikot n̄kpọ nte utịm ike-30 ke usen.” Ọwọrọ ke ofụri ọfiọn̄ kiet, Kingsley ama esibri n̄kpọ ke isọn̄ etie okot itien̄wed oro, okot afiak okot, tutu ofụri itie Bible oro odụk enye ibuot.

Ke usen emi Kingsley ekenyenede ndinam n̄kpọ, ekedi m̀mê enye okokụre m̀mê ikụreke, mme owo ẹkwak ubọk tutu owo ikemeke ndidọhọ ẹtre; ediwak owo ẹtua ndikụt se nnan ekemede ndinam. Eyenete kiet emi ama eketre ndinam n̄kpọ ke Ufọkn̄wed Utom Ukara Abasi ke ntak nnyekidem ama ọdọhọ ẹfiak ẹsịn imọ enyịn̄. Ntak emi enye oyomde ndifiak nsịn enyịn̄? Eyenete oro ọkọdọhọ ete, “Edieke Kingsley ekemede ndinam, ọwọrọ mmọn̄ nnam!”

Ke Kingsley ama ekekpep Bible ke isua ita, enye ama ayak idemesie ọnọ Jehovah onyụn̄ ana baptism ke September 6, 2008. Enye ama ama Abasi tutu usen n̄kpa esie ke May 13, 2014. Kingsley ama enen̄ede enịm ke isọn̄ emi eyedi Paradise, ndien ke imọ iyetiene idu do, ida ukot ye enyịn imọ inam n̄kpọ Abasi. (Isa. 35:5, 6)—Paul McManus ọnọ mbụk emi.

^ ikp. eki. 4 Ẹkesio ke 1995, edi owo imịn̄ke aba idahaemi.