Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MAY 2015

Kpeme Idem—Satan Oyom Nditata Fi!

Kpeme Idem—Satan Oyom Nditata Fi!

“Ẹdu ke ukpeme. Asua mbufo, kpa Devil, ke oyoyo nte ekpe eke okụnide, oyom owo eke enye editade.”—1 PET. 5:8.

1. Tịn̄ nte angel Abasi kiet akasan̄ade edi Satan.

ENYE ekedi ata eti angel Jehovah; ete ise, enye oforo n̄kpọ en̄wen, ọtọn̄ọ ndikere ke imọ ke mme owo ẹkpekam ẹtuak ibuot ẹnọ, idịghe Abasi. Ndien utu ke ndisọsọp nsio utọ idiọk ekikere emi mfep ke esịt esie, enye ama etie ekere tutu akanam idiọkn̄kpọ. (Jas. 1:14, 15) Nnyịn idiọn̄ọke nte ekesikotde enye ke heaven, edi ẹkot enye Satan idahaemi. Enye ‘ikọsọn̄ọke ida ke akpanikọ,’ edi ama ọsọn̄ ibuot ye Jehovah onyụn̄ akabade “ete nsu.”—John 8:44.

2, 3. Ntak emi Bible okotde asua Jehovah “Satan,” “Devil,” “urụkikọt,” ye “dragon”?

2 Tọn̄ọ Satan ọkọsọn̄ ibuot ye Jehovah, se enye anamde owụt ke idụhe eke asuade Jehovah nte enye. Enye inyụn̄ imaha owo ndomokiet. Nsio nsio enyịn̄ emi ẹkotde enye ke Bible anam idiọn̄ọ adan̄a nte enye abiarade eketre. Ẹkot enye Satan, ndien Satan ọwọrọ andibiọn̄ọ. Emi owụt ke enye asua onyụn̄ ọbiọn̄ọ ukara Abasi, iyomke-yom ndikụt Abasi akarade mme owo. Idụhe se ikpenemde Satan nte ndibiat ukara Jehovah.

3 Ediyarade 12:9 okot Satan, Devil. Devil ọwọrọ ọdọk  edidọk. Satan ama ọsọn̄ọ Jehovah enyịn, okot enye osu nsu. Bible okot Satan n̄ko “akani urụkikọt,” ndien emi esiti nnyịn nte Satan akadade urụkikọt abian̄a Eve ke In̄wan̄ Eden. Enyịn̄ en̄wen emi ẹkotde enye edi “akwa dragon,” ndien enyịn̄ emi enen̄ede odot enye sia enye edi ata idiọk mbuka ye ibak. Enye odomo etieti ndibiat se ededi oro Jehovah aduakde ndinam onyụn̄ oyom ndiwot kpukpru ikọt Abasi nsion̄o.

4. Nso ke iyom ndineme ke ibuotikọ emi?

4 Kpukpru emi owụt ke Satan ke odomo ndinam nnyịn ikpọn̄ Abasi. Enye esịn Bible ọnọ nnyịn item ete: “Ẹnyene ikike, ẹnyụn̄ ẹdu ke ukpeme. Asua mbufo, kpa Devil, ke oyoyo nte ekpe eke okụnide, oyom owo eke enye editade.” (1 Pet. 5:8) Imọn̄ ineme iban̄a edu Satan ita. Ke ini inemede n̄kpọ emi, oyokụt ntak emi anade ikọt Abasi ẹnen̄ede ẹkpeme idem ye akwa asua Abasi emi mîmaha ikọt Abasi mi.

SATAN ENYENE ODUDU ETIETI

5, 6. (a) Tịn̄ mme n̄kpọ emi owụtde ke Satan ‘okop odudu’ etieti. (b) Satan esisan̄a didie owot owo?

5 Mme angel ‘ẹkop odudu’ etieti. (Ps. 103:20) Mmọ ẹfiọk n̄kpọ ẹnyụn̄ ẹnyene odudu ẹkan mme owo. Mmọ ẹsida odudu mmọ ẹnam nti n̄kpọ. Ke uwụtn̄kpọ, angel kiet ama anam n̄kpọ emi owo ndomokiet m̀mê ata ediwak mbonekọn̄ mîkpekemeke ndinam—enye ama owot mbonekọn̄ Assyria 185,000 ke okoneyo kiet. (2 Ndi. 19:35) Ini en̄wen, angel kiet ama ada ifiọk ye akwa odudu esie osion̄o mbet Jesus ke ufọk-n̄kpọkọbi. Enye ama ọkpọhọde usụn̄ ufọk-n̄kpọkọbi osion̄o mme apostle, ekem afiak ọkọbi usụn̄ oro—mme ekpeme ufọk-n̄kpọkọbi do ẹda ikwe enye!—Utom 5:18-23.

6 Nti angel Abasi ẹda odudu mmọ ẹnam nti n̄kpọ; Satan ada eke esie abak ibak. Ufọn idụhe ndifan̄a, Satan enyene odudu etieti. Bible okot enye “andikara ererimbot emi,” afiak okot enye “abasi editịm n̄kpọ emi.” (John 12:31; 2 Cor. 4:4) Satan akam ekeme ndiwot owo. (Heb. 2:14) Emi iwọrọke ke Satan ada ubọk esie owot kpukpru mbon emi ẹkpade. Nso ke ọwọrọ ndien? Akpa, mme owo ke ererimbot ẹsua owo ẹnyụn̄ ẹbak ibak nte Satan. Ọyọhọ iba, kpukpru n̄kpa ye idiọkn̄kpọ ke ererimbot emi ọkọtọn̄ọ ke ini Eve ekenịmde nsu Satan, Adam onyụn̄ ọsọn̄ ibuot ye Abasi. (Rome 5:12) Nte Satan esisan̄ade owot owo edi emi. Jesus okokot enye “owotowo,” ndien se enye onyụn̄ edide edi oro. (John 8:44) Satan imaha owo nnyịn ndomokiet!

7. Nso iwụt ke mme demon ẹnyene odudu?

7 Edieke nnyịn mîdaha ye Satan, ọwọrọ nnyịn n̄ko idaha ye mbon emi ẹdade ye enye ẹn̄wana ye Abasi. Ata ediwak ndiọi angel—mme demon—emi ẹkesọn̄de ibuot ye Abasi ẹsịne ke otu emi. (Edi. 12:3, 4) Bible etịn̄ afiak etịn̄ nte mme demon ẹdade akwa odudu mmọ ẹbak ibak ẹnyụn̄ ẹtụhọde mme owo. (Matt. 8:28-32; Mark 5:1-5) Kûdedei ukere ke mme demon ye “andikara . . . mme demon” ikemeke ndinam fi n̄kpọ. (Matt. 9:34) Mîkpedịghe Jehovah, Satan akpakan nnyịn.

SATAN ABAK IBAK ETIETI

8. (a) Nso ke Satan enen̄ede oyom? (Se akpa ndise ibuotikọ emi.) (b) Nso ke afo ke idemfo okụt ke ererimbot emi owụtde ke Satan edi ata ibak?

8 Apostle Peter ọdọhọ ke Satan etie nte “ekpe eke okụnide.” N̄wed kiet ọdọhọ ke Peter eketịn̄ aban̄a “n̄kụni idiọk unam emi biọn̄ ọdọn̄de.” Emi owụt nte  Satan abakde ibak eketre. Kpa ye emi ofụri ererimbot esịnede enye ke ubọk, enye ke oyoyom mbon en̄wen emi enye editade. (1 John 5:19) Mme Christian emi ẹyetde aran ye “mme erọn̄ en̄wen” ke enye enen̄ede oyom. (John 10:16; Edi. 12:17) Satan oyom ndisobo ikọt Jehovah mfep. Nte ẹkọbọde mme Christian toto ke eyo mme apostle tutu esịm eyo nnyịn owụt adan̄a nte Satan abakde ibak.

9, 10. (a) Didie ke Satan okodomo ndibiat nditọ Israel? (Nọ uwụtn̄kpọ.) (b) Ntak emi Satan ekenen̄erede afịna nditọ Israel? (c) Afo ekere ke esitie Satan didie ke idem ke ini asan̄autom Jehovah anamde akwa idiọkn̄kpọ?

9 Enyene ibak en̄wen emi Satan abakde man osụk ọbiọn̄ọ uduak Abasi. Ekpe emi biọn̄ ọdọn̄de isituaha unam ekededi emi odụkde enye ubọk mbọm, esịt isinyụn̄ imiaha enye ufen ama ata ama. Satan n̄ko isituaha mbon emi enye oyomde ndita mbọm. Ke uwụtn̄kpọ, ekere ke eketie Satan didie ke idem ke ini enye okokụtde nte nditọ Israel ẹnamde oburobụt ido ẹnyụn̄ ẹdiọkde itọn̄? Esịt ama enem enye etieti ke ini enye okokụtde se oburobụt ido Zimri ye idiọkitọn̄ Gehazi ẹkedade ẹdi.—Num. 25:6-8, 14, 15; 2 Ndi. 5:20-27.

Esịt esinem Satan etieti ke ini asan̄autom Jehovah anamde idiọkn̄kpọ (Se ikpehe ekikere 10)

10 Enyene akpan n̄kpọ emi akanamde Satan enen̄ede afịna nditọ Israel. Messiah, emi ediwotde Satan edinyụn̄ anamde ẹdiọn̄ọ ke Jehovah ikpọn̄ odot ndikara enyọn̄ ye isọn̄, edito idụt Israel. (Gen. 3:15) Enye ikoyomke Abasi aka iso ama nditọ Israel, oro akanam enye odomo ofụri ukeme esie ndinam mmọ ẹnam n̄kpọ emi edinamde Abasi osobo mmọ efep. Ndi emekere ke mbọm Moses ama anam Satan ke ini enye mîkodotke aba ndidụk Isọn̄ Un̄wọn̄ọ? Ndi emekere n̄ko ke mbọm David ama anam Satan ke ini enye ekesịnde efịbe? Ke m̀mọ̀n̄ ke mbọm owo akpanam ọbọn̄ ibak! Esịt akakam enenem enye ndikụt nte ikọt Abasi ẹnamde akwa idiọkn̄kpọ. N̄kpọ ntem ke enye esida osụn̄i Jehovah.—N̄ke 27:11.

11. Nso ke Satan okpokoyom Sarah anam?

11 Ubon emi Messiah editode ke  Satan akasua akan. Ke uwụtn̄kpọ, kere se iketịbede esisịt ini ke Abasi ama ọkọdọhọ Abraham ke iyanam enye edi “akwa idụt.” (Gen. 12:1-3) Ke adan̄aemi Abraham ye Sarah ẹkedude ke Egypt, Pharaoh ama ọdọhọ ẹmen Sarah ẹsọk imọ. Enye okoyom ndidọdọ Sarah. Edi Jehovah ikayakke utọ n̄kpọ oro esịm Sarah. (Kot Genesis 12:14-20.) Ukem n̄kpọ emi ama afiak etịbe ke Gerar esisịt ini mbemiso Isaac amanade. (Gen. 20:1-7) Ndi Satan akanam kpukpru emi? N̄kọ emeti ke Sarah ọkọkpọkpọn̄ inyene ke Ur etiene Abraham okodụn̄ ke tent. Okûdi Satan ekekere ke Sarah ayama ediye ufọk ubọn̄ Pharaoh m̀mê eke Abimelech? Ndi enye ama ekere ke Sarah ọyọkpọn̄ Abraham ọkọdọ kiet ke otu mmọ onyụn̄ edue Jehovah? Bible itịn̄ke, edi etie nte esịt ekpekenen̄ede enem Satan edieke Sarah akpakanamde n̄kpọ emi edinamde enye okûdot aba ndiman eyen emi Messiah editode ubon esie. Esịt ikpakafịnake Satan ndikụt Sarah abiatde ndọ esie, abiat enyịn̄ esie, onyụn̄ etre ndinam n̄kpọ Jehovah. Satan edi ata ibak!

12, 13. (a) Didie ke Satan okowụt ke idi ọbọn̄ ibak ke ini Jesus akamanade? (b) Afo ekere ke Satan ada didie mme uyen emi ẹmade Jehovah ẹnyụn̄ ẹdomode ndinam n̄kpọ Abasi?

12 Jesus akamana ata ediwak isua ke Abraham ama akakpa. Ndi emekere ke Satan ama enem esịt ke ediye nsekeyen amana? Ihih ikenemke! Satan ama ọfiọk ke nsekeyen emi edidi Messiah ama okpon. Enye edidi mfri Abraham emi Abasi ọkọdọhọde ke ‘ayabiat utom Devil.’ (1 John 3:8) Ndi emekere ke Satan ama ekere ke idịghe se ẹkpewotde utọ ekpri nsekeyen oro? Utọ eti n̄kpọ oro ikemeke-keme ndidụk enye esịt. Enye ama ọsọsọp oyom usụn̄ ndiwot Jesus. Didie ke enye akanam emi?

13 Esịt ama enen̄ede ayat Edidem Herod ke ini mme asiak ntantaọfiọn̄ ẹkekade Jerusalem ẹkebụp m̀mê “enye emi amanade nte edidem mme Jew” odu m̀mọ̀n̄. Enye ama ebiere ndiwot Jesus. (Matt. 2:1-3, 13) Man okụt ete ke ẹwot Jesus, enye ama odọn̄ ẹkewot kpukpru nditọ irenowo emi mîbehe isua iba ke Bethlehem ye ke n̄kann̄kụk oro. (Kot Matthew 2:13-18.) Jesus ama ọbọhọ utọ afai afai n̄kpa oro, edi nso ke mbụk emi ekpep nnyịn aban̄a asua nnyịn emi? Enye owụt ke Satan idaha uwem owo ke n̄kpọ ndomokiet. Mbọm nditọwọn̄ isinamke enye. Bible enen ndidọhọ ke Satan edi “ekpe eke okụnide.” Ibak esie inyeneke mbiet. Kûdedei ukere ke inyeneke se enye ekemede ndinam fi!

SATAN OKPON ABIAN̄A ETIETI

14, 15. Didie ke Satan “anam ikike mbon oro mînịmke ke akpanikọ ekịm”?

14 Mîkpedịghe abian̄a emi Satan esibian̄ade mme owo, enye ikpekemeke ndiwọn̄ọde owo ndomokiet n̄kpọn̄ Jehovah, edima Abasi nnyịn. (1 John 4:8) Satan esibian̄a mme owo mbak mmọ ‘ẹdikere ẹban̄a se inanade mmọ ke n̄kan̄ eke spirit,’ oro edi, mbak mmọ idikere ke ọfọn mmimọ isịk ikpere Jehovah inyụn̄ idi ufan esie. (Matt. 5:3) Ntak edi oro enye “[anamde] ikike mbon oro mînịmke ke akpanikọ ekịm, mbak un̄wana ubọn̄ ubọn̄ eti mbụk emi aban̄ade Christ, emi edide mbiet Abasi, ediyama ọnọ mmọ.”—2 Cor. 4:4.

15 Usụn̄ kiet emi Satan amade ndida mbian̄a mme owo edi nsunsu ido ukpono. Kpa ye emi enye ọdiọn̄ọde ke Jehovah Abasi oyom “san̄asan̄a utuakibuot,” esinenem enye ndikụt mme owo ẹkpọn̄de Jehovah ẹketuak ibuot ẹnọ mme ete ete mmọ emi ẹma ẹkekpan̄a, m̀mê se  Abasi okobotde, utọ nte owo ye unam! (Ex. 20:5) Ediwak owo ẹkere ke inam n̄kpọ Abasi, edi mmọ ibọhọke nsunsu ukpepn̄kpọ ye mme edinam emi mînyeneke ufọn. Mbọm mmọ esinam nnyịn tutu. Nditọ Israel ẹma ẹsinam ukem n̄kpọ emi ke eyo Isaiah. Mbọm mmọ ama anam Jehovah tutu enye ọdọhọ mmọ ete: “Ntak emi mbufo ẹsụk ẹkpede okụk ke se mîdịghe uyo, nso inyụn̄ idi ntak emi mbufo ẹkpade utom ke se mînọhọ mbufo uyụhọ? Ẹtịm ẹkpan̄ utọn̄ ẹnọ mi, ẹnyụn̄ ẹdia se ifọnde, ẹnyụn̄ ẹyak ukpọn̄ mbufo enen̄ede adat esịt ke isek.”—Isa. 55:2.

16, 17. (a) Nso ikanam Jesus ọdọhọ Peter: “Da mi ke edem, Satan”? (b) Didie ke Satan ekeme ndinam nnyịn ikere ke utịt ikpereke?

16 Satan ekeme n̄ko ndibian̄a mme asan̄autom Jehovah emi ẹsịnde idem ẹnam n̄kpọ Abasi. Ke uwụtn̄kpọ, ndi emeti se iketịbede ke ini Jesus ọkọdọhọde mbet esie ke ẹmọn̄ ẹwot imọ? Apostle Peter ama ada Jesus esịk ada n̄kan̄ kiet, ete enye: “Tua idemfo mbọm, Ọbọn̄; n̄kpọ emi idiwọrọke fi tutu amama.” Edi Jesus ama ọsọn̄ọ asua ọnọ enye ete: “Da mi ke edem, Satan!” (Matt. 16:22, 23) Ntak emi Jesus okokotde Peter “Satan”? Sia Jesus ama ọfiọk se iditịbede ke mîbịghike. Ini ama esesịm ama enye ndikpa mfak mme owo nnyụn̄ n̄wụt ke Devil edi osu nsu. Ata akpan ini ekedi oro tọn̄ọ ẹkebot owo. Idịghe utọ ini oro ke Jesus akpatua idemesie mbọm. Esịt ekpekenem Satan ekpedi Jesus ama etie eseme idem.

17 Utịt editịm n̄kpọ emi enen̄ede ekpere; idu uwem ke ndiọkeyo. Satan oyom nnyịn ‘itua idem nnyịn mbọm.’ Enye oyom nnyịn ida ofụri ini nnyịn in̄wana iyom ndidi n̄kpọ ke ererimbot emi. Enye iyomke nnyịn idu uwem nte imọfiọk ke utịt ekpere, inyụn̄ iyomke nnyịn idu ke ukpeme. Kûdu utọ uwem oro! ‘Du ke ukpeme.’ (Matt. 24:42) Satan ke abian̄a mme owo ọdọhọ ke utịt ikpetke-kpet ndidi, mîdịghe ọdọhọ ke utịt idikam idịghe-di. Kûnịm utọ anafai nsu oro.

18, 19. (a) Nso ke Satan ekeme ndinam nnyịn ikere iban̄a idem nnyịn? (b) Didie ke Jehovah esin̄wam nnyịn ifiọk nte inamde n̄kpọ inyụn̄ idu ke ukpeme?

18 Se ise usụn̄ en̄wen emi Satan esidomode ndida mbian̄a nnyịn. Enye oyom nnyịn ikere ke nnyịn idotke se Jehovah amade ye nte ke Jehovah idifenke mme idiọkn̄kpọ nnyịn. Ata nsu ke edi. Kere ise: Anie ke afo ekere ke ikpanaha Jehovah ama? Ndi idịghe enye Satan? Idiọkn̄kpọ anie ke afo ekere ke ikpanaha Jehovah efen? Ndi idịghe eke Satan? Bible ọdọhọ nnyịn ete: “Abasi ikwan̄ake eke ekpesịnde enye efre utom mbufo ye ima eke mbufo ẹwụtde ẹban̄a enyịn̄ esie.” (Heb. 6:10) Jehovah ama ofụri se inamde man inem enye esịt; se inamde inọ enye iditakke-tak. (Kot 1 Corinth 15:58.) Mmọdo, yak ikûdedei inịm nsu Satan ndomokiet.

19 Imokụt ke Satan enyene odudu, abak ibak, onyụn̄ osu nsu etieti. Didie ke ikeme ndin̄wana n̄kan utọ asua emi? Jehovah iyakke in̄wana ikpọn̄. Ikọ esie ayarade mme n̄kari Satan, anam nnyịn “[ikûnana] ifiọk iban̄a mme n̄kukan esie.” (2 Cor. 2:11) Edieke itịmde ifiọk mme n̄kari Satan, iyọdiọn̄ọ nte inamde n̄kpọ iyonyụn̄ idu ke ukpeme. Edi ikụreke ke ndifiọk n̄kari Satan. Bible ọdọhọ ete: “Ẹbiọn̄ọ Devil, ndien enye eyefehe ọkpọn̄ mbufo.” (Jas. 4:7) Ke ibuotikọ oro etienede, iyeneme nte ikemede ndin̄wana ye Satan n̄kan ke nsio nsio n̄kpọ ita.