Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MAY 2015

 OTO ITIEUTOM UBON N̄KANI N̄KPỌ NNYỊN

Ẹkenam Kpukpru N̄kpọ ke Ima ke Cafeteria

Ẹkenam Kpukpru N̄kpọ ke Ima ke Cafeteria

TOTO ke eset, ikọt Abasi ẹsima ndisop idem ọtọkiet n̄kpep Ikọ Abasi. Esinem mmọ nditie kiet ndia ata udia ke ini ntem.

Ke September 1919, Nditọ Ukpepn̄kpọ Bible ẹma ẹnịm mbono usen itiaita ke Cedar Point, Ohio, ke U.S.A. Ẹma ẹbọ ufọkisen ẹnyụn̄ ẹdọhọ mmọ ẹnam udia ẹnọ mbon emi ẹdidide, edi mbon emi ẹkedide ẹma ẹwak ẹkan nte ẹkekerede. Ẹma ẹwak tutu mbon ufọkisen emi ẹkenọde udia ẹwọn̄ọ kpukpru ẹnyọn̄ọ ke ntak emi mîdiọn̄ọke se ẹkpenamde. Akwaowo ufọkisen emi ekesede enyịn ke cafeteria oro ama obụp nditọete m̀mê ẹkeme ndidọhọ mme uyen nnyịn ẹn̄wam imọ ẹdeme udia, ediwak uyen ẹma ẹnyịme. Sadie Green esịne ke otu mme uyen emi. Enye ọdọhọ ete: “Akpa ini emi n̄kanamde utọ utom oro ekedi oro, edi ama enem mi tutu.”

Sierra Leone, 1982

Ọtọn̄ọde ke isua oro, nditọete nnyịn ẹma ẹsin̄wam etieti ke ini ẹketọn̄ọde ndinyam udia ke itie mbono. Ediwak uyen emi ẹkedianade ye nditọete eken ẹn̄wam ke utom cafeteria ẹma ẹbọ ufọn en̄wen. Utom emi ama anam mmọ ẹbiere ndisịn idem nnam n̄kpọ Abasi. Gladys Bolton ama etiene anam utom ke cafeteria ke akamba mbono 1937. Enye ọdọhọ ete: “Mma nsobo ye mme owo emi ẹtode nsio nsio itie. Mmọ ẹma ẹsitịn̄ nte iyọde nsio nsio mfịna. Ini oro ke utom usiakusụn̄ ọkọtọn̄ọ ndidọn̄ mi.”

Beulah Covey ọdọhọ ke ‘nditọete ẹma ẹdiana kiet ẹnam utom nte iyọn̄’ ke mbono kiet emi enye okodụkde. Nte ededi, utom ke cafeteria ikesimemke ndusụk ini. Ke Angelo Manera ama ekesịm Dodger Stadium ke Los Angeles, California, ke 1969, ẹma ẹdọhọ enye ke enye edise aban̄a cafeteria. Enye ọdọhọ ete: “Akanam idem inyekke mi ntre!” Kiet ke otu n̄kpọ emi ẹkenamde mbemiso mbono ọtọn̄ọde ekedi ndisiak isọn̄ ndọn̄ pipe emi edimende gas ito anyan usụn̄ idisịm cafeteria.

Frankfurt, Germany, 1951

Ke 1982 ke Sierra Leone, nditọete ẹkenyene nditem mbiet kan̄a ẹnyụn̄ ẹnam itie oro asana mbemiso ẹdade ọkọkọk ye n̄kpọ eken ẹbọp cafeteria. Ke 1951 ke Frankfurt ke Germany, nditọete ẹma ẹbọ engine tren ke ukpeokụk, ẹda uye oro enye esision̄ode ẹtem eso udia 40. Nditọete emi ẹkekọpde udia ẹkekọp usan  udia 30,000 ke hour kiet. Utom ama okpon etieti ọnọ owo 576 emi ẹkeyetde usan, ikpan̄, ikwa, ye cup, tutu edi se ẹdọhọde nditọete ẹsikama fork ye ikwa mmọ ẹdi mbono. Nditọete ke Yangon ke Myanmar ẹma ẹsikere ẹban̄a mbon emi ẹtode nsio nsio idụt ẹdidụk mbono ke obio mmọ, ikûnyụn̄ inen̄ekede isịn ntokon ke udia nte mmọ ẹsisịnde ke udia mmọ.

“ẸDADA ẸDIA UDIA”

Annie Poggensee ama ada ke eyo ke ata anyan udịm oyom ndidep udia ke mbono kiet emi ẹkenịmde ke United States ke 1950, edi emi ama ọfọn ye enye. Enye ọdọhọ ete: “Nneme emi nditọete iba emi ẹkesan̄ade ke ubom ẹto Europe ẹdi United States ẹkenemede ama enem mi etieti.” Mmọ mbiba ẹma ẹtịn̄ nte Jehovah akan̄wamde mmimọ idụk mbono oro. Enye ọdọhọ ete: “Nsehe nte ama odu owo ke an̄wa mbono oro, emi esịt ekenemde nte nditọete iban iba oro. Mmọ ikadaha ufiop eyo ye ofụri ini oro ikabiatde ida ibet ndidep udia do ke n̄kpọ ndomokiet.”

Seoul, Korea, 1963

Ke ediwak ikpọ mbono, ẹma ẹsinịm okpokoro emi okon̄de ke cafeteria man nditọete ẹdada ẹdia udia, ẹsọp ẹwọrọ ẹkpọn̄ itie ẹnọ mbon en̄wen. Mîkpedịghe ntre, mbono uwemeyo ọkpọtọn̄ọ aka anyan, ata ediwak owo idiaha udia ima. Owo kiet emi mîdịghe Ntiense, emi okodụkde mbono oro, ọkọdọhọ ete: “Akpa n̄kụtde utọ ufọkabasi emi edi emi; ẹdada ẹdia udia!”

Ama esiye mbonekọn̄ ye ikpọ owo ukara ndikụt nte inamde n̄kpọ ke nde ke nde, inam akamba n̄kpọ ke ata ekpri ini. Ke akwaowo ekọn̄ United States kiet ama akasan̄a ese cafeteria nnyịn ke Yankee Stadium, enye ama ọdọhọ Major Faulkner, emi akanamde utom ke British War Department, ete etiene okokụt se imọ ikụtde. Ete oro ama asan̄a ye n̄wan esie ke 1955 odụk “Triumphant Kingdom” Assembly oro ẹkenịmde ke Twickenham ke England. Enye ọkọdọhọ ke ẹkenam kpukpru n̄kpọ ke ima ke cafeteria nnyịn.

Ke ata ediwak isua, ẹma ẹsitem ndinem udia emi mîsọn̄ke urua ẹnọ nditọete ke itie mbono. Edi utom emi ikesimemke, ama esida ini, onyụn̄ oyom ata ediwak owo ẹtiene ẹn̄wam. Nditọete ẹma ẹsinam utom tutu ikopke ndusụk se ẹkpepde ke mbono; ndusụk owo ikopke-kop n̄kpọ ndomokiet. Mbemiso 1980, ẹma ẹnam obufa ndutịm man utom utem udia afiak efere. Ẹma ẹtọn̄ọ ndisinọ udia emi mîdaha ini nditem ke ediwak idụt. Emi ama anam mbon emi ẹtemde udia ẹkeme ndikop se ẹkpepde ẹnyụn̄ ẹnyene ini ẹtie ye nditọete eken ẹneme nneme. * Edi 1995, ẹma ẹdọhọ nditọete ẹsikama udia mmọ ẹdi mbono.

Jehovah ama enen̄ede ama mbon oro ẹkesịnde ukeme ẹn̄wam nditọete mmọ! Ke ini ndusụk owo ẹtide nte ẹkesinemde ndidọn̄ ubọk ye nditọete ntem udia, esitie mmọ nte n̄kpọ akpafiak eketie ntre. Kpa ye oro owo mîtemke aba udia ke itie mbono, owo itreke n̄kpọ kiet emi: Ke ẹnanam kpukpru n̄kpọ ke ima ke mbono nnyịn.—John 13:34, 35.

^ ikp. eki. 12 Mme n̄kpọ do emi nditọete ẹsụk ẹkemede ndin̄wam nnam ke itie mbono idahaemi.

Kpep N̄kpọ En̄wen

Mbono “Ẹsan̄a ke Ofụri Ererimbot” Emi Ẹkenịmde

Ke isua 50 emi ẹkebede, Mme Ntiense Jehovah 583 ẹma ẹtọn̄ọ isan̄ urua duop emi ẹdidade mmọ ẹsịm nsio nsio itie ke ererimbot.

Ekpri Vidio: Mbono Emi Mme Ntiense Jehovah Ẹkenịmde ke Ofụri Ererimbot ke 1963

Vidio emi ekedi hour iba. Ẹkesio enye ke 1963 ẹwụt Mme Ntiense Jehovah ke ofụri ererimbot.