Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MAY 2015

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Anie edi Gog isọn̄ Magog oro ẹtịn̄de ẹban̄a ke n̄wed Ezekiel?

Ke ediwak isua, n̄wed nnyịn esitịn̄ ke Gog isọn̄ Magog edi enyịn̄ emi ẹkenọde Satan ke ini ẹkesiode enye ke heaven ẹduọk. Ẹketịn̄ emi sia n̄wed Ediyarade ọdọhọ ke Satan anam mme owo ke ererimbot ẹn̄wana ye ikọt Abasi. (Edi. 12:1-17) Ntre ikesikere ke Gog edi enyịn̄ en̄wen emi ẹsikotde Satan.

Edi se ikenịmde emi ama anam ikere nsio nsio n̄kpọ. Ke uwụtn̄kpọ: Ke ini Jehovah etịn̄de aban̄a ini emi ẹdiwotde Gog, enye ọkọdọhọ ete: “Nyada fi nnọ mme inuen utaokpo ye mme inuen kpukpru orụk mba ye mme unam ikọt nte udia.” (Ezek. 39:4) Jehovah ama ọdọhọ n̄ko ete: “Ndien ama ekem ke usen oro, ami nyọnọ Gog itie do, itie ubụkowo ke Israel . . . Ndien do ke mmọ ẹdibụk Gog ye ofụri otuowo esie.” (Ezek. 39:11) Edi Satan edi spirit. Ntre, ‘mme inuen ye mme unam ikọt’ ẹdisan̄a didie ita spirit? Ẹdisan̄a didie ẹbụk Satan ke isọn̄? N̄wed Ediyarade ọdọhọ ke ẹdisịn Satan ke editụn̄ọ ukpe ke isua tọsịn kiet, idọhọke ke inuen ẹdita m̀mê ke ẹdibobụk enye.—Edi. 20:1, 2.

Bible ọdọhọ n̄ko ke ẹyesio Satan ke editụn̄ọ ukpe ke utịt isua tọsịn kiet oro, ndien ke “enye ọyọwọrọ aka nditụn mme idụt usụn̄ ke inụk isọn̄ mbinan̄, kpa Gog ye Magog, nditan̄ mmọ mbon ọtọkiet nnọ ekọn̄.” (Edi. 20:8) Edi Satan edinam didie ibian̄a Gog edieke enye ke idemesie edide Gog? Emi ọwọrọ ke idịghe Satan edi “Gog” emi ẹtịn̄de ẹban̄a ke prọfesi Ezekiel ye ke n̄wed Ediyarade.

Anie ndien idi Gog isọn̄ Magog? Ọfọn idụn̄ọde N̄wed Abasi man idiọn̄ọ owo emi an̄wanade ye ikọt Abasi. Bible etịn̄ aban̄a en̄wan “Gog isọn̄ Magog,” eke “edidem edere,” ye eke “ndidem isọn̄.” (Ezek. 38:2, 10-13; Dan. 11:40, 44, 45; Edi. 17:14; 19:19) Ndi nsio nsio en̄wan ke ẹtịn̄ ẹban̄a emi? Nnyịn ikereke ntre. Etie nte en̄wan kiet ke Bible ọnọ nsio nsio enyịn̄ oro. Itịn̄ ntem sia N̄wed Abasi ọdọhọ ke kpukpru mme idụt ẹyetiene ẹn̄wana ye ikọt Abasi, ndien emi edinam Abasi ada ekọn̄ Armageddon edi.—Edi. 16:14, 16.

Ima imen se Ezekiel etịn̄de aban̄a akpatre en̄wan emi mme idụt ẹdin̄wanade ye ikọt Abasi idomo ye se Daniel ye n̄wed Ediyarade ẹtịn̄de  n̄ko, iyokụt ke idịghe Satan edi Gog isọn̄ Magog, ke mme idụt emi ẹdidianade kiet in̄wana ye ikọt Abasi ẹkam ẹdi. Ndi “edidem edere” edida iso ke en̄wan emi mme idụt ẹdin̄wanade mi ye ikọt Abasi? Nnyịn idiọn̄ọke. Edi imekere ke edidi ntre ke ntak se Jehovah etịn̄de aban̄a Gog ete: “Afo oyoto ke ebiet fo edi, ke mme ata nsannsan ikpehe edem edere, afo ye ediwak owo emi ẹdude ye afo, kpukpru mmọ ẹwat ke enan̄-mbakara, kpa akwa esop, ata ediwak udịmekọn̄.”—Ezek. 38:6, 15.

Kop mi se prọfet Daniel emi okodude uwem ke ukem ini ye Ezekiel etịn̄de aban̄a edidem edere: “Etop oyoto ke edem usiahautịn ye edem edere editịmede enye, ndien enye ọyọwọrọ ye akwa ifụtesịt aka man ọkọsọhi onyụn̄ osobo ediwak owo. Ndien enye oyowụk tent ufọk ubọn̄ esie ke ufọt akwa inyan̄ ye edisana obot N̄kpọmbana; ndien enye eyesịm utịt esie, idinyụn̄ idụhe owo eke an̄wamde enye.” (Dan. 11:44, 45) Se n̄wed Ezekiel onyụn̄ ọdọhọde nte Gog edinamde edi emi.—Ezek. 38:8-12, 16.

Nso en̄wen iditịbe ke ini mmọ ẹmende en̄wan ẹbịne ikọt Abasi? Daniel ọdọhọ ete: “Ke ini oro, Michael akwa ọbọn̄ [Jesus Christ] emi adade [toto ke 1914] ọnọ nditọ orụk fo, ayadaha ada [ke ini Armageddon]. Ndien ini nnanenyịn oyodu [ini akwa ukụt] emi akanam orụk esie mîdụhe toto nte idụt okodu tutu esịm ini oro. Ndien ke ini oro orụk fo ẹyebọhọ, kpukpru owo emi ẹwetde enyịn̄ ẹsịn ke n̄wed.” (Dan. 12:1) Ediyarade 19:11-21 ọdọhọ n̄ko ke se Jesus edinamde ini oro edi emi.

Edi anie idi “Gog ye Magog” emi ẹtịn̄de ẹban̄a ke Ediyarade 20:8? Ke ini akpatre udomo ke utịt tọsịn isua kiet emi Christ edikarade, mbon emi ẹdisọn̄de ibuot ye Jehovah ẹdibak ibak ye ikọt Abasi nte “Gog isọn̄ Magog”—mme idụt emi ẹken̄wanade ye ikọt Abasi ke akpatre ikpehe akwa ukụt. Ẹyewot kpukpru mmọ n̄ko ẹsion̄o, mmọ idinyụn̄ isetke aba ukem nte mbon emi ẹken̄wanade ye ikọt Abasi ke ini akwa ukụt. (Edi. 19:20, 21; 20:9) Ntre odot ẹkot kpukpru mbon emi ẹdisọn̄de ibuot ke utịt Tọsịn Isua Ukara Christ “Gog ye Magog.”

Nnyịn ke isịn idem ikpep Ikọ Abasi, ke inyụn̄ itie ibet ndikụt owo emi edidide “edidem edere.” Edi inamke n̄kpọ m̀mê anie edida iso ke en̄wan emi mme idụt ẹdin̄wanade ye ikọt Abasi, se idiọn̄ọde edi ke (1) ẹyekan Gog isọn̄ Magog ye udịmekọn̄ esie ẹnyụn̄ ẹwot mmọ; (2) Jesus Christ, edidem nnyịn emi akarade idahaemi ke heaven, ayanyan̄a ikọt Abasi oyonyụn̄ anam mmọ ẹdu ke emem ye ifụre ke obufa ererimbot.—Edi. 7:14-17.