Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  April 2015

Ntak Emi Ndisio Anamidiọk Mfep ke Esop Owụtde ke Ẹma Enye?

Ntak Emi Ndisio Anamidiọk Mfep ke Esop Owụtde ke Ẹma Enye?

EYENETE kiet emi ekerede Julian ọdọhọ ete: “Ke ini ẹketọtde esop nnyịn ke ẹsio eyen mi ẹfep ke esop, eketie mi nte mmọn̄ n̄kpa. Akpan mi ke ntịn̄ mban̄a emi. Mma mma enye etieti; ikesinam kpukpru n̄kpọ kiet. Enye ekedi ata eti eyen, edi ete ise, enye ọtọn̄ọ ndidu ndisịme uwem. N̄wan mi akpakatua akpa, n̄kọdiọn̄ọke nte n̄kpọdọn̄de enye esịt. Ima isikere m̀mê enyene se ete ye eka ẹkpenamde ẹnọ eyen emi nnyịn mîkanamke.”

Edieke n̄kpọ emi esibiakde owo ntem, ntak ndien emi ẹdọhọde ke ndisio owo mfep ke esop owụt ke ẹma enye? Nso ke N̄wed Abasi etịn̄ ndiwụt ke ọfọn ẹsio owo ẹfep ke esop? Nso isinam ẹsio owo ẹfep ke esop?

N̄KPỌ IBA EMI ẸSINAMDE ẸSIO OWO ẸFEP

N̄kpọ iba ẹsinam Mme Ntiense Jehovah ẹsio owo ẹfep ke esop mmọ. Akpa, owo emi anade baptism anam akwa idiọkn̄kpọ. Ọyọhọ iba, owo oro imaha ndikabade esịt.

Kpa ye emi Jehovah mîdọhọke ke ana nnyịn ifọn ima, enye oyom kpukpru mme asan̄autom esie ẹdu edisana uwem. Ke uwụtn̄kpọ, Jehovah etịn̄ afiak etịn̄ ke inaha nnyịn inam akwa idiọkn̄kpọ nte oburobụt idan̄, ikpono ndem, iyịp n̄kpọ owo, idia inọ, iwot owo, m̀mê ikọk ibọk.—1 Cor. 6:9, 10; Edi. 21:8.

Ndi ukereke ke nte Jehovah ọdọhọde idu uwem isọn̄ke ikaha, ke akam edi ke ufọn nnyịn? Anie mîkpamaha ndidụn̄ n̄kpere mbon emi ẹnamde n̄kpọ nte mme ọdiọn̄ọde-idem owo, ẹtiede emem emem, mîsinyụn̄ iyomke mbon en̄wen ikọ? Nte esitiede edi oro ke ini idude ye nditọete nnyịn. Nnyịn inyene emem sia idomo ndidu uwem nte Ikọ Abasi etemede, ndien se ikọn̄wọn̄ọde inọ Abasi edi oro ke ini ikayakde idem inọ enye.

Edi nso iditịbe edieke Christian oro ama akana baptism anamde akwa idiọkn̄kpọ ke ntak mmeme? Ndusụk mbon oro ẹkenamde n̄kpọ Jehovah ke eset ẹma ẹnam utọ ndudue emi, edi Abasi ikesịnke mmọ ofụri ofụri. Da Edidem David ke uwụtn̄kpọ. David ama esịn efịbe ye n̄wan owo onyụn̄ owot ebe esie. Kpa ye oro, prọfet Nathan ọkọdọhọ enye ete: “Jehovah . . . efen idiọkn̄kpọ fo.”—2 Sam. 12:13.

Abasi ekefen ọnọ David ke ntak emi David akakabarede esịt. (Ps. 32:1-5) Kpasụk ntre, n̄kukụre se isinamde ẹsio owo ẹfep ke esop Mme Ntiense Jehovah mfịn edi edieke enye mîmaha ndikabade esịt, edi akade iso anam idiọkn̄kpọ. (Utom 3:19; 26:20) Edieke mbiowo emi ẹkpede ikpe owo mîkwe nte enye akabarede esịt, ana mmọ ẹsio enye ẹfep ke esop.

Edieke owo mîtịmke ikere, ekeme nditie nte ke ẹsọsọn̄ esịt ye owo oro ẹsiode ẹfep, akpan akpan edieke owo oro edide owo idem esie. Edi Ikọ Abasi etịn̄ mme n̄kpọ emi anamde ikụt ke ẹkam ẹmama owo oro ẹsiode ẹfep do.

NTAK EMI ỌFỌNDE ẸSIO ANAMIDIỌK ẸFEP KE ESOP?

Jesus ama etịn̄ ini kiet ete ke “mme utom ọniọn̄ ẹwụt ke ọniọn̄ enen.” (Matt. 11:19) Ke ini ẹbierede ndisio anamidiọk oro mîkabakede esịt mfep, ẹsikụt ke ubiere emi enyene ufọn. Kere ban̄a ufọn ita emi:

Ndisio anamidiọk mfep ke esop esinam ẹkpono enyịn̄ Jehovah. Sia ikerede enyịn̄ idian Jehovah, se nnyịn inamde esinam mme owo ẹtoro enye mîdịghe ẹtịn̄ ndisịme ẹdian enye. (Isa. 43:10) Ukem nte se eyen anamde ekemede ndinam ẹtịn̄ eti m̀mê idiọk ẹdian ete ye eka esie, mme owo ẹsiwak nditịn̄ eti m̀mê idiọk mban̄a Jehovah etiene se mmọ ẹkụtde ikọt esie ẹnamde. Edieke mbon oro ẹkerede enyịn̄ ẹdian Jehovah ẹdude uwem nte enye etemede, mme owo iditịn̄ke ebiọ ye Abasi. Se iketịbede edi oro ke eyo Ezekiel ke ini mme owo ẹkebatde mme Jew nte ikọt Jehovah.—Ezek. 36:19-23.

Iyanam ẹsuene enyịn̄ Abasi edieke idude oburobụt uwem. Apostle Peter ọkọdọhọ mme Christian ete: “Nte nditọ n̄kopitem, ẹtre ndinam n̄kpọ ekekem ye mme udọn̄ oro mbufo ẹkenyenede ke unana ifiọk ke eyo oko, edi, kpa nte Enye emi okokotde mbufo edide Edisana, mbufo n̄ko ẹkabade ẹsana ke ofụri edu uwem mbufo, koro ẹwet ẹte: ‘Mbufo ẹnyene ndidi edisana koro ami ndide edisana.’” (1 Pet. 1:14-16) Peter eketịn̄ akpanikọ. Mme owo ẹsitoro enyịn̄ Abasi ke ini ẹkụtde nte idude edisana uwem.

Inyeneke se ikpa idịbe nsụn̄. Edieke Ntiense Jehovah anamde idiọkn̄kpọ, mme ufan ye mbon esie ẹyesụk ẹdiọn̄ọ. Ndisio anamidiọk mfep ke esop owụt ke Jehovah enyene mbon emi ẹnyịmede ndidu edisana uwem nte N̄wed Abasi ọdọhọde ikọt Abasi ẹdu. Ọbọn̄ kiet ama aka Ufọkmbono Obio Ubọn̄ kiet ke Switzerland ọkọdọhọ ke iyom ndidi Ntiense Jehovah. Ibịghike ẹkesio eyeneka esie emi akanamde use ẹfep ke esop. Ntre, enye ọkọdọhọ ke iyom nditiene ndụk esop emi “mînyịmeke mme owo ẹsan̄a nan̄a ẹma.”

Ndisio anamidiọk mfep ke esop iyakke ẹsabade esop Christian. Apostle Paul ama ọdọhọ nditọete ke esop Corinth se ikemede nditịbe edieke ẹyakde owo oro okoide-koi anam idiọk aka iso odu ke esop. Enye ekemen idiọkowo oro odomo ye leaven sia leaven esinam ofụri ebok uyo ofụt. Enye ọkoḍọhọ mmọ ete: “Ekpri leaven ananam ofụri ebok uyo ofụt.” Ekem ọdọhọ mmọ ete: “Ẹsio idiọkowo oro ke otu mbufo ẹfep.”—1 Cor. 5:6, 11-13.

“Idiọkowo” oro Paul eketịn̄de aban̄a ama ọsọn̄ enyịn akama n̄wan ete esie ọdọ. Ndien ndusụk owo ke esop ẹma ẹtọn̄ọ ndidọhọ ke mmimọ ikwe se idiọkde do. (1 Cor. 5:1, 2) Edieke ẹkpekeyakde utọ owo oro aka iso odu ke esop, mme Christian eken ẹkpeketọn̄ọ ndidu oburobụt uwem emi mbon Corinth ẹkedude. Ke ini owo mînọhọ owo oro okoide-koi anam idiọk ufen, mme owo ẹkeme ndikere ke se enye akanamde idiọkke, ẹsọn̄ esịt ẹtiene enye ẹnam idiọk. (Eccl. 8:11) Ke adianade do, mme anamidiọk oro mîkabakede esịt ẹkeme ndikabade ntie nte “mme itiat emi ẹdịbede ke isọn̄ mmọn̄” ẹnyụn̄ ẹbiat ediwak owo ke esop.”—Jude 4, 12.

Ndisio anamidiọk mfep ke esop ekeme ndinam enyịn an̄wan̄a enye. Jesus ama etịn̄ ini kiet aban̄a akparawa emi ọkọkpọn̄de ufọk akatahade inyene emi ete esie ọkọnọde enye ke esenidụt. Idiọk udọ ama ọkọbọ ufen ke obio owo, onyụn̄ atua n̄kpọfiọk nte ikọwọrọde ikpọn̄ ufọk. Ke ini enyịn akan̄wan̄ade enye, enye ama atua n̄kpọfiọk afiak ọnyọn̄ ufọk. (Luke 15:11-24) Jesus ama etịn̄ nte esịt ekenemde ete idiọk udọ ke ini enye akakabarede esịt. Se enye eketịn̄de emi anam nnyịn ikụt nte esịt esinemde Jehovah ke ini idiọkowo akabarede esịt. Jehovah ọdọhọ ete: “Ami ndatke esịt ke n̄kpa idiọkowo, edi ndat esịt ke idiọkowo ndiwọn̄ọde n̄kpọn̄ usụn̄ esie nnyụn̄ ndu uwem.”—Ezek. 33:11.

Kpasụk ntre, mbon oro ẹsiode ẹfep ke esop ẹkeme ndikụt se itakde mmimọ nte ini akade. Ke ini mmọ ẹtide nte ndikpere Jehovah nnyụn̄ ndian idem ye nditọete ke esop ekenemde, ẹnyụn̄ ẹkụtde se idiọk edinam mmọ adade ọsọk mmimọ, enyịn ekeme ndin̄wan̄a mmọ.

 Yak iwụt ke imama anamidiọk oro ẹkesiode ẹfep ke esop ke ndinam n̄kpọ ye enye nte n̄wed Abasi ọdọhọde ẹnam. Emi edinam enyịn an̄wan̄a enye. David ekewet ete: “Edinen owo akpamia mi, emi edidi ima-mfọnido; enye okponyụn̄ asua ọnọ mi, emi edidi aran ke ibuot mi.” (Ps. 141:5) Ke uwụtn̄kpọ, yak idọhọ ke eyenọwọn̄ emen ọkpọusụn̄ emi okponde akan enye, ndien ọkpọusụn̄ oro afaha enye ke itọn̄. Keme ndimen ikemeke nyụn̄ kpọhi sio ikemeke; ibifịk ọtọn̄ọ ndibaba enye. Ọkpọusụn̄ oro ekeme ndida enye ibuot edieke owo mîsọpke-sọp in̄wam enye. Ntre, eka esie amia enye edem man ọkpọhi ọkpọusụn̄ oro osio. Umia emi ekeme ndibiak enye, edi ekeme n̄ko ndibọ enye nsụk. Kpasụk ntre, David ama enyịme edinen owo otụnọ enye. Ntụnọ oro ekeme ndibiak enye, edi edi ke ufọn esie.

Ke ediwak idaha, ndisio owo mfep ke esop esinen̄ede owo ke usụn̄ oro edifọnde ye enye. Akpan Julian oro iketịn̄de ke ntọn̄ọ ama akabade esịt ke isua duop ama ekebe, okpụhọde nte enye odude uwem, afiak ọnyọn̄ edi esop, ndien idahaemi edi ebiowo. Enye ọdọhọ ete: “Ekpedi owo ikosioho mi ifep ke esop, enyịn ikpakan̄wan̄ake mi. Ntụnọ oro ama ọfọn ye ami.”—Heb. 12:7-11.

NTE IKPOWỤTDE MBON ORO ẸSIODE ẸFEP KE ESOP KE IMAMA MMỌ

Imọdiọn̄ọ ke ẹma ẹsio owo ẹfep, ke owo oro enyene mfịna ye Abasi. Edi mfịna emi ikpedịghe ke nsinsi. Enyene se kpukpru nnyịn ikemede ndinam man ntụnọ oro ẹnọde owo oro do enyene ufọn.

Mbiowo ẹsidomo ndin̄wam anamidiọk oro akabarede esịt afiak edi ufan Jehovah

Mbiowo emi anade ẹdọhọ owo ke ẹsio enye ẹfep ke esop ana ẹkpebe ima Jehovah. Utom enye emi isinemke-nem mmọ. Ke ini mmọ ẹdọhọde owo ke ẹsio enye ẹfep ke esop, ana mmọ ẹtịn̄ ikọ ke usụn̄ emi owụtde ke imama enye ẹnyụn̄ ẹnam enye ọdiọn̄ọ ofụri se anade enye anam man ẹfiak ẹda enye ke esop. Ke ini ke ini, mmọ ẹkeme ndika n̄kese mbon oro ẹnamde n̄kpọ ifan̄ oro owụtde ke mmọ ke ẹkpụhọde. Mbiowo ẹyeti mmọ se mmọ ẹkpenamde man ẹfiak ẹdi ufan Jehovah. *

Mbonubon owo oro ẹsiode ẹfep ana ẹwụt ke imama esop Christian, ke imonyụn̄ ima owo mmimọ oro ke ndibere ye se mbiowo ẹbierede. Julian ọdọhọ ete: “Enye okosụk edidi eyen mi, edi uwem esie akadian̄ade nnyịn.”

Kpukpru owo ke esop ẹkeme ndiwụt ke imama owo oro ẹsiode ẹfep. Ikpanaha ẹneme nneme ye enye m̀mê ẹnam n̄kpọ ekededi ye enye. (1 Cor. 5:11; 2 John 10, 11) Emi ayanam ntụnọ oro Jehovah adade mbiowo ọnọ owo oro enyene ufọn. Ofụri esop ẹkeme ndin̄wam ubon owo oro ẹsiode ẹfep. Ikpanaha idedei inam mmọ ẹkere ke ẹtiene ẹsio mmimọ ẹfep ke esop.—Rome 12:13, 15.

Julian ọdọhọ ete: “Ọfọn ẹsio anamidiọk ẹfep ke esop sia emi an̄wam nnyịn idu uwem nte Jehovah oyomde. Kpa ye oro esibiakde owo, esinyene ufọn nte ini akade. Ekpedi mma mfiọn̄ọ eyen mi ibuot, nyak enye aka iso odu idiọk uwem, enye ikpokpụhọkede tutu amama.”

^ ikp. eki. 24 Se Enyọn̄-Ukpeme April 15, 1991, page 21-23.

Kpep N̄kpọ En̄wen

ENYỌN̄-UKPEME (EKE UKPEPNKPỌ)

Ntak Emi Ẹsisiode Ndusụk Owo Ẹfep- e?

Didie ke ntụnọ emi Abasi ọnọde ke ima anam ufọn ọnọ anamidiọk emi akabarade esịt?