Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) APRIL 2015

Afo Ekpere Jehovah Adan̄a Didie?

Afo Ekpere Jehovah Adan̄a Didie?

“Ẹsan̄a ẹkpere Abasi, ndien enye ayasan̄a ekpere mbufo.”—JAS. 4:8.

1. Ntak emi anade inam ofụri se ikekeme man inen̄ede ikpere Jehovah?

NDI ama ayak idemfo ọnọ Jehovah, ana baptism, onyụn̄ akabade edi Ntiense esie? Edieke edide ntre, ọwọrọ afo edi ufan Abasi. Ererimbot Satan iyomke nnyịn idi ufan Abasi. Ndien idiọkn̄kpọ oro ikadade-da imana ekeme ndidian̄ade nnyịn n̄kpọn̄ Abasi. Inyeneke Christian emi se itịn̄de emi mîsifịnake. Mmọdo, ana inam ofụri se ikekeme man inen̄ede ikpere Jehovah.

2. (a) Nso ke ẹsida ẹdiọn̄ọ ke owo iba ẹdi ufan? (Se ikọ idakisọn̄.) (b) Nso ke ikpanam man inen̄ede ikpere Jehovah?

2 Afo ekpere Jehovah adan̄a didie? Ndi emekere ke enye edi ufan fo? Ndi akpama ndinen̄ede n̄kpere enye? James 4:8 etịn̄ nte ikpanamde oro. Enye ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” Omokụt do ke n̄kpọ enye emi edi ‘ubọk otụk edem, edem otụk ubọk.’ * Edieke esịkde ekpere Abasi, enye n̄ko eyesịk ekpere fi. Nte ini akade, mbufo  mbiba ẹdidi itai ye aban̄. Editie fi ke idem nte eketiede Jesus ke ini enye ọkọdọhọde ete: “Enye emi ọkọdọn̄de mi enen̄ede odu, . . . Ami mmọfiọk enye.” (John 7:28, 29) Edi nso ye nso ke akpanam man enen̄ede ekpere Jehovah?

Didie ke afo ekeme ndineme nneme ye Abasi? (Se ikpehe ekikere 3)

3. Didie ke ikeme ndineme nneme ye Jehovah?

3 Ndineme nneme ye Jehovah ayanam enen̄ede ekpere enye. Edi edisan̄a didie itịn̄ ikọ ye Abasi? Ọfọn, esinam didie eneme nneme kpukpru ini ye ufan fo emi mîdụn̄ke ikpere fi? Anaedi ẹmesiwet leta ẹnọ kiet eken mîdịghe ẹkot kiet eken ke fon. N̄kukụre usụn̄ emi ekemede nditịn̄ ikọ ye Jehovah edi ndibọn̄ akam nnọ enye kpukpru ini. (Kot Psalm 142:2.) Edi edinam didie ikop se Jehovah etịn̄de? Ke ini okotde Bible onyụn̄ etiede ekere se okotde, ọwọrọ ke akpan̄ utọn̄ okop se Abasi etịn̄de. (Kot Isaiah 30:20, 21.) Yak ineme nte n̄kpọ iba emi—akam ye edikot Bible—ẹkemede ndinam nnyịn inen̄ede ikpere Jehovah, ida enye nte ata ufan.

JEHOVAH ESITỊN̄ IKỌ YE AFO KE INI OKOTDE BIBLE

4, 5. Didie ke Jehovah esida Bible etịn̄ ikọ ọnọ fi? Nọ uwụtn̄kpọ.

4 Anaedi ọmọfiọk ke Abasi akanam ẹwet Bible ẹnọ kpukpru owo. Enye ada Bible etịn̄ ikọ ọnọ nnyịn. Edi ndi Bible etịn̄ n̄ko se afo akpanamde man ekeme ndikpere Jehovah? Ih, etịn̄. Edi etịn̄ nso? Kpukpru ini emi okotde onyụn̄ ekpepde Bible, kere nte etiede fi ke idem nyụn̄ kere n̄ko nte ekemede ndinam se okotde oro. Edieke anamde emi, ọwọrọ ke ayak Jehovah ada Bible etịn̄ ikọ ọnọ fi. Afo eyenen̄ede ekpere Jehovah, enye eyedi ufan fo onyụn̄ an̄wam fi.—Heb. 4:12; Jas. 1:23-25.

5 Ke uwụtn̄kpọ, yak idọhọ ke okot onyụn̄ etie ekere ikọ Jesus emi, “ẹtre ndibon n̄kpọuto nnọ idem mbufo ke isọn̄.” Edieke edide emenenịm n̄kpọ Obio Ubọn̄ akpa ke uwem fo, esịt edinenem fi sia ọmọdiọn̄ọ ke Jehovah ama se anamde. Edi edieke okụtde ke oyom anam ukpụhọde man ekeme ndinen̄ede nnam n̄kpọ Obio Ubọn̄, ọwọrọ Jehovah etịn̄ ikọ ọnọ fi emi, owụt fi ebiet emi oyomde anam n̄kpọ man enen̄ede ekpere imọ.—Matt. 6:19, 20.

6, 7. (a) Ndikot Bible edinam Jehovah ada nnyịn didie, edinyụn̄ anam nnyịn ida Jehovah didie? (b) Nso idi ata akpan ntak emi ikpokotde Bible?

6 Enyene mme ufọn en̄wen emi edikot Bible ekemede ndinyene nnọ fi ke adianade ye ndinam fi ọfiọk ebiet emi anade anam ukpụhọde. Ndikot Bible anam  nnyịn ifiọk mme n̄kpọ emi Jehovah anamde, anam inen̄ede imehe ye enye inyụn̄ ima enye. Edieke imade Jehovah ikan nte ikesimade, ntre n̄ko ke enye edinyụn̄ ama nnyịn, ndien emi ayanam nnyịn itetịm ikpere enye.—Kot 1 Corinth 8:3.

7 Edi edieke iyomde ndinen̄ede n̄kpere Jehovah, ana inyene eti ntak emi anamde ikot Ikọ esie. John 17:3 ọdọhọ ete: “Nsinsi uwem ọwọrọ mmọ ndikọ ifiọk emi aban̄ade fi, ata Abasi kierakiet, ye enye emi afo okosiode ọdọn̄, kpa Jesus Christ.” Imesikpep ediwak n̄kpọ ke ini ikotde Bible, edi ata akpan ntak emi ikpokotde Bible ekpedi man inen̄ede ifiọk Jehovah.—Kot Exodus 33:13; Ps. 25:4.

8. (a) Nso ke ndusụk owo ẹkeme ndikere mban̄a nte Jehovah akanamde n̄kpọ ye Edidem Azariah? (b) Didie ke nnyịn idida mbụk emi edieke inen̄erede ifiọk Jehovah?

8 Nte inen̄erede ikpere Jehovah, nnyịn idifịnake idem ikaha edieke Bible mîtịn̄ke ntak emi enye akanamde ndusụk n̄kpọ. Ke uwụtn̄kpọ, esitie fi didie ke idem ke ini okotde nte enye akanamde n̄kpọ ye edidem Judah emi ekekerede Azariah? (2 Ndi. 15:1-5) Ke ini okotde mbụk oro, oyokụt ke Azariah ama “anam se inende ke enyịn Jehovah” kpa ye emi ‘mme owo ẹkesụk ẹwade uwa ẹnyụn̄ ẹnamde nsụn̄ikan̄ uwa ọwọrọ ọdọk ke mme edikon̄ ebiet.’ Edi “Jehovah [ama] amia edidem oro ufen, ndien enye edi owo akpamfia tutu esịm usen n̄kpa esie.” Itien̄wed oro itịn̄ke ntak emi Jehovah akanamde n̄kpọ ntem ye edidem oro. Ndi akpana ifịna idem nnyịn iban̄a se iketịbede emi m̀mê ikere se ikpanamde Jehovah amia owo emi mîduehe ufen? Nnyịn idikereke kpukpru emi edieke inen̄erede idiọn̄ọ nte Jehovah esinamde n̄kpọ. Owo emi ọfiọkde Jehovah ọdiọn̄ọ ke enye esitụnọ owo “ke udomo oro odotde” ye se owo anamde. (Jer. 30:11) Ndifiọk emi ayanam inịm ke se Jehovah akanamde Azariah ama enen, kpa ye oro nnyịn mîdiọn̄ọke ntak emi enye akanamde n̄kpọ ntre ye enye.

9. Isan̄a didie idiọn̄ọ ntak emi Jehovah ọkọtọde Azariah akpamfia?

9 Enyene itie en̄wen ke Bible emi anamde mbụk emi enen̄ede an̄wan̄a. Edidem emi enyene enyịn̄ iba; kpa enye ekere Edidem Uzziah. (2 Ndi. 15:7, 32) Udiana Chronicle 26:3-5, 16-21 owụt ke kpa ye oro Uzziah akanamde eti n̄kpọ, ke nte ini akade, enye ama ọtọn̄ọ ndiseri iseri ke esịt esie “tutu [iseri] ada enye esịm nsobo.” Iseri ama anam enye aka ndimen utom oku nnam. Ofụri oku 81 ẹma ẹdụk ẹbịne enye ẹkedọhọ enye ke idịghe utom esie ndifọp incense nnọ Jehovah. Edi nso ke Uzziah akanam? Enye ama owụt ke imọ idaha owo ndomokiet ke n̄kpọ onyụn̄ “ofụt esịt” ye mme oku oro. Se ikanamde Jehovah ọtọ enye akpamfia edi oro.

10. Ntak emi mîkpanaha iyom ẹnam kpukpru se Jehovah anamde an̄wan̄a nnyịn, ndien nso ikeme ndin̄wam nnyịn inịm ke Jehovah ikemeke-keme ndinam se idiọkde?

10 Nso ke emi ekpep nnyịn? Nso ke ikpanam edieke mbụk emi ekpetiede nte ndusụk mbụk Bible emi mînyeneke itien̄wed en̄wen emi anamde mmọ ẹn̄wan̄a? Ndi ikpekere ke n̄kpọ enye emi Jehovah anamde mi inenke? Mîdịghe, ndi ikpeti ke mme n̄kpọ eken ke Bible ẹwowụt ke kpukpru se Jehovah anamde enen, ndien ke Jehovah akam ebiere se ifọnde ye se idiọkde? (Deut. 32:4) Nte inen̄erede ifiọk Jehovah, ntre ke idinen̄ede ima nte enye esinamde n̄kpọ; idifịnake nnyịn ekpededi se enye anamde in̄wan̄ake nnyịn. Se idude edi ke adan̄a nte okotde Ikọ Abasi onyụn̄ etiede ekere se Abasi etịn̄de ọnọ fi, ntre ke edima Abasi. (Ps. 77:12, 13)  Edieke amade Jehovah, eyetetịm ekpere enye; edida enye nte ata ufan fo.

AFO ESITỊN̄ IKỌ ỌNỌ JEHOVAH KE INI ỌBỌN̄DE AKAM

11-13. Afo asan̄a didie ọfiọk ke Jehovah esikop akam oro ibọn̄de? (Se akpa ndise ibuotikọ emi.)

11 Akam esinam nnyịn ikpere Jehovah. Imesitoro enye, ikọm enye, inyụn̄ ikpe enye ubọk ite an̄wam nnyịn. (Ps. 32:8) Edi udûkemeke ndida Jehovah nte ata ufan fo edieke mûnịmke ke enye esikop akam fo.

12 Ndusụk owo ẹkere ke n̄kukụre se akam esinamde edi ndinam esịt ana owo sụn̄. Mmọ ẹdọhọ ke Abasi isibọrọke akam owo ndomokiet, ke n̄kukụre se akam esinamde edi ndinam owo enen̄ede ekere aban̄a mfịna esie onyụn̄ ekere nte ọkpọkọkde mfịna emi. Imọdiọn̄ọ ke akam esinam owo ekere aban̄a mfịna esie ye nte enye akpasan̄ade ọkọk mfịna emi. Edi Jehovah esikpan̄ utọn̄ ọnọ nnyịn ke ini ibọn̄de akam. Isan̄a didie ifiọk emi?

13 Se ise: Ke ini Jesus okodude ke heaven ye Abasi mbemiso edide edimana ke isọn̄ nte owo, enye ama ada enyịn esie okụt nte Jehovah ọbọrọde akam ikọt esie. Ke ini enye edide edidu ke isọn̄ ọkwọrọ ikọ, enye ama esibọn̄ akam ọnọ ete esie ke heaven etịn̄ nte etiede imọ ke idem. Ndi enye ekpekesibọn̄ akam—ada ofụri okoneyo ọbọn̄ akam—edieke enye ọkpọkọdiọn̄ọde ke Jehovah isikpan̄ke utọn̄ ikop se nnyịn itịn̄de? (Luke 6:12; 22:40-46) Ndi enye ekpekekpep mbet esie ndibọn̄ akam edieke enye ọkpọkọfiọkde ke Abasi isikopke akam? Omokụt do ke Jesus ama ọfiọk ke akam edi n̄kukụre usụn̄ emi ikemede nditịn̄ ikọ nnọ Jehovah. Enye ama ọdọhọ Ete esie ini kiet ete: “Ete, mmọkọm fi koro afo okopde akam mi. Ke akpanikọ, mmọfiọk nte ke afo emesikop uyo mi kpukpru ini.” Nnyịn n̄ko imenen̄ede inịm ke Jehovah edi “Andikop akam.”—John 11:41, 42; Ps. 65:2.

14, 15. (a) Didie ke afo esibọ ufọn ke ini ọbọn̄de akam asiak nnennen se oyomde? (b) Didie ke akam akan̄wam eyenete an̄wan kiet enen̄ede ekpere Jehovah?

14 Jehovah ekeme ndibọrọ akam owo, edi owo oro isọpke idiọn̄ọ. Edi edieke asiakde nnennen se oyomde, ọyọsọsọp  ọdiọn̄ọ ini emi ẹbọrọde akam fo. Esịt eyenem fi ndinyene Jehovah nte ata ufan fo ke ini okụtde nte enye ọbọrọde akam fo. Ke adianade do, ama awak nditịn̄ nte etiede fi ke idem nnọ enye, enye eyenen̄ede esịk ekpere fi.

15 Da se Kathy etịn̄de ke uwụtn̄kpọ. * Kpa ye oro enye ekesiwakde ndiwọrọ an̄wautom, utom ukwọrọikọ ikesinemke enye. Enye ọdọhọ ete: “Ukwọrọikọ ikesinemke mi. N̄kesika mbak mme owo ẹdidọhọ ke n̄kaha. Ke mma n̄kọkpọn̄ utom, ebiowo kiet ama ọdọhọ mi ke nte imọ isede ke mmekeme ndinam utom usiakusụn̄, onyụn̄ ọnọ mi babru utom usiakusụn̄. Mma mbiere nditọn̄ọ utom usiakusụn̄, nnyụn̄ ntọn̄ọ ndibọn̄ akam nnọ Jehovah kpukpru usen nte enye anam mi nsikop inem utom ukwọrọikọ.” Ndi Jehovah ama okop akam Kathy? Enye ọdọhọ ete: “Isua ita edi emi n̄kọtọn̄ọ usiakusụn̄. Sia n̄wọrọde an̄wautom ndien ndien nsinyụn̄ n̄wakde ndisan̄a ye nditọete iban en̄wen, mmọtọn̄ọ ndikwọrọ ikọ ọfọn. Utom ukwọrọikọ enem mi idahaemi etieti. Mmedima enye ndien. Mmonyụn̄ n̄kpere Jehovah n̄kan nte n̄kesikperede.” Kathy etịn̄ akpanikọ. Enye ndikọbọn̄ akam nnọ Jehovah anam enye ekpere Jehovah ntre.

NAM OKWO

16, 17. (a) (a) Nso ye nso ke inyene ndinam man ika iso ikpere Jehovah? (b) Nso mfịna ke idineme iban̄a ke ibuotikọ oro etienede?

16 Ndisịk n̄kpere Jehovah idịghe n̄kpọ usen kiet; edi n̄kpọ emi idinamde ke ofụri eyouwem nnyịn. Mmọdo, yak ikot Bible kpukpru ini man ikop se Jehovah etịn̄de ọnọ nnyịn. Ana isibọn̄ akam n̄ko inọ enye. Edieke inamde n̄kpọ mbiba emi, iyekpere Jehovah ikan nte ikesikperede, ndien enye ayan̄wam nnyịn iyọ idomo ekededi.

Ndisịk n̄kpere Jehovah idịghe n̄kpọ usen kiet; edi n̄kpọ emi idinamde ke ofụri eyouwem nnyịn (Se ikpehe ekikere 16, 17)

17 Edi imekeme ndibọn̄ akam ke ofụri esịt mban̄a mfịna oro inyenede, edi mfịna imaha ndikụre. Ke utọ ini ntre, mbuọtidem nnyịn ekeme ndimem. Imekeme nditọn̄ọ ndikere m̀mê Jehovah esikop akam nnyịn, m̀mê enye akam adada nnyịn nte ufan esie. Nso ke akpanam edieke utọ ekikere emi odụkde fi esịt? Ibuotikọ oro etienede ọyọbọrọ mbụme emi.

^ ikp. eki. 2 Ẹdọhọ ke nte owo iba ẹdade kiet eken ẹsinyụn̄ ẹnamde n̄kpọ ye kiet eken ke ẹsida ẹdiọn̄ọ ke mmọ ẹdi ufan. Ana mmọ mbiba ẹsinam mme n̄kpọ emi ẹdinamde mmọ ẹka iso ẹkpere kiet eken.

^ ikp. eki. 15 Ẹkpụhọ enyịn̄.