Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2015

Se Uwụtn̄kpọ Talent Ekpepde Nnyịn

Se Uwụtn̄kpọ Talent Ekpepde Nnyịn

“Ndien enye ọnọ owo kiet talent ition, ọnọ owo efen talent iba, enye eken talent kiet.”—MATT. 25:15.

1, 2. Ntak emi Jesus ọkọnọde uwụtn̄kpọ talent?

KE INI Jesus ọkọnọde uwụtn̄kpọ talent, enye akanam mbet esie oro ẹyetde aran ẹdiọn̄ọ utom oro mmọ ẹnyenede ndinam. Akpana kpukpru nnyịn idiọn̄ọ se uwụtn̄kpọ emi ọwọrọde, sia enye ebehe kpukpru mme ata Christian, mbon emi ẹdoride enyịn ndidu uwem ke heaven ye mbon emi ẹdidude uwem ke isọn̄.

2 Jesus ọkọnọ uwụtn̄kpọ talent ke ini enye ọkọbọrọde mbet esie mbụme oro mmọ ẹkebụpde enye ẹban̄a “idiọn̄ọ edidu [esie] ye eke akpatre ini editịm n̄kpọ emi.” (Matt. 24:3) Ntem, uwụtn̄kpọ emi osu ke eyo nnyịn emi, onyụn̄ edi kiet ke otu mme n̄kpọ emi ẹwụtde ke enye ke akara ke heaven.

3. Nso ke uwụtn̄kpọ kiet kiet ke Matthew ibuot 24 ye 25 ekpep nnyịn?

3 Uwụtn̄kpọ talent edi kiet ke otu uwụtn̄kpọ inan̄ emi odude ke Matthew 24:45 esịm 25:46. Uwụtn̄kpọ ita eken—eke ofụn emi anamde akpanikọ onyụn̄ enyenede ọniọn̄, eke nditọiban duop, ye eke erọn̄ ye ebot—ẹsụk ẹsịne ke se Jesus ọkọbọrọde mbet esie ke ini mmọ ẹkebụpde enye ẹban̄a idiọn̄ọ edidu esie. Uwụtn̄kpọ mbinan̄ ẹwụt mme edu emi anade mbet esie ẹnyene ke mme akpatre usen emi. Uwụtn̄kpọ ofụn  emi anamde akpanikọ, eke nditọiban duop, ye eke talent ẹnyene mbet esie oro ẹyetde aran. Ke akpa uwụtn̄kpọ oro aban̄ade ofụn emi anamde akpanikọ, Jesus ama ọnọ ekpri otu nditọete esie oro ẹyetde aran utom ete ẹkpep ikọt Jehovah n̄kpọ. Ana mmọ ẹnam akpanikọ ẹnyụn̄ ẹnyene ọniọn̄. Ke uwụtn̄kpọ nditọiban duop, Jesus ama anam kpukpru mbet esie oro ẹyetde aran ẹdiọn̄ọ ke ana mmọ ẹben̄e idem ẹbet imọ ẹnyụn̄ ẹdu ke ukpeme sia mmọ mîfiọkke ini ye usen emi imọ ididide. Jesus ama ọnọ n̄ko uwụtn̄kpọ talent man anam mbet esie oro ẹyetde aran ẹdiọn̄ọ ke ana mmọ ẹnen̄ede ẹsịn idem ẹnam utom oro ẹdọn̄de mmọ. Ekem, enye ama ọnọ uwụtn̄kpọ oro aban̄ade erọn̄ ye ebot. Uwụtn̄kpọ enye emi enyene mbon oro ẹdidude uwem mi ke isọn̄. Enye ama ọsọn̄ọ etịn̄ ke ana mmọ ẹnam akpanikọ ẹnyụn̄ ẹnen̄ede ẹn̄wam nditọete imọ oro ẹyetde aran. * Yak ineme se uwụtn̄kpọ talent ọwọrọde.

ETEUFỌK ỌNỌ IFỊN ESIE EDIWAK OKỤK

4, 5. Anie edi eteufọk ke uwụtn̄kpọ talent, ndien talent akawak didie?

4 Kot Matthew 25:14-30. Ke uwụtn̄kpọ talent oro Jesus ọkọnọde, enye ama etịn̄ aban̄a ọbọn̄ kiet emi akakade anyan idụt. Ke ini enye ọkọnọde uwụtn̄kpọ en̄wen emi ebietde enye emi, enye ọkọdọhọ ke ọbọn̄ oro akaka ndibọ ubọn̄. (Luke 19:12) Ke ediwak isua idahaemi, n̄wed nnyịn esitịn̄ ke ọbọn̄ oro ada aban̄a Jesus, ye nte ke enye akaka anyan idụt ke ini enye akafiakde ọnyọn̄ heaven ke isua 33. Abasi ikemekke Jesus Edidem ke ndondo oro enye esịmde heaven. * Edi Jesus ama “osụhọde etetie ke ubọk nnasia Abasi, ọtọn̄ọde ke ini oro enye etetie ebet tutu ẹnịm mme asua esie nte udoriukot esie.”—Heb. 10:12, 13.

5 Jesus ọkọdọhọ ke ọbọn̄ oro ama enyene okụk emi esịmde talent itiaita. Ata ediwak okụk ekedi oro ini oro. * Mbemiso enye adahade isan̄, enye ama okot ifịn esie edeme okụk emi ọnọ mmọ man mmọ ẹda ẹnam mbubehe. Jesus ama enyene akpan n̄kpọ emi eketiede nte talent mbemiso enye ọkọnyọn̄de heaven. Nso idi oro? Utom emi enye akadade ofụri uwem esie anam.

6, 7. Nso ke talent ada aban̄a?

6 Jesus ama owụt ke ndikwọrọ ikọ nnyụn̄ n̄kpep mme owo n̄kpọ edi akakan utom. (Kot Luke 4:43.) Enye ama ọfiọk ke utom emi ke okpokpon, ke ediwak owo ẹyekop eti mbụk nte ini akade. Ini kiet, enye ama ọdọhọ mbet esie ete: “Ẹmenede enyịn ẹse in̄wan̄, ẹte n̄kpọ ẹdat se ẹkpen̄ede.” (John 4:35-38) Enye eketịn̄ aban̄a ndikwọrọ ikọ n̄n̄wam ediwak mbon emi ẹnyenede eti esịt ẹkabade ẹdi mbet imọ. Eti ọtọin̄wan̄ isiyakke n̄kpọ-in̄wan̄ esie adat atak. Jesus n̄ko ikpekemeke ndikpọn̄ se enye ọkọtọn̄ọde yak atatak ntre. Mmọdo, mbemiso enye afiakde ọnyọn̄ heaven ke enye ama ekeset, enye ama ọnọ mbet esie akamba utom, ọdọhọ mmọ ete: “Ẹka ẹkenam mme owo ke kpukpru idụt ẹdi mbet mi.” (Matt. 28:18-20) Ntre, Jesus ama ọnọ mmọ ata eti utom—utom ukwọrọikọ.—2 Cor. 4:7.

7 Ikpọdọhọ ke talent ada aban̄a nso?  Ke ini Jesus ọkọdọhọde mbet esie ẹka ẹkenam mbet, enye ọkọnọ mmọ “inyene esie”—talent esie. (Matt. 25:14) Ke nditịn̄ ibio ibio, talent ada aban̄a utom oro ẹnọde nnyịn ẹte ikwọrọ ikọ inyụn̄ inam mme mbet.

8. Nso ke eteufọk ifịn oro okoyom mmọ ẹda talent oro ẹnam kpa ye emi enye mîkọnọhọ mmọ talent ukem ukem?

8 Jesus ọkọdọhọ ke eteufọk oro ọkọnọ ofụn kiet talent ition, ọnọ en̄wen talent iba, ọnọ akpatre owo talent kiet. (Matt. 25:15) Kpa ye oro eteufọk oro mîkọnọhọ mmọ talent ukem ukem, enye okoyom owo mmọ kiet kiet ada se inọde enye esịn ifịk anam mbubehe, oro edi, esịn ifịk ọkwọrọ ikọ ke ofụri ukeme esie. (Matt. 22:37; Col. 3:23) Mbet Christ ẹma ẹtọn̄ọ ndida talent nnam mbubehe ke eyo mme apostle, ọtọn̄ọde ke Pentecost eke isua 33. N̄wed Utom etịn̄ nte mmọ ẹkesịnde idem ẹkwọrọ ikọ ẹnyụn̄ ẹnam mme mbet. *Utom 6:7; 12:24; 19:20.

KE ẸDA TALENT ẸNAM MBUBEHE KE UTỊT INI

9. (a) Nso ke ifịn iba emi ẹnamde akpanikọ ẹkeda talent oro ẹkenọde mmọ ẹnam, ndien nso ke oro ekpep nnyịn? (b) Nso ke ana “mme erọn̄ en̄wen” ẹnam?

9 Ke mme akpatre usen emi, akpan akpan ọtọn̄ọde ke 1919, mme anam-akpanikọ ifịn Christ oro ẹyetde aran ke  isọn̄ ẹda talent Eteufọk mmọ ẹnam mbubehe. Ukem nte akpa ye udiana ifịn oro ke uwụtn̄kpọ Jesus, nditọete iren ye iban oro ẹyetde aran ke ẹda se ẹkenọde mmọ ẹnam ofụri se ẹkekeme. Ufọn idụhe nditie n̄kere m̀mê mmanie ke otu mmọ ẹkebọ talent ition, m̀mê mmanie ẹkebọ talent iba. Ke uwụtn̄kpọ oro, ifịn iba ẹma ẹnam okụk emi eteufọk mmọ ọkọnọde mmọ awak utịm ikaba, ọwọrọ mmọ mbiba ẹma ẹsịn idem ẹnam mbubehe. Edi ndi mbon oro ẹyetde aran kpọt ẹkenyene ndisịn idem n̄kwọrọ ikọ nnyụn̄ n̄kpep mme owo n̄kpọ? Ihih. Uwụtn̄kpọ Jesus en̄wen oro aban̄ade erọn̄ ye ebot ekpep nnyịn ke ana mbon oro ẹdoride enyịn ndidu uwem mi ke isọn̄ ẹn̄wam mbon oro ẹyetde aran ẹnam utom ukwọrọikọ ẹnyụn̄ ẹsọn̄ọ ẹda ye mmọ. Ke ofụri idiọk akpatre usen emi, otu mbiba emi ẹdiana kiet nte “otuerọn̄ kiet” ẹsịn ifịk ẹn̄wam mme owo ẹdi mbet Christ.—John 10:16.

10. Nso inen̄ede iwụt ke Jesus ama ọtọn̄ọ ndikara ke heaven?

10 Jesus oyom kpukpru mme anditiene enye ẹsịn idem ẹnam mme mbet. Se mbet esie ẹkenamde edi oro ke eyo mme apostle. Edi didie ke ẹnam mme mbet ke utịt ini emi uwụtn̄kpọ talent osude mi? Mbet Jesus ke ẹnam utom ukwọrọikọ ke usụn̄ emi akanam owo mînamke. Mmọ ẹkwọrọ ikọ ẹnyụn̄ ẹn̄wam ediwak tọsịn owo ẹna baptism kpukpru isua. Mbufa mbet emi n̄ko ke ẹtiene ẹkwọrọ ikọ. Ofụri emi anam utom ukwọrọikọ akabade edi n̄wọrọnda ke otu mme n̄kpọ emi Jesus ọkọdọhọde nte ẹdidade ẹdiọn̄ọ ke imọ imọtọn̄ọ ndikara. Imọfiọk ke utom emi ifịn Christ ẹnamde mi enen̄ede enem enye esịt.

Jesus Christ ọnọ ifịn esie ata akpan utom, oro edi, utom ukwọrọikọ (Se ikpehe ekikere 10)

INI EWE KE ETEUFỌK EDIDỌHỌ IFỊN ESIE ẸNAM IBAT?

11. Nso inam inịm ke Jesus edidi idinam ibat ke ini akwa ukụt?

11 Akwa ukụt ọmọn̄ ọtọtọn̄ọ. Jesus edidi idinam ibat ye ifịn esie ke ini akwa ukụt emi ekperede ndikụre. Nso inam idọhọ ntre? Ke prọfesi Jesus ke Matthew ibuot 24 ye 25, enye ama etịn̄ afiak etịn̄ ke imọ iyafiak idi. Enye ama ọdọhọ ke mme owo “ẹyekụt Eyen owo asan̄ade ke obubịt enyọn̄ edi ye odudu ye akwa ubọn̄” edi ndibiere ikpe ke ini akwa ukụt. Enye okoyom mbet esie emi  ẹdidude uwem ke mme akpatre usen ẹnen̄ede ẹdu ke ukpeme. Enye ọkọdọhọ mmọ ete: “Mbufo [ifiọkke] usen eke Ọbọn̄ mbufo edidide,” afiak ọdọhọ mmọ ete ke “hour emi mbufo mîkereke, Eyen owo eyedi.” (Matt. 24:30, 42, 44) Ntem, ke ini Jesus ọkọdọhọde ke “eteufọk ifịn oro [eyedi] edinam ibat ye mmọ,” enye eketịn̄ aban̄a ini emi enye edidide idibiere ikpe inọ mme idiọkowo. *Matt. 25:19.

12, 13. (a) Nso ke eteufọk oro ọkọdọhọ akpa ye udiana ifịn esie, ndien ntak emi enye ọkọdọhọde mmọ ntre? (b) Ini ewe ke ẹdifịk mme Christian oro ẹyetde aran akpatre idiọn̄ọ? (Se ekebe emi “Ẹnọ Mmọ Utịp ke Ini Mmọ Ẹkpade.”) (c) Nso ke Abasi edinam inọ mbon emi enye abatde nte mme erọn̄ esie?

12 Ke ini eteufọk oro ke uwụtn̄kpọ Jesus ọkọnyọn̄de edi, enye ama edikụt ke ifịn iba—enye emi enye ọkọnọde talent ition ye enye emi enye ọkọnọde talent iba—ẹma ẹda talent mmọ ẹnam mbubehe ẹnyụn̄ ẹdia udori emi okponde nte iso okụk. Eteufọk mmọ ọkọdọhọ mmọ mbiba ete: “Emetịm anam, eti ofụn emi anamde akpanikọ! Afo ama anam akpanikọ ke se mîwakke. Nyemek fi ese aban̄a ediwak n̄kpọ.” (Matt. 25:21, 23) Ekere ke nso iditịbe ke ini Jesus, Eteufọk nnyịn, edidide idibiere ikpe ke ini iso?

13 Ifịn iba oro ẹda ẹban̄a mme Christian oro ẹyetde aran, emi ẹsịnde ifịk ẹnam utom mmọ. Ẹyefịk mmọ akpatre idiọn̄ọ mbemiso akwa ukụt ọtọn̄ọde. (Edi. 7:1-3) Kpukpru mmọ ẹdidu ke heaven mbemiso Armageddon ọtọn̄ọde. Edi nso kaban̄a mbon emi ẹdoride enyịn ndidu uwem mi ke isọn̄, emi ẹken̄wamde nditọete Christ emi ẹyetde aran? Etisịm ini emi, imekere ke Abasi ababat mmọ nte mme erọn̄ esie. Enye ayanam mmọ ẹdu uwem ke isọn̄ ke ini emi Obio Ubọn̄ Abasi edikarade.—Matt. 25:34.

IDIỌK OFỤN EMI EDIDE IFU

14, 15. Ndi ikọ Jesus ọkọwọrọ ke ediwak nditọete esie emi ẹyetde aran ẹyekabade idiọk ofụn ye ifu? Ntak emi ọdọhọde ntre?

14 Ke uwụtn̄kpọ Jesus oro, akpatre ofụn ekemen talent esie ọkọdọk isọn̄ esịn utu ke ndida nnam mbubehe m̀mê ndimen nnọ mme akama okụk. Ofụn emi akanam eteufọk esie ibak, okokoi ọdọk isọn̄ esịn okụk emi ẹkpedade ẹnam mbubehe man eteufọk esie adia udori. Odot nte eteufọk esie okokotde enye “idiọk ofụn ye ifu.” Eteufọk esie ama ọbọ enye talent kiet oro ọkpọn̄ ọnọ owo emi ekenyenede talent duop. Ẹma ẹtop idiọk ofụn oro “ẹduọk ke an̄wa ke ekịm. Do ke enye editua onyụn̄ ata edet.”—Matt. 25:24-30; Luke 19:22, 23.

15 Ndi Jesus ndikọdọhọ ke kiet ke otu ifịn oro ama emen talent emi ẹkenọde enye ọkọdọk isọn̄ esịn ọwọrọ ke ndusụk  mbon emi ẹyetde aran idinamke se ẹdọn̄de mmọ? Ihih, iwọrọke ntre. Fiak kere se Jesus eketịn̄de aban̄a. Ke ini enye ọkọnọde uwụtn̄kpọ aban̄a ofụn emi anamde akpanikọ onyụn̄ enyenede ọniọn̄, enye ama etịn̄ aban̄a idiọk ofụn emi akamiade ifịn eteufọk esie eken. Ikọ Jesus ikọwọrọke ke ndusụk mbon emi ẹsịnede ke otu “ofụn emi anamde akpanikọ” ẹyediọk. Edi enye okodụri mmọ utọn̄ ete ẹkûtie nte idiọk ofụn oro. Ukem ntre, ke ini enye ọkọnọde uwụtn̄kpọ nditọiban duop, ikọ esie ikọwọrọke ke mbahade iba ke otu mbon oro ẹyetde aran ẹditie nte ndisịme nditọiban ition. Edi enye akakam anam nditọete esie ẹfiọk se iditịbede edieke mmọ mîdụhe ke ukpeme mînyụn̄ iben̄eke idem. * Ntem, imekeme ndidọhọ ke se Jesus eketịn̄de ke uwụtn̄kpọ talent iwọrọke ke mbon oro ẹyetde aran ẹyekabade idiọk ifu ke mme akpatre usen. Utu ke oro, enye okodụri mbet esie oro ẹyetde aran utọn̄ ete ẹsin idem ẹnam se idọn̄de mmọ—ẹda talent oro inọde mmọ ‘ẹnam mbubehe’—ẹkûtie nte idiọk ofụn emi edide ifu.—Matt. 25:16.

16. (a) Nso ke uwụtn̄kpọ talent ekpep nnyịn? (b) Didie ke ẹnam uwụtn̄kpọ talent enen̄ede an̄wan̄a nnyịn ke ibuotikọ emi? (Se ekebe emi, “ Nte Uwụtn̄kpọ Talent Akpan̄wan̄ade Nnyịn.”)

16 Nso n̄kpọ iba ke uwụtn̄kpọ talent ekpep nnyịn? Akpa, Jesus Christ ọnọ ifịn esie ata akpan utom, oro edi, ndikwọrọ ikọ nnyụn̄ n̄kpep mme owo n̄kpọ. Udiana, enye oyom kpukpru nnyịn isịn ifịk inam utom ukwọrọikọ. Edieke inamde emi, Jesus ọyọdiọn̄ nnyịn ke ntak emi inyenede mbuọtidem, idude ke ukpeme, inyụn̄ isọn̄ọde ida.—Matt. 25:21, 23, 34.

^ ikp. eki. 3 Ẹma ẹnam idiọn̄ọ ofụn emi anamde akpanikọ onyụn̄ enyenede ọniọn̄ ke Enyọn̄-Ukpeme July 15, 2013, page 21 esịm 22, ikpehe ekikere 8 esịm 10. Udiana ibuotikọ ukpepn̄kpọ ke Enyọn̄-Ukpeme emi anam idiọn̄ọ nditọiban duop. Ẹnam uwụtn̄kpọ erọn̄ ye ebot an̄wan̄a nnyịn ke Enyọn̄-Ukpeme October 15, 1995, page 23 esịm 28 ye ke ibuotikọ ukpepn̄kpọ oro etienede ke Enyọn̄-Ukpeme emi.

^ ikp. eki. 5 Ke eyo Jesus, talent kiet ekedi n̄kpọ nte denarii 6,000. Denarius kiet edi okụk utom usen kiet, ndien edida owo isua 20 ndinyene talent kiet.

^ ikp. eki. 8 Ke mme apostle ẹma ẹkekpan̄a, mfiakedem ama okpon etieti ke esop, ndien owo ikekemeke ndinam utom ukwọrọikọ ke ata ediwak isua. Edi n̄kpọ okpụhọde ke “ini ukpen̄e,” oro edi, mme akpatre usen emi. (Matt. 13:24-30, 36-43) Se Enyọn̄-Ukpeme July 15, 2013, page 9-12.

^ ikp. eki. 15 Se ikpehe ekikere 13 ke ibuotikọ emi, “Ndi Ayaka Iso ‘Odu ke Ukpeme’?” ke Enyọn̄-Ukpeme emi.