Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2015

Ndi Ayaka Iso ‘Odu ke Ukpeme’?

Ndi Ayaka Iso ‘Odu ke Ukpeme’?

“Ẹdu ke ukpeme, ndien, koro mbufo mîfiọkke usen m̀mê hour oro.”—MATT. 25:13.

1, 2. (a) Nso ke Jesus eketịn̄ aban̄a mme akpatre usen? (b) Mme mbụme ewe ke idibọrọ ke ibuotikọ emi?

KERE nte Jesus etiede ke Obot Olive, emi asakde iso ese temple Jerusalem. Anaedi ama enem Peter, Andrew, James, ye John nditie ye enye nnen̄ede n̄kpan̄ utọn̄ n̄kop nte enye etịn̄de mme n̄kpọ emi ẹditịbede ke ata ini iso. Enye ama etịn̄ ediwak n̄kpọ emi ẹditịbede ke mme akpatre usen idiọk ererimbot emi, ke ini enye edikarade ke heaven. Enye ọkọdọhọ ke “ofụn emi anamde akpanikọ onyụn̄ enyenede ọniọn̄” ayanam utom oro imọ idọn̄de enye, ke enye ọyọnọ ikọt imọ udia ke edikem ini.—Matt. 24:45-47.

2 Ekem, ke ini Jesus osụk etịn̄de se iditịbede ke ini iso, enye ọnọ uwụtn̄kpọ aban̄a nditọiban duop. (Kot Matthew 25:1-13.) Idahaemi, yak ibọrọ mbụme ita emi: (1) Nso ke uwụtn̄kpọ emi nditọiban duop ekpep nnyịn? (2) Didie ke mme anam-akpanikọ mbon oro ẹyetde aran ẹnam se uwụtn̄kpọ emi ekpepde nnyịn, ndien nso utịp ke mmọ ẹdibọ? (3) Didie ke kpukpru  nnyịn ikeme ndibọ ufọn nto uwụtn̄kpọ Jesus emi idahaemi?

NSO KE UWỤTN̄KPỌ NDITỌIBAN DUOP EKPEP NNYỊN?

3. Didie ke ikesinam uwụtn̄kpọ nditọiban duop an̄wan̄a ini akpa, ndien nso mfịna ke emi ekeme ndida ndi?

3 Ke ibuotikọ emi ebede, ima itịn̄ ke ofụn emi anamde akpanikọ ẹkpụhọde nte ẹnamde ndusụk mbụk Bible an̄wan̄a. Mmọ iwakke nditịn̄ se mme mbụk Bible ẹdade ẹban̄a, edi ẹditịn̄ se mme mbụk emi ẹkpepde nnyịn ye nte ikemede ndida mmọ ndu uwem. Ini akpa, ima isitịn̄ se n̄kpọ kiet kiet ke uwụtn̄kpọ nditọiban duop oro Jesus ọkọnọde adade aban̄a. Ima itịn̄ se utuenikan̄, aran, okpon̄ ye mme n̄kpọ eken ẹdade ẹban̄a. Okûdi emi ikayakke mme owo ẹkpep n̄kpọ ẹto uwụtn̄kpọ emi? Nte inemede n̄kpọ emi, oyokụt ke ibọrọ mbụme emi enyene ufọn.

4. (a) Ke uwụtn̄kpọ Jesus oro aban̄ade nditọiban duop, isan̄a didie idiọn̄ọ (a) owo emi edide ebendọ? (b) mbon emi ẹdide nditọiban?

4 Yak ise se uwụtn̄kpọ Jesus emi ekpepde nnyịn. Akpa kan̄a, kere ban̄a owo kiet kiet emi Jesus asiakde ke uwụtn̄kpọ emi. Anie edi ebendọ? Jesus eketịn̄ aban̄a idemesie. Itịn̄ ntem sia enyene ini en̄wen emi enye okokotde idem ebendọ. (Luke 5:34, 35) Mmanie idi nditọiban? Jesus ọkọdọhọ ke uwụtn̄kpọ emi ke nditọiban oro ẹkenyene ndidomo utuenikan̄ mmọ ntie mbet tutu ebendọ edi. Kûfre ke enyene ini emi Jesus ọkọdọhọde “ekpri otuerọn̄,” oro edi, mbet esie emi ẹyetde aran, ẹnam ukem n̄kpọ emi. Enye ọkọdọhọ mmọ ete: “Ẹbọbọ mbọbọ ke isịn mbufo ẹnyụn̄ ẹnam mme utuenikan̄ mbufo ẹsak, mbufo ẹnyụn̄ ẹbiet mme owo emi ẹtiede ẹbet eteufọk mmọ ke ini enye otode ndọ ọnyọn̄ edi.” (Luke 12:32, 35, 36) Ke adianade do, apostle Paul ye apostle John ẹmen mme Christian emi ẹyetde aran ẹdomo ye eyenan̄wan emi mîfiọkke erenowo. (2 Cor. 11:2; Edi. 14:4) Ntem, Jesus akada uwụtn̄kpọ oro odude ke Matthew 25:1-13 ọnọ mbet esie item onyụn̄ odụri mmọ utọn̄ ete ẹka iso ẹnam akpanikọ.

5. Nso ke Jesus etịn̄ emi anamde idiọn̄ọ ini emi se enye etịn̄de aban̄a ke uwụtn̄kpọ esie editịbede?

5 N̄kpọ en̄wen edi ini emi se Jesus etịn̄de aban̄a editịbede. Se enye etịn̄de mbemiso enye okụrede ndinọ uwụtn̄kpọ emi anam idiọn̄ọ ini emi enye etịn̄de aban̄a. Enye ọkọdọhọ ete: “Ebendọ edisịm.” (Matt. 25:10) Nte ikekpepde ke Enyọn̄-Ukpeme July 15, 2013, ẹtịn̄ ẹban̄a “edidi” Jesus utịm ikatiaita ke prọfesi Jesus ke Matthew ibuot 24 ye 25. Ke ini Jesus eketịn̄de aban̄a “edidi” esie, enye eketịn̄ aban̄a ini akwa ukụt emi enye edidide idibiere ikpe mme owo edinyụn̄ osobode mme idiọkowo ifep. Ntem, imekeme ndidọhọ ke mme n̄kpọ oro Jesus etịn̄de ke uwụtn̄kpọ nditọiban duop oro enye ọkọnọde etịbe ke mme akpatre usen emi, ye nte ke enye edidi ke ini akwa ukụt.

6. Didie ke ofụri se ẹnemede ke Matthew ibuot 24 ye 25 ekeme ndin̄wam nnyịn idiọn̄ọ se uwụtn̄kpọ nditọiban duop ekpepde nnyịn?

6 Edi nso ke uwụtn̄kpọ emi ekpep nnyịn? Fiak kere ofụri se Jesus enemede aban̄a. Ke Matthew ibuot 24, Jesus ama etịn̄ aban̄a ofụn emi anamde akpanikọ onyụn̄ enyenede ọniọn̄. “Ofụn” emi ẹdidi irenowo ifan̄ emi ẹyetde aran, emi ẹdidade ikọt Abasi usụn̄ ke mme akpatre usen. Jesus ọkọdọhọ ke ana mmọ ẹnam akpanikọ ẹnọ Abasi kpukpru ini. Ekem, enye ama ọnọ uwụtn̄kpọ nditọiban duop man an̄wam kpukpru mme Christian emi ẹyetde aran emi ẹdidude uwem ke mme akpatre usen. Enye okoyom kpukpru mmọ “ẹdu ke ukpeme” mbak idotenyịn  mmọ idikpa mfụhọ. (Matt. 25:13) Yak ifiak ineme uwụtn̄kpọ emi, inyụn̄ ise nte mbon oro ẹyetde aran ẹnamde se enye ekpepde nnyịn.

DIDIE KE MBON ORO ẸYETDE ARAN ẸNAM ITEM ORO JESUS ỌNỌDE KE UWỤTN̄KPỌ EMI?

7, 8. (a) Nso ye nso inam ẹdọhọ ke nditọiban ition emi ẹnyenede ọniọn̄ ẹketetie ẹbet ebendọ? (b) Didie ke mme Christian oro ẹyetde aran ẹwụt ke mmimọ imeben̄e idem?

7 Ke ini Jesus ọkọnọde uwụtn̄kpọ emi, enye ama ọdọhọ ke nditọiban ition emi ẹnyenede ọniọn̄ ẹma ẹkụre kpukpru n̄kpọ ẹtetie ẹbet ebendọ, ke mmọ iketiehe nte ndisịme nditọiban ition eken. Nso ye nso ikan̄wam mmọ? Akpa, mmọ ẹma ẹben̄e idem. Ọyọhọ iba, mmọ ẹma ẹdu ke ukpeme. Akpakana nditọiban mboduop ẹdomo utuenikan̄ mmọ ẹtaba idap ẹtie ẹbet ini emi ebendọ edidide. Edi sụk nditọiban ition emi ẹnyenede ọniọn̄ ẹkenen̄ede ẹben̄e idem. Mmọ kpọt ẹkekama utuenikan̄ ẹfiak ẹkama aran ke okpon̄. Ndi mme anam-akpanikọ mbon oro ẹyetde aran ẹben̄e idem ntre n̄ko?

8 Ih, mmọ ẹben̄e idem! Mme Christian oro ẹyetde aran ẹnam n̄kpọ nte nditọiban ition emi ẹnyenede ọniọn̄ ke mme akpatre usen emi. Mmọ ẹben̄e idem ndisọn̄ọ nda nnam n̄kpọ Abasi nsịm utịt. Mmọ ẹyak n̄kpọ ererimbot emi atak mmimọ ẹnyụn̄ ẹsọn̄ọ ẹda ẹnam n̄kpọ Abasi—idịghe ke ntak emi utịt ekperede—edi ke ntak emi mmọ ẹmade Abasi ye Eyen esie. Mmọ iyakke ererimbot emi abiat mmọ, inyịmeke nditiene mbon ererimbot mma inyene, ndu oburobụt uwem, nnyụn̄ ndu uwem ibụk. Mmọ ke ẹyama nte mme enyene-ọniọn̄ nditọiban oro ẹkekamade utuenikan̄ ẹtie ẹbet ebendọ; ikakke mmọ nditie mbet enye kpa ye emi etiede nte enye ebịghi ndidi.—Phil. 2:15.

9. (a) Nso ke Jesus ọkọdọhọ mbet esie ẹnam mbak idap edibọhọ mmọ? (b) Nso ke mme Christian oro ẹyetde aran ẹnam ẹban̄a mme n̄kpọ emi ẹwụtde ke ebendọ ke edi? (Se n̄ko ikọ idakisọn̄.)

9 Ọyọhọ n̄kpọ iba emi akan̄wamde nti nditọiban oro edi ke mmọ ẹma ẹdu ke ukpeme. Edi Jesus ọkọdọhọ ke ‘kpukpru nditọiban duop oro ẹma ẹyet idap ẹnyụn̄ ẹde’ ke ini emi eketiede nte ebendọ isọpke idi. Ndi emi ọwọrọ ke idap ekeme ndibọhọ Christian emi ẹyetde aran, oro edi, ke n̄kpọ ekeme ndinam enye osio ekikere ọkpọn̄ n̄kpọ Abasi ke esisịt ini ke adan̄aemi enye etiede ebet Christ? Ih. Jesus ama ọfiọk ke ekpededi owo ama n̄kpọ Abasi se amama, ke idem ekeme ndimem enye, anam enye osio esịt efep ke n̄kpọ Abasi ke esisịt ini. Ntak edi oro enye ọkọdọhọde mme Christian oro ẹyetde aran ete ẹnen̄ede ẹdu ke ukpeme. Ke uwụtn̄kpọ oro enye ọkọnọde, kpukpru nditọiban oro ẹma ẹdaha ẹda ke ini ẹkefioride ke ufọt okoneyo ẹte: “Sese ebendọ mi!” Edi sụk nditọiban oro ẹnyenede ọniọn̄ kpọt ẹkedu ke ukpeme ẹsịm akpatre. Mmọ ẹma ẹkama aranikan̄ oro awakde ekem, ikonyụn̄ itieneke iwọrọ ika ndidep aran. (Matt. 25:5, 6; 26:41) Nso kaban̄a mme anam-akpanikọ mbon oro ẹyetde aran mfịn? Nsio nsio n̄kpọ emi etịbede ke mme akpatre usen emi etie nte mfiori oro owụtde ke ebendọ ọmọn̄ edisesịm. Mmọ ẹnam n̄kpọ ẹban̄a mfiori emi. Ntem, mmọ ke ẹyọ, ke ẹnyụn̄ ẹben̄e idem ẹbet ini emi Ebendọ edidide. * Yak ineme se Jesus eketịn̄de akpatre, kpa n̄kpọ emi editịbede ke ata akpan ini.

ẸDIỌN̄ MME ENYENE-ỌNIỌN̄ ẸNYỤN̄ ẸNỌ NDISỊME UFEN

10. Nso mbụme ke ẹkeme ndibụp mban̄a se idude ke Matthew 25:8, 9?

10 Akpatre n̄kpọ emi Jesus etịn̄de edi ke ndisịme nditọiban ẹma ẹben̄e nditọiban emi ẹnyenede ọniọn̄ ẹte ẹnọ mmimọ aran isịn ke utuenikan̄, edi mmọ ẹsịn. (Kot Matthew 25:8, 9.) Ini ewe ke mme Christian oro ẹyetde aran ẹkesịn ndin̄wam owo? N̄kọ emeti ke ima idọhọ ke Jesus edidi idibiere ikpe ke ini akwa ukụt ekperede ndikụre. Mmọdo, etie nte se Jesus eketịn̄de aban̄a nti nditọiban ndisịn ndinọ ndisịme nditọiban aranikan̄ editịbe esisịt ini mbemiso akwa ukụt okụrede. Ntak emi idọhọde ntre? Sia etisịm ini oro, ẹfefịk mbon emi ẹyetde aran akpatre idiọn̄ọ.

11. (a) Nso iditịbe mbemiso akwa ukụt ọtọn̄ọde? (b) Nso ke mme enyene-ọniọn̄ nditọiban ndidọhọ mme ndisịme ẹka ẹkedep aranikan̄ ọwọrọ?

11 Ntre, mbemiso akwa ukụt ọtọn̄ọde, ẹyefịk kpukpru mme anam-akpanikọ mbon oro ẹyetde aran ke isọn̄ akpatre idiọn̄ọ. (Edi. 7:1-4) Ọtọn̄ọde ke ini oro, n̄kpọ ndomokiet ikemeke ndikpan mmọ ndika heaven. Edi kere ban̄a se iditịbede isua ifan̄ mbemiso akwa ukụt ọtọn̄ọde. Nso iditịbe inọ mbon emi ẹyetde aran emi mîkodụhe aba ke ukpeme, mîkonyụn̄ isọn̄ọke ida inam n̄kpọ Abasi? Mmọ idikaha heaven aba. Owo idifịkke mmọ akpatre idiọn̄ọ mbemiso akwa ukụt ọtọn̄ọde. Abasi eyemek mbon en̄wen oro ẹnamde akpanikọ esịn ke itie mmọ. Ke ini akwa ukụt ọtọn̄ọde, idem ayakpa mme Christian emi ẹyetde aran oro mînamke akpanikọ aba ndikụt nte ẹsobode Akwa Babylon. Ekeme ndidi ini oro ke mmọ ẹdikụt ke mmimọ iben̄eke idem inọ Ebendọ. Ekere ke nso ke ẹkeme ndinam nnọ mmọ ke utọ idiọk ini oro edieke mmọ ẹdide ẹdiyom un̄wam? Jesus ama ọbọrọ ke ini enye ọkọnọde uwụtn̄kpọ emi. Nditọiban emi ẹnyenede ọniọn̄ ẹma ẹsịn ndinọ ndisịme nditọiban aranikan̄, edi ẹdọhọ mmọ ẹkeyom aran ẹdep. Kûfre n̄ko ke ekedi “ke ufọt okoneyo.” Anie edima ndiberede usụn̄ nnyam aran nnọ mmọ ke idaha ini oro? Idụhe! Eyo ọsọn̄ akaha.

12. (a) Ke ini akwa ukụt ọtọn̄ọde, ndi mme anam-akpanikọ mbon oro ẹyetde aran ẹyekeme ndin̄wam mbon oro ẹyetde aran emi mîkanamke akpanikọ isịm ini emi ẹfịkde akpatre idiọn̄ọ? Ntak emi ọdọhọde ntre? (b) Nso iditịbe inọ mbon oro ẹbietde ndisịme nditọiban?

12 Ukem ntre, akwa ukụt ama ọtọtọn̄ọ, mme anam-akpanikọ mbon oro ẹyetde aran idikemeke ndin̄wam owo ndomokiet emi mîkọsọn̄ọke ida. Nso ndien iditịbe inọ mbon emi mîsọn̄ọke ida inam n̄kpọ Abasi? Se se iketịbede inọ ndisịme nditọiban emi ẹkekade ndidep aranikan̄ mi: “Ebendọ edisịm, ndien nditọiban oro ẹkeben̄ede idem ẹsan̄a ye enye ẹdụk usọrọ ndọ; ndien ẹberi usụn̄.” Ke ini Christ edidide ke utịt akwa ukụt, enye ayatan̄ mbon oro ẹyetde aran emi ẹnamde akpanikọ aka heaven. (Matt. 24:31; 25:10; John 14:1-3; 1 Thess. 4:17) Ẹyeberi usụn̄ ẹbaha mbon emi mîkọsọn̄ọke ida, emi ẹkenamde n̄kpọ nte ndisịme nditọiban oro Jesus eketịn̄de aban̄a. Mmọ ẹyetua, ẹnyụn̄ ẹdọhọ ete: “Ete, ete, berede usụn̄ nọ nnyịn!” Edi ẹdidọhọ mmọ ukem se ẹdidọhọde mme ebot ẹte: “Ntịn̄ akpanikọ nnọ mbufo, ndiọn̄ọke mbufo.” Mbọm oyokpon etieti.—Matt. 7:21-23; 25:11, 12.

13. (a) Ntak emi mîkpanaha ikere ke ediwak mbon oro ẹyetde aran ẹyeduọn̄ọ? (b) Ntak emi ikemede ndidọhọ ke uwụtn̄kpọ nditọiban duop owụt ke Jesus enịm ke mbon oro ẹyetde aran ẹyesọn̄ọ ẹda? (Se akpa ndise ibuotikọ emi.)

13 Ndi ikọ Jesus ọkọwọrọ ke ediwak mbon oro ẹyetde aran ẹyeduọn̄ọ, ndien ke ẹyemek mbon en̄wen ẹsịn ke itie mmọ? Ihih. Kûfre ke Jesus ama ọdọhọ “ofụn emi anamde akpanikọ” ke  Matthew ibuot 24 ete okûtie nte idiọk ofụn. Oro iwọrọke ke enye ekekere ke ofụn emi editie ntre. Kpasụk ntre, Jesus akada uwụtn̄kpọ nditọiban duop odụri mbon oro ẹyetde aran utọn̄ ete ẹka iso ẹnam akpanikọ. Ukem nte nditọiban ition ẹkenyenede ọniọn̄, ition ẹdi ndisịme, ana owo kiet kiet ke otu mbon oro ẹyetde aran ebiere ndiben̄e idem mbet Eteufọk mmọ nnyụn̄ ndu ke ukpeme. Edieke mmọ mînamke emi, mmọ ẹkeme ndikabade ntie nte ndisịme nditọiban inyụn̄ isọn̄ọke ida tutu esịm utịt. Se apostle Paul eketịn̄de edi emi n̄ko ke ini enye ekewetde leta ọnọ nditọete oro ẹyetde aran. (Kot Mme Hebrew 6:4-9; men Deuteronomy 30:19 domo.) Kpa ye oro Paul eketịn̄de ikọ ntem ye mmọ, enye ama enịm ke mmọ ẹyesọn̄ọ ẹda tutu ẹbọ utịp. Ukem ntre, uwụtn̄kpọ Jesus oro aban̄ade nditọiban duop owụt ke nte Jesus onyụn̄ adade mme Christian oro ẹyetde aran edi emi. Enye enen̄ede enịm ke owo mmọ kiet kiet eyekeme ndisọn̄ọ nda nnam n̄kpọ Abasi tutu ọbọ utịp utom esie!

DIDIE KE UWỤTN̄KPỌ EMI ENYENE UFỌN ỌNỌ “MME ERỌN̄ EN̄WEN”?

14. Ntak emi uwụtn̄kpọ nditọiban duop ebehede “mme erọn̄ en̄wen”?

14 Ndi ọkpọfọn ikere ke uwụtn̄kpọ emi Jesus ọkọnọde mbet esie oro ẹyetde aran mi ibeheke “mme erọn̄ en̄wen”? (John 10:16) Ihih! Ti ke se ikpepde ito uwụtn̄kpọ emi Jesus ọnọde edi yak idu ke ukpeme. Ndi mbon oro ẹyetde aran kpọt ẹnyene ndidu ke ukpeme? Jesus ama etịn̄ ini kiet ete: “Se ndọhọde mbufo ke ndọhọ kpukpru owo nte, Ẹdu ke ukpeme.” (Mark 13:37) Jesus oyom kpukpru mbet esie ẹben̄e idem ẹnyụn̄ ẹdu ke ukpeme. Mmọdo, akpana kpukpru mme Christian ẹkpebe uwụtn̄kpọ mbon emi ẹyetde aran ẹnyụn̄ ẹnịm n̄kpọ Abasi akpa ke uwem mmọ. N̄kọ emeti ke ndisịme nditọiban ẹma ẹben̄e nditọiban emi ẹnyenede ọniọn̄ ẹte ẹnọ mmimọ aranikan̄ isịn ke utuenikan̄. Utọ eben̄e oro eti nnyịn ke owo ikemeke ndikpono Abasi nnọ nnyịn, inyụn̄ ikemeke ndidu ke ukpeme nnọ nnyịn. Nnyịn kiet kiet idibọrọ mbụme idem nnyịn. Ana kpukpru nnyịn iben̄e idem. Jesus ọmọn̄ edisesịm!

Eben̄e oro eti nnyịn ke owo ikemeke ndikpono Abasi nnọ nnyịn, inyụn̄ ikemeke ndidu ke ukpeme nnọ nnyịn

15. Ntak emi kpukpru Christian ẹmade ndọ emi ẹdinamde ke heaven?

15 Mme n̄kpọ emi Jesus etịn̄de aban̄a ke uwụtn̄kpọ emi ebehe kpukpru Christian. Itịn̄ ntem sia imọdiọn̄ọ ke idụhe owo nnyịn ndomokiet emi mîmaha ndọ oro Jesus eketịn̄de aban̄a ke uwụtn̄kpọ emi. Mme Christian oro ẹyetde aran ẹdidu ke heaven Armageddon ama okụre; mmọ ẹdidi n̄wanndọ Christ. (Edi. 19:7-9) Ndọ oro ẹdinamde ke heaven do eyenyene ufọn ọnọ kpukpru mbon emi ẹdude ke isọn̄, sia oro owụt ke mmọ ẹnyene ata eti ukara. Mbọk, yak idomo ndinam se uwụtn̄kpọ nditọiban duop ekpepde nnyịn, edide ididu uwem ke heaven m̀mê ke isọn̄. Yak inen̄ede iben̄e idem inyụn̄ idu ke ukpeme idahaemi man ikpetiene idia ufọn nti n̄kpọ emi Jehovah ọn̄wọn̄ọde ọnọ nnyịn!

^ ikp. eki. 9 Ke uwụtn̄kpọ oro Jesus ọkọnọde, ini ama ebe tọn̄ọ ẹkekop ẹfioride ẹte, “Sese ebendọ mi!” (ufan̄ikọ 6) ye ini emi ebendọ edide edisịm (ufan̄ikọ 10). Ke ofụri akpatre usen emi, mme Christian oro ẹyetde aran ẹdu ke ukpeme. Mmọ ẹkụt mme n̄kpọ oro owụtde ke Jesus ke akara ke heaven. Edi ana mmọ ẹka iso ẹdu ke ukpeme tutu Jesus edi ke ini akwa ukụt.