Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2015

Ẹka Iso Ẹn̄wam Nditọete Christ

Ẹka Iso Ẹn̄wam Nditọete Christ

“Adan̄a nte mbufo ẹkenamde n̄kpọ emi ẹnọ kiet ke otu n̄kpri-n̄kan nditọete mi emi, mbufo ẹkenam ẹnọ mi.”—MATT. 25:40.

1, 2. (a) Siak uwụtn̄kpọ inan̄ oro Jesus ọkọnọde mbet esie. (Se akpa ndise ibuotikọ emi.) (b) Ntak emi ọfọnde idiọn̄ọ se uwụtn̄kpọ emi ọwọrọde?

JESUS etịn̄ ediwak n̄kpọ ọnọ Peter, Andrew, James, ye John—ndima ufan esie. Enye ọnọ mmọ nsio nsio uwụtn̄kpọ, utọ nte eke ofụn emi anamde akpanikọ onyụn̄ enyenede ọniọn̄, eke nditọiban duop, ye eke talent. Jesus afiak ọnọ mmọ uwụtn̄kpọ en̄wen mbemiso etrede nneme emi. Uwụtn̄kpọ enye emi aban̄a ini emi “Eyen owo” edidide idibiere ikpe inọ “kpukpru mme idụt.” Mbet esie ẹma ẹnen̄ede ẹma se enye eketịn̄de! Jesus ama etịn̄ aban̄a otu iba ke uwụtn̄kpọ enye emi. Enye okokot otu kiet erọn̄, okot enye eken ebot. Ekem, enye ama etịn̄ aban̄a ọyọhọ otu ita emi enye okokotde “nditọete” “Edidem.”—Kot Matthew 25:31-46.

2 Mme asan̄autom Jehovah ke eyo nnyịn ẹma uwụtn̄kpọ emi ukem nte mme apostle ẹkemade sia Jesus eketịn̄ aban̄a se idiwọrọde mme owo. Enye ama etịn̄ ntak emi ẹdinọde ndusụk owo nsinsi uwem, edi ẹsobo mbon eken taktak. Ntak edi oro ọfọnde iyom usụn̄ idiọn̄ọ se uwụtn̄kpọ emi ọwọrọde ye se ikpanamde man inyene nsinsi uwem. Ke ibuotikọ emi, iyọbọrọ mbụme ifan̄ emi: Didie ke  Jehovah anam uwụtn̄kpọ emi an̄wan̄a nnyịn sụn̄sụn̄? Ntak emi ikemede ndidọhọ ke uwụtn̄kpọ emi ekpep nnyịn ntak emi anade ikwọrọ ikọ? Mmanie inyene ndikwọrọ ikọ? Ntak emi anade ika iso in̄wam “Edidem” ye “nditọete” esie idahaemi?

DIDIE KE ẸNAM UWỤTN̄KPỌ ERỌN̄ YE EBOT AN̄WAN̄A NNYỊN?

3, 4. (a) Siak n̄kpọ ita emi anade idiọn̄ọ man uwụtn̄kpọ erọn̄ ye ebot an̄wan̄a nnyịn. (b) Ke 1881, Zion’s Watch Tower ọkọdọhọ ke uwụtn̄kpọ erọn̄ ye ebot ọwọrọ nso?

3 Enyene n̄kpọ ita emi anade idiọn̄ọ man uwụtn̄kpọ erọn̄ ye ebot an̄wan̄a nnyịn. Akpa, ana idiọn̄ọ mbon emi ẹtịn̄de ẹban̄a ke uwụtn̄kpọ emi. Udiana, ana idiọn̄ọ ini emi ẹdibaharede erọn̄ ye ebot. Ọyọhọ ita, ana idiọn̄ọ se ẹdade ẹbiere ke owo edi erọn̄ m̀me ebot.

4 Ke 1881, Zion’s Watch Tower ọkọdọhọ ke Jesus edi “Eyen owo,” enye n̄ko edi “Edidem,” afiak etịn̄ ke “nditọete” edidem emi idịghe sụk mbon oro ẹditienede Jesus ikara ke heaven, ke esịne kpukpru mbon oro ẹdidude uwem mi ke isọn̄ ke ini ẹdinamde mme owo ẹfọn ẹma. Enye ọkọdọhọ n̄ko ke ẹdibahade erọn̄ ye ebot ke ini Tọsịn Isua Ukara Christ, ye nte ke mbon oro ẹkpebede ima Abasi ke ẹdibat nte erọn̄.

5. Didie ke ẹkenam uwụtn̄kpọ erọn̄ ye ebot afiak an̄wan̄a ke 1923?

5 Ke 1923, Jehovah ama anam uwụtn̄kpọ emi afiak an̄wan̄a ikọt esie. Enyọn̄-Ukpeme (Ikọmbakara) eke October 15, 1923 ama afiak etịn̄ ke Jesus edi “Eyen owo.” Enyọn̄-Ukpeme oro ama ada nsio nsio itie N̄wed Abasi owụt ke sụk mbon emi ẹdikarade ye Christ ke heaven ẹdi nditọete esie, ndien ke mbon emi ẹdidude uwem ke isọn̄ ke ini ukara Christ ẹdi mme erọn̄. Edi enye ọkọdọhọ ke ini ewe ke ẹdibahade erọn̄ ye ebot? Enyọn̄-Ukpeme oro ọkọdọhọ ke sia nditọete Christ ẹdidude ye enye ke heaven ke ofụri tọsịn isua emi enye edikarade, ke idụhe nte mme owo ke isọn̄ ẹkpekemede ndin̄wam m̀mê nditre ndin̄wam mmọ. Mmọdo, ẹdibahade erọn̄ ye ebot mbemiso Tọsịn Isua Ukara Christ ọtọn̄ọde. Edi nso kaban̄a se ẹdade ẹbiere m̀mê owo edi erọn̄ m̀mê ebot? Enyọn̄-Ukpeme oro ọkọdọhọ ke mbon oro ẹnyịmede ke Jesus edi Ọbọn̄ ẹnyụn̄ ẹdade ukara esie nte n̄kukụre ukara emi edinamde kpukpru n̄kpọ ọfọn ke ẹdibat nte erọn̄.

6. Didie ke ẹkefiak ẹnam uwụtn̄kpọ erọn̄ ye ebot an̄wan̄a nnyịn ke 1995?

6 Se ẹketịn̄de emi ke 1923 ama anam ikọt Jehovah ẹnịm ke ẹbahade erọn̄ ye ebot ke ofụri ukperedem ini emi, ndien ke se owo anamde aban̄a etop Obio Ubọn̄ oro ẹkwọrọde ke ẹda ẹbiere m̀mê enye edi erọn̄ m̀mê ebot. Edi ke 1995, ẹma ẹnam n̄kpọ emi an̄wan̄a akan nte ekedide. Ibuotikọ ukpepn̄kpọ iba ke Enyọn̄-Ukpeme October 15, 1995 ama etịn̄ nte ikọ Jesus ke Matthew 24:29-31 (kot) ebietde se enye etịn̄de ke Matthew 25:31, 32. (kot.) * Akpa ibuotikọ ọkọdọhọ ke ‘ẹdibiere ikpe inọ erọn̄ ye ebot ke ini iso.’ Edi ini ewe ke ini iso? Enyọn̄-Ukpeme oro ọdọhọ ke edidi ke akwa ukụt ama ọkọtọn̄ọ, kpa ini emi Eyen owo ‘edide ke ubọn̄ esie.’

7. Didie ke uwụtn̄kpọ erọn̄ ye ebot an̄wan̄a nnyịn idahaemi?

7 Uwụtn̄kpọ erọn̄ ye ebot enen̄ede an̄wan̄a nnyịn idahaemi. Imọfiọk kpukpru  mbon emi ẹsiakde ke uwụtn̄kpọ oro. Jesus edi “Eyen owo,” enye edi Edidem. Mme Christian oro ẹyetde aran, emi ẹditienede enye ẹkara ke heaven ke enye okokot “nditọete mi.” (Rome 8:16, 17) “Erọn̄” ye “ebot” ẹda ẹban̄a mme owo ke kpukpru idụt, emi owo mîdaha edisana spirit iyet aran. Edi ini ewe ke ẹdibiere mbon emi ẹdide erọn̄ ye ebot? Ẹdibiere mbemiso akwa ukụt okụrede, ndien imọfiọk ke akwa ukụt ọmọn̄ ọtọtọn̄ọ. Edi nso ke ẹdida ibiere m̀mê owo edi erọn̄ m̀mê ebot? Ẹdida nte owo kiet kiet anamde n̄kpọ ye nditọete Christ oro ẹsụhọde ke isọn̄ ibiere. Imọkọm Jehovah etieti ke emi enye anamde uwụtn̄kpọ emi ye uwụtn̄kpọ eken ke Matthew ibuot 24 ye 25 an̄wan̄a nnyịn sụn̄sụn̄!

DIDIE KE UWỤTN̄KPỌ EMI OWỤT KE ANA IKWỌRỌ IKỌ?

8, 9. Nso inam Christ ọdọhọ ke mme erọn̄ ẹdi “ndinen owo”?

8 Ke ini Jesus ọkọnọde uwụtn̄kpọ erọn̄ ye ebot, enye iketịn̄ke nnennen nnennen iban̄a ukwọrọikọ. Edi ntak emi ikemede ndidọhọ ke uwụtn̄kpọ oro ekpep nnyịn ntak emi anade ikwọrọ ikọ?

9 Akpa kan̄a, kûfre ke Jesus akada uwụtn̄kpọ emi ekpep mbet esie n̄kpọ. Mmọdo, imọfiọk ke enye iketịn̄ke iban̄a ata ata edibahade erọn̄ ye ebot. Ikọ esie ikọwọrọke n̄ko ke ana owo ọnọ nditọete imọ ata ata udia ye ọfọn̄, ese aban̄a mmọ ke ini mmọ ẹdọn̄ọde, m̀mê aka ufọk-n̄kpọkọbi ekese mmọ man ẹbat owo oro nte erọn̄. Enye eketịn̄ aban̄a nte ẹkpenamde n̄kpọ ye nditọete imọ. Enye ọkọdọhọ ke edibat mme erọn̄ nte “ndinen owo” ke ntak emi mmọ ẹdiọn̄ọde ke mbon oro ẹyetde aran ẹdi nditọete imọ ẹnyụn̄ ẹn̄wamde mmọ ke mme akpatre usen emi.—Matt. 10:40-42; 25:40, 46; 2 Tim. 3:1-5.

10. Didie ke mbon oro ẹyomde ẹbat mmimọ nte erọn̄ ẹkpefọn ido ye nditọete Christ?

10 Ọyọhọ n̄kpọ iba emi mîkpanaha ifre edi ke Jesus ọkọnọ uwụtn̄kpọ erọn̄ ye ebot ke ini enye okosụk etịn̄de mme n̄kpọ emi ẹditịbede ke akpatre ini editịm n̄kpọ emi. (Matt. 24:3) Kiet ke otu n̄kpọ emi enye ekebemde iso asiak ekedi nte ke ‘ẹyekwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.’ (Matt. 24:14) Edi mbemiso enye etịn̄de aban̄a erọn̄ ye ebot, enye ama ọnọ uwụtn̄kpọ oro aban̄ade talent. Nte ikekpepde ke ibuotikọ oro ebede, Jesus ọkọnọ uwụtn̄kpọ emi man mbon oro ẹyetde aran, “nditọete” esie, ẹfiọk ke ana mmimọ isịn idem ikwọrọ eti mbụk. Edi nditọete Christ oro ẹsụhọde ke isọn̄ iwakke aba, ndien utom ukwọrọikọ ke okpokpon. Mmọ ẹdinam didie ikwọrọ ikọ inọ “kpukpru mme idụt” mbemiso utịt edide? Uwụtn̄kpọ erọn̄ ye ebot owụt ke mme owo ẹyen̄wam mmọ. Ntem, ata akpan n̄kpọ kiet oro mbon oro ẹyomde ẹbat mmimọ nte erọn̄ ẹkpenamde ẹnọ nditọete Christ edi ndin̄wam mmọ ke utom ukwọrọikọ. Edi didie ke mmọ ẹn̄wam ke utom emi? Ndi okụre ke ndinọ okụk nnyụn̄ ndọhọ mmọ ẹsịn idem ẹnam utom emi, mîdịghe ndi n̄kpọ en̄wen do emi mmọ ẹkpenamde?

MMANIE INYENE NDIKWỌRỌ IKỌ?

11. Nso mbụme ke owo ekeme ndibụp, ndien ntak-a?

11 Mbet Jesus ẹsịm miliọn itiaita idahaemi, ndien n̄wakn̄kan ke otu emi  ẹdori enyịn ndidu uwem ke isọn̄. Jesus ikọnọhọ mmọ talent emi enye ọkọnọde ifịn esie emi ẹyetde aran. (Matt. 25:14-18) Ntem, owo ekeme ndibụp ete, ‘Ndi ẹtiene ẹdọhọ mbon oro owo mîyetke aran ẹkwọrọ ikọ?’ Ih, ẹdọhọ. Se nsio nsio ntak emi anamde idọhọ ntre mi.

12. Nso ke se Jesus eketịn̄de ke Matthew 28:19, 20 ọwọrọ?

12 Jesus ọkọdọhọ kpukpru mbet esie ẹkwọrọ ikọ. Ke Jesus ama ekeset, enye ama ọdọhọ mme anditiene enye ẹkenam mme owo ẹdi mbet imọ, ẹkpep mmọ “kpukpru n̄kpọ” oro imọ iketemede mmọ. Kiet ke otu n̄kpọ emi enye eketemede mmọ ekedi ndikwọrọ ikọ. (Kot Matthew 28:19, 20.) Mmọdo, ana kpukpru mbet Christ ẹkwọrọ ikọ, edide mmọ ẹdori enyịn ndikara ke heaven m̀mê ndidu uwem mi ke isọn̄.—Utom 10:42.

13. Nso ke n̄kukụt John ọwọrọ, ndien ntak emi ọdọhọde ntre?

13 N̄wed Ediyarade owụt ke mme Christian oro ẹyetde aran ye mbon eken emi owo mîyetke aran ẹyekwọrọ ikọ. Apostle John ama okụt ke n̄kukụt nte “n̄wanndọ” eyenerọn̄, owo 144,000 oro ẹdikarade ye Christ ke heaven, ẹkotde mme owo ẹte “[ẹdibọ] mmọn̄ uwem ke mfọn.” (Edi. 14:1, 3; 22:17) Mmọn̄ emi ada aban̄a ufak Christ emi edisiode nnyịn ke ufụn idiọkn̄kpọ ye n̄kpa. (Matt. 20:28; John 3:16; 1 John 4:9, 10) Mme Christian oro ẹyetde aran ẹda iso ke ndinam mme owo ẹdiọn̄ọ ufọn emi ufak Christ enyenede ye se mmọ ẹkpenamde man ẹtiene ẹdia ufọn ufak. (1 Cor. 1:23) Ke n̄kukụt emi, John ama okụt n̄ko mbon en̄wen emi mîsịneke ke otu emi. Mmọ ẹdi mbon emi ẹdoride enyịn ndidu uwem mi ke isọn̄. Ẹdọhọ mmọ n̄ko ẹtiene ẹdọhọ ẹte, “Di!”  Ndien mmọ ẹnam emi, ke ẹnyụn̄ ẹtiene ẹkot mbon en̄wen ẹdi ẹdibọ mmọn̄ uwem. N̄kukụt emi owụt ke kpukpru mbon emi ẹnyịmede ‘ndidi’ ana ẹka ẹkekwọrọ ikọ ẹkot mbon en̄wen.

14. Didie ke ikeme ndiwụt ke imenịm “ibet Christ”?

14 Ana kpukpru mbon emi ‘ẹnịmde ibet Christ’ ẹkwọrọ ikọ. (Gal. 6:2) Ukem ibet ke Jehovah ọnọ kpukpru ikọt esie; se enye odọhọde mbon oro ẹyetde aran ẹnam ke enye ọdọhọ mbon eken ẹnam. Ke uwụtn̄kpọ, enye ọkọdọhọ nditọ Israel ete: “Ibet kiet edidu ọnọ amanaisọn̄ ye esenowo emi odude ke otu mbufo.” (Ex. 12:49; Lev. 24:22) Idịghe kpukpru ibet emi ẹkenọde nditọ Israel ke ẹdọhọ nnyịn mme Christian inịm. Edi ana kpukpru nnyịn, edide ẹyet nnyịn aran m̀mê owo iyetke, inịm ‘ibet Christ.’ Ibet Christ esịne kpukpru se Jesus ekekpepde. Akakan n̄kpọ emi Jesus ekekpepde mbet esie edi yak mmọ ẹma kiet eken. (John 13:35; Jas. 2:8) Akpan usụn̄ emi iwụtde ke imama Abasi, Christ, ye mbọhọidụn̄ nnyịn edi ndikwọrọ eti mbụk Obio Ubọn̄.—John 15:10; Utom 1:8.

15. Ntak emi ẹkemede ndidọhọ ke Jesus ọkọdọhọ kpukpru mbet esie ẹkwọrọ ikọ?

15 Se Jesus etịn̄de ye ibat ibat owo ekeme ndibehe ata ediwak owo. Ke uwụtn̄kpọ, Jesus akanam ediomi Obio Ubọn̄ ye mbet esie 11, edi ediomi emi ebehe kpukpru owo 144,000. (Luke 22:29, 30; Edi. 5:10; 7:4-8) Kpasụk ntre, ibat ibat mbet emi ẹkedude ke ini Jesus ekesetde ke Jesus ọkọdọn̄ ẹkekwọrọ ikọ. (Utom 10:40-42; 1 Cor. 15:6) Edi kpukpru mbet esie ke eyo mme apostle ẹma ẹdiọn̄ọ ke ana mmimọ n̄ko itiene ikwọrọ ikọ, kpa ye oro mmọ mîkodụhe ke ini Jesus eketịn̄de ikọ emi. (Utom 8:4; 1 Pet. 1:8) Ntre ke onyụn̄ edi mfịn. Jesus itịn̄ke ikọ ye owo ndomokiet ke otu owo miliọn itiaita emi ẹkwọrọde ikọ mfịn. Edi kpukpru nnyịn imọdiọn̄ọ ke ana ikwọrọ ikọ man iwụt ke imọbuọt idem ye enye.—Jas. 2:18.

ANA IN̄WAM NDITỌETE CHRIST IDAHAEMI

16-18. Didie ke mbon emi ẹyomde Abasi abat mmimọ nte mme erọn̄ esie ẹkpen̄wam nditọete Christ, ndien ntak emi anade mmọ ẹnam oro idahaemi?

16 Satan ke an̄wana ye nditọete Christ oro ẹsụhọde mi ke isọn̄, oyonyụn̄ enen̄ede an̄wana ye mmọ sia enye ọdiọn̄ọ ke ‘ibio ini imọ’ ọmọn̄ okokụre. (Edi. 12:9, 12, 17) Kpa ye ofụri se Satan anamde nditọete Christ, mmọ ẹnen̄ede ẹsịn idem ẹnam utom ukwọrọikọ idahaemi ẹkan nte akanam ẹnamde. Imenen̄ede ikụt ke Jesus odu ye mmọ, an̄wam mmọ ẹnam utom emi.—Matt. 28:20.

17 Enenem kpukpru nnyịn ndin̄wam nditọete Christ nnam utom ukwọrọikọ. Imesitịp okụk inyụn̄ itiene ibọp mme Ufọkmbono Obio Ubọn̄, Itie Mbono, ye n̄kọk itieutom. Ke ini ikopde item mbiowo ye eke nditọete eken emi “ofụn emi anamde akpanikọ onyụn̄ enyenede ọniọn̄” ẹmekde, nnyịn iwụt ke imama ndin̄wam nditọete Christ.—Matt. 24:45-47; Heb. 13:17.

Mbon emi ẹyomde Abasi abat mmimọ nte mme erọn̄ esie ke ẹn̄wam nditọete Christ ke nsio nsio usụn̄ (Se ikpehe ekikere 17)

18 Mme angel ẹmọn̄ ẹsasana ofụm nsobo akwa ukụt ẹyak. Edi mbemiso mmọ ẹnamde emi, ẹyefịk nditọete Christ emi ẹsụhọde ke isọn̄ akpatre idiọn̄ọ. (Edi. 7:1-3) Ẹyetan̄ mmọ ẹka heaven mbemiso Armageddon ọtọn̄ọde. (Matt. 13:41-43) Ntem, edieke iyomde Abasi abat nnyịn nte mme erọn̄ esie, ana in̄wam nditọete Christ idahaemi.

^ ikp. eki. 6 Edieke oyomde ndikot ofụri se ẹketịn̄de ẹban̄a uwụtn̄kpọ emi, se ibuotikọ iba emi, “N̄kpọ Editie Didie ye Afo ke Iso Itie Ikpe?” ye “Nso Ini Iso Idu Inọ Erọn̄ ye Ebot?” ke Enyọn̄-Ukpeme October 15, 1995.