Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  February 2015

Sụhọde Idem Nyụn̄ Tua Owo Mbọm Nte Jesus

Sụhọde Idem Nyụn̄ Tua Owo Mbọm Nte Jesus

“Christ ama okụt ukụt ke ntak mbufo, onyụn̄ ọkpọn̄ uwụtn̄kpọ ọnọ mbufo man mbufo ẹkpetiene nde ikpat esie ketket.”1 PET. 2:21.

1. Ntak emi ẹdọhọde ke ndikpebe Jesus ayanam ikpere Jehovah?

NNYỊN imesima ndikpebe mbon emi ẹnyenede nti edu ẹnyụn̄ ẹdude uwem emi nnyịn imade. Edieke ẹkpedọhọde imek owo emi odotde se ẹkpekpebede ke otu kpukpru owo oro akanam ẹdude uwem ke ererimbot emi, Jesus Christ ekpedi akpa owo emi ikpemekde. Ntak emi idọhọde ntre? Sia Jesus ke idemesie ọkọdọhọ ete: “Owo eke okụtde mi okụt Ete n̄ko.” (John 14:9) Jesus okodu uwem ata ukem ukem nte Ete esie. Ntre ndikụt enye onyụn̄ etie nte ndikụt Ete esie. Ndikpebe Jesus anam inen̄ede ikpere Jehovah, kpa akakan owo ke ofụri ekondo. Idụhe se ifọnde nte ndikpebe Eyen Abasi!

2, 3. (a) Ntak emi Jehovah akanamde ẹwet nte Eyen esie okodude uwem ẹnọ nnyịn, ndien nso ke Jehovah oyom nnyịn inam? (b) Nso ke idineme ke ibuotikọ emi ye ke enye oro etienede?

2 Edi nnyịn idisan̄a didie idiọn̄ọ nte Jesus okodude uwem? Jehovah anam etieti ye nnyịn. Enye ama anam ẹwet nte Jesus okodude uwem ẹnọ nnyịn. Mbụk Jesus odu ke N̄wed Abasi Christian Usem Greek. Jehovah akanam ẹwet enye ẹnọ  nnyịn man ikeme ndidiọn̄ọ Eyen esie nnyụn̄ n̄kpebe enye. (Kot 1 Peter 2:21.) Bible okot uwụtn̄kpọ oro Jesus ekenịmde “nde ikpat esie.” Etie nte n̄kpọ eke Jehovah ọdọhọde itiene Jesus ke edem, isịn ukot ke ebiet emi enye esịnde ukot. Edi idisan̄a didie itiene nde ikpat mfọnmma owo, ke emi idade-da idiọkn̄kpọ idimana mi? Jehovah iyomke nnyịn ifọn ima nte Jesus. Enye oyom nnyịn idomo ofụri ukeme nnyịn idu uwem nte Eyen imọ, kpa ye oro nnyịn mîfọnke ima.

3 Yak ineme iban̄a nte Jesus okodude uwem. Ke ibuotikọ enye emi, iyeneme iban̄a nte enye okosụhọrede idem ekesinyụn̄ atuade mme owo mbọm. Ke ibuotikọ emi etienede, iyeneme iban̄a nte enye ekenyenede uko ye mbufiọk. Iyọbọrọ mbụme ita emi ke ini inemede mme edu emi kiet kiet: Nso ke edu emi edi? Didie ke Jesus okowụt ke imenyene edu emi? Didie ke ikeme ndikpebe enye?

JESUS AMA OSỤHỌDE IDEM

4. Nso utọ owo ke afo ada nte owo emi osụhọrede idem?

4 Nso idi nsụhọdeidem? Mme owo ẹkohode idem etieti ke ererimbot emi. Ndusụk owo ẹsikere ke owo emi osụhọrede idem edi mbe. Edi emi idịghe akpanikọ sia owo emi mîsụhọkede idem akam edi mbe. Oyom owo enyene uko man ekeme ndisụhọde idem. Nsụhọdeidem edi ata isio ye ntan̄idem. (Phil. 2:3) Nte owo adade idemesie esinam owo osụhọde idem. N̄wed ukabade ikọ Bible kiet ọdọhọ ke “owo emi ọdiọn̄ọde ke Abasi anam imọ idi se ededi oro imọ idide oyosụhọde idem.” Edieke isụhọrede idem nte Abasi oyomde, nnyịn idikereke ke imọfọn ikan owo en̄wen. (Rome 12:3) Imemke utom ndisụhọde idem. Edi imekeme ndisụhọde idem edieke itienede nde ikpat Eyen Abasi inyụn̄ itide ke mîkpedịghe Abasi ke nnyịn ikpodụhe uwem.

5, 6. (a) Anie edi Michael, Etubom Mme Angel? (b) Nso ke Michael akanam emi owụtde ke enye osụhọde idem?

5 Toto ke ini emi Jesus okodude ke heaven tutu esịm ini emi enye ekedide isọn̄, enye ama osụhọde idem etieti. Nso iwụt ke enye ama osụhọde idem? Yak ise nte enye akanamde n̄kpọ.

6 Edu esie. Jude etịn̄ se iketịbede ke heaven ke ini Jesus mîkedịghe isọn̄ kan̄a. (Kot Jude 9.) Jesus edi Michael, Etubom Mme Angel. Enyene ini emi enye “mîkenyịmeke inọ Devil edi [eneni] aban̄a okpo Moses.” N̄kọ emeti ke Jehovah ke idemesie okobụk Moses, ke owo ndomokiet idiọn̄ọke udi Moses. (Deut. 34:5, 6) Nnyịn idiọn̄ọke se Devil okoyomde ndida okpo Moses nnam. Ekeme ndidi enye okoyom ndida okpo Moses ndọk ibi esie nnyụn̄ nnam mme owo ẹtuak ibuot ẹnọ enye. Edi imọdiọn̄ọ ke Michael ikenyịmeke inọ enye. N̄wed kiet ọdọhọ ke ikọ Greek emi ẹkabarede ‘inyịmeke inọ’ ye ‘eneni’ ẹdi “ikọ emi ẹsitịn̄de ke esopikpe,” onyụn̄ ekeme ndiwọrọ ke “Michael ‘ọkọdọhọ Devil ke enye inyeneke unen’ ndibụhọde okpo Moses.” Edi Michael ama ọdiọn̄ọ ke imọ inyeneke unen ndibiere ikpe nnọ Devil, onyụn̄ ayak enye oro esịn Jehovah, Akakan Ebiereikpe, ke ubọk. Ntem, idem ke ini esịt akayatde Michael, enye ikanamke n̄kpọ emi enye mînyeneke unen ndinam. Jesus osụhọde idem etieti!

7. Didie ke nte Jesus ekesitịn̄de ikọ onyụn̄ anamde n̄kpọ owụt ke enye ama osụhọde idem?

7 Nte Jesus eketịn̄de ikọ onyụn̄ anamde  n̄kpọ ke ini enye okodude ke isọn̄ owụt ke enye ama osụhọde idem etieti. Nte enye ekesitịn̄de ikọ. Jesus ikesitoroke idem. Enye akakam oyom ẹtoro Ete esie. (Mark 10:17, 18; John 7:16) Akanam enye isueneke mbet esie inyụn̄ inamke mmọ ẹkere ke mmimọ iwọrọke n̄kpọ. Enye ekesitịn̄ ikọ ye mmọ ukpono ukpono, otoro mmọ ke ini mmọ ẹnamde se inende onyụn̄ ọdọhọ ke imọdiọn̄ọ ke mmọ ẹyeka iso ẹnam nti n̄kpọ. (Luke 22:31, 32; John 1:47) Nte enye ekesinamde n̄kpọ. Jesus ikedịghe imọ owo, ikonyụn̄ iyomke ikpọ n̄kpọ. (Matt. 8:20) Enye ama enyịme ndinam utom emi ofụn akpanamde. (John 13:3-15) Idụhe owo emi osụhọrede idem nte enye. (Kot Philippi 2:5-8.) Jesus ama anam uduak Abasi, “osụk ibuot [ọnọ Abasi] tutu esịm n̄kpa.” Enye iketiehe nte mbon ntan̄idem emi ẹdade owo emi osụhọrede idem nte mbe. Emi anam Bible ọdọhọ ke Jesus ama enyene ifụre ifụre ido onyụn̄ ‘osụhọde idem.’—Matt. 11:29.

SỤHỌDE IDEM NTE JESUS

8, 9. Didie ke ikeme ndisụhọde idem?

8 Didie ke ikeme ndisụhọde idem nte Jesus? Edu nnyịn. Nsụhọdeidem idiyakke inam n̄kpọ emi nnyịn mînyeneke unen ndinam. Edieke idiọn̄ọde ke owo inọhọ nnyịn odudu ndibiere ikpe nnọ mbon en̄wen, nnyịn idiyatke esịt itịn̄ ikọ ntịme ntịme ye owo ke ini enye anamde ndudue, m̀mê ndiyom n̄kpọ ntịn̄ ndọhọ ke oro anam enye etịn̄ m̀mê anam se enye akanamde. (Luke 6:37; Jas. 4:12) Nsụhọdeidem idiyakke ida idem ke ‘edinen ikaha,’ idinyụn̄ iyakke ida mbon emi mîkemeke ndinam se nnyịn isinamde m̀mê emi mînyeneke ifetutom oro nnyịn inyenede ke usụhọde. (Eccl. 7:16) Mbiowo emi ẹsụhọrede idem idikereke ke imọfọn ikan nditọete mmọ ke esop. Mmọ ẹdikam ẹda nte ke “mbon en̄wen ẹfọn ẹkan [mmimọ],” ke mmimọ ikpri ikan.—Phil. 2:3; Luke 9:48.

9 Da W. J. Thorn ke uwụtn̄kpọ. Enye ọkọtọn̄ọ ndidi esenyịn oro asan̄ade-san̄a ke 1894. Edi ke enye ama akanam utom oro ke ediwak isua, ẹma ẹkot enye edinam utom ke ufọkunen ke Bethel New York. Enye ọkọdọhọ ete: “Ini ekededi emi n̄kerede se ikpanamde ẹdọhọ n̄kpọn̄ utom circuit ndinam utom ke ufọkunen, mmesikot idem nnọ item nnyụn̄ ndọhọ idemmi nte: ‘Ntan isọn̄ nte afo, ekekere ke idi nso?’” (Kot Isaiah 40:12-15.) Brọda Thorn ama osụhọde idem etieti!

10. Didie ke nte itịn̄de ikọ inyụn̄ inamde n̄kpọ owụt ke imosụhọde idem?

10 Nte isitịn̄de ikọ. Nte isitịn̄de ikọ ke idida idiọn̄ọ m̀mê imosụhọde idem. (Luke 6:45) Ke ini inemede nneme ye mme owo, nnyịn idiyịreke itịn̄ se nnyịn idide ye mme ifetutom emi inyenede. (N̄ke 27:2) Utu ke oro, nnyịn idikam ikụt nti n̄kpọ emi nditọete nnyịn ẹnamde ye nti edu mmọ, inyụn̄ itoro mmọ. (N̄ke 15:23) Nte isinamde n̄kpọ. Mme Christian emi ẹsụhọrede idem isiyomke ndiwọrọ etop ke ererimbot emi. Mmọ isiyomke ikpọ n̄kpọ, edi ẹsinyịme ndinam utom emi mme owo mîdaha ke n̄kpọ man ẹkeme ndisịn idem nnam n̄kpọ Jehovah. (1 Tim. 6:6, 8) Edi n̄kponn̄kan usụn̄ emi ikemede ndiwụt ke imosụhọde idem edi ndikop item. Owo emi mîsụhọkede idem idikemeke ‘ndinam n̄kpọ nte esop Jehovah ẹdọhọde ẹnam idinyụn̄ imaha ndikop uyo mbiowo ke esop.’—Heb. 13:17.

JESUS AMA ATUA MME OWO MBỌM

11. Didie ke owo emi esituade mbon en̄wen mbọm esinam n̄kpọ?

11 Owo mîmaha owo ituaha owo mbọm. Bible ọdọhọ ke Jehovah ye Jesus ẹsitua mme owo mbọm ẹnyụn̄ ẹma mmọ. (Luke 1:78; 2 Cor. 1:3; Phil. 1:8) Sia Bible ọdọhọde itua owo mbọm, n̄wed kiet emi esitịn̄de n̄kpọ aban̄a Bible ọdọhọ ete: ‘Se Bible ọdọhọde edi yak ikûseseme owo emi enyenede nnyịn mbọm kpọt edi yak in̄wam enye.’ Mbọm esinam owo an̄wam owo en̄wen anam n̄kpọ oro enye mîkekemeke ndinam.

12. Nso iwụt ke Jesus ama esitua mme owo mbọm?

12 Nso iwụt ke Jesus ama esitua owo mbọm? Nte enye ekesinamde n̄kpọ. Enye ama esitua mme owo mbọm etieti. Ke uwụtn̄kpọ, ke ini enye okokụtde nte Mary ufan esie ye mbon eken ẹtuade n̄kpa Lazarus, Jesus ama ada ke iso kpukpru mmọ “atua eyet.” (Kot John 11:32-35.) Mbọm ama anam Jesus anam Lazarus eset ukem nte akanamde enye anam eyen ebeakpa kiet eset. (Luke 7:11-15; John 11:38-44) Ekeme ndidi se Jesus akanamde emi ama ọnọ Lazarus ifet nditiene n̄ka heaven. Mbemiso emi, enyene ini emi enye okokụtde otuowo ndien mbọm mmọ anam “enye ọtọn̄ọ ndikpep mmọ ediwak n̄kpọ.” (Mark 6:34) Mbon emi ẹkenamde se Jesus ekekpepde ẹma ẹbọ ufọn. Edi kûfre ke Jesus iketiehe-tie iseme mmọ, edi mbọm ama anam enye an̄wam mmọ.—Matt. 15:32-38; 20:29-34; Mark 1:40-42.

13. Didie ke Jesus ekesitịn̄ ikọ ye mme owo? (Se akpa ndise ibuotikọ emi.)

13 Nte enye ekesitịn̄de ikọ. Nte Jesus ekesitịn̄de ikọ ye mme owo, akpan akpan mbon emi ẹfịkde, owụt ke mbọm mme owo ama esinam enye. Apostle Matthew ama afiak etịn̄ se Isaiah ekewetde aban̄a Jesus ete: “Enye idinuakke nnyanyan̄a eke obụn̄ọde, idinyụn̄ inịmeke ikan̄ ọfọn̄ utuenikan̄ eke osiode nsụn̄ikan̄.” (Isa. 42:3; Matt. 12:20) Jesus ekesitịn̄ ikọ emi enemde-nem mbon emi ẹketiede nte nnyanyan̄a eke obụn̄ọde m̀mê utuenikan̄ emi ekperede ndinịme ke ntak emi aran ikan̄ okụrede. Enye ọkọkwọrọ etop idotenyịn ọnọ “mbon oro esịt obụn̄ọde.” (Isa. 61:1) Enye ọkọdọhọ mbon emi “ẹkpade utom ẹnyụn̄ ẹbiomde ndodobi mbiomo” ẹdi ẹbịne imọ, ke imọ iyọnọ mmọ “nduọkodudu.” (Matt. 11:28-30) Enye ama ọdọhọ mbet esie ke Abasi ama kpukpru ikọt esie, idem mbon emi mbon ererimbot mîdaha ke n̄kpọ ndomokiet.—Matt. 18:12-14; Luke 12:6, 7.

TUA MME OWO MBỌM NTE JESUS

14. Nso ke akpanam man esitua owo mbọm?

14 Didie ke ikeme nditua owo mbọm nte Jesus ekesituade? Nte esitiede fi ke idem. Idịghe kpukpru owo ẹsikeme nditua owo mbọm, edi Bible ọdọhọ ikpep ndisitua owo mbọm. Enye ọdọhọ inyene “esịt ima emi asan̄ade ye mbọm.” Emi edi usụn̄ kiet emi ikemede ndimen obufa owo nsịne. (Kot Colossae 3:9, 10, 12.) Nso ke akpanam man esitua owo mbọm? Tat esịt fo ma mbon en̄wen. (2 Cor. 6:11-13) Sinen̄ede kpan̄ utọn̄ ke ini owo etịn̄de mfịna esie ọnọ fi. (Jas. 1:19) Bụp idemfo ete: ‘Edieke se iwọrọde owo emi ọkpọwọrọde mi, ekpetie mi didie ke idem? Nso ke n̄kpoyom ẹnam ẹnọ mi?’—1 Pet. 3:8.

15. Didie ke ikeme ndin̄wam mbon emi ẹtiede nte nnyanyan̄a eke obụn̄ọde m̀mê utuenikan̄ emi ekperede ndinịme?

15 Nte isinamde n̄kpọ ye mbon en̄wen.  Mbọm esinam nnyịn iyom ndin̄wam mme owo, akpan akpan mbon emi ẹtiede nte nnyanyan̄a eke obụn̄ọde m̀mê utuenikan̄ emi ekperede ndinịme. Didie ke ikeme nditua mmọ mbọm? Rome 12:15 ọdọhọ yak ‘itua ye mmọ emi ẹtuan̄ade.’ Mbon emi ẹfụhọde ẹsiyom mbon en̄wen ẹtiene mmimọ ẹseme, isiyomke ẹsọsọp ẹteme mmimọ se ikpanamde. Eyenete an̄wan kiet emi nditọete ẹkekade ẹkedọn̄ esịt ke ini eyen esie akakpade ọdọhọ ete: “Ama enem mi ke ini mme ufan mi ẹkedide ẹditiene mi ẹtua.” Imekeme ndiwụt ke imama mbon en̄wen edieke ifọnde ido ye mmọ. Ndi ọmọfiọk ebeakpa emi oyomde-yom owo emi akpan̄wamde enye ọdiọn̄ n̄kpọ ke ufọk esie? Ndi enyene akanieren m̀mê akanian̄wan ke esop mbufo emi akpamade owo esidi edimen imọ aka mbono esop, aka an̄wautom, m̀mê aka okokụt abiausọbọ? Ekpededi ekpri n̄kpọ ke inam inọ eyenete nnyịn, oro ekeme ndinen̄ede nnyene ufọn nnọ enye. (1 John 3:17, 18) N̄kponn̄kan usụn̄ oro ikemede nditua mme owo mbọm edi ndikwọrọ ikọ kpukpru ini nnọ mmọ. Usụn̄ en̄wen idụhe emi ikemede nditua mbon emi ẹnyenede eti esịt mbọm n̄kan emi.

Ndi emenen̄ede ekere aban̄a nditọete fo? (Se ikpehe ekikere 15)

16. Didie ke ikeme ndidọn̄ mbon emi ẹfụhọde esịt?

16 Nte isitịn̄de ikọ. Mbọm esinam ‘itịn̄ ikọ isọn̄ọ ukpọn̄ eke ofụhọde esịt.’ (1 Thess. 5:14.) Nso ke ikpetịn̄ isọn̄ọ utọ mbon emi idem? Imekeme nditịn̄ nnọ mmọ adan̄a nte ikerede iban̄a mmọ. Imekeme nditoro mmọ ke nti n̄kpọ emi mmọ ẹnamde ye nti edu emi mmọ ẹnyenede. Ọyọfọn iti mmọ ke Jehovah okodụri mmọ ọnọ Eyen esie, ke mmọ ẹsọn̄ urua ke enyịn Abasi. (John 6:44) Nam mmọ ẹdiọn̄ọ ke Jehovah enen̄ede ekere aban̄a ikọt esie emi “esịt obụn̄ọde.” (Ps. 34:18) Nti ikọ oro itịn̄de ye mme owo ekeme ndidọn̄ mmọ esịt.—N̄ke 16:24.

17, 18. (a) Didie ke Jehovah oyom mbiowo ẹnam n̄kpọ ye mme erọn̄ esie? (b) Nso ke idineme ke ibuotikọ oro etienede?

17 Jehovah oyom mbiowo ẹnam n̄kpọ ye erọn̄ esie sụn̄sụn̄. (Utom 20:28, 29) Mbiowo, mbọk ẹti ke mbufo ẹnyene ndibọk nnyụn̄ nse mban̄a erọn̄ Abasi. (Isa. 32:1, 2; 1 Pet. 5:2-4) Mbiowo emi ẹtuade erọn̄ Abasi mbọm idikarake-kara mmọ. Mmọ idibọpke ibet m̀mê ndiyịre ntịn̄ ikọ emi edinamde esịt amia eyenete ufen man enye akanam se enye ẹkekerede ke imọ idikemeke ndinam. Mbiowo ẹsidomo ndinam esịt enenem nditọete mmọ. Mmọ ẹfiọk ke nditọete emi ẹma Jehovah, ke ima oro ayanam mmọ ẹnam n̄kpọ Abasi ke ofụri esịt.—Matt. 22:37.

18 Edieke itiede ikere nte Jesus okosụhọrede idem ekesinyụn̄ atuade mme owo mbọm, iyaka iso ikpebe enye. Ke ibuotikọ en̄wen, iyekpep iban̄a nti edu iba en̄wen emi Jesus ekenyenede, oro edi, uko ye mbufiọk.