Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) FEBRUARY 2015

Ẹnọ Mbon Japan Se Mmọ Mîkodorike Enyịn

Ẹnọ Mbon Japan Se Mmọ Mîkodorike Enyịn

KE April 28, 2013, ẹma ẹnịm san̄asan̄a mbono ke Nagoya ke Japan. Anthony Morris, owo Otu Emi Ẹsede Ẹban̄a Utom Mme Ntiense Jehovah, ama etịn̄ n̄kpọ emi akanamde esịt enem kpukpru owo, nte ke ẹsio obufa n̄wed emi ẹkotde, The Bible—The Gospel According to Matthew ke usem Japanese. Se ibede owo 210,000 ẹkedụk edinam emi. Ndusụk ẹkedu ke itie edinam emi, ndusụk ẹtie ke ebiet en̄wen ẹda Intanet ẹse se ikade iso. Esịt ama enem nditọete etieti, mmọ ema ẹnyụn̄ ẹkwak ubọk ke ata anyan ini.

N̄wed Matthew ke Edikabade Eke Obufa Ererimbot eke usem Japanese ke ẹfiak ẹmịn̄ emi. Enye enyene page 128. Brọda Morris ọdọhọ ke “ẹmịn̄ Bible emi ẹnọ mbon Japan.” Nso ye nso isịne ke n̄wed emi? Ntak emi ẹsiode enye? Mme owo ẹda enye didie?

NSO YE NSO ISỊNE KE N̄WED EMI?

Idem ama akpa kpukpru owo ndikụt nte ẹbonde ikọ ke Bible emi. Mbon Japan ẹsiwet n̄kpọ to ke enyọn̄ n̄wed sịm isọn̄, mîdịghe ẹto ke ubọk ufien ẹwet ẹka nnasia nte nnyịn isinyụn̄ iwetde n̄kpọ. Ibat ibat n̄wed mmọ, ye n̄wed esop Abasi oro ẹmịn̄de ndondo emi, ke ẹwet to ke ubọk nnasia ka ubọk ufien. Edi ẹbon mme abisi Bible emi to ke enyọn̄ n̄wed sịm isọn̄, nte mbon Japan ẹsiwetde n̄wedmbụk n̄kpọntịbe mmọ ye n̄wed eken. Ediwak mbon Japan ẹdọhọ ke enye emi esimem utom ndikot n̄kan. N̄kpọ en̄wen edi ke ẹtan̄ mme ikọ ẹnyọn̄ n̄wed Bible ẹwet nte n̄kpri ibuotikọ ke esịt man enen̄ede an̄wan̄a owo.

Nte ẹbonde ikọ ke n̄wed Matthew emi an̄wam nditọete ke Japan etieti. Mmọ ẹtọtọn̄ọ ndikot enye, ke ẹnyụn̄ ẹnọ mme owo. Eyenete an̄wan kiet emi ebede isua 80 ọdọhọ ete: “Mmokot n̄wed Matthew ke Bible mi ediwak ini, edi nte ẹbonde mme abisi ke n̄wed Matthew enye emi ye n̄kpri ibuotikọ emi ẹdọn̄de ke esịt anam ukwọrọikọ Jesus ke obot enen̄ede an̄wan̄a mi.” Eyenete an̄wan en̄wen ọdọhọ ete: “N̄kokot ofụri n̄wed Matthew emi ke ebe kiet. Nsikot n̄wed emi ẹwetde to ke ubọk nnasia ka ubọk ufien, edi mbon n̄kan̄ nnyịn ẹma n̄wed emi ẹwetde to ke enyọn̄ n̄wed sịm isọn̄.”

ẸSIO ẸNỌ MBON JAPAN

N̄wed awak ke Bible, edi ntak emi ẹsiode n̄wed kiet kpọt ẹmịn̄ ẹnọ mbon Japan? Akanam ediwak mmọ ikwe Bible, edi mmọ ẹkpema ndikot edieke ẹkụtde. N̄wed Matthew oro ẹfiakde ẹmịn̄ mi ayanam mbon Japan emi mîkwe Bible akpa ẹtiene ẹkụt ẹnyụn̄ ẹkot Ikọ Abasi kpa ye oro mîdịghe ofụri Bible.

Ntak emi owo mîkemịn̄ke n̄wed Bible en̄wen? Ke ini mbon Japan ẹkopde nte ẹtịn̄de ẹban̄a Bible, akpa n̄kpọ emi esidụkde mmọ ibuot edi Jesus Christ. Emi akanam ẹmịn̄ n̄wed Matthew ẹnọ mmọ sia enye etịn̄ aban̄a ubon emi Jesus okotode, se  iketịbede ke ini enye akamanade, ọwọrọetop ukwọrọikọ esie ke obot, ye se enye ọkọdọhọde ke eyetịbe ke utịt ini. Mbon Japan ẹsima utọ n̄kpọ emi tutu!

Nditọete nnyịn ke Japan ẹtọtọn̄ọ ndinọ mme owo obufa n̄wed emi. Eyenete an̄wan kiet ọdọhọ ete: “Mmekeme ndien ndinịm Bible ke an̄wautom. Mma nnọ owo n̄wed emi kpa usen oro ẹkesiode enye.”

MME OWO ẸDA ENYE DIDIE?

Nso ke nditọete nnyịn ẹsitịn̄ ke ini ẹyomde ndinọ mme owo n̄wed emi? Ediwak mbon Japan ẹdọdiọn̄ọ utọ ikọ nte, “mfafaha inuaotop,” ‘kûtop pearl fo unọ mme edi,’ “kûtịmede esịt uban̄a n̄kpọn̄.” (Matt. 6:34; 7:6, 13) Idem esikpa mmọ ndikop ke Jesus eketịn̄ mme ikọ emi. Ke ini ediwak mmọ ẹkụtde ikọ emi ke n̄wed Matthew, mmọ ẹsidọhọ ẹte: “Esidọn̄ mi ndikot Bible ekpededi ini kiet kpọt.”

Ke ini nditọete ẹfiakde ẹkese mbon oro ẹkebọde n̄wed Matthew, ediwak mmọ ẹsidọhọ ke imọtọn̄ọ ndikot, ndusụk ẹte ke imokokot ima. Ete kiet emi ebede isua 60 ọkọdọhọ eyenete nnyịn ete: “Mmokot n̄wed emi mma ediwak ini, enem mi tutu. Mbọk kpep mi Bible.”

Mme asuanetop ẹsika ẹkeda ke ebiet emi mme owo ẹwakde ẹnọ mme owo n̄wed emi. Ke ini eyenete an̄wan kiet ọkọkwọrọde ikọ ke utọ ebiet emi, enye ama ọnọ mma kiet emi ọkọbọde enye n̄wed Matthew adres e-mail esie. Ke hour kiet ama ekebe, mma oro ama ọnọ enye etop ete ke imọtọn̄ọ ndikot n̄wed emi, onyụn̄ ọdọhọ ke ikpama ẹdikpep imọ Bible. Ẹma ẹtọn̄ọ ndikpep enye Bible ke urua kiet ama ekebe, ndien ikebịghike enye ama ọtọn̄ọ ndidụk mbono esop.

Ẹmịn̄ n̄wed Matthew emi ẹbe idem 1,600,000 ẹnọ ẹsọk mme esop ke Japan, ndien idụhe ọfiọn̄ emi nditọete mînịmke enye ibe idem tọsịn duop. Ke “mbemiso ikọ” Bible emi, mme andisio ẹdọhọ ẹte: “Imenịm ke edieke okotde n̄wed Matthew emi, ke enye ayanam fi ama Bible.”