Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  February 2015

Ka Iso Sịn Ifịk Kwọrọ Ikọ

Ka Iso Sịn Ifịk Kwọrọ Ikọ

UTOM ukwọrọikọ edi mfọnn̄kan utom oro ẹnamde ke ererimbot mfịn. Sia afo edide asan̄autom Jehovah, afo abat ke edi akwa n̄kpọ imọ nditiene n̄n̄wam mme owo ẹkabade ẹdi mbet Christ. Edi ndi ọmọdiọn̄ọ ke enyene ini emi esisọn̄de mme asiakusụn̄ ye mme asuanetop ndisịn ifịk n̄kwọrọ ikọ?

Nso idin̄wam fi aka iso esịn ifịk ọkwọrọ ikọ?

Ndusụk mme asuanetop ẹsisan̄a ke ufọk ke ufọk, edi ikwe eke ẹkwọrọde ikọ ẹnọ—mme enyene-ufọk ẹma ẹwọn̄ọ ẹka n̄kpọ. Idem edieke ẹkụtde owo ke ufọk, ndusụk mmọ isimaha ndikop mîdịghe ẹbịn mme ọkwọrọikọ. Enyene mme asuanetop n̄ko emi ẹnyenede ata akamba efakutom emi mme owo ẹmade Ikọ Abasi etieti tutu mmọ ẹkere m̀mê mmimọ iyekeme ndikpep kpukpru mmọ n̄kpọ. Mme asuanetop ẹnyụn̄ ẹdu n̄ko emi ẹkwọrọde ikọ ke ata ediwak isua, edi idem emem mmọ idahaemi sia mmọ mîkekereke ke ererimbot Satan emi okpodu edisịm mfịn emi.

Ndi idem akpa fi ndikop ke enyene mme n̄kpọ emi ẹkemede ndinam nditọete nnyịn ẹkûsịn ifịk ẹkwọrọ ikọ nte ẹkesikwọrọde? Kûyak idem akpa fi; imọfiọk ke imemke utom ndikwọrọ ikọ ke ererimbot emi esịnede ke ubọk “andidiọk,” Satan kpa Devil.—1 John 5:19.

Nnyịn idiọn̄ọke se iwọrọde fi ke efakutom mbufo, edi imọdiọn̄ọ ke Jehovah ayan̄wam fi ọyọ se ededi emi osobode. Nso ke akpanam man aka iso esịn ifịk ọkwọrọ ikọ? Yak inọ fi ekikere ifan̄.

N̄WAM MBUFA OWO

Kpukpru isua, ediwak tọsịn owo ẹsina baptism ẹkabade ẹdi Mme Ntiense Jehovah. Edieke edide ibịghike akana baptism, anaedi eyenen̄ede ama mbon oro ẹnyenede mbufiọk ẹkpep fi nte ẹsikwọrọde ikọ. Edieke edide ọmọkwọrọ ikọ ke ediwak isua, ndi ukereke ke ọfọn ekpep mbufa owo nte ẹsikwọrọde ikọ?

 Jesus ama ekpep mbet esie nte ẹkpekwọrọde ikọ ọfọn sia enye ama ọfiọk ke emi ọyọfọn ye mmọ. (Luke 8:1) Ana ekpep mme owo mfịn n̄ko ẹkwọrọ ikọ ọfọn.

Ikpanaha ikere ke owo ama ọtọtọn̄ọ ndiwọrọ an̄wautom ke ọmọn̄ enen̄ede ọdiọn̄ọ ndikwọrọ ikọ. Mbufa owo ẹsiyom owo emi ọfọnde ido an̄wam mmimọ. Emekeme ndikpep obufa asuanetop (1) nte ẹsitịmde idem ẹnyụn̄ ẹnam se ẹdinamde ke an̄wautom, (2) nte ẹkpenamde enyene-ufọk etiene esịn uyo ke nneme, mîdịghe nte ẹkpetọn̄ọde nneme ye owo ke usụn̄, (3) nte ẹkpenọde owo n̄wed, (4) se ẹkpetịn̄de ye owo ke ini ẹfiakde ẹkese enye, ye (5) nte ẹkpetọn̄ọde ukpepn̄kpọ Bible. Obufa owo oro idomode ndin̄wam ekeme ndikwọrọ ikọ ọfọn edieke enye esede nte nnyịn inamde onyụn̄ odomode ndinam nte nnyịn. (Luke 6:40) Esịt eyenen̄ede enem obufa asuanetop ndinyene owo emi an̄wamde enye. Ọyọfọn itoro enye inyụn̄ iteme enye se akpanamde.—Eccl. 4:9, 10.

NEME NNEME YE OWO EMI ASAN̄ADE KIET KE AN̄WAUTOM

Kpa ye emi isidomode ndikwọro ikọ nnọ mme owo, enyene ndusụk usen emi isinemede nneme ye owo emi isan̄ade kpọt sia mme owo mîdụhe ke ufọk. Ntak edi oro Jesus akanamde mbet esie “ẹsan̄a iba iba” ẹka ukwọrọikọ. (Luke 10:1) Mmọ ẹma ẹsineme nneme ẹnyụn̄ ẹn̄wam kiet eken ke an̄wautom. Mmọdo, yak isida ini oro isan̄ade ye nditọete nnyịn ikwọrọ ikọ “isịn udọn̄ inọ kiet eken.”—Rome 1:12.

Nso ye nso ke ikeme ndineme ye nditọete nnyịn? Ndi owo mbufo kiet enyene inem inem ifiọkutom? Ndi enyene se okokotde ke ini ekekpepde n̄kpọ m̀mê ke ini mbufo ẹkenịmde utuakibuot ubon emi ekenen̄erede enem fi? Ndi enyene se ẹkenemede ke mbono esop emi akan̄wamde fi? Ekeme ndidi owo emi asan̄ade kiet isiwakke ndisan̄a ye afo n̄kwọrọ ikọ. Ndi ọmọdiọn̄ọ nte enye akasan̄ade odụk esop? Nso inam enye enịm ke esop Jehovah edi emi? Mme ifetutom ewe ke enye enyene? Ndi enye enyene nti ifiọkutom ndibụk nnọ fi? Amakam ekeme ndibụk nti ifiọkutom emi afo enyenede nnọ enye. M̀mê ẹmekụt owo ẹkwọrọ ikọ ẹnọ m̀mê ikwe, “ẹka iso . . . ẹbọp kiet eken ọkọri” ke ini ẹsan̄ade kiet ẹkwọrọ ikọ.—1 Thess. 5:11.

KPEP IKỌ ABASI KPUKPRU INI

Ndisisio ini ntie n̄kpep n̄kpọ ayan̄wam nnyịn ika iso isịn ifịk ikwọrọ ikọ. “Ofụn  emi anamde akpanikọ onyụn̄ enyenede ọniọn̄” ẹtịn̄ nsio nsio n̄kpọ ke mme n̄wed nnyịn. (Matt. 24:45) Ntre, emenyene ata ediwak n̄kpọ emi ekemede ndikpep. Yak ise n̄kpọ kiet emi ikemede ndikpep: Ntak emi anade ikwọrọ eti mbụk Obio Ubọn̄? Ekebe emi odude ke page 16 etịn̄ ntak ifan̄.

Ndikot nnyụn̄ ntie n̄kere se idude ke ekebe emi ayanam aka iso esịn ifịk ọkwọrọ ikọ. Emekeme ndinam ndụn̄ọde nyom mme ntak en̄wen emi akpanade ikwọrọ eti mbụk Obio Ubọn̄. Ekem tie kere mmọ. Edieke anamde emi, ayaka iso ndisịn ifịk n̄kwọrọ ikọ.

NYỊME NDIKWỌRỌ IKỌ KE MBUFA USỤN̄

Esop Jehovah ẹsiteme nnyịn mbufa usụn̄ oro ikpọkwọrọde ikọ. Ke uwụtn̄kpọ, ke adianade ye ndikwọrọ ikọ ke ufọk ke ufọk, imekeme ndida leta ye fon n̄kwọrọ ikọ, ikwọrọ ke efak, ke ebiet emi mme owo ẹwakde, ke itie emi mme owo ẹnamde mbubehe, inyụn̄ ikwọrọ inọ mme owo idem ke ini nnyịn mîkaha ukwọrọikọ. Imakam ikeme ndinam ndutịm man ika ikọkwọrọ ikọ ke efakutom emi owo mîdemeke inọ esop.

Ndi emesidomo ndinam se esop Abasi ẹtemede nnyịn emi? Ediwak nditọete nnyịn ẹnam, ẹnyụn̄ ẹbọ ufọn. Yak ise se owo ita ẹkenamde.

Eyenete an̄wan kiet emi ekerede April ama anam ekikere oro ẹkenọde ke Utom Obio Ubọn̄ Nnyịn ẹban̄a nte ẹkpetọn̄ọde ukpepn̄kpọ Bible. Enye ama owụt owo ita ke itieutom mmọ nte isikpepde mme owo Bible. Idem ama akpa enye, esịt onyụn̄ enem enye nte mmọ mbita ẹkenyịmede ndikpep Bible ẹnyụn̄ ẹtọn̄ọ ndidụk mbono esop.

 Ọyọhọ owo iba akanam ekikere oro ẹkenọde ẹban̄a nte ẹkpenịmde magazine. Ẹkedọhọ ima ikot magazine, yak iyom mbon emi ikerede ke se ikotde oro ọyọfọn ye mmọ. Esenyịn circuit kiet ke United States ọdọhọ ke ima imen Awake! emi ekenemede n̄kpọ aban̄a taya moto ikedeme kpukpru mbon emi ẹsinyamde taya moto ke efak kiet. Enye ye n̄wan esie ẹma ẹmen Awake! emi ekenyenede ibuotikọ emi “Understanding Your Doctor” ẹka nsio nsio ufọkibọk ẹkenọ dọktọ 100. Enye ọdọhọ ete: “Ndisida n̄wed n̄ka utọ itie emi esinam mme owo ẹdiọn̄ọ nnyịn ye n̄wed nnyịn. Ediwak mmọ ẹtie ufan ufan, imesinyụn̄ ifiak ikese mmọ ke ubọk ke ubọk.”

Ọyọhọ owo ita ama ada fon ọkwọrọ ikọ nte ẹketemede. Eyenete an̄wan emi ekerede Judy ama ewet leta ọkọm ibuot itieutom nnyịn ke ndikọdọhọ yak isida fon ikwọrọ ikọ. Enye ọdọhọ ke eka imọ emi edide isua 86 ẹsidọn̄ọ etieti, edi ke enye esida fon ọkwọrọ ikọ, ke esịt enem enye etieti ndida fon n̄kpep akanian̄wan kiet emi edide isua 92 Bible!

Nsio nsio ekikere oro ẹsinọde ke mme n̄wed nnyịn ke nte ikpọkwọrọde ikọ esifọn etieti. Nam se ẹtemede emi. Esịt eyenem fi oyonyụn̄ esịn ifịk ọkwọrọ ikọ.

BIERE SE EDINAMDE

Idịghe ibat n̄wed oro inịmde, ibat nditọ ukpepn̄kpọ Bible oro inyenede, m̀mê ibat mbon oro in̄wamde ẹdụk esop ke ẹsida ẹfiọk m̀mê imọdiọn̄ọ ndikwọrọ ikọ. Akam edi owo nte Noah, ke esiode mbonufọk esie ẹfep, owo ifan̄ ke enye akan̄wam ẹdinam n̄kpọ Jehovah? Edi Bible okot Noah ọkwọrọ edinen ido. Ete mbon ama anam se akpakanade anam. Se Jehovah oyomde edi yak inam akpanikọ inọ imọ.—1 Cor. 4:2.

Ediwak mme asuanetop ẹsikụt ke ini ekededi emi mmimọ ibierede nte idinamde utom ukwọrọikọ, ke oro esinam mmimọ isịn ifịk ikwọrọ ikọ. Nso ke mmọ ẹsibiere ndinam? Ẹsiak ndusụk n̄kpọ emi ke ekebe oro odude ke idak emi.

Ben̄e Jehovah ete an̄wan fi anam utom fo ọfọn. Edieke anamde se ekebierede ndinam, esịt eyenem fi sia ọmọdiọn̄ọ ke ada ofụri ukeme fo ọkwọrọ eti mbụk.

Imọdiọn̄ọ ke imemke utom ndikwọrọ eti mbụk. Edi enyene mme n̄kpọ emi ẹkemede ndinam esịn ifịk ọkwọrọ eti mbụk. Neme eti nneme ye owo emi asan̄ade kiet ke an̄wautom, kpep ikọ Abasi kpukpru ini, nyịme ndikwọrọ ikọ ke mbufa usụn̄ emi ofụn emi anamde akpanikọ ẹtemede nnyịn, nyụn̄ biere nte edinamde utom ukwọrọikọ. Se ikam idide akpan n̄kpọ ikan edi ke Jehovah ọnọ kpukpru Mme Ntiense esie ifet ndikwọrọ eti mbụk Obio Ubọn̄. (Isa. 43:10) Esịt eyenen̄ede enem fi edieke akade iso esịn ifịk ọkwọrọ ikọ.