Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JANUARY 2015

Ntak Emi Isinịmde Udia Mbubreyo Ọbọn̄

Ntak Emi Isinịmde Udia Mbubreyo Ọbọn̄

“Ẹka iso ẹnam emi nditi mi.”1 COR. 11:24.

1, 2. Nso ke Jesus akanam ke mbubreyo Nisan 14, isua 33? (Se akpa ndise ibuotikọ emi.)

EYO ofụk owo idem, edi ọfiọn̄ anam Jerusalem an̄wan̄a ekpri. Mbubreyo Nisan 14, isua 33 edi emi. Jesus ye mme apostle esie ẹdia Passover man ẹti nte Abasi akanyan̄ade nditọ Israel osio ke ufụn Egypt ke isua 1,500 emi ẹbede. Ke ẹma ẹkedia Passover ẹma, Jesus ọtọn̄ọ n̄kpọ en̄wen ye mme apostle esie 11. Enye ọmọn̄ akpa eyo usen oro etikụt, edi n̄kpọ emi ke mbet esie ẹdisida ẹti n̄kpa esie. *Matt. 26:1, 2.

2 Jesus ọbọn̄ akam, ayak uyo eke leaven mîdụhe ọnọ mbet esie onyụn̄ ọdọhọ mmọ ete: “Ẹbọ, ẹta.” Ekem enye emen cup wine akama, afiak ọbọn̄ akam onyụn̄ ọdọhọ ete: “Kpukpru mbufo ẹbọ ẹn̄wọn̄.” (Matt. 26:26, 27) N̄kukụre se Jesus ọnọde mbet esie edi oro, edi enyene ediwak n̄kpọ emi enye editịn̄de ye mbet esie okoneyo emi.

3. Mme mbụme ewe ke idibọrọ ke ibuotikọ emi?

 3 Jesus okoyom mbet esie ẹsiti n̄kpa esie kpukpru isua. Ẹsikot edinam emi “udia mbubreyo Ọbọn̄” m̀mê Editi. (1 Cor. 11:20) Mme owo ẹsibụp mbụme ẹban̄a edinam emi, utọ nte: Ntak emi ikpetide n̄kpa Jesus? Nso ke uyo ye wine ẹda ẹban̄a? Didie ke ikeme nditịm idem nnọ Editi n̄kpa Christ? Mmanie ẹkpeta uyo ẹnyụn̄ ẹn̄wọn̄ wine? Didie ke mbon emi ẹdikade heaven ye mbon emi ẹdidude uwem ke isọn̄ ẹda se Abasi ọn̄wọn̄ọde ọnọ mmọ?

NTAK IKPETIDE N̄KPA JESUS

4. Nso ufọn ke n̄kpa Jesus anam ọnọ nnyịn?

4 Nnyịn idi nditọ Adam, ntre ikadada idiọkn̄kpọ ye n̄kpa imana. (Rome 5:12) Idụhe owo nnyịn ndomokiet emi ekemede ndinọ Abasi ufak ibuot esie m̀mê eke mbon en̄wen. (Ps. 49:6-9) Edi Jesus ama akpa ọnọ nnyịn, ndien Abasi ada oro anyan̄a nnyịn. Se Jesus akanamde emi osio nnyịn ke ufụn idiọkn̄kpọ ye n̄kpa, onyụn̄ anam idori enyịn ndidu uwem ke nsinsi.—Rome 6:23; 1 Cor. 15:21, 22.

5. (a) Isan̄a didie ifiọk ke Abasi ye Jesus ẹma mme owo? (b) Ntak emi anade isidụk Editi n̄kpa Jesus?

5 Ufak emi Abasi ọkọnọde owụt ke enye ama mme owo etieti. (John 3:16) Jesus ndinyịme ndikpa nnọ nnyịn owụt ke enye n̄ko ama nnyịn. Enye ama enen̄ede ama mme owo idem mbemiso enye ekedide isọn̄. (N̄ke 8:30, 31) Imenen̄ede ima se Abasi ye Jesus ẹnamde ẹnọ nnyịn. Oro anam isidụk Editi man inam se Jesus okowụkde nnyịn ete: “Ẹka iso ẹnam emi nditi mi.”—1 Cor. 11:23-25.

SE UYO YE WINE EDITI ẸDADE ẸBAN̄A

6. Didie ke ikpada uyo ye wine Editi?

6 Ke ini Jesus ọkọtọn̄ọde Editi n̄kpa esie, enye ikanamke uyo ye wine oro ẹkabade ẹdi ikpọkidem ye iyịp esie. Edi akakam ọdọhọ ntem ke ini oyomde ndinọ mbet esie uyo: “Emi ada aban̄a idem mi,” onyụn̄ ọdọhọ ntem ke ini ọnọde mmọ wine: “Emi ada aban̄a iyịp mi, kpa ‘iyịp ediomi,’ emi ẹdiduọkde kaban̄a ediwak owo.” (Mark 14:22-24) Emi owụt ke ikpanaha ida uyo ye wine nte ata ikpọkidem ye iyịp Jesus.

7. Uyo emi ẹsidade ẹnịm Editi ada aban̄a nso?

7 Uyo emi Jesus akadade enịm Editi ekedi nyọhọ-nsụhọ uyo eke leaven mîdụhe emi mmọ ẹkedade ẹnịm Passover. (Ex. 12:8) Ke Bible, ndusụk ini leaven esida aban̄a idiọkn̄kpọ m̀mê n̄kpọ emi ekemede ndibiat n̄kpọ. (Matt. 16:6, 11, 12; Luke 12:1) Ntem, ọfọn nte Jesus akadade uyo eke leaven mîdụhe enịm Editi, sia utọ uyo oro odot ndida mban̄a mfọnmma idem esie. (Heb. 7:26) Utọ uyo oro n̄ko ke isida inịm Editi.

8. Nso ke wine emi ẹsidade ẹnịm Editi ada aban̄a?

8 Wine emi Jesus ọkọnọde mbet esie ke Nisan 14 isua 33 akada aban̄a iyịp esie. Wine emi isidade inịm Editi ada aban̄a iyịp Jesus n̄ko. Ẹkeduọk iyịp Jesus ke Golgotha “man ẹfen mme idiọkn̄kpọ” nnyịn. (Matt. 26:28; 27:33) Uyo ye wine Editi ẹda ẹban̄a ọsọn̄urua n̄kpọ emi Jesus akawade man ẹda ẹfak mbon emi ẹkopde item. Ntre, sia imade se enye akanamde emi, ọyọfọn isitịm idem inọ Udia Mbubreyo Ọbọn̄ kpukpru isua.

NDUSỤK USỤN̄ EMI IKEMEDE NDITỊM IDEM

9. (a) Ntak emi anade isikot mme itie Bible emi ẹsidọhọde ẹkot ke ini Editi? (b) Afo ada didie ufak emi Jesus ekekpede ke ibuot nnyịn?

9 Ẹsiwet mme itie Bible emi idikotde ke ini Editi ke Ẹdụn̄ọde N̄wed Abasi  ke Usen ke Usen. Edieke okotde mmọ, eyekeme nditie n̄kere mme n̄kpọ emi Jesus akanamde mbemiso akpade. Se ikerede emi ayanam iben̄e idem inọ Udia Mbubreyo Ọbọn̄. * Eyenete an̄wan kiet ọkọdọhọ ete: ‘Isitetie ibet Editi n̄kpa Christ. Editi esinem mi isio isio kpukpru isua. Mmeti nte n̄kadade nse okpo ete mi usen emi ẹyomde ndibụk enye. Se ẹsikpepde nnyịn ẹban̄a ufak ekenen̄ede an̄wan̄a mi usen oro. Mmọdiọn̄ọ kpukpru itie n̄wed Abasi emi aban̄ade ufak nnyụn̄ nsinam an̄wan̄a mbon en̄wen. Edi n̄kpa ete mi akanam nnen̄ede mma se Abasi edidade ufak inam inọ nnyịn.’ Ke ini itịmde idem inọ Editi, ọyọfọn inen̄ede itie ikere nte ufak emi Jesus ekekpede ke ibuot nnyịn anamde iwọrọ ke ufụn idiọkn̄kpọ ye n̄kpa.

Da mme n̄wed emi esop Abasi ẹnọde tịm idem nọ Editi (Se ikpehe ekikere 9)

10. Tịn̄ usụn̄ en̄wen emi ikemede nditịm idem nnọ Editi.

10 Usụn̄ en̄wen emi ikemede nditịm idem nnọ Editi edi ndibiere ndikwọrọ ikọ n̄kan nte isikwọrọde. Imekeme ndinam utom usiakusụn̄ unọ un̄wam ini oro. Ke ini ikotde mbon emi isikpepde Bible ye mbon en̄wen Udia Mbubreyo Ọbọn̄, esịt eyenen̄ede enem nnyịn nditịn̄ n̄kpọ mban̄a Jehovah, Eyen esie, ye se Enye ọn̄wọn̄ọde ndinam nnọ mbon emi ẹkopde item esie ẹnyụn̄ ẹtorode enye.—Ps. 148:12, 13.

11. Didie ke ndusụk Christian ke Corinth ẹketa uyo ẹnyụn̄ ẹn̄wọn̄ wine ke usụn̄ emi mîdotke?

11 Nte etịmde idem ọnọ Udia Mbubreyo Ọbọn̄, kere ban̄a se apostle Paul ekewetde ọnọ mme Christian ke esop Corinth. (Kot 1 Corinth 11:27-34.) Paul ọkọdọhọ ke owo ekededi emi atade uyo onyụn̄ ọn̄wọn̄de wine ke usụn̄ emi mîdotke “eyenyene ubiomikpe aban̄a idem ye iyịp” Jesus Christ. Ntre, ana Christian emi ẹyetde aran “ebem iso odụn̄ọde idem ese m̀mê imodot” mbemiso atade uyo onyụn̄ ọn̄wọn̄de wine. Mîdịghe ntre, enye “ata onyụn̄ ọn̄wọn̄ ubiomikpe odori idemesie.” Ke eyo Paul, ndusụk Christian ke Corinth ẹma ẹsinam se mîfọnke ke ini Editi. Ẹtie nte ndusụk mmọ ẹma ẹsidia n̄kpọ ẹnyụn̄ ẹn̄wọn̄ n̄kpọ ẹkaha mbemiso ẹdide Editi m̀mê ke ini ẹnịmde Editi, ndien emi ama esinam  mmọ ẹde idap. Mmọ ikadaha edinam emi ke n̄kpọ ndomokiet, ntre esịt ikenemke Abasi ke ini mmọ ẹtade uyo ẹnyụn̄ ẹn̄wọn̄de wine.

12. (a) Paul ekemen Editi odomo ye nso, ndien nso item ke enye ọkọnọ mme Christian emi ẹsitade uyo ẹnyụn̄ ẹn̄wọn̄ wine? (b) Nso ke eyenete emi esitade uyo onyụn̄ ọn̄wọn̄ wine akpanam edieke enye anamde akwa idiọkn̄kpọ?

12 Paul ekemen Editi odomo ye udia emi mme owo ẹbuanade-buana ẹdia, ntre enye ama ọnọ mme Christian oro ẹsitade uyo ẹnyụn̄ wine item ete: “Mbufo ikemeke ndin̄wọn̄ cup Jehovah ye cup mme demon; mbufo ikemeke ndidia n̄kpọ ke ‘okpokoro Jehovah’ ye ke okpokoro mme demon.” (1 Cor. 10:16-21) Edieke eyenete emi atade uyo onyụn̄ ọn̄wọn̄de wine Udia Mbubreyo Ọbọn̄ anamde akwa idiọkn̄kpọ, ana enye aka eketịn̄ ọnọ mbiowo man ẹn̄wam enye. (Kot James 5:14-16.) Edieke enye akabarede esịt, ekem akata uyo onyụn̄ ọn̄wọn̄ wine, emi iwọrọke ke enye ada ufak nte n̄kpọ mbubru.—Luke 3:8.

13. Ntak emi ọfọnde itịm ikere m̀mê Abasi oyom nnyịn idu uwem ke heaven m̀mê ke isọn̄?

13 Ke ini itịmde idem inọ Editi, ọkpọfọn owo kiet kiet etịm ekere m̀mê Abasi oyom imọ idu uwem ke heaven m̀mê ke isọn̄. Ọkpọdiọk etieti edieke asan̄autom Jehovah akpatade uyo onyụn̄ ọn̄wọn̄de wine ke ini enye mînen̄ekede ifiọk m̀mê ẹyet imọ aran. Edi owo edinam didie ifiọk m̀mê akpana imọ ita uyo inyụn̄ in̄wọn̄ wine?

MMANIE ẸKPETA UYO ẸNYỤN̄ ẸN̄WỌN̄ WINE?

14. Nso ke mbon emi ẹyetde aran ẹsinam ke Editi ke ntak emi mmọ ẹtienede ẹdụk obufa ediomi?

14 Mbon emi ẹdotde ndita uyo nnyụn̄ n̄n̄wọn̄ wine ẹnen̄ede ẹdiọn̄ọ ke mmimọ imetiene idụk obufa ediomi. Jesus ọkọdọhọ ntem ke ini ọnọde mbet esie wine: “Cup emi ada aban̄a obufa ediomi eke ẹnamde ẹbe ke iyịp mi.” (1 Cor. 11:25) Abasi ama ọdọhọ prọfet Jeremiah etịn̄ ke imọ iyanam obufa ediomi emi mîdibietke ediomi Ibet Moses emi enye akanamde ye nditọ Israel. (Kot Jeremiah 31:31-34.) Abasi anam obufa ediomi ye Israel Abasi. (Gal. 6:15, 16) N̄kpa Jesus ọsọn̄ọ ediomi emi. (Luke 22:20) Jesus edi Esịne-Ufọt obufa ediomi, ndien mbon emi ẹyetde aran emi ẹtienede ẹdụk ediomi emi ẹdidu uwem ke heaven. Edi ana mmọ ẹsọn̄ọ ẹda ye Abasi tutu usen emi mmọ ẹkpade.—Heb. 8:6; 9:15.

15. Mmanie ẹdụk ẹdiomi Obio Ubọn̄, ndien nso ke mmọ ẹdinyene edieke ẹnamde akpanikọ ẹnọ Abasi tutu ẹkpa?

15 Mbon emi ẹdotde ndita uyo nnyụn̄ n̄n̄wọn̄ wine ẹdiọn̄ọ ke mmimọ imetiene idụk ediomi Obio Ubọn̄. (Kot Luke 12:32.) Mbet Jesus emi ẹyetde aran, emi ẹsọn̄ọde ẹda ye enye, ẹnyụn̄ ẹtienede enye ẹkụt ndutụhọ, ẹyetiene enye ẹkara ke heaven. (Phil. 3:10) Mmọ ẹyetiene Christ ẹkara ke heaven ke nsinsi sia ẹkenam ediomi Obio Ubọn̄ ye mmọ. (Edi. 22:5) Mmọ ẹdot ndita uyo nnyụn̄ n̄n̄wọn̄ wine ke ini Udia Mbubreyo Ọbọn̄.

16. Tịn̄ ibio ibio se Rome 8:15-17 ọwọrọde.

16 Sụk mbon emi spirit Abasi anamde mmọ ẹdiọn̄ọ ke mmọ ẹdi nditọ Abasi ẹkpeta uyo ẹnyụn̄ ẹn̄wọn̄ wine. (Kot Rome 8:15-17.) Paul ọdọhọ ke mmọ ẹkot Abasi “Abba.” Abba edi ikọ Aramaic emi ọwọrọde “O Ete!” Edieke eyen okotde ete esie Abba, ọwọrọ enye ama ete esie onyụn̄ okpono enye. Mme Christian emi ndikot Abasi Abba owụt nte Abasi adade mmọ  ke enye ama ọkọnọ mmọ ‘spirit emi anamde ẹda mmọ ẹnyene nte nditọ.’ Spirit Abasi “etie ntiense” ọnọ mmọ onyụn̄ anam mmọ ẹdiọn̄ọ ke Abasi eyet mmimọ aran. N̄kpọ enye emi idịghe owo mîmaha ndidu uwem ke isọn̄, enye ọdọhọ ke ẹyet imọ aran ndika heaven. Mmọ ẹdiọn̄ọ ke mmimọ iyetiene Jesus ikara ke heaven edieke isọn̄ọde ida inam n̄kpọ Abasi tutu ikpa, ẹnyụn̄ ẹdiọn̄ọ ke Jehovah, ‘enye emi edide edisana,’ eyet mmimọ aran. Mfịn emi, owo ifan̄ kpọt ẹyọhọ ẹsụhọ ke otu owo 144,000. (1 John 2:20; Edi. 14:1) Mmọ ẹnen̄ede ẹkpere Jehovah tutu mmọ ẹkot enye “Abba, Ete!”

SE AKPANAMDE EDIDE EDIKA HEAVEN M̀MÊ EDIDU KE ISỌN̄

17. M̀mọ̀n̄ ke mbon oro ẹyetde aran ẹdori enyịn ndidu, ndien mmọ ẹse emi didie?

17 Edieke odoride enyịn ndika heaven, anaedi emesisịn n̄kpọ emi ke akam fo kpukpru ini. Ke ini Bible ọdọhọde ke ‘ẹn̄wọn̄ọ ndida’ mme Christian emi ẹyetde aran “nnọ ebe” mmọ ke heaven, oro edi, Jesus Christ, ọmọdọdiọn̄ọ ke imọ ke ẹtịn̄ ẹban̄a oro, ndien ke etie ebet utọ ini emi. (2 Cor. 11:2; John 3:27-29; Edi. 21:2, 9-14) Ke ini Bible etịn̄de nte Abasi amade mbon emi ẹyetde aran, ọmọfiọk ke imọ ke ẹtịn̄ ẹban̄a oro. Ke ini okotde n̄ko se Ikọ Abasi ọdọhọde mbon oro ẹyetde aran ẹnam, edisana spirit esinam fi anam se ẹdọhọde oro. Edisana spirit anam fi enen̄ede ọdiọn̄ọ ke edidu uwem ke heaven.

18. M̀mọ̀n̄ ke “mme erọn̄ en̄wen” ẹdidu, ndien afo ada emi didie?

18 Edi edieke esịnede ke otu “akwa otuowo” emi ẹkotde n̄ko “mme erọn̄ en̄wen,” Abasi edinam fi odu uwem mi ke isọn̄. (Edi. 7:9; John 10:16) Enen̄ede ọdọn̄ fi ndidu uwem ke Paradise, ndien esinenem fi nditie n̄kere se Bible etịn̄de aban̄a nte uwem editiede ke isọn̄ ini oro. Ke etie ebet ini emi edidude ke emem, afo ye mbon mbufo ye nti owo eken. Ọdọn̄ fi ndikụt ini emi akan̄, ubuene, ufen, udọn̄ọ, ye n̄kpa mîdidụhe aba. (Ps. 37:10, 11, 29; 67:6; 72:7, 16; Isa. 33:24) Emesikere n̄ko nte edidarade mbon oro ẹdisetde ẹdi. (John 5:28, 29) Imenịm ke emesikọm Jehovah nte enye ọn̄wọn̄ọde ndinam fi odu uwem ke isọn̄. Kpa ye emi mûsutaha uyo unyụn̄ un̄wọn̄ wine, emesidụk Editi man owụt ke esịt enem imọ nte Jesus Christ akakpade afak imọ.

NDI OYODỤK EDITI?

19, 20. (a) Nso ke akpanam man odu uwem ke nsinsi edide ke heaven m̀mê ke isọn̄? (b) Ntak emi okpodụkde Udia Mbubreyo Ọbọn̄?

19 Oyodu uwem ke nsinsi, edide ke heaven m̀mê ke isọn̄, edieke ọbuọtde idem ye Jehovah Abasi ye Jesus Christ onyụn̄ enịmde ke ufak Jesus ekeme ndinam ẹnyan̄a fi. Ke ini odụkde Editi, kere ban̄a utọ uwem emi odoride enyịn ndidu ye ufọn emi n̄kpa Jesus anamde ọnọ fi. Ntre, kûtetre nditiene mme owo ke ofụri ererimbot ndụk Udia Mbubreyo Ọbọn̄ ke utịn ama okosop ke Friday April 3, 2015, ke Ufọkmbono Obio Ubọn̄ m̀mê ke ebiet en̄wen ekededi emi ẹdinịmde enye.

20 Ndidụk Editi ayanam enen̄ede ọkọm Abasi ke ndikọnọ ufak. Edieke enen̄erede akpan̄ utọn̄ okop se ẹdikwọrọde ke itie oro, ọyọdọn̄ fi nditịn̄ nnọ mbọhọidụn̄ fo nte Jehovah amade mme owo ye se enye aduakde ndinam nnọ nnyịn. Emi oyowụt ke amama mmọ. (Matt. 22:34-40) Mbọk kûtetre ndidụk Udia Mbubreyo Ọbọn̄.

^ ikp. eki. 1 Usen mme Jew ẹsitọn̄ọ ke utịn ama okosop onyụn̄ etre ke ini utịn osopde edemusen.

^ ikp. eki. 9 Se ikpehe 16 ke Se Idin̄wamde Fi Ekpep Ikọ Abasi.