Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  December 2014

Nte Afo Emeti?

Nte Afo Emeti?

Ndi ama etịn̄ enyịn okot mme Enyọn̄-Ukpeme ndondo emi? Ọfọn, se m̀mê emekeme ndibọrọ mme mbụme oro ẹtienede mi:

Ndi ọfọn mme Christian ẹsifọp okpo owo?

Owo kiet kiet m̀mê ubon kiet kiet enyene ndibiere m̀mê akpana ifọfọp owo mmimọ. Okposụkedi emi Bible mîtịn̄ke m̀mê akpana ẹfọfọp okpo owo, ọfọn iti ke ẹkefọfọp okpo Edidem Saul ye eke Jonathan eyen esie ẹnyụn̄ ẹbụk ọkpọ mmọ. (1 Sam. 31:2, 8-13)—6/15, page 7.

Nso inam inịm ke idịghe Abasi esinam ndiọi n̄kpọ ẹtịbe?

Abasi enen ke kpukpru usụn̄ esie. Enye edi Abasi akpanikọ. Enye ọfọn onyụn̄ enen. Enye enyene esịt ima onyụn̄ esitua owo mbọm. (Deut. 32:4; Ps. 145:17; Jas. 5:11)—7/1, page 4.

Nso mfịna ke owo ekeme ndisobo ke ini enye ọwọrọde aka ebiet emi ẹyomde mme ọkwọrọikọ?

1. Nte mme owo ẹdude uwem do ẹdi isio. 2. Ufọk esidọn̄ owo. 3. Isimemke utom ndisọp mmehe ye nditọete do. Ediwak owo ẹkan mme mfịna emi, ẹnyụn̄ ẹbọ ekese ufọn.—7/15, page 4-5.

Nso ikanam nditọete Joseph ẹsua enye?

Jacob ama ama Joseph etieti onyụn̄ ọnọ enye ata ediye ọfọn̄. Nditọete esie ẹma ẹfụbe enye ẹnyụn̄ ẹnyam enye man ekedi ofụn.—8/1, page 11-13.

Ntak emi mîsọn̄ke ndida mbufa tract nnyịn n̄kwọrọ ikọ?

Ẹwet kpukpru mbufa tract nnyịn ke ukem usụn̄. Kpukpru mmọ ẹnyene itien̄wed emi ẹkpekotde ẹnọ enyeneufọk ye mbụme emi ẹkpebụpde. Inamke n̄kpọ m̀mê enyeneufọk ọbọrọ nso, imekeme ndiwọn̄ọde n̄ka ọyọhọ page iba inyụn̄ iwụt enye nte Bible ọbọrọde mbụme oro. Imekeme ndiwụt enye mbụme emi idibọrọde ke ini idifiakde ika.—8/15, page 12-14.

Syriac Peshitta edi nso?

Usem Syriac edi kiet ke otu usem emi ẹdade ẹto usem Aramaic. Ata ediwak owo ẹkesem enye isua ifan̄ ke mme apostle ẹma ẹkekpan̄a. Etie nte akpa usem emi ẹkekabarede ndusụk ikpehe ke N̄wed Abasi Usem Greek ẹsịn ekedi Syriac. Bible usem Syriac ke ẹkedikot Peshitta.9/1, page 13-14.

Nso ke mme ete ye eka emi ẹdide Christian ẹkpenam man ẹn̄wam nditọ mmọ?

Ana mmọ ẹsikpan̄ utọn̄ ẹnọ nditọ mmọ man ẹdiọn̄ọ mmọ. Ana mmọ ẹsikpep nditọ mmọ Ikọ Abasi. Ana mmọ ẹda nditọ mmọ usụn̄, akpan akpan ke ini nditọ mînen̄ekede inịm ke se Mme Ntiense Jehovah ẹkpepde ẹdi akpanikọ.—9/15, page 18-21.

Nso ye nso mîdidụhe aba ke Obio Ubọn̄ Abasi?

Udọn̄ọ, n̄kpa, ekọn̄, akan̄, ubuene. Kpukpru owo ẹyenyene utom.—10/1, page 6-7.

Ewe ediomi ke Bible inam mbon en̄wen ẹkeme nditiene Christ n̄kara?

Ke Jesus ama akadia akpatre Passover ye mme apostle esie, enye ama anam ediomi ye apostle 11 oro ẹkesọn̄ọde ẹda ye enye. Ẹkot ediomi emi Ediomi Obio Ubọn̄. (Luke 22:28-30) Ediomi oro ama anam mmọ ẹnịm ke mmọ ẹyetiene Jesus ẹkara ke heaven.—10/15, page 16-17.

Tịn̄ n̄kpọ iba ke Bible emi owụtde ke Satan odu.

N̄wed Abasi ọdọhọ ke Satan ama etịn̄ ikọ ye Jesus ke ini enye okodomode Jesus idomo. Ke eyo Job, Satan ama eneme nneme ye Abasi. Mbụk iba emi owụt ke Satan edi ata owo.—11/1, page 4-5.

Mmanie ke James eketịn̄ aban̄a ke Utom 15:14?

Ẹkedi mme Jew ye mme Gentile emi ẹkenịmde Abasi ke akpanikọ. Abasi ọkọdọhọ ke mmọ ẹdi orụk eke emekde ‘man ẹkpetan̄a nti ido’ enye emi okokotde mmọ. (1 Pet. 2:9, 10)—11/15, page 24-25.

Timgad okodu ke m̀mọ̀n̄, ndien didie ke mme owo ẹkedu uwem do?

Timgad edi akamba obio oro okodude ke Edem Edere Africa; mbon Rome ẹkebọp. Itie oro odu idahaemi ke Algeria. Se ẹkekụtde ke itiat kiet emi ẹkedọkde ẹsio do owụt nte mme owo ẹkesidude uwem do. Ẹkewet ẹte: “Utop, uyere, mbre, imam—uwem edi oro!” Emi owụt ke mmọ ẹkesikere n̄kpọ nte mbon emi ẹtịn̄de ẹban̄a ke 1 Corinth 15:32.—12/1, page 8-10.