Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) DECEMBER 2014

Jehovah Esidiọn̄ Mbon Emi Ẹmade Ndinam N̄kpọ Nnọ Enye

Jehovah Esidiọn̄ Mbon Emi Ẹmade Ndinam N̄kpọ Nnọ Enye

ANDIBOT ayak owo emek se enye oyomde ndinam. Ata akwa n̄kpọ ke enye anam emi ọnọ nnyịn. Enye esinen̄ede ọdiọn̄ mbon emi ẹmekde ndinam n̄kpọ emi mîdisueneke enye, emi ẹnyụn̄ ẹmade ndinam n̄kpọ emi edinamde uduak esie osu. Jehovah iyomke owo anam n̄kpọ ọnọ imọ ke ntak ndịk n̄kpa m̀mê ke ntak emi ẹnyịkde-nyịk enye. Enye ama owo emi anamde n̄kpọ imọ ke ntak emi enen̄erede ama imọ ye se imọ inamde inọ enye.

Ke uwụtn̄kpọ, ke ini nditọ Israel ẹkedude ke wilderness Sinai, Jehovah ama ọdọhọ mmọ ẹbọp tent utuakibuot. Enye ọkọdọhọ mmọ ete: “Mbufo ẹtịp etịbe ke otu mbufo ẹnọ Jehovah. Yak owo ekededi eke esịt esie enyịmede ada enye edi nte etịbe Jehovah.” (Ex. 35:5) Eyen Israel ọkọnọ se ededi emi enye enyenede ọkpọkọm ekpekpri. Ẹma ẹda se mme owo ẹkenọde ẹnam n̄kpọ Abasi. Didie ke nditọ Israel ẹketịp n̄kpọ?

Bible ọdọhọ ke “kpukpru owo eke esịt onụkde mmọ” ye “mmọ eke esịt edemerede” ẹma ẹtịp n̄kpọ. Irenowo ye iban ẹma ẹda n̄kpọ ẹdi man ẹnam utom Jehovah: N̄kpaha, n̄kpanuen utọn̄, n̄kpanuen, gold, silver, okpoho, blu blu ndidi, idet erọn̄ emi enyenede uduot mmọn̄ibọn̄, ididuot ndidi, eti linen, idet ebot, ikpa okukịm erọn̄ emi ẹnamde eyịbe, ikpa seal, eto acacia, ọsọn̄urua itiat, balsam, ye aran. Nte ini akakade, “n̄kpọ [ama] awak ekem ke kpukpru utom emi ẹkenyenede ndinam, onyụn̄ awak akan se ẹkeyomde.”—Ex. 35:21-24, 27-29; 36:7.

Idịghe se ẹkenọde ekenen̄ede enem Jehovah esịt, edi edi nte mme owo ẹkenyịmede ndinọ n̄kpọ man ẹda ẹnam utom Abasi. Mme owo ẹma ẹnyịme nditiene nnam utom oro n̄ko. Mbụk oro ọdọhọ ke “kpukpru iban emi ẹnyenede esịt ọniọn̄ [ẹma] ẹdọk n̄kpọ ke ubọk mmọ.” “Kpukpru iban emi ẹnyenede ọniọn̄, eke esịt edemerede mmọ, [ẹma] ẹdọk idet ebot.” N̄ko-n̄ko, Jehovah ama ọnọ Bezalel “ọniọn̄, ye asian ye ifiọk ye kpukpru orụk usọ.” Enye ọkọnọ Bezalel ye Oholiab ifiọk ẹda ẹnam kpukpru se ẹkedade ẹbọp tent utuakibuot.—Ex. 35:25, 26, 30-35.

Ke ini Jehovah ọkọdọhọde nditọ Israel ẹtịp n̄kpọ, enye ama enen̄ede ọdiọn̄ọ ke mbon oro ẹmade imọ ẹyenọ etịbe imaesịt ẹda ẹnam utom imọ. Enye ama eteme mbon emi ẹkenyịmede ndinam utom esie se ẹkpenamde onyụn̄ anam mmọ ẹnen̄ede ẹkop idatesịt. Jehovah ama owụt ke ikọt imọ idinanake ifiọk m̀mê n̄kpọ ndida nnam utom imọ, ama akam edi mmọ ẹnyịme ndinam. (Ps. 34:9) Jehovah iditreke-tre ndidiọn̄ fi edieke enyịmede ndinam n̄kpọ esie.