Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) DECEMBER 2014

Enye ‘Ama Ọdiọn̄ọ Usụn̄’

Enye ‘Ama Ọdiọn̄ọ Usụn̄’

GUY HOLLIS PIERCE, emi ekesịnede ke otu mbon emi ẹsede ẹban̄a utom Mme Ntiense Jehovah ama akpa ke Tuesday, March 18, 2014. Enye ekedi isua 79 ke ini enye akakpade. Imọfiọk ke enye odu idahaemi ke heaven ye Christ kpa nte enye okodoride enyịn.—Heb. 2:10-12; 1 Pet. 3:18.

Guy Pierce akamana ke Auburn, California, ke U.S.A., ke November 6, 1934, okonyụn̄ ana baptism ke 1955. Enye ọkọdọ edima an̄wan esie emi ekerede Penny ke 1977. Mmọ ẹnyene nditọ. Emi akanam enye esinam n̄kpọ ye mme owo nte ete nditọ. Etisịm 1982, enye ye Penny ẹma ẹdedi mme asiakusụn̄. Ke 1986, enye ama ọtọn̄ọ utom circuit ke United States onyụn̄ anam utom emi ke isua 11.

Ke 1997, Guy Pierce ye Penny an̄wan esie ẹma ẹtọn̄ọ utom ke Bethel United States. Brọda Pierce akanam utom ke Itieutom Utịmutom, ndien ke 1998 ẹma ẹmek enye ete esin̄wam Kọmiti Mbonutom Otu Emi Ẹsede Ẹban̄a Utom Mme Ntiense Jehovah. Ke mbono ofụri isua Watch Tower Bible and Tract Society of Pennsylvania emi ẹkenịmde ke October 2, 1999, ẹma ẹtịn̄ ẹnọ kpukpru owo ke ẹmek Brọda Pierce ẹsịn ke Otu Emi Ẹsede Ẹban̄a Utom Mme Ntiense Jehovah. Mbemiso enye akpade, enye ama anam utom ke Kọmiti Mbonutom, Kọmiti Uwetn̄wed, Kọmiti Oro Esede Aban̄a Usio N̄wed, ye Kọmiti Mme Anam-Ndutịm.

Brọda Pierce ama enem itie etieti, inua imam imam, onyụn̄ esinam mbubru ye kpukpru owo. Emi akanam mme owo emi ẹtode nsio nsio idụt ẹma enye. Edi se mme owo ẹkemade ẹkan edi nte enye akamade mbon en̄wen, osụhọrede idem, amade Ibet Abasi, onyụn̄ enen̄erede obuọt idem ye Jehovah. Guy Pierce ekesidọhọ ke utịn ekeme nditre ndisiaha edi ke ikọ Jehovah iditreke-tre ndisu, ndien se enye okoyomde ofụri ererimbot ẹdiọn̄ọ edi emi.

Brọda Pierce ikesikpaha mba ndinam n̄kpọ Jehovah. Enye ama esibak edemede aka utom onyụn̄ anam utom tutu eyo ọsọn̄. Enye ama esika nsio nsio itie ke ererimbot ọkọsọn̄ọ nditọete idem. Akananam enye idọhọke mbon Bethel ye mbon en̄wen ke imọ inyeneke ini ndineme nneme ye mmọ, ndinọ mmọ item, m̀mê ndin̄wam mmọ. Nditọete emi ẹkediọn̄ọde enye ediwak isua ke edem ẹsụk eteti nte enye ekesifọnde ido, etiede mbre mbre, onyụn̄ adade Ikọ Abasi an̄wam mme owo.

Edima eyenete nnyịn emi akpa ọkpọn̄ n̄wan esie, nditọ itiokiet, nditọ nditọ, nditọ nditọ nditọ, ediwak owo emi enye akan̄wamde ẹdụk esop, ye mbon eken emi ẹkedade enye nte ete. Brọda Mark Sanderson emi esịnede ke Otu Emi Ẹsede Ẹban̄a Utom Mme Ntiense Jehovah ọkọnọ utịn̄ikọ n̄kpa Brọda Pierce ke Bethel Brooklyn ke Saturday, March 22, 2014. Ke ini enye ọkọnọde utịn̄ikọ emi, enye ama ọdọhọ ke Brọda Pierce okodori enyịn ndika heaven onyụn̄ okot se Jesus eketịn̄de ke John 14:2-4 ete: “Ke ufọk Ete mi ediwak ebietidụn̄ ẹdu. . . . Edieke ami nnyọn̄de n̄ka n̄ketịm itie nnịm nnọ mbufo, nyafiak ndi ndida mbufo nnyọn̄, man mbufo n̄ko ẹkpedu ke ebiet eke ami ndude. Mbufo ẹmenyụn̄ ẹfiọk usụn̄ ebiet eke ami n̄kade.”—John 14:2-4.

Imọfiọk ke nnyịn idikwe Brọda Pierce aba, edi esịt enem nnyịn ke enye ‘ama ọdiọn̄ọ usụn̄’ ebiet emi enye edidụn̄de ke nsinsi.