Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  October 2014

Mbufo Ẹyedi “Obio Ubọn̄ Mme Oku”

Mbufo Ẹyedi “Obio Ubọn̄ Mme Oku”

“Mbufo ẹyekabade ẹdi obio ubọn̄ mme oku ye edisana idụt ẹnọ mi.”—EX. 19:6.

1, 2. Ntak emi okoyomde ẹkpeme ubon emi mfri n̄wan oro editode?

AKPA prọfesi ke Bible an̄wam nnyịn ifiọk nte Jehovah edisan̄ade inam se enye akaduakde. Ke ini Abasi eketịn̄de se imọ idinamde ke In̄wan̄ Eden, enye ọkọdọhọ ete: “Ami nyesịn usua ke ufọt fo [Satan] ye n̄wan ye ke ufọt mfri fo ye mfri esie.” Usua oro editie didie? Jehovah ọkọdọhọ ntem ete: “Enye [mfri n̄wan oro] ayanuak fi [Satan] ibuot, afo oyonyụn̄ anuak enye nditịn̄ikpat.” (Gen. 3:15) Urụkikọt ayasua n̄wan oro tutu odomo nte enye ekekeme ndiwot mfri esie.

2 Oro akanam andiwet psalm esịn ikọt Abasi ke akam. Enye ọkọdọhọ ete: “Sese! mme asua fo ke ẹsịn editịm; ndien mmọ eke ẹnen̄erede ẹsua fi ẹmenede ibuot mmọ. Mmọ ẹmedụk odu n̄kari n̄kari ẹban̄a ikọt fo; ẹnyụn̄ ẹdụk odu ẹban̄a ikọt fo emi afo edịpde. Mmọ ẹdọhọ ẹte: ‘Ẹdi nnyịn isobo mmọ ifep man mmọ ẹkûdi aba idụt.’” (Ps. 83:2-4) Akana ẹkpeme ubon emi mfri n̄wan oro editode mbak Satan ediwot kpukpru owo ke ubon oro, mbak enye edinyụn̄ ada mbon emi mîkpodụhe ke ubon oro edisịn. Oro akanam ẹnam nsio nsio ediomi.

 EDIOMI EMI EKPEMEDE MFRI N̄WAN ORO

3, 4. (a) Ini ewe ke ediomi Ibet Moses ọkọtọn̄ọ, ndien nso ke nditọ Israel ẹkenyịme ndinam? (b) Ntak emi ẹkenọde Ibet Moses?

3 Nditọ nditọ Abraham, Isaac, ye Jacob ẹma ẹtọt ẹsịm ediwak miliọn, Jehovah ama onyụn̄ anam mmọ ẹkabade ẹdi idụt. Ẹkekot idụt emi Israel. Jehovah ama ada Moses anam ediomi ye idụt emi onyụn̄ ọnọ mmọ Ibet. Nditọ Israel ẹma ẹnyịme ndinịm Ibet oro. Bible ọdọhọ ete: “[Moses] emen n̄wed ediomi edikot ke utọn̄ mme owo. Ndien mmọ ẹdọhọ ẹte: ‘Nnyịn imenyịme ndinam kpukpru se Jehovah ọdọhọde nnyụn̄ n̄kop uyo esie.’ Ntre Moses ada iyịp oro esịme mme owo ke idem onyụn̄ ọdọhọ ete: ‘Emi edi iyịp ediomi emi Jehovah anamde ye mbufo aban̄a kpukpru ikọ emi.’”—Ex. 24:3-8.

4 Ediomi Ibet Moses ọkọtọn̄ọ ke Obot Sinai ke isua 1513 mbemiso Christ. Ediomi oro ke Abasi akada anam idụt Israel ẹkabade ẹdi san̄asan̄a mbon emi enye emekde. Ini oro ke Jehovah akakabade edi ‘Ebiereikpe mmọ, Owụk-ewụhọ mmọ, ye Edidem mmọ.’ (Isa. 33:22) Mbụk nditọ Israel anam ikụt nte n̄kpọ esitiede ke ini mme owo ẹnịmde Ibet Abasi ye ke ini owo mînịmke. Ibet ọkọdọhọ ke inaha nditọ Israel ẹdọ mme okpono ndem m̀mê ẹtiene ẹkpono ndem. Ẹkenọ mmọ ibet emi man ekpeme mmọ, man n̄kpọ ndomokiet okûtịmede ubon Abraham emi mfri oro editode.—Ex. 20:4-6; 34:12-16.

5. (a) Nso utọ ifet ke ediomi Ibet Moses akanam nditọ Israel ẹnyene? (b) Nso ikanam Abasi esịn nditọ Israel?

5 Ediomi Ibet Moses ama anam ẹmek mme oku ke Israel. Mme oku oro ẹkeda ẹban̄a mme oku en̄wen emi ẹdinamde ikpọ n̄kpọ inọ mme owo ke ini iso. (Heb. 7:11; 10:1) Ediomi Ibet Moses ama anam idụt Israel ẹkeme ndidi “obio ubọn̄ mme oku,” edi akana mmọ ẹbem iso ẹnịm ibet Jehovah. (Kot Exodus 19:5, 6.) Edi nditọ Israel ikenịmke ibet Jehovah. Utu ke mmọ ndikọm Abasi ke ndinọ mmọ Messiah emi edide akpan mfri Abraham, mmọ ẹma ẹsịn enye. Abasi ama onyụn̄ esịn mmọ n̄ko.

Ntụtutọn̄ nditọ Israel ikọwọrọke ke ediomi Ibet Moses ikenyeneke aba ufọn (Se ikpehe ekikere 3-6)

6. Nso ikanam ẹnọ Ibet?

6 Sia idụt Israel mîkenịmke ibet Abasi, mmọ ikekemeke ndidi “obio ubọn̄ mme oku.” Edi emi iwọrọke ke Ibet ikenyeneke aba ufọn. Ẹkenọ Ibet man n̄kpọ okûnam mfri oro, man mme owo ẹnyụn̄ ẹdiọn̄ọ enye emi edidide Messiah. Ibet ikenyeneke ufọn aba ke ini Christ ekedide isọn̄ yak mme owo ẹkụt enye ẹnyụn̄ ẹdiọn̄ọ ke enye edi Messiah. Ntak edi oro Bible ọdọhọde ke “Christ anam Ibet etre.” (Rome 10:4)  Edi, mmanie ẹdidi “obio ubọn̄ mme oku”? Jehovah Abasi ama anam ediomi en̄wen man ẹtọn̄ọ obufa idụt.

ẸTỌN̄Ọ OBUFA IDỤT

7. Nso ke Jehovah ọkọdọhọ Jeremiah etịn̄ aban̄a obufa ediomi?

7 Anyan ini mbemiso Jehovah akabiatde ediomi Ibet Moses efep, enye ama ọdọhọ Jeremiah etịn̄ ke imọ iyanam “obufa ediomi” ye Israel. (Kot Jeremiah 31:31-33.) Ediomi enye emi iditiehe nte ediomi Ibet Moses. Enye ayanam ẹkeme ndifen idiọkn̄kpọ mme owo kpa ye emi owo mîwaha unam. Asan̄a didie edi ntre?

8, 9. (a) Nso ke iyịp Jesus anam ọnọ mme owo? (b) Nso ifet ke mbon emi ẹdụkde obufa ediomi ẹnyene? (Se akpa ndise ibuotikọ emi.)

8 Ke ediwak isua ama ekebe, Jesus ama ọtọn̄ọ Udia Mbubreyo Ọbọn̄ ke Nisan 14, ke isua 33. Jesus ọkọdọhọ apostle esie 11 ete: “Cup emi ada aban̄a obufa ediomi eke ẹnamde ẹbe ke iyịp mi, emi ẹdiduọkde kaban̄a mbufo.” (Luke 22:20) Matthew etịn̄ ukem n̄kpọ emi ke n̄wed Matthew. Enye ọdọhọ ke Jesus ọkọdọhọ ete: “Emi ada aban̄a iyịp mi, kpa ‘iyịp ediomi,’ emi ẹdiduọkde kaban̄a ediwak owo man ẹfen mme idiọkn̄kpọ.”—Matt. 26:27, 28.

9 Iyịp emi Jesus ọkọduọkde ọsọn̄ọ obufa ediomi. Iyịp emi n̄ko anam ẹkeme ndifen idiọkn̄kpọ mme owo ke nsinsi. Jesus itieneke isịne ke obufa ediomi emi sia akananam enye inamke idiọkn̄kpọ emi anade ẹfen ẹnọ enye. Edi Abasi ekeme ndida uwa Jesus n̄n̄wam mme owo. Enye ekeme n̄ko ndida edisana spirit nyet ndusụk nti ikọt esie aran, anam mmọ ẹdi “nditọ” esie. (Kot Rome 8:14-17.) Abasi edida mmọ nte mbon emi mînamke idiọkn̄kpọ. Ke enyịn esie, mmọ ẹditie nte Eyen Abasi emi akananam mînamke idiọkn̄kpọ. Mbon oro ẹyetde aran mi ‘ẹyetiene Christ ẹnyene udeme’ ke “obio ubọn̄ mme oku” emi nditọ Israel mîkekemeke ndinyene ke ini ẹkenamde ediomi Ibet Moses ye mmọ. Apostle Peter etịn̄ aban̄a mmọ ‘nditiene Christ nnyene udeme.’ Enye ọkọdọhọ ete: “Mbufo ẹdi ‘orụk eke ẹmekde, ẹdi mme oku emi ẹdide ndidem, ẹdi edisana idụt, mbon emi ẹdide akpan inyene, man ke kpukpru ebiet mbufo ẹkpetan̄a nti ido’ enye emi okokotde mbufo osio ke ekịm esịn ke utịbe un̄wana esie.” (1 Pet. 2:9) Omokụt do ke obufa ediomi enyene ufọn etieti. Enye anam mbet Jesus ẹkeme ndidi udiana mfri Abraham.

OBUFA EDIOMI ỌTỌN̄Ọ

10. Ini ewe ke obufa ediomi ọkọtọn̄ọ, ntak emi mîkọtọn̄ọke mbemiso ini oro?

10 Ini ewe ke obufa ediomi ọkọtọn̄ọ? Ikedịghe ke ini emi Jesus eketịn̄de aban̄a enye ke akpatre okoneyo emi enye okodude uwem ke isọn̄. Akana Jesus ọduọk iyịp esie kan̄a onyụn̄ emen idem emi enye akawade okowụt Jehovah ke heaven mbemiso ediomi oro ọtọn̄ọ. N̄ko-n̄ko, akana ẹda edisana spirit ẹyet mbon emi ‘ẹditienede Christ inyene udeme’ aran kan̄a. Ke ntre, obufa ediomi ọkọtọn̄ọ ke Pentecost isua 33, ke ini ẹkedade edisana spirit ẹyet mbet Jesus aran.

11. Didie ke obufa ediomi akanam mme Jew ye mme Gentile ẹdi Israel Abasi, ndien owo mmọ ifan̄ idu ke obufa ediomi?

11 Ke ini Jehovah ọkọdọhọde Jeremiah etịn̄ ke imọ imọn̄ inam obufa ediomi ye nditọ Israel, oro ọkọwọrọ ke ini ke edi emi ediomi Ibet Moses mîdinyeneke aba ufọn. Edi ediomi oro  okosụk ododu tutu esịm ini emi obufa ediomi ọtọn̄ọde. (Heb. 8:13) Ke ini obufa ediomi ọkọtọn̄ọde, Abasi ama ọtọn̄ọ ndida mme Jew ye mme Gentile emi mîkanaha mbobi ukem ukem, sia ‘mbobi mmọ ekedi eke ọwọn̄esịt emi edide ke spirit, idịghe ke ibet oro ẹwetde-wet.’ (Rome 2:29) Obufa ediomi oro Abasi akanamde ye mmọ anam Abasi esịn ibet esie ‘ke ekikere mmọ, onyụn̄ ewet enye ke esịt mmọ.’ (Heb. 8:10) Ibat kpukpru mbon emi ẹdude ke obufa ediomi emi edi 144,000. Mmọ ẹdi obufa idụt emi ẹkotde “Israel Abasi.”—Gal. 6:16; Edi. 14:1, 4.

12. Tịn̄ nte ediomi Ibet Moses ebietde obufa ediomi.

12 Nso ke ediomi Ibet Moses ada ebiet obufa ediomi? Jehovah akanam ediomi Ibet Moses ye nditọ Israel, kpa enye onyụn̄ anam obufa ediomi ye Israel Abasi. Moses ke Abasi akada ọnọ nditọ Israel ediomi Ibet Moses; Jesus ke Abasi ada anam obufa ediomi. Iyịp unam ke ẹkeda ẹsọn̄ọ ediomi Ibet Moses; iyịp Jesus ke ẹda ẹsọn̄ọ obufa ediomi. Ke ini ediomi Ibet Moses, Moses ekedi adausụn̄ nditọ Israel; Jesus emi edide Ibuot esop ada mbon emi ẹdude ke obufa ediomi usụn̄.—Eph. 1:22.

13, 14. (a) Didie ke obufa ediomi asan̄a n̄kpọ ye Obio Ubọn̄? (b) Nso ke oyom ẹnam man Israel Abasi ẹkeme nditiene Christ n̄kara ke heaven?

13 Obufa ediomi asan̄a nso ye Obio Ubọn̄? Obufa ediomi anam ẹtọn̄ọ edisana idụt emi enyenede mbon emi ẹdidide ndidem ye mme oku ke Obio Ubọn̄ heaven. Idụt emi ẹdi udiana mfri Abraham. (Gal. 3:29) Obufa ediomi anam inịm ke ediomi oro Abasi akanamde ye Abraham oyosu.

14 Obufa ediomi anam ẹtọn̄ọ idụt emi ẹkotde Israel Abasi onyụn̄ anam mbon emi ẹyetde aran ẹnyene unen nditiene Christ n̄kara. Edi nso inam mmọ ẹkeme nditiene Jesus n̄kara ke heaven? Ediomi odu emi anamde mmọ ẹkeme ndikara.

EDIOMI EMI ANAMDE MBON EN̄WEN ẸKEME NDITIENE CHRIST N̄KARA

15. Ewe ediomi ke Jesus akanam ye mme apostle esie?

15 Ke Jesus ama ọkọtọn̄ọ Udia Mbubreyo Ọbọn̄, enye ama anam ediomi ye mbet esie. Ẹkot ediomi oro ediomi Obio Ubọn̄. (Kot Luke 22:28-30.) Ediomi enye emi itiehe nte mme ediomi eken emi Jehovah akanamde ye mme owo. Jesus anam ediomi enye emi ye mbet esie oro ẹyetde aran. Ke ini Jesus ọkọdọhọde, “kpa nte Ete mi akanamde ediomi ye ami,” etie nte enye eketịn̄ aban̄a ediomi oro Jehovah akanamde ye enye man enye edi “oku ke nsinsi ke ukem usụn̄ oro Melchizedek ekedide.”—Heb. 5:5, 6.

16. Nso unen ke ediomi Obio Ubọn̄ anam mme Christian oro ẹyetde aran ẹnyene?

16 Mme apostle 11 oro ẹma ‘ẹsọn̄ọ ẹda ye Jesus ke ini idomo esie.’ Ediomi Obio Ubọn̄ ama anam mmọ ẹnịm ke mmọ ẹyetiene Jesus ẹtie ke ebekpo ke heaven ẹkara ẹnyụn̄ ẹdi mme oku. Edi idịghe mme apostle 11 oro kpọt ẹdikara ẹnyụn̄ ẹdi mme oku. Jesus ama owụt apostle John idem ke n̄kukụt onyụn̄ ọdọhọ enye ete: “Nyanam owo eke akande osụhọde etie ye ami ke ebekpo mi, kpa nte ami n̄kakande nnyụn̄ nsụhọrede ntie ye Ete mi ke ebekpo esie.” (Edi. 3:21) Ikọ Jesus emi ọwọrọ ke enye akanam ediomi Obio Ubọn̄ ye owo 144,000 emi ẹyetde aran. (Edi. 5:9, 10; 7:4) Ediomi emi anam mmọ ẹnyene unen nditiene  Jesus n̄kara ke heaven. Mmọ ẹtie nte n̄wan emi ẹmekde ẹnọ edidem. N̄wan oro esitiene ebe esie akara ke ẹma ẹkenam ndọ mmọ ẹma. N̄wed Abasi ọdọhọ ke mme Christian oro ẹyetde aran ẹdi “n̄wan” Christ, ke mmọ ẹdi “edisana eyenan̄wan emi mîfiọkke erenowo” emi ẹken̄wọn̄ọde ndinọ Christ ọdọ.—Edi. 19:7, 8; 21:9; 2 Cor. 11:2.

NEN̄EDE NỊM KE OBIO UBỌN̄ ABASI AYANAM UDUAK ABASI OSU

17, 18. (a) Tịn̄ ibio ibio ban̄a nte ediomi itiokiet emi ikenemede ẹsan̄ade n̄kpọ ye Obio Ubọn̄. (b) Nso inam inịm ke Obio Ubọn̄ ayanam uduak Abasi osu?

17 Kpukpru ediomi oro inemede ke ibuotikọ iba emi ẹsan̄a n̄kpọ ye Obio Ubọn̄ ke usụn̄ kiet m̀mê akande oro. (Se chart emi “Nte Abasi Edinamde Se Enye Akaduakde Osu.”) Mmọ ẹwụt ke Obio Ubọn̄ iditreke ndikara. Imenyene ata akpan ntak ndinịm ke Obio Ubọn̄ Messiah ke Abasi edida inam se enye akaduakde ọnọ isọn̄ ye mme owo.—Edi. 11:15.

Jehovah ayada Obio Ubọn̄ Messiah anam se enye akaduakde aban̄a isọn̄ osu (Se ikpehe ekikere 15-18)

18 Obio Ubọn̄ Abasi kpọt editre kpukpru mfịna emi mme owo ẹnyenede. Imenen̄ede inịm ke Obio Ubọn̄ emi ayanam ufọn ọnọ mme owo ke nsinsi. Ntre, ẹyak isịn ifịk inam mme owo ẹdiọn̄ọ eti mbụk emi!—Matt. 24:14.