Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  October 2014

 MBỤK EYOUWEM

Mme Akpan N̄kpọ Emi Ẹtịbede ke Ofụri Isua Emi Nnamde N̄kpọ Jehovah

Mme Akpan N̄kpọ Emi Ẹtịbede ke Ofụri Isua Emi Nnamde N̄kpọ Jehovah

Ke 1947, mme oku Catholic ke Santa Ana ke El Salvador ẹma ẹtọn̄ọ ndinam ẹsịn ntịme ye Mme Ntiense Jehovah. Ke ini ẹkesụk ẹnịmde Ukpepn̄kpọ Enyọn̄-Ukpeme ke ufọk mme isụn̄utom, nditọwọn̄ ẹma ẹtomo itiat ẹdọn̄ ke ufọk oro. Ekem, mme oku ẹma ẹsan̄a ye ediwak owo ẹdi. Ndusụk ẹkama nsadan̄ ikan̄; mbon eken ẹkama ndisọi mbiet. Mmọ ẹma ẹda do ke ofụri hour iba, ẹtop itiat ẹtọ ufọk oro, ke ẹfiori: “Itọn̄ uwem ọsọn̄ Eka Abasi!” “Yak Jehovah akpa!” Ẹkenam kpukpru emi man mme isụn̄utom ẹkpọn̄ obio oro. Ntịn̄ ntre sia n̄kesịne ke otu mme isụn̄utom oro, mma nnyụn̄ ndụk mbono esop usen oro. Se ntịn̄de emi eketịbe ke isua 67 emi ẹkebede. *

ISUA iba mbemiso se nsụk mbụkde emi etịbede, ami ye Evelyn Trabert ima ikụre n̄wed ke Ufọkn̄wed Gilead emi okodude ini oro ekpere Ithaca ke New York. Otu nnyịn ekedi ọyọhọ otu inan̄, ndien ẹma ẹnọ nnyịn mbiba isan̄a ntre ika Santa Ana ikanam utom isụn̄utom. Edi mbemiso ntịn̄de se nnamde ke ofụri isua 29 emi ndide isụn̄utom, yak ntịn̄ kan̄a se ikanamde mbiere ndidi isụn̄utom.

NTE IKASAN̄ADE IKPEP AKPANIKỌ

Ete mi ekekere John Olson, eka mi ekere Eva Olson. Ke 1923, mmọ ẹkedụn̄ ke Spokane, Washington, ke U.S.A., ndien isua oro ke n̄kamana. Ete ye eka mi ẹkesika ufọkabasi Lutheran, edi mmọ ikenịmke se ẹkekpepde ke ufọkabasi ẹban̄a ikan̄ hell sia ọkọsọsọn̄ mmọ ndinịm ke Abasi emi amade mme owo ekeme ndifọp owo ke ikan̄. (1 John 4:8) Ete mi ekesinam utom ke itie utem bred. Okoneyo usen kiet, owoutom mmọ ama ọdọhọ enye ke Bible idọhọke ke Abasi esitụhọde owo ke hell. Ibịghike-bịghi, ete mi ye eka mi ẹma ẹtọn̄ọ ndikpep Bible ye Mme Ntiense Jehovah ẹnyụn̄ ẹdidiọn̄ọ se Bible etịn̄de aban̄a se isitịbede owo ama akpa.

N̄kedi isua usụkkiet kpọt ini oro, edi ke nsụk nteti nte n̄kesikpan̄de utọn̄ n̄kop nte mmọ ẹtịn̄de mbufa n̄kpọ oro mmọ ẹkekpepde ke Bible. Ke ini mmọ  ẹkedide ẹdidiọn̄ọ ke enyịn̄ ata Abasi edi Jehovah, ye nte ke ukpepn̄kpọ Abasi-Ita-ke-Kiet idịghe akpanikọ, esịt ama enem mmọ etieti. Mma ntọn̄ọ ndimụm nti ukpepn̄kpọ N̄wed Abasi emi ndọn̄ ke ibuot, nnyụn̄ ndiọn̄ọ ‘akpanikọ oro anamde owo ọwọrọ ufụn.’ (John 8:32) Akananam Bible ifekke mi; esikam enenem mi nditie ndụn̄ọde Ikọ Abasi. Kpa ye emi n̄kedide owo o-bụt, mma nsitiene ete mi ye eka mi n̄kwọrọ ikọ. Mmọ ẹma ẹna baptism ke 1934. Ke 1939, mma nna baptism n̄ko. N̄kedi isua 16 ini oro.

Ami ye eka mi ye ete mi ke mbono emi ẹkenịmde ke St. Louis ke Missouri ke 1941

Ke July 1940, ete mi ye eka mi ẹma ẹnyam ufọk nnyịn, ndien nnyịn mbita ima itọn̄ọ utom usiakusụn̄ ke Coeur d’Alene, ke Idaho. Ikekpekpe ufọkenyọn̄ kiet idụn̄. Ẹkesidiọn̄ moto ke isọn̄ oro. Ẹma ẹsinịm mbono esop ke ufọk nnyịn. Esop ifan̄ kpọt ẹkenyene Ufọkmbono Obio Ubọn̄ ini oro. Mme esop ẹkesiwak ndidụk mbono esop ke ufọk owo, mîdịghe ẹnịm ke ufọk emi ẹbọde ke ukpeokụk.

Mma ntiene ete ye eka mi ndụk mbono oro ẹkenịmde ke 1941 ke St. Louis ke Missouri. Ẹkekot akpatre usen mbono oro “usen nditọwọn̄,” ndien ẹma ẹdọhọ nditọwọn̄ ọtọn̄ọde ke mbon emi ẹdide isua 5 tutu esịm isua 18 ẹtie ke iso n̄kpọitie. Ke utịt utịn̄ikọ oro Brọda Joseph F. Rutherford ọkọnọde, enye ama ọdọhọ nnyịn nditọwọn̄ ete: ‘Mbọk yak nditọwọn̄ oro ẹnyịmede ndikop uyo Abasi ye uyo Edidem oro enye emekde, ẹdada.’ Kpukpru nnyịn ima idaha ida. Brọda Rutherford ama etịn̄ ke ọkpọsọn̄ uyo ete: “Sese, se iwakde ibe mbufa ntiense Obio Ubọn̄ 15,000!” Se ikan̄wamde mi mbiere ndidi asiakusụn̄ ke ofụri eyouwem mi edi oro.

EFAKUTOM ORO ẸKENỌDE UBON NNYỊN

Ke ọfiọn̄ ifan̄ ẹbede tọn̄ọ ikọnyọn̄ mbono oro ke St. Louis, ẹma ẹdọhọ nnyịn iwọrọ ika usụk usụk California. Ẹkedọhọ ikọtọn̄ọ esop ke ebiet emi ẹkotde Oxnard. Ikodụn̄ ke moto emi ẹkesịnde bed kiet kpọt. Ẹma ẹsibri n̄kpọ kpukpru okoneyo ke enyọn̄ okpokoro udia ẹnọ mi nna. Ibietke-biet mma nsinyene ọkpọkpọ ubet mi!

Mbemiso isịmde California, Japan ẹma ẹduọk bọmb ke Pearl Harbor ke Hawaii ke December 7, 1941. Edem usen oro, United States ẹma ẹtiene ẹn̄wana ọyọhọ ekọn̄ ererimbot iba. Ukara ẹma ẹwụk ẹte ẹsinịme kpukpru ikan̄ ke okoneyo, ntre ima isinịme. Nsụn̄ikan̄ idakmmọn̄ emi mbon Japan ẹkedade ẹn̄wana ekọn̄ ẹma ẹsikan ke esụk California. Ntre, ẹkedọhọ kpukpru owo ẹsinịme ikan̄ sia mmọ ẹkpeketop ebiet ekededi emi mmọ ẹkụtde ikan̄ ke obot.

Ke ọfiọn̄ ifan̄ ẹbede, ima idụk akamba mbono emi ẹkekotde New World Theocratic Assembly ke Cleveland, ke Ohio. Ekedi ke September 1942. Brọda Nathan H. Knorr ama ọnọ utịn̄ikọ emi ibuotikọ ekedide “Emem—Ndi Enye Ekeme Ndibịghi?” Enye ekeneme se idude ke Ediyarade 17, emi aban̄ade “ididuot unam” emi ‘ama okododu, ekem idụhe aba, edi emi editode editụn̄ọ ukpe idọk idi.’ (Edi. 17:8, 11) Brọda Knorr ama ọdọhọ ke “ididuot unam” oro ekedi Esop Ediomi Mme Idụt emi mîkodụhe aba ke 1939. Bible ama etetịn̄ ke esop en̄wen ayada itie Esop Ediomi Mme Idụt, ndien ke emem oyodu ke esisịt ini. Se ikonyụn̄ itịbede edi oro ke 1945. Ekọn̄ ererimbot ọyọhọ iba ama etre, ndien “unam” oro ama afiak edi—isan̄ enye emi edidi Esop Edidiana Mme Idụt. Mme Ntiense Jehovah ẹma ẹtọn̄ọ ndikwọrọ ikọ ke nsio nsio itie ke ererimbot, ata ediwak owo ẹma ẹnyụn̄ ẹdụk esop Abasi.

N̄weditoro Ufọkn̄wed Gilead mi edi emi

Prọfesi oro ama anam n̄kụt akwa utom emi ẹdinamde ke ini iso. Ke ini ẹkedọhọde ke ẹmọn̄ ẹtọn̄ọ Ufọkn̄wed Gilead ke isua oro eketienede, ama ọdọn̄  mi ndidi isụn̄utom. Ke 1943, ẹma ẹdọhọ n̄kanam utom usiakusụn̄ ke Portland ke Oregon. Ini oro, ikesikama ukwak ubre usanikwọ ibre utịn̄ikọ inọ mme enyeneufọk ke esa ufọk mmọ, ekem inọ mmọ mme n̄wed nnyịn emi ẹtịn̄de n̄kpọ ẹban̄a Obio Ubọn̄ Abasi. Ofụri isua oro, n̄kosioho ekikere n̄kpọn̄ utom isụn̄utom.

Ke 1944, esịt ama enem mi etieti ke ini ẹkekotde mi ye Evelyn Trabert ufan mi ẹte idi Gilead. Ke ofụri ọfiọn̄ ition emi ikodude do, mme andikpep ẹma ẹwụt nnyịn nte ikpekpepde Bible ikop inem. Ima ima nte mmọ ẹkesụhọrede idem. Ndusụk ini, nditọete emi ẹkesitan̄ udia ẹdibon ẹnọ nnyịn, ẹda ẹbet nnyịn idia, ẹnyụn̄ ẹtan̄ usan ẹsion̄o ima idia ima. Ima ikụre n̄wed ke January 22, 1945.

EBIET EMI N̄KANAMDE UTOM ISỤN̄UTOM

Ami, Evelyn, Leon Mahan, ye Esther an̄wan esie ima ikesịm El Salvador ke June 1946. Do ke ẹkenọ nnyịn ikanam utom. “N̄kpọ [ẹma] ẹdat se ẹkpen̄ede” ke idụt oro. (John 4:35) Se n̄ketịn̄de ke ntọn̄ọ mbụk emi owụt adan̄a nte esịt akayatde mme oku ederi do. Urua kiet mbemiso mfịna oro, ima inịm akpa mbono circuit nnyịn ke Santa Ana. Ima ikot ata ediwak owo ẹdikop utịn̄ikọ an̄wa mbono oro. Esịt ama enem nnyịn etieti ke ini n̄kpọ nte owo 500 ẹkedide. Nnyịn ikefeheke ikpọn̄ obio oro, edi ima ibiere ndidu do n̄n̄wam mbon emi ẹkeyomde ndifiọk akpanikọ. Mme oku ẹma ẹdọhọ mme owo ẹkûkot Bible; ibat ibat owo kpọt ẹkenyụn̄ ẹnyene Bible. Kpa ye oro, mbon emi ẹkeyomde ndifiọk akpanikọ ẹma ẹwak etieti. Mmọ ẹma ẹma nte ikodomode ndikpep Spanish man ikeme ndikpep mmimọ n̄kpọ mban̄a ata Abasi emi ekerede Jehovah, ye se enye ọn̄wọn̄ọde ndinam man isọn̄ emi afiak edi Paradise.

Ẹma ẹnọ nnyịn owo ition ika El Salvador. Ọtọn̄ọde ke ufien aka nnasia: Evelyn Trabert, Millie Brashier, Esther Mahan, ami, ye Leo Mahan

Rosa Ascencio ekesịne ke otu mbon emi n̄kebemde iso n̄kpep Bible ke idụt oro. Ke enye ama ọkọtọn̄ọ ndikpep Bible, enye ama ọwọrọ ọkpọn̄ erenowo emi enye okodụn̄de kiet. Ete oro n̄ko ama ọtọn̄ọ ndikpep Bible. Mmọ ẹma ẹnam ndọ nte ini akade, ẹna baptism ẹkabade ẹdi Mme Ntiense Jehovah ẹnyụn̄ ẹsisịn ifịk ẹkwọrọ ikọ. Rosa ekedi akpa eyen Santa Ana emi ekedide asiakusụn̄ ofụri ini. *

Rosa ama enyene ekpri ufọkurua. Enye ama esiberi ufọkurua esie aka ukwọrọikọ onyụn̄ enịm ke Jehovah iditreke ndise mban̄a imọ. Ke ini enye ọnyọn̄de ukwọrọikọ ediberede ufọkurua esie, mbonurua esie ẹma ẹsidi ke udịm ẹdibọ enye n̄kpọ ẹdep. Enye ama okụt ke se Bible etịn̄de ke Matthew 6:33 edi akpanikọ onyụn̄ aka iso anam n̄kpọ Abasi tutu esịm usen emi enye akpade.

Ini kiet ntem, oku Catholic obio oro ikodude ama edi edidọhọ ete emi ọkọnọde mme isụn̄utom ufọk ẹdụn̄ ete ke edieke enye mîsioho nnyịn ke ufọk esie, ke ẹyebịn enye ye n̄wan esie ẹsion̄o ke ufọkabasi. Enyeneufọk emi ekedi anam mbubehe emi ẹkediọn̄ọde etieti. Ufọkabasi ama ododorode ete mbon ke ntak idiọk ido mme oku, ntre enye ikamaha ndinam se oku oro eketịn̄de. Enye ama ọdọhọ enye ke ọkpọkọm ẹbebịn imọ ẹsio ke ufọkabasi, ke ibeheke  imọ onyụn̄ ọdọhọ nnyịn ke imekeme ndidụn̄ ke ufọk imọ adan̄a nte imama.

AKWA OWO UKARA AKABADE NTIENSE

N̄kọk itieutom emi ẹkebọpde ke 1955

Ke San Salvador, ibuot obio idụt oro, isụn̄utom kiet ama ekpep Bible ye n̄wan ọwọrọetop ọbọpn̄kpọ emi ekerede Baltasar Perla. Ete oro ekedi eti owo, edi enye ikọbuọtke idem ye Abasi aba ke ntak mbubịk mme oku ederi. Ke ini ikoyomde ndibọp n̄kọk itieutom, Baltasar ama enyịme ndiwet mbuwed ufọk oro nnyụn̄ mbọp enye ke mfọn, kpa ye oro enye mîkedịghe Ntiense kan̄a.

Baltasar ndikanam utom ye ediwak Mme Ntiense Jehovah ke ini ẹkebọpde n̄kọk itieutom oro ama anam enye enịm ke imokụt mbon emi ẹkponode ata Abasi. Enye ama ana baptism ke July 22, 1955, ndien Paulina an̄wan esie ama etiene ana ke mîbịghike. Nditọ mmọ mbiba ke ẹnam n̄kpọ Jehovah tutu emi. Akpan esie emi ekerede Baltasar, Jr., anam utom ke Bethel Brooklyn esịm isua 49. Enye esịne ke Kọmiti N̄kọk Itieutom United States, ke onyụn̄ an̄wam ẹnam utom ukwọrọikọ. *

Ini ikọtọn̄ọde ndinịm akamba mbono ke San Salvador, Brọda Perla ama esin̄wam nnyịn ọbọ akamba itie usịn̄ede idem man ida inịm mbono. Akpa, ikesitie ke n̄kpọitie ifan̄ kpọt; edi nte ini akade, Jehovah ama ọdiọn̄ utom nnyịn. Ima isiwak kpukpru isua ikan nte ikedide tutu mme owo ẹyọhọ itie mbono oro. Nte ini akakade, itie mbono oro ikekemke owo aba! Mma nsikụt mbon emi n̄kekpepde Bible ke ini mbono. Esịt ama esinem mi ke ini n̄kani nditọ ukpepn̄kpọ mi ẹwụtde mi nditọ ukpepn̄kpọ Bible mmọ oro ẹnade baptism obufa. N̄kada mmọ nte nditọ nditọ mi ke esop Abasi!

Brọda F. W. Franz ke etịn̄ ikọ ye mme isụn̄utom ke itie mbono

Ke mbono kiet, eyenete kiet ama asan̄a ebịne mi edidọhọ ke iyom nditịn̄ idiọkn̄kpọ imọ. N̄kọdiọn̄ọke enye, edi mma nyom ndikop se enye okoyomde nditịn̄. Enye ama ọdọhọ mi ete, “Mma ntiene nsịne ke otu nditọwọn̄ emi ẹketopde itiat ẹtọ fi ke Santa Ana.” Idahaemi enye editiene mi anam n̄kpọ Jehovah. Esịt ama enem mi etieti. Nneme oro ama anam mi n̄kụt ke idụhe utom emi ọfọnde nte utom uyọhọ ini.

Akpa mbono circuit emi ikodụkde ke El Salvador

 MME N̄KPỌ EFEN EMI N̄KANAMDE

Mma n̄ka iso n̄kwọrọ ikọ ke El Salvador ke n̄kpọ nte isua 29. N̄kọtọn̄ọ utom isụn̄utom ke Santa Ana, ekem n̄ka Sonsonate, Santa Tecla, ye San Salvador. Ke 1975, mma n̄kpọn̄ utom isụn̄utom nnyọn̄ n̄ka Spokane sia ete mi ye eka mi ẹma ẹsọn̄, ndien akana n̄ka n̄kan̄wam mmọ. N̄kanam emi ke mma n̄ketịm mbọn̄ akam mban̄a n̄kpọ emi.

Ke ete mi ama akakpa ke 1979, mma nse mban̄a eka mi, edi idem esie ama enen̄ede ọdiọk nte eyo esierede. Enye ama odu uwem isua itiaita en̄wen onyụn̄ akpa ke ini edide isua 94. Idem ama emem mi etieti, esịt onyụn̄ etịmede mi. Ibịghike-bịghi, mma ndọn̄ọ n̄kwaiyọ. Edi akam emi n̄kọbọn̄de ye nte Jehovah akakamade mi ke ini mfịna emi ama an̄wam mi nyọ se ikọwọrọde mi emi. Jehovah ama ọn̄wọn̄wọn̄ọ ete, ‘Idem tutu esịm ini emi ọsọn̄de, nyemen fi n̄kama, nyobiom fi nyonyụn̄ nnyan̄a fi.’—Isa. 46:4.

Ke 1990, mma n̄wọrọ n̄kodụn̄ ke Omak ke Washington. Mma n̄n̄wam mbon emi ẹsemde Spanish do, ndien ediwak nditọ ukpepn̄kpọ mi ẹma ẹna baptism. Ke November 2007, n̄kekemeke ndikama ufọk mi ke Omak aba, ntre mma n̄wọrọ n̄kodụn̄ ke ekpri ufọk ke mbọhọ oro, ke Chelan ke Washington. Nditọete ke esop Spanish mi ẹkama mi tutu tọn̄ọ n̄kọwọrọ ndi; mmesikọm mmọ etieti ke se mmọ ẹnamde ẹnọ mi. Ami nsọn̄ n̄kan ke esop nnyịn, ntre nditọete ẹda mi nte eka eka mmọ.

Okposụkedi n̄kebierede ke ndidọhọ ebe, ke ndinyụn̄ nnyeneke nditọ man n̄keme ndida ofụri uwem mi nnam n̄kpọ Abasi, mmenyene ediwak nditọ ke esop Abasi. (1 Cor. 7:34, 35) Mmọdiọn̄ọ ke ndikemeke ndinyene kpukpru se nyomde ke uwem emi. Oro anam nnam se idide ata akpan n̄kpọ ikan, oro edi, ndida ofụri uwem mi nnam n̄kpọ Jehovah. Ke obufa ererimbot, nyenyene ini nnam kpukpru nti n̄kpọ emi ẹdọn̄de mi idahaemi. Itie N̄wed Abasi emi mmade n̄kan edi Psalm 145:16 emi ọdọhọde ke Jehovah ‘ọyọnọ kpukpru mme odu-uwem se mmọ ẹyomde.’

Utom usiakusụn̄ anam mi nsụk n̄kop odudu nte n̄kaiferi

Ndi isua 91 idahaemi, idem mi inyụn̄ idiọkke ikaha, ntre ke nsụk nnanam utom usiakusụn̄. Utom usiakusụn̄ anam nsụk n̄kop odudu nte n̄kaiferi onyụn̄ anam uwem enem mi. Ini n̄kakade El Salvador, ẹketọtọn̄ọ utom ukwọrọikọ do. Kpa ye emi Satan akade iso ndinam ẹkọbọ ikọt Abasi ke idụt oro, mme asuanetop do ẹwak ẹbe 39,000. Emi anam ntetịm mbuọt idem ye Abasi. Mmokụt ke spirit Jehovah an̄wam ikọt esie ẹnam utom!

^ ikp. eki. 4 Kot mbụk emi ke N̄wedisua Mme Ntiense Jehovah eke 1981, page 45-46.

^ ikp. eki. 19 N̄wedisua 1981, page 41-42.

^ ikp. eki. 24 N̄wedisua 1981, page 66-67, 74-75.