Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) AUGUST 2014

Ndi ke Adia “Udia ke Nnennen Ini”?

Ndi ke Adia “Udia ke Nnennen Ini”?

NNYỊN idu uwem ke ndiọkn̄kan ini. (2 Tim. 3:1-5) Idụhe usen emi owo mîdomoke nnyịn ise m̀mê imenen̄ede ima Jehovah ye ibet esie. Jesus ama ọdọdiọn̄ọ ke n̄kpọ editie ntem onyụn̄ ọn̄wọn̄ọ ọnọ mbet esie ke iyan̄wam mmọ ẹyọ kpukpru emi. (Matt. 24:3, 13; 28:20) Kiet ke otu n̄kpọ emi Jesus anamde edi ndimek ofụn emi anamde akpanikọ ete ọnọ ikọt imọ “udia ke nnennen ini.”—Matt. 24:45, 46.

Tọn̄ọ ke 1919 emi ẹkemekde ofụn emi, ediwak miliọn owo emi ẹsemde nsio nsio usem ke ẹdụk ẹdi esop Abasi, ke ẹnyụn̄ ẹkpep mmọ ikọ Abasi. (Matt. 24:14; Edi. 22:17) Edi idịghe kpukpru se esop Abasi ẹsiode ẹdu ke kpukpru usem, inyụn̄ idịghe kpukpru owo ẹkeme ndika ikpehe Intanet esop Abasi. Ke uwụtn̄kpọ, enyene ndusụk nditọete emi mîsehe mme vidio mînyụn̄ ikotke mme n̄wed nnyịn emi ẹdọn̄de ke jw.org kpọt. Ndi emi ọwọrọ ke mmọ idiọn̄ọke ndusụk n̄kpọ emi ẹkpepde nditọete mmọ man ẹn̄wam mmọ ẹka iso ẹkpono Abasi? Iyom ndida mbụme inan̄ mbọrọ mbụme emi.

 1. Nso ke Jehovah esinen̄ede ada ekpep nnyịn n̄kpọ?

Ke ini Satan okodomode Jesus ete anam itiat akabade uyo, Jesus ama ọdọhọ enye ete: “Idịghe uyo ikpọn̄ ke owo edida odu uwem, edi edida kpukpru ikọ eke ẹwọrọde Jehovah ke inua odu.” (Matt. 4:3, 4) Kpukpru ikọ Jehovah ẹdu ke Bible. (2 Pet. 1:20, 21) Ntem, Bible ke Jehovah esinen̄ede ada ekpep nnyịn n̄kpọ.—2 Tim. 3:16, 17.

Esop Jehovah ẹkabade ofụri m̀mê ubak Edisana N̄wed Abasi—Edikabade Eke Obufa Ererimbot ke se ibede usem 120, ndien ke ẹkabade enye ke mme usem en̄wen kpukpru isua. Ke adianade ye Edikabade Eke Obufa Ererimbot, ẹsio nsio nsio Bible en̄wen ke ata ediwak usem. Ndusụk usem ẹnyene ofụri Bible; ndusụk ẹnyene ubak. Ẹmịn̄ ediwak biliọn Bible. Kpukpru se ẹnamde emi edi uduak Jehovah, koro enye oyom “kpukpru owo ẹnyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:3, 4) Sia ‘mîdụhe baba owo kiet oro Abasi obotde emi edịbede enye ke enyịn,’ imọfiọk ke Jehovah ayanam kpukpru mbon emi “ẹkerede ẹban̄a unana mmọ ke n̄kan̄ eke spirit” ẹdidụk esop esie oyonyụn̄ ekpep mmọ n̄kpọ.—Heb. 4:13; Matt. 5:3, 6; John 6:44; 10:14.

2. Didie ke ẹsida mme n̄wed nnyịn ẹkpep nnyịn ikọ Abasi?

Ana owo oro oyomde ndinen̄ede nnyene mbuọtidem okot Bible. Edi ikụreke ke oro, ana se enye okotde an̄wan̄a enye, ana enye onyụn̄ anam se enye ekpepde. (Jas. 1:22-25) Eunuch emi ekedide owo Ethiopia ke eyo mme apostle ama ọdiọn̄ọ emi. Enye okosụk okot Ikọ Abasi ke ini Philip okobụpde enye ete: “Nte afo emetịm ọfiọk se afo okotde?” Eunuch oro ama ọbọrọ Philip ete: “N̄keme didie ndifiọk ke owo mîtemeke mi?” (Utom 8:26-31) Philip ama anam Ikọ Abasi enen̄ede an̄wan̄a enye. Se eunuch oro ekekpepde ama otụk enye tutu enye ana baptism. (Utom 8:32-38) Mfịn, mme n̄wed esop Abasi ẹnam inen̄ede ifiọk akpanikọ. Se idiọn̄ọde otụk nnyịn onyụn̄ anam ida se ikpepde idu uwem.—Col. 1:9, 10.

Ẹsida mme n̄wed esop Abasi ẹkpep ikọt Jehovah ediwak n̄kpọ. (Isa. 65:13) Ke uwụtn̄kpọ, Enyọn̄-Ukpeme odu ke se ibede usem 210. Magazine emi esinam mme prọfesi Bible an̄wan̄a owo, anam mme akpan n̄kpọ ke Ikọ Abasi an̄wan̄a nnyịn, onyụn̄ etịn̄ nte ikpadade ibet Abasi idu uwem. Ẹdemede! emi ẹsiode ke n̄kpọ nte usem 100 esikpep nnyịn n̄kpọ aban̄a nsio nsio n̄kpọ emi Jehovah okobotde onyụn̄ owụt nnyịn nte ikpanamde nsio nsio item emi Bible ọnọde. (N̄ke 3:21-23; Rome 1:20) Ofụn emi anamde akpanikọ anam ẹkabade mme n̄kpọ emi esop Abasi ẹsiode ẹsịn ke se ibede usem 680. Ndi emenyene ini emi esikotde Bible kpukpru usen? Ndi emesikot kpukpru magazine nnyịn ye mbufa n̄wed emi ẹsiode ke usem mbufo kpukpru isua?

Ke ẹsiode n̄wed ye mme n̄kpọ eken ẹfep, esop Jehovah ẹsitịm utịn̄ikọ emi ẹsinọde ke mme mbono esop ye n̄kpri ye ikpọ mbono. Ndi emesima mme utịn̄ikọ, drama, nnamn̄wụt, ye ndụn̄ọde oro ẹsinamde ke mme mboho nnyịn? Mme n̄kpọ emi ke Jehovah ada ekpep nnyịn n̄kpọ!—Isa. 25:6.

 3. Edieke kpukpru se ẹsiode mîdụhe ke usem mbufo, ndi oro ọwọrọ ke udunen̄ekede udiọn̄ọ ikọ Abasi?

Iwọrọke ntre. Ndusụk ini, ndusụk ikọt Jehovah ẹsidiọn̄ọ n̄kpọ emi nditọete mmọ mîdiọn̄ọke. Ikpanaha emi akpa nnyịn idem. Ntak-a? Da mme apostle ke uwụtn̄kpọ. Jesus ama ekpep mmọ n̄kpọ akan mme mbet eken. (Mark 4:10; 9:35-37) Kpa ye oro, mme mbet eken ẹkesụk ẹdọdiọn̄ọ ikọ Abasi; se mmọ ẹkediọn̄ọde ama ekem ye mmọ.—Eph. 4:20-24; 1 Pet. 1:8.

N̄kpọ en̄wen emi mîkpanaha ifre edi ke idịghe kpukpru se Jesus eketịn̄de onyụn̄ anamde ke ẹkewet ke mme mbụk Gospel. Apostle John ekewet ete: “Ke akpanikọ, ediwak n̄kpọ efen ẹdu emi Jesus akanamde, emi edide, edieke ẹkpewetde mmọ ata ọyọhọ ọyọhọ, n̄kereke ke ererimbot ọkpọdọn̄ọ n̄wed emi ẹdade ẹwet.” (John 21:25) Okposụkedi emi mme mbet Jesus ke eyo esie ẹkediọn̄ọde n̄kpọ ẹban̄a Jesus ẹkan nnyịn, isụk idọdiọn̄ọ n̄kpọ iban̄a enye. Jehovah ama anam ẹwet mme n̄kpọ emi aban̄ade Jesus emi ẹdin̄wamde nnyịn itiene nde ikpat esie.—1 Pet. 2:21.

Kere n̄ko ban̄a mme leta emi mme apostle ẹkewetde ẹnọ mme esop ke eyo mmọ. Ke uwụtn̄kpọ, owo isịnke leta Paul kiet ke Bible. (Col. 4:16) Ndi enyene n̄kpọ Abasi emi nnyịn mîfiọkke ke ntak emi nnyịn mînyeneke leta Paul oro? Ihih. Jehovah ọdiọn̄ọ se ifọnde ye nnyịn, enye onyụn̄ ọnọ nnyịn se idin̄wamde nnyịn ika iso inam n̄kpọ esie.—Matt. 6:8.

Jehovah ọdiọn̄ọ se ifọnde ye nnyịn, enye onyụn̄ ọnọ nnyịn se idin̄wamde nnyịn ika iso inam n̄kpọ esie

Mfịn, ndusụk ikọt Jehovah ẹnyene n̄wed esop Abasi ke usem mmọ ẹkan mbon eken. Edieke n̄wed esop Abasi mîwakke ke usem mbufo, kûyak afịna fi. Jehovah osụk amama fi. Kpep mme n̄wed emi ẹnyenede, ndien edieke ekemede, dụk mbono esop ke usem emi an̄wan̄ade fi. Nịm ke Jehovah ayan̄wam fi aka iso anam n̄kpọ esie.—Ps. 1:2; Heb. 10:24, 25.

4. Edieke mûkemeke ndika jw.org n̄kese m̀mê n̄kokot se ẹdọn̄de do, ndi oro ọwọrọ ke udunen̄ekede ukpere Abasi?

Imọdọn̄ mme magazine nnyịn ye mme n̄kpọ en̄wen ke ikpehe Intanet nnyịn. Ẹdọn̄ n̄ko mme n̄kpọ emi ẹdin̄wamde mme ebe ye n̄wan, mme uyen, ye mbon emi ẹnyenede n̄kpri nditọ. Mme ubon ẹkeme ndibọ ufọn edieke ẹnemede mme n̄kpọ emi ke ini Utuakibuot Ubon mmọ. Imesidọn̄ n̄ko n̄kpọ emi aban̄ade mme akpan edinam, utọ nte edinam ukụre ukpep ke ufọkn̄wed Gilead ye mbono ofụri isua. Ẹsidọn̄ n̄kpọ emi aban̄ade nditọete nnyịn emi oto-obot afanikọn̄ ẹsịmde, mme ikpe emi inyenede ke esop ye mme ikpe emi ikande, man nditọete nnyịn ke ofụri ererimbot ẹfiọk se ikade iso. (1 Pet. 5:8, 9) Ke ẹda ikpehe Intanet nnyịn ẹkwọrọ ikọ idem ke mme idụt emi owo mînyịmeke nnyịn ikwọrọ ikọ.

Omosụk ekeme ndika iso n̄kpere Abasi inamke n̄kpọ m̀mê emekeme ndidụk ikpehe Intanet nnyịn m̀mê ukemeke. Ofụn emi anamde akpanikọ ke anam utom ọkpọsọn̄ man ọnọ ikọt Abasi udia oro ekemde. Ntre, kûkere ke ana edep kọmputa m̀mê fon emi ẹkemede ndida ndụk Intanet man aka jw.org. Ndusụk owo ẹsimịn̄ ndusụk n̄kpọ oro ẹdọn̄de ke ikpehe Intanet nnyịn ẹnọ mbon oro mîkemeke ndidụk ikpehe emi, edi owo idọhọke ke ana esop kiet kiet ẹnam emi ẹnọ kpukpru owo.

Imọkọm Jesus ke ndinam se enye ọkọn̄wọn̄ọde ete ke iyọnọ nnyịn udia ke nnennen ini. Mme akpatre usen emi ẹmọn̄ ẹkekụre, edi imenen̄ede inịm ke Jehovah iditreke ndinọ nnyịn “udia ke nnennen ini.”