Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) AUGUST 2014

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Jesus ọkọdọhọ mme Sadducee ke mbon emi ẹdisetde ke n̄kpa “ididọhọ ndọ, owo idinyụn̄ idaha mmọ inọ ke ndọ.” (Luke 20:34-36) Ndi enye eketịn̄ aban̄a mbon emi ẹdisetde ididu uwem ke isọn̄?

N̄kpọ emi esifịna ediwak owo, akpan akpan mbon emi ebe m̀mê n̄wan mmọ akpade. Utọ mbon emi ẹsiyom ndika iso ke ndọ mmọ ke obufa ererimbot. Eyenete kiet emi n̄wan esie akakpade ọdọhọ ete: “Ami ye n̄wan mi ikebiereke ndidian̄ade n̄kpọn̄ kiet eken. Ikesikam ibọbọn̄ akam ite idiana kiet ituak ibuot inọ Abasi ke nsinsi. Se ikaduakde oro osụk ọdọdọn̄ mi.” Ndi enyene n̄kpọ ndomokiet emi anamde owo enịm ke mbon emi ẹnamde ẹset ẹyedọ ndọ? Ibọrọ edi ke idụhe eke ekemede nditịn̄.

Ke ediwak isua idahaemi, imewet n̄kpọ iban̄a ikọ Jesus ke Luke 20:34-36. Isidọhọ ke etie nte ikọ Jesus emi aban̄a mbon emi ẹdisetde ididu uwem mi ke isọn̄, inyụn̄ idọhọ ke mmọ ididọhọ ndọ. * (Matt. 22:29, 30; Mark 12:24, 25; Luke 20:34-36) Edi, okûdi ikọ Jesus oro akakam aban̄a mbon emi ẹdisetde ika heaven? Kpa ye emi nnyịn mîditịn̄ke n̄kpọ emi nte imenen̄ede idiọn̄ọ, ikere ke ọfọn ifiak idụn̄ọde ikọ Jesus oro.

Nso ikanam Jesus etịn̄ ikọ emi? (Kot Luke 20:27-33.) Mme Sadducee emi mîkenịmke ke mme owo ẹyeset ẹkebụp Jesus mbụme ẹban̄a ediset ke n̄kpa ye edidọ eyenete ebe man ẹda oro ẹmụm enye. * Jesus ama ọbọrọ mmọ ete: “Nditọ editịm n̄kpọ emi ẹdọ ndọ, ẹnyụn̄ ẹda mmọ ẹnọ ke ndọ, edi mmọ oro ẹbatde ẹte mmọ ẹdot ndinyene editịm n̄kpọ oro ẹnyụn̄ ẹdot ndiset ke n̄kpa ididọhọ ndọ, owo idinyụn̄ idaha mmọ inọ ke ndọ. Ke akpanikọ, mmọ ikemeke ndikpa aba, koro mmọ ẹtie nte mme angel, mmọ ẹnyụn̄ ẹdi nditọ Abasi sia mmọ ẹdide nditọ ediset ke n̄kpa.”—Luke 20:34-36.

Ntak emi ikọdọhọde ke ndusụk n̄wed nnyịn ke ekeme ndidi Jesus eketịn̄ aban̄a mbon emi ẹdisetde ididu uwem ke isọn̄? N̄kpọ iba akanam isidọhọ ntre. Akpa, ikesikere ke mme Sadducee ẹkebụp Jesus mbụme ẹban̄a mbon oro ẹdisetde ididu ke isọn̄, ke Jesus okonyụn̄ ọbọrọ mmọ aban̄a isọn̄. Udiana, akpatre n̄kpọ emi Jesus eketịn̄de ke ini ọbọrọde mbụme emi akaban̄a Abraham, Isaac, ye Jacob—mme anam-akpanikọ asan̄autom Abasi emi ẹdisetde ididu uwem mi ke isọn̄.—Luke 20:37, 38.

Edi etie nte Jesus eketịn̄ aban̄a mbon emi ẹdisetde ikodu uwem ke heaven. Nso inam idọhọ ntre? Yak idụn̄ọde ọkpọikọ iba ke ibọrọ Jesus oro.

“Mmọ oro ẹbatde ẹte mmọ ẹdot . . . ndiset ke n̄kpa.” Ẹbat mme Christian oro ẹyetde aran nte mbon oro ‘ẹdotde ndidụk obio ubọn̄ Abasi.’ (2 Thess. 1:5, 11) Ufak anam ẹda mmọ nte ndinen owo, ntem mmọ ikpaha nte mme anamidiọk emi ẹbiomde ikpe. (Rome 5:1, 18; 8:1) Bible ọdọhọ ke mmọ ‘ẹkop inemesịt, ẹnyụn̄ edi edisana,’ ẹnyụn̄ ẹdot ndiset n̄kodu uwem ke heaven. (Edi. 20:5, 6) Mmọ itiehe nte mbon emi ẹdisetde ididu ke isọn̄ koro ndusụk mbon emi ẹdisetde ididu ke isọn̄ ẹdi “mme anam  ukwan̄n̄kpọ.” (Utom 24:15) Ndi ẹkeme ndidọhọ ke mme anam ukwan̄n̄kpọ emi “ẹdot” ndiset ke n̄kpa?

“Mmọ ikemeke ndikpa aba.” Jesus ikọdọhọke ite: “Mmọ idikpaha aba,” edi ọkọdọhọ: “Mmọ ikemeke ndikpa aba.” Ke ini mme Christian emi ẹyetde aran ẹkpade, Abasi esinam mmọ ẹset ẹka heaven onyụn̄ anam mmọ ẹnyene uwem emi mîkemeke ndikpa. Oro ọwọrọ ke owo ikemeke ndiwot mmọ, ke mmọ ẹdinyụn̄ ẹdu uwem ke nsinsi. (1 Cor. 15:53, 54) Mbon emi ẹsetde ẹka heaven ikemeke-keme ndikpa. *

Nso ke ikeme ndibiere nto se inemede emi? Imekeme ndidọhọ ke etie nte Jesus eketịn̄ aban̄a mbon emi ẹdisetde ika heaven. Edieke edide ntre, ọwọrọ ikọ esie oro anam ifiọk ndusụk n̄kpọ iban̄a mbon emi ẹsetde ẹka heaven, utọ nte ke mmọ ididọhọ ndọ, ke mmọ ikemeke ndikpa, ke enyene ndusụk n̄kpọ emi mmọ ẹdade ẹbiet mme angel. Edi ndidọhọ ke Jesus eketịn̄ aban̄a mbon emi ẹsetde ẹka heaven anam ẹbụp mme mbụme.

Akpa, ntak emi Jesus eketịn̄de aban̄a mbon emi ẹsetde ẹka heaven ke ini edide etie nte mme Sadducee ẹkebụp enye n̄kpọ ẹban̄a mbon emi ẹdisetde ididu mi ke isọn̄? Jesus ikesiwakke ndibọrọ mme asua esie mbụme nte mmọ ẹyomde. Ke uwụtn̄kpọ, ke ini mme Jew ẹkedọhọde enye ọnọ mmimọ idiọn̄ọ, enye ama ọdọhọ mmọ ete: “Ẹwụri temple emi, ndien nyọbọp enye ke usen ita.” Jesus ama ọfiọk ke mmọ ẹdikere ke imọ itịn̄ iban̄a ata ata temple, ke ini edide “enye eketịn̄ aban̄a temple emi edide idem esie.” (John 2:18-21) Ntre, ekeme ndidi Jesus ekekere ke ufọn idụhe ndinọ mme Sadducee nnennen ibọrọ sia mmọ ikenịmke ke mme owo ẹyeset, ikonyụn̄ inịmke ke mme angel ẹdu. (N̄ke 23:9; Matt. 7:6; Utom 23:8) Akam etie nte Jesus eketịn̄ aban̄a mbon emi ẹdisetde ika heaven man mbet esie emi ẹdinamde ẹset ẹka heaven ẹfiọk nte n̄kpọ editiede do.

Ọyọhọ iba, ntak emi Jesus akasiakde Abraham, Isaac, ye Jacob emi ẹdisetde ididu uwem mi ke isọn̄? (Kot Matthew 22:31, 32.) Mbemiso Jesus asiakde Abraham, Isaac, ye Jacob, enye ekebem iso ọdọhọ ete, “Amaedi ediset mme akpan̄kpa.” Ikọ emi okowụt ke enye oyom nditịn̄ n̄kpọ efen. Enye eketịn̄ se Moses ekewetde, emi mme Sadducee ẹdọhọde ke imenịm. Enye akafiak etịn̄ se Jehovah eketịn̄de ye Moses ke ebiet oro ikan̄ akasakde ke eto man owụt mme Sadducee oro ke Abasi iditreke-tre ndinam mme owo ẹset ẹdidu uwem mi ke isọn̄.—Ex. 3:1-6.

Ọyọhọ ita, ekpedi ikọ Jesus akaban̄a mbon emi ẹdisetde ika heaven, ndi ọwọrọ ke mbon oro ẹdisetde ididu mi ke isọn̄ ẹyedọ ndọ? Owo itịn̄ke emi nnennen nnennen ke Bible. Edi ekpedi ikọ esie akaban̄a mbon emi ẹdisetde ika heaven, ọwọrọ enye inamke nnyịn idiọn̄ọ m̀mê mbon emi ẹdisetde ididu mi ke isọn̄ ẹyedọ ndọ.

Imọdiọn̄ọ ke Ikọ Abasi ọdọhọ ke n̄kpa esidian̄ade ndọ. Ntem, ikpanaha owo emi ebe m̀mê n̄wan esie akpade ekere ke imanam idiọkn̄kpọ edieke enye afiakde ọdọ ndọ. Enyene-idem edibiere m̀mê iyafiak idọ ndọ m̀mê ididọhọ. Ikpanaha owo ndomokiet ayat esịt m̀mê etịn̄ ikọ ye owo emi ebierede ndifiak ndọ ndọ.—Rome 7:2, 3; 1 Cor. 7:39.

Imọfiọk ke enyene mme n̄kpọ emi osụk afịnade mme owo aban̄a nte uwem editiede ke obufa ererimbot. Ọyọfọn inyene ime ibet utu ke nditịn̄ se mîsịneke ke Bible. Se idiọn̄ọde edi ke mbon emi ẹkopde item Jehovah ẹyekop inemesịt koro Jehovah ọyọnọ mmọ se ededi emi mmọ ẹyomde, emi enye onyụn̄ okụtde ke ọfọn ye mmọ.—Ps. 145:16.

^ ikp. eki. 4 Se Enyọn̄-Ukpeme eke June 1, 1987, page 30-31.

^ ikp. eki. 5 Ke eyo Bible, edieke owo akpade ke ini mînyeneke eyen, eyeneka esie eyemen n̄wan esie emi enye akpade ọkpọn̄ ọdọ, obon eyen ọnọ enye mbak enyịn̄ esie idisop. Emi ke ẹkekot ndọ eyenete ebe.—Gen. 38:8; Deut. 25:5, 6.

^ ikp. eki. 9 Mbon emi ẹdisetde ididu uwem mi ke isọn̄ ẹdidu uwem ke nsinsi, edi Abasi inọhọ mmọ uwem emi mîkemeke ndikpa. Edieke oyomde ndifiọk nte nsinsi uwem okpụhọrede ye uwem emi owo mîkemeke ndikpa, se Enyọn̄-Ukpeme April 1, 1984, page 31.