Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  July 2014

“Mbufo Ẹyetie Ntiense Ẹban̄a Mi”

“Mbufo Ẹyetie Ntiense Ẹban̄a Mi”

“[Jesus] ọdọhọ mmọ ete: ‘. . . Mbufo ẹyetie ntiense ẹban̄a mi . . . tutu esịm ata utịt ikpehe isọn̄.’”—UTOM 1:7, 8.

1, 2. (a) Anie edi “anam-akpanikọ ye ntiense akpanikọ”? (b) Nso ke enyịn̄ oro Jesus ọwọrọ, didie ke Jesus okowụt ke enyịn̄ emi odot imọ?

KE INI ẹkekpede ikpe Jesus ke iso Pontius Pilate emi akakarade Judea, enye ama ada ke iso Pilate etịn̄ uko uko ete: “N̄kamana kaban̄a emi, n̄konyụn̄ ndi ke ererimbot kaban̄a emi, man ntie ntiense nnọ akpanikọ.” (Kot John 18:33-37.) Ke ediwak isua ama ekebe, apostle Paul ama ọdọhọ ke Jesus ama ‘ọnọ eti ikọ ntiense ke iso Pontius Pilate.’ (1 Tim. 6:13) Satan akara ererimbot emi, usua onyụn̄ okpon etieti. Man ikeme ndika iso nnọ ikọ ntiense, ana inen̄ede inyene uko nte Jesus emi ekedide “anam-akpanikọ ye ntiense akpanikọ.”—Edi. 3:14.

2 Sia Jesus ekedide eyen Jew, enye ekedi ntiense Jehovah tọn̄ọ ke emana. (Isa. 43:10) Jesus ekedi akakan ke otu kpukpru mbon emi Abasi ọdọn̄de ẹtie ntiense ẹban̄a enyịn̄ imọ. Jesus ikadaha enyịn̄ emi Abasi ọkọnọde enye ntre ntre. Angel ama ọdọhọ Joseph emi ekemende Jesus akama ete ke edisana spirit ayanam Mary an̄wan esie oyomo. Angel oro ama adian do ete: “Enye ayaman eyeneren, ndien afo oyosio enye enyịn̄ Jesus, koro enye edinyan̄ade ikọt esie osio ke mme idiọkn̄kpọ mmọ.” (Matt. 1:20, 21) Ke usem  Hebrew, enyịn̄ oro Jesus ọwọrọ “Jehovah Edi Andinyan̄a.” Jehovah okoyom ndida Jesus nnyan̄a mme owo nsio ke idiọkn̄kpọ ye n̄kpa. Jesus ama ọdọhọ mme Jew ke ana mmọ ẹkabade esịt, ẹkpọn̄ idiọkn̄kpọ man Jehovah anyan̄a mmọ. (Matt. 10:6; 15:24; Luke 19:10) Jesus ama esịn idem ọkwọrọ ikọ man an̄wam mme owo ẹkabade esịt. Mark emi eketienede ewet Gospel ọdọhọ ete: “Jesus odụk Galilee ọkọkwọrọ eti mbụk Abasi onyụn̄ ọdọhọ ete: ‘Edimek ini emekem, obio ubọn̄ Abasi onyụn̄ asan̄a ekpere. Mbufo ẹkabade esịt ẹnyụn̄ ẹbuọt idem ke eti mbụk.’” (Mark 1:14, 15) Jesus ama asua ọnọ mme adaiso ido ukpono mme Jew; ifeheke owo mmọ ndomokiet. Kiet ke otu ntak emi akanamde mmọ ẹwot enye edi emi.—Mark 11:17, 18; 15:1-15.

“IKPỌ UTOM ABASI”

3. Nso iketịbe ke usen ita ẹbede ke ẹma ẹkewot Jesus?

3 Ke ẹma ẹkewot Jesus, Jehovah ama anam utịben̄kpọ ke usen ita ama ekebe. Enye ama anam Jesus eset nte spirit, idịghe nte owo. (1 Pet. 3:18) Jesus ama owụt mbet esie idem man mmọ ẹfiọk ke imọ imeset. Enye ama owụt nsio nsio mbet idem ke nsụhọde n̄kaha utịm ikotion ke usen emi enye ekesetde.—Matt. 28:8-10; Luke 24:13-16, 30-36; John 20:11-18.

4. Nso ke Jesus akanam mbet esie ẹfiọk ke ini okowụtde mmọ idem, ndien nso ke enye ọkọdọhọ mmọ ẹnam?

4 Ke ini Jesus owụtde mme owo idem ọyọhọ utịm ikotion, enye akanam emi ke itie oro mme apostle esie ye mbon en̄wen ẹkesopde idem. Enye ama an̄wam mmọ ẹfiọk ke N̄wed Abasi ama etetịn̄ ke ẹyewot imọ ye nte ke ẹyenam imọ iset. Ke utịt mboho oro, Jesus ama etịn̄ se anade mbet esie ẹnam. Enye ọkọdọhọ ke mmọ “ẹnyene ndikwọrọ edikabade esịt ye edifen mme idiọkn̄kpọ ke enyịn̄ [imọ] ke kpukpru mme idụt—ọtọn̄ọde ke Jerusalem.” Ekem enye ọdọhọ mmọ ete: “Mbufo ẹnyene ndidi mme ntiense n̄kpọ emi.”Luke 24:44-48.

5, 6. (a) Ntak emi Jesus ọkọdọhọde ete: “Mbufo ẹyetie ntiense ẹban̄a mi”? (b) Nso obufa n̄kpọ ke akana mbet Jesus ẹnam mme owo ẹdiọn̄ọ?

5 Se Jesus eketịn̄de ke usen 40 ẹbede, ke akpatre ini emi enye owụtde mbet esie idem, ikedịghe obufa ke utọn̄ mmọ. Enye ọkọdọhọ mmọ ẹte: “Mbufo ẹyetie ntiense ẹban̄a mi ke Jerusalem ye ke ofụri Judea ye Samaria tutu esịm ata utịt ikpehe isọn̄.” (Utom 1:8) Ntak emi Jesus ọkọdọhọde mmọ: “Mbufo ẹyetie ntiense ẹban̄a mi,” utu ke ndidọhọ: “Mbufo ẹyetie ntiense ẹban̄a Jehovah”? Ufọn ikpodụhe ndidọhọ mmọ ẹtie ntiense ẹban̄a Jehovah sia mme Jew ẹma ẹdedi ntiense Jehovah.

Nnyịn iman̄wam mme owo ẹfiọk se Jehovah oyomde ndinam ke ini iso kpa nte mbet Jesus ẹkenamde (Se ikpehe ekikere 5, 6)

6 Idahaemi, ana mbet Jesus ẹnam mme owo ẹdiọn̄ọ obufa n̄kpọ emi Jehovah anamde—emi okponde akan se enye akanamde ke ini okosiode nditọ Israel ke ufụn Egypt, ye ke ini enye akanamde mme asua ẹsana mmọ ẹyak ke Babylon. N̄kpa Jesus ye enye ndiset ke n̄kpa anam mme owo ẹwọrọ ke ufụn emi akam ọdiọkde akan eke nditọ Israel, oro edi, ufụn idiọkn̄kpọ ye n̄kpa. Ke Pentecost eke isua 33, mme mbet Jesus emi ẹkedade edisana spirit ẹyet aran usen oro ẹma ẹnam mme owo ẹfiọk “ikpọ utom Abasi,” ndien ediwak tọsịn owo emi ẹkekopde se mmọ ẹketịn̄de ẹma ẹkabade esịt ẹnyụn̄ ẹbuọt idem ke uwa Jesus. Jesus ama etie ke ubọk nnasia Jehovah ke heaven okụt nte Jehovah  adade enye anyan̄a mme owo ke isọn̄.—Utom 2:5, 11, 37-41.

“UFAK KE IBUOT EDIWAK OWO”

7. Se iketịbede ke usen Pentecost eke isua 33 okowụt nso?

7 Se iketịbede ke usen Pentecost eke isua 33 okowụt ke Jehovah ama enyịme ndida uwa Jesus mfen idiọkn̄kpọ mme owo. (Heb. 9:11, 12, 24) Jesus ọkọdọhọ ke imọ ‘ikedịghe man ẹnam n̄kpọ ẹnọ imọ, edi man imọ inam n̄kpọ inọ owo inyụn̄ inọ ukpọn̄ imọ nte ufak ke ibuot ediwak owo.’ (Matt. 20:28) Idịghe mme Jew emi ẹkabarede esịt kpọt ẹdi “ediwak owo” emi Jesus ọkọdọhọde ke ẹyebọ ufọn ẹto ufak imọ. Utu ke oro, uduak Abasi edi yak “kpukpru orụk owo ẹnyene edinyan̄a” sia ufak Jesus ‘emen idiọkn̄kpọ ererimbot efep!’—1 Tim. 2:4-6; John 1:29.

8. Nso ikan̄wam mme mbet Jesus ẹka iso ẹtie ntiense ẹban̄a enye, ndien mmọ ẹkenam utom emi adan̄a didie?

8 Ndi mme mbet Jesus ini oro ẹma ẹnyene uko ẹka iso ẹtie ntiense ẹban̄a enye? Ih, ẹma ẹnyene, edi mmọ ikanamke emi ke odudu idemmọ. Edisana spirit Jehovah ọkọnọ mmọ odudu ẹka iso ẹkwọrọ ikọ. (Kot Utom 5:30-32.) Ke n̄kpọ nte isua 27 ama ekebe tọn̄ọ ke Pentecost eke isua 33, mbet Jesus ẹma ẹkwọrọ “eti mbụk” ẹnọ kpukpru mme Jew ye mme Gentile “ke idak ikpaenyọn̄.”—Col. 1:5, 23.

9. Nso iketịbe inọ esop ata mme Christian nte ẹma ẹketetịn̄?

9 Edi nte ini akakade, mme owo ẹma ẹtọn̄ọ ndikpep nsunsu ukpepn̄kpọ ke esop ata mme Christian. (Utom 20:29, 30; 2 Pet. 2:2, 3; Jude 3, 4) Nsunsu mme andikpep emi ẹma ẹdibiat esop ofụri ofụri. Jesus ama ọdọdọhọ ke mfiakedem emi “andidiọk” edidade itọ ubahade do idiyakke ẹdiọn̄ọ ata mme Christian tutu ke “akpatre ini editịm n̄kpọ emi.” (Matt. 13:37-43) Ini oro ke Jehovah edidori Jesus ke ebekpo man akara mme owo. Emi ama etịbe ke October 1914, kpa ini emi “mme akpatre usen” ererimbot Satan emi ọkọtọn̄ọde.—2 Tim. 3:1.

10. (a) Ewe isua ke mme Christian emi ẹyetde aran ẹkekwọrọ ẹban̄a? (b) Nso iketịbe ke October 1914, ndien isan̄a didie ifiọk emi?

10 Ke n̄kpọ nte isua 30 mbemiso  October 1914, mme Christian emi ẹyetde aran ẹma ẹtọn̄ọ ndikwọrọ nte ke ukara Obio Ubọn̄ Abasi ọmọn̄ ọtọn̄ọ ke 1914. Mmọ ẹketịn̄ emi ke ntak se Daniel eketịn̄de aban̄a akamba eto emi ẹkesịbede, edi emi edifiakde ikpon ke “ini itiaba” ẹbede. (Dan. 4:16) Jesus ama etịn̄ mme n̄kpọ emi mbet esie ẹdidade ẹdiọn̄ọ ke imọ imọtọn̄ọ ndikara ye nte ke utịt ini ọtọn̄ọ. Mme n̄kpọ emi ẹtịbede ke ererimbot ọtọn̄ọde ke 1914 ẹwụt ke Jesus ọtọn̄ọ ndikara. (Matt. 24:3, 7, 14; Luke 21:24) Mfịn, kiet ke otu “ikpọ utom Abasi” oro nnyịn ikwọrọde edi nte ke Jehovah ama emek Jesus Edidem ke 1914.

11, 12. (a) Nso ke obufa Edidem ọkọtọn̄ọ ndinam ke akpa ekọn̄ ererimbot ama okokụre? (b) Nso ke ẹkekụt tọn̄ọ ke 1935? (Se akpa ndise ibuotikọ emi.)

11 Ke ndondo oro ẹmekde Jesus Christ edidem, enye ama ada odudu esie osion̄o mbet esie emi ẹyetde aran ke ufụn “Akwa Babylon.” (Edi. 18:2, 4) Ke akpa ekọn̄ ererimbot ama okokụre, mme Christian emi ẹyetde aran ẹma ẹkeme ndikwọrọ ikọ ke ofụri ererimbot. Mmọ ẹma ẹnam mme owo ẹfiọk ke Abasi ada ufak Jesus anyan̄a mme owo ẹnyụn̄ ẹdọhọ ke Obio Ubọn̄ Abasi ọtọn̄ọ ndikara. Ediwak tọsịn owo ẹma ẹkpep akpanikọ ẹnyụn̄ ẹtiene ẹsịne ke otu mbon emi ẹmekde ndika n̄kakara ye Christ ke heaven.

12 Tọn̄ọ ke 1935, ikọt Abasi ẹma ẹdikụt ke Christ ọtọn̄ọ ndinyene “mme erọn̄ en̄wen.” Mfịn, ediwak miliọn owo emi ẹdide mme erọn̄ en̄wen ẹto nsio nsio itie ke ererimbot. Mmọ ye mbon emi ẹyetde aran ẹkpebe Christ, ẹnyụn̄ ẹkwọrọ ikọ uko uko. Edieke mmọ ẹkade iso ẹkwọrọ ikọ ẹnyụn̄ ẹbuọtde idem ke ufak Christ, mmọ ẹyebọhọ “akwa ukụt” ẹnyụn̄ ẹdu uwem ke obufa ererimbot Abasi.—John 10:16; Edi. 7:9, 10, 14.

‘ẸDA UKO ẸTAN̄A ETI MBỤK’

13. Nso ke ana nnyịn emi idide Mme Ntiense Jehovah inam, ndien nso idin̄wam nnyịn inam emi?

13 Ẹyak ida ifet emi inyenede nditie ntiense mban̄a “ikpọ utom” emi Jehovah Abasi anamde ye se enye ọn̄wọn̄ọde ndinam ke ini iso ke ata akpan n̄kpọ. Imọdiọn̄ọ ke imemke utom ndinam emi. Ediwak nditọete nnyịn ẹkwọrọ ikọ ke ebiet emi ẹkọbọde ẹnyụn̄ ẹsakde mmọ; ndusụk imaha-ma ndikop se mmọ ẹtịn̄de. Imekeme ndikpebe apostle Paul ye mbon eken emi ẹkesan̄ade ye enye ẹkwọrọ ikọ. Paul ọkọdọhọ ete: “[Ikada] uko ke Abasi nnyịn itan̄a eti mbụk Abasi inọ mbufo ye ọkpọsọn̄ en̄wan.” (1 Thess. 2:2) Inaha iyak idem emem nnyịn. Utu ke oro, ana ika iso inam se ikọn̄wọn̄ọde inọ  Abasi ke usen emi ikayakde idem inọ enye. Ana inam ntre tutu ẹsobo ererimbot Satan emi. (Isa. 6:11) Nnyịn idikemeke ndida odudu idem nnyịn nnam kpukpru emi. Ana itiene uwụtn̄kpọ mme Christian eyo mme apostle, iben̄e Jehovah ite ọnọ nnyịn edisana spirit esie man inyene “odudu eke ebede ukeme owo.”—Kot 2 Corinth 4:1, 7; Luke 11:13.

14, 15. (a) Ẹkenam n̄kpọ didie ye mme Christian ke eyo mme apostle, ndien nso ke apostle Peter eketịn̄ ye mmọ? (b) Ikpanam n̄kpọ didie edieke ẹsuade nnyịn ke ntak emi idide Mme Ntiense Jehovah?

14 Ediwak owo mfịn ẹdọhọ ke mmimọ idi mme Christian, “edi mmọ ẹkan̄ [Abasi] ke mme utom mmọ, koro mmọ ẹdi n̄kpọ itekesịt ye mbon ntụtutọn̄ inyụn̄ idotke ndinam eti utom ekededi.” (Titus 1:16) Ọfọn iti ke ediwak owo ẹma ẹsua ata mme Christian ke eyo mme apostle. Oro akanam apostle Peter ewet ntem ete: “Edieke ẹsuenede mbufo ke ntak enyịn̄ Christ, mbufo ẹkop inemesịt, koro . . . spirit Abasi . . . omodoro mbufo ke idem.”—1 Pet. 4:14.

15 Ndi se itie N̄wed Abasi oro etịn̄de ebehe Mme Ntiense Jehovah mfịn? Ebehe, sia nnyịn itie ntiense iban̄a ukara Jesus. Ntem, owo ndisua nnyịn ke ntak emi ikerede enyịn̄ idian Jehovah edi ukem n̄kpọ nte ‘ndisuene nnyịn ke ntak enyịn̄ Jesus Christ.’ Jesus ọkọdọhọ mme asua esie ete: “Ami ndi ke enyịn̄ Ete mi, edi mbufo idarake mi.” (John 5:43) Edieke ẹkọbọde fi ke ntak emi ọkwọrọde ikọ, kûyak idem emem fi. Se mme owo ẹnamde emi owụt ke Abasi ama se anamde, ye nte ke spirit esie ‘odoro fi ke idem.’

16, 17. (a) Didie ke ikọt Abasi ke ofụri ererimbot ẹda utom ukwọrọikọ? (b) Nso ke afo ebiere ndinam?

16 Ti n̄ko ke mme owo ke nsio nsio itie ke ererimbot ke ẹdụk esop Abasi. Idem ke ebiet emi ẹsikwọrọde ikọ etieti, imesisụk ikụt mme owo emi ẹkpan̄de utọn̄ ẹnọ etop edinyan̄a. Ẹyak isifiak ika ibịne mmọ inyụn̄ ikpep mmọ Bible, in̄wam mmọ ẹyak idem ẹnọ Abasi ẹnyụn̄ ẹna baptism. Sarie emi odude ke South Africa ọkwọrọ ikọ ke se ibede isua 60 idahaemi. Enye ọdọhọ ete: “Mmenen̄ede n̄kọm Abasi nte ufak Jesus anamde ndi ufan Jehovah emi edide Andikara enyọn̄ ye isọn̄, onyụn̄ enem mi nte nnamde mbon en̄wen ẹdiọn̄ọ enyịn̄ esie.” Enye ye Martinus ebe esie ẹn̄wam nditọ mmọ ita ye ediwak mbon en̄wen ẹtuak ibuot ẹnọ Jehovah. Sarie ọdọhọ ete: “Idụhe utom en̄wen emi enemde mi ntem. Jehovah ọnọ nnyịn edisana spirit esie man inyene odudu ika iso inam utom emi ẹdidade ẹnyan̄a mme owo.” Ekeme ndidi etie fi ke idem ntem n̄ko.

17 Edide imana baptism m̀mê inaha kan̄a, akpana kpukpru nnyịn ikọm Abasi nte itienede idi Mme Ntiense Jehovah. Ẹyak ika iso isịn idem itiene ikọt Abasi ke ofụri ererimbot itie ntiense inọ enye ikûnyụn̄ uyak se ẹnamde ke ererimbot Satan emi abiat nnyịn. Edieke inamde ntre, iyanam mme owo ẹkpono edima ete nnyịn eke Heaven, emi ikerede enyịn̄ idian.