Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  July 2014

“Jehovah Ọmọfiọk Mmọ Eke Ẹnyenede Enye”

“Jehovah Ọmọfiọk Mmọ Eke Ẹnyenede Enye”

“Edieke owo ekededi amade Abasi, Abasi ọfiọk owo emi.” —1 COR. 8:3.

1. Nọ mbụk Bible oro owụtde nte ndusụk mme asan̄autom Abasi ẹkebian̄ade idem? (Se akpa ndise ibuotikọ emi.)

USENUBỌK usen kiet, Aaron emi ekedide akwa oku ama akama n̄kpọ ufọp incense ada ke enyịnusụn̄ tent utuakibuot Jehovah. Korah ye owo 250 ẹma ẹkama eke mmọ ẹda ẹkpere do n̄ko. (Num. 16:16-18) Owo emi adade okụt mmọ ekeme ndikere ke kpukpru mmọ ẹdi ata mme asan̄autom Jehovah. Edi Aaron kpọt ekedi. Korah ye mbon eken ẹkedi mbon ntan̄idem emi ẹkeyomde ndibọ Aaron itie oku. (Num. 16:1-11) Mmọ ẹkekere ke Abasi ayama incense emi mmimọ ifọpde inọ enye. Edi Jehovah akada se mmọ ẹkenamde oro nte ata usọn̄enyịn, koro enye ama okụt esịt mmọ onyụn̄ ọfiọk ke mmọ ẹdi mbubịk.—Jer. 17:10.

2. Moses ọkọdọhọ ke nso iditịbe, ndien didie ke ikọ esie okosu?

2 Moses ama ọdọdọhọ mmọ ete: “Eyo ama esiere Jehovah ayanam ẹfiọk m̀mê anie edi owo esie.” (Num. 16:5) Jehovah ama anam ẹdiọn̄ọ mbon emi ẹdide ata ikọt esie ye mbon emi mîdịghe kpa nte Moses eketịn̄de. Enye ama ọdọn̄ ikan̄ oto heaven edita Korah ye owo 250 oro ẹkedade ye enye. (Num. 16:35; 26:10) Edi enye ikanamke Aaron n̄kpọ, ndien  ẹma ẹda emi ẹfiọk owo emi enye oyomde edi oku ye owo emi anamde n̄kpọ esie ke ofụri esịt.—Kot 1 Corinth 8:3.

3. (a) Nso iketịbe ke eyo apostle Paul? (b) Nso ke ikeme ndikpep nto se Jehovah akanamde ye mbon nsọn̄ibuot ke eyo Moses?

3 Ke n̄kpọ nte isua 1,500 ẹma ẹkebe, ukem n̄kpọ emi ama afiak etịbe. Ndusụk mbon oro ẹkedọhọde ke idi mme Christian ke eyo Paul ẹma ẹtọn̄ọ ndikpep se mîdịghe akpanikọ, edi ẹsụk ẹka iso ẹdu ke esop. Mbon oro mîdiọn̄ọke ẹkeme ndikere ke mmọ ẹdi ata mme asan̄autom Abasi nte nditọete eken ke esop. Edi mmọ ẹma ẹsịn mfịna ke esop. Mme wolf emi ẹkeyarade ikpa erọn̄ mi ẹma ẹtọn̄ọ “[ndibiat] mbuọtidem ndusụk owo.” (2 Tim. 2:16-18) Ndi Jehovah ama okụt ofụri se iketịbede emi? Ih, ama okụt. Paul ama ọfiọk se Abasi akanamde Korah ye mbon nsọn̄ibuot oro ẹkedade ye enye, ntre enye ama ọfiọk ke Jehovah ke okụt se ikade iso ke esop. Yak ineme se Paul ekewetde ọnọ Timothy, inyụn̄ ise nte emi ekemede ndin̄wam nnyịn inịm ke Jehovah okụt ofụri se ikade iso ke esop idahaemi.

“AMI NDI JEHOVAH; AMI N̄KPỤHỌKEDE”

4. Nso ke Paul ọkọfiọk, ndien nso ke enye eketịn̄ ọnọ Timothy emi owụtde ke enye ama ọfiọk emi?

4 Paul ama enen̄ede ọfiọk ke Jehovah ọdiọn̄ọ mbon mbubịk emi ẹnamde nte ikpono imọ, onyụn̄ ọdiọn̄ọ mbon emi ẹkopde uyo imọ. Se enye ekewetde ọnọ Timothy owụt emi. Ke Paul ama eketịn̄ ke mmọ ẹbiat mbuọtidem ndusụk nditọete ke esop, enye ama ewet ete: “Kpa ye kpukpru emi, ọkpọsọn̄ itiat idakisọn̄ Abasi ke ọsọn̄ọ ada, onyụn̄ enyene ufịkn̄kpọ emi: ‘Jehovah ọmọfiọk mmọ eke ẹnyenede enye,’ ye: ‘Yak owo ekededi emi okotde enyịn̄ Jehovah ọwọn̄ọde ọkpọn̄ ukwan̄ido.’”—2 Tim. 2:18, 19.

5, 6. Didie ke itiat idakisọn̄ emi Paul eketịn̄de aban̄a okpụhọde ye itiat idakisọn̄ eken ke Bible? Nso ufọn ke se enye eketịn̄de akanam ọnọ Timothy?

5 Bible etịn̄ aban̄a “itiat idakisọn̄” ke nsio nsio usụn̄. Ada enye etịn̄ aban̄a Jerusalem emi ekedide ibuot obio Israel, ye nte Jesus anamde uduak Abasi osu. (Ps. 87:1, 2; 1 Cor. 3:11; 1 Pet. 2:6) Edi ini kiet kpọt ke Bible etịn̄ aban̄a “ọkpọsọn̄ itiat idakisọn̄ Abasi.” Nso ke Paul ekenyene ke ekikere ke ini enye eketịn̄de ikọ emi?

6 Mbemiso Paul etịn̄de aban̄a “ọkpọsọn̄ itiat idakisọn̄ Abasi,” enye ama afiak etịn̄ se Moses eketịn̄de ye Korah ye mbon oro ẹkedade ye enye. (Se Numbers 16:5.) Se Paul ekewetde emi ama eti Timothy ke Jehovah okụt ofụri se ikade iso ke esop, ke Enye idiyakke mbon mfiakedem ẹbiat mbon eken ke esop. Korah ikekemeke ndikpan mme owo ndinam uduak Jehovah, mbon mfiakedem oro idinyụn̄ ikemeke n̄ko. Paul ikenen̄ekede itịn̄ se “ọkpọsọn̄ itiat idakisọn̄ Abasi” edide, edi se enye eketịn̄de ọnọ Timothy ama anam Timothy ọbuọt idem ye Jehovah.

7. Inam didie ifiọk ke Jehovah iditreke ndinam se inende idinyụn̄ itreke ndinam akpanikọ?

7 Mme edumbet Jehovah isikpụhọkede. Psalm 33:11 ọdọhọ ete: “Uduak Jehovah ayada ke nsinsi; ekikere esịt esie ododu ọtọn̄ọde ke emana kiet tutu esịm emana efen.” Mme itie N̄wed Abasi en̄wen ẹtịn̄ ke ukara Jehovah, ima mfọnido, edinen ido, ye edinam akpanikọ esie ẹdidu ke nsinsi. (Ex. 15:18; Ps. 106:1; 112:9; 117:2) Malachi 3:6 ọdọhọ ete: “Ami ndi Jehovah; ami n̄kpụhọkede.” James 1:17 ọdọhọ n̄ko ke  Jehovah “ikemeke ndikpụhọde nte emi mbukpọn̄ okpụhọrede.”

SE PAUL EKEWETDE ANAM OWO ỌBUỌT IDEM YE JEHOVAH

8, 9. Nso ke ikeme ndikpep nto se ẹwetde ke “ọkpọsọn̄ itiat idakisọn̄ Abasi”?

8 Se Paul etịn̄de ke 2 Timothy 2:19 anam owo eti itiat idakisọn̄ emi ẹwetde n̄kpọ. Ke eset, ẹma ẹsiwak ndiwet n̄kpọ ke itiat idakisọn̄ ufọk ye ke mme n̄kpọ en̄wen oro ẹbọpde man ẹdiọn̄ọ andibọp m̀mê andinyene. Ke otu mbon emi ẹkewetde Bible, Paul edi akpa owo emi ọnọde utọ uwụtn̄kpọ emi. * N̄kpọ iba ke ẹwet ke “ọkpọsọn̄ itiat idakisọn̄ Abasi.” Akpa, “Jehovah ọmọfiọk mmọ eke ẹnyenede enye.” Udiana, “Yak owo ekededi emi okotde enyịn̄ Jehovah ọwọn̄ọde ọkpọn̄ ukwan̄ido.” Emi anam iti se idude ke Numbers 16:5.—Kot.

9 Nso ke ikọt Abasi ẹkeme ndikpep nto se ẹwetde ke “ọkpọsọn̄ itiat idakisọn̄ Abasi”? Mmọ ẹkeme ndikpep ke (1) Jehovah ama mbon emi ẹnamde akpanikọ ẹnọ enye, ye nte ke (2) Jehovah asasua idiọkido, ndien ke ofụri ibet ye edumbet esie owụt n̄kpọ iba emi. Edi se ẹtịn̄de emi asan̄a nso ye se mbon mfiakedem ẹkenamde ke esop?

10. Didie ke se mbon mfiakedem ẹkenamde ke eyo Paul akafịna nditọete eken ke esop?

10 Se mbon mfiakedem ẹkenamde ama afịna Timothy ye nti ikọt Abasi eken. Etie nte ndusụk nditọete ẹma ẹkere m̀mê nso ikpanam ẹyak mmọ ẹka iso ẹdu ke esop. Anaedi mmọ ẹma ẹkere n̄ko m̀mê Jehovah okụt ke mmimọ itiehe nte mbon mfiakedem emi ẹnamde nte ikpono enye.—Utom 20:29, 30.

Timothy ikayakke se mbon mfiakedem ẹkenamde anam enye etre ndibuọt idem ye Abasi (Se ikpehe ekikere 10-12)

11, 12. Didie ke se Paul ekewetde ọnọ Timothy akanam Timothy enen̄ede ọbuọt idem ye Abasi?

11 Se Paul ekewetde ọnọ Timothy ama anam Timothy enen̄ede ọbuọt idem ye Abasi. Paul ama eti enye ke Jehovah ama anam ẹdiọn̄ọ ke Korah ye mbon emi ẹkedade ye enye ẹkedi mbubịk. Jehovah ikoyomke utọ mbon oro, ntre enye ama osobo mmọ onyụn̄ owụt ke Aaron edi owo imọ. Kpa ntre n̄ko, okposụkedi emi ndusụk owo ke eyo Paul ẹkenamde nte idi ata mme Christian, Jehovah ayanam mme owo ẹdiọn̄ọ mbon emi ẹdide ata ikọt esie ke nnennen ini.

 12 Sia Jehovah mîkpụhọkede, imekeme ndibuọt idem ye enye. Enye asasua idiọkido, ndien ayamia ndiọi owo emi mîmaha ndikabade esịt ufen. Ikọ Paul ama anam Timothy eti ke inaha enye ayak mbon mbubịk emi ẹkenamde nte idi ata mme Christian ẹbiat enye, koro “owo ekededi emi okotde enyịn̄ Jehovah” ana asua idiọkido. *

SE INAMDE INỌ ABASI KE OFỤRI ESỊT IDITAKKE

13. Nso ke nnyịn inịm emi edide akpanikọ?

13 Se Paul eketịn̄de ye Timothy ekeme ndin̄wam nnyịn n̄ko. Edi didie? Jehovah ọdiọn̄ọ ata ikọt esie. Idiọn̄ọke-diọn̄ọ kpọt-o, enye enen̄ede ama mmọ n̄ko. Bible ọdọhọ ete: “Enyịn Jehovah [asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.” (2 Chron. 16:9) Imenịm ke Jehovah idifreke ofụri ukeme emi isịnde inam n̄kpọ inọ enye ke ofụri esịt.—1 Cor. 15:58; 1 Tim. 1:5.

14. Nso utọ utuakibuot ke Abasi asua?

14 Jehovah asasua mbubịk inyụn̄ imaha owo emi anamde n̄kpọ esie mbubịk mbubịk. Enye ọdiọn̄ọ esịt kpukpru owo onyụn̄ okụt esịt “mbon oro ẹnamde n̄kpọ ẹnọ enye ke ofụri esịt.” Edieke owo anamde n̄kari nte ke inam n̄kpọ Abasi edi ke edịbe anam idiọkn̄kpọ, utọ owo emi ededehe Jehovah ke enyịn. (N̄ke 3:32) Owo ikpọn̄ ke ẹkeme ndibian̄a, owo ikemeke ndibian̄a Jehovah. Bible ọdọhọ ete: “Owo eke edịpde idiọkn̄kpọ esie idikwe unen.” Jehovah enyene odudu onyụn̄ ama edinen ido, oro esịn owo mîkemeke ndidịp enye idiọkn̄kpọ.—N̄ke 28:13; kot 1 Timothy 5:24; Mme Hebrew 4:13.

15. Nso ke nnyịn mîkpanamke, ndien ntak-a?

15 Ata ediwak ikọt Jehovah ẹtuak ibuot ẹnọ enye ke ofụri esịt. Udusọpke ukụt mbon emi ẹsịnede ke esop Abasi ẹnam n̄kari nte ikpono Abasi. Edi utọ mbon emi ẹkeme ndidu ke esop mfịn sia ẹma ẹdu ke eyo Moses ye ke eyo mme apostle. (2 Tim. 3:1, 5) Ndi akpana itọn̄ọ ndikere ke anaedi ndusụk nditọete nnyịn inamke n̄kpọ Jehovah ke ofụri esịt? Ihih! Ikpọfọnke inyene utọ ekikere emi ke ini mmọ mînamke n̄kpọ ndomokiet emi owụtde ke mmọ ẹdi mbubịk. (Kot Rome 14:10-12; 1 Corinth 13:7.) Emi ekeme ndinam Jehovah ayat esịt ye nnyịn.

16. (a) Nso ke ikpanam mbak nnyịn ididi mbubịk? (b) Nso ke ikeme ndikpep nto se idude ke ekebe oro, “ Ẹka Iso Ẹdomo Ẹse . . . Ẹka Iso Ẹwụt . . . ”?

16 Ana Christian kiet kiet “owụt se utom esie edide.” (Gal. 6:4) Sia idide mme anana-mfọnmma, imekeme nditọn̄ọ ndinam n̄kpọ Jehovah ke ntak ufọn emi ididiade kpọt, edi nnyịn idiọn̄ọke. (Heb. 3:12, 13) Ntem, ọkpọfọn isidụn̄ọde idem nnyịn ke ini ke ini man ise m̀mê nso inam nnyịn inam n̄kpọ Jehovah. Imekeme ndibụp idem nnyịn ite: ‘Ndi nnam n̄kpọ Jehovah ke ntak emi mmade enye, nnyụn̄ mfiọkde ke enye odot ndikara mme owo? Mîdịghe, ndi nnam n̄kpọ esie ke ntak mme n̄kpọ oro enye ọn̄wọn̄ọde ndinam ke Paradise?’ (Edi. 4:11) Nnyịn iditreke-tre ndibọ ufọn edieke idụn̄ọrede idem nnyịn inyụn̄ itre mbubịk ekededi emi ikụtde ke idem nnyịn.

IYOKOP INEMESỊT EDIEKE INAMDE AKPANIKỌ

17, 18. Ntak emi ikpanamde n̄kpọ Jehovah ke ofụri esịt?

17 Abasi eyenen̄ede ọdiọn̄ nnyịn edieke idomode ndinam n̄kpọ esie ke ofụri  esịt. Andiwet Psalm ọkọdọhọ ete: “Owo emi Jehovah mîbatke ndudue esie inọ enye, emi mînyụn̄ inyeneke edu abian̄a, okop inemesịt.” (Ps. 32:2) Mbon emi mîdịghe mbubịk, emi ẹnamde n̄kpọ Abasi ke ofụri esịt, ẹkop inemesịt idahaemi, ẹyenyụn̄ ẹkop ata inemesịt ke ini iso.

18 Ini ama ekem, Jehovah ayayarade kpukpru mbon oro ẹnamde se idiọkde, m̀mê mbon oro ẹdude uwem esịt iba. Enye ayanam “ẹkụt ukpụhọde ke ufọt edinen owo ye idiọkowo, ye ke ufọt owo emi anamde n̄kpọ Abasi ye owo emi mînamke n̄kpọ esie.” (Mal. 3:18) Esịt enem nnyịn ndifiọk ke “enyịn Jehovah ke ese ndinen owo, enye onyụn̄ okop n̄kpeubọk mmọ.”—1 Pet. 3:12.

^ ikp. eki. 8 Ediyarade 21:14 etịn̄ aban̄a “itiat idakisọn̄” 12 emi ẹwetde enyịn̄ mme apostle 12. Ẹkewet itien̄wed emi ke ata ediwak isua ẹma ẹkebe tọn̄ọ Paul ekewet leta oro ọnọ Timothy.

^ ikp. eki. 12 Ke ibuotikọ oro etienede, iyeneme nte ikemede ndisua idiọkido nte Jehovah asuade.