Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MAY 2014

‘Udia Mi Edi Ndinam Uduak Abasi’

‘Udia Mi Edi Ndinam Uduak Abasi’

Nso isinam fi enen̄ede okop idatesịt? Ndi ndọ, ndinyene nditọ, m̀mê ndinyene ufan? Anaedi esinem fi nditie ye mbon emi afo amade ndia udia. Ndi isinemke fi emi edide asan̄autom Jehovah ndinam uduak Abasi, n̄kpep Ikọ esie, nnyụn̄ n̄kwọrọ eti mbụk?

Ke ikwọ emi Edidem David ọkọkwọde otoro Andibot, enye ama ọdọhọ ete: “Mmadat esịt ndinam uduak fo, O Abasi mi, ibet fo onyụn̄ odu mi ke ọwọn̄esịt.” (Ps. 40:8) Kpa ye ofụri afanikọn̄ emi ẹkesịmde enye, enye ama enen̄ede adat esịt ndinam uduak Abasi. Edi idịghe David kpọt edi asan̄autom Jehovah emi akamade ndinam n̄kpọ ata Abasi.

Apostle Paul okowụt ke se idude ke Psalm 40:8 aban̄a Messiah, m̀mê Christ, ke ini enye ọkọdọhọde ete: “Ke ini enye [Jesus] odụkde ererimbot enye ọdọhọ ete: ‘“Afo ukoyomke uwa ye enọ, edi ama eben̄e ikpọkidem ọnọ mi. Afo ukokopke inemesịt ke ofụri edifọp uwa ye uwa idiọkn̄kpọ.” Ekem ndọhọ nte, “Sese! mmedi (ẹwet ẹban̄a mi ke ikpan̄wed) ndinam uduak fo, O Abasi.”’”—Heb. 10:5-7.

Ke ini Jesus okodude ke isọn̄, enye ama esima mme n̄kpọ-obot, ama ndidu ye mme ufan esie, onyụn̄ ama ndidia udia ye mbon en̄wen. (Matt. 6:26-29; John 2:1, 2; 12:1, 2) Edi se ikenen̄erede inem enye ekedi ndinam uduak Ete esie eke heaven. Enye ọkọdọhọ ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.” (John 4:34; 6:38) Nte Jesus okodude uwem ama anam mbet esie ẹkụt se isinamde owo okop ata inemesịt. Mmọ ẹma ẹnen̄ede ẹkop idatesịt, ẹnyụn̄ ẹma ndikwọrọ etop Obio Ubọn̄ nnọ mme owo.—Luke 10:1, 8, 9, 17.

‘ẸKA ẸKENAM MBET’

Jesus ọkọdọhọ mbet esie ete: “Ẹka ẹkenam mme owo ke kpukpru idụt ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit, ẹkpep mmọ ẹnam kpukpru n̄kpọ eke n̄ketemede mbufo. Ndien, sese! Ami ndodu ye mbufo kpukpru usen tutu esịm akpatre ini editịm n̄kpọ emi.” (Matt. 28:19, 20) Emi esịne ndikwọrọ ikọ ke  kpukpru ebiet, ndifiak mbịne mbon emi ẹkemade se ikenemede, nnyụn̄ n̄kpep mmọ Bible. Ndinam emi ekeme ndinam owo okop ata inemesịt.

Ima esinam ika iso ikwọrọ ikọ kpa ye oro ndusụk owo mîmaha ndikpan̄ utọn̄

Nte idade utom ukwọrọikọ ayanam ikop ata idatesịt, edide mme owo ẹkpan̄ utọn̄ m̀mê ikpan̄ke. Ntak emi nnyịn mîtreke ndikwọrọ ikọ kpa ye oro ndusụk owo mîmaha ndikpan̄ utọn̄? Sia imọfiọk ke ndikwọrọ etop Obio Ubọn̄ Abasi nnyụn̄ nnam mbet owụt ke imama Abasi ye mbọhọidụn̄ nnyịn. Nditre ndikwọrọ ikọ ekeme ndinam nnyịn ye mbon en̄wen ikûnyene uwem. (Ezek. 3:17-21; 1 Tim. 4:16) Yak itịn̄ ndusụk n̄kpọ emi ẹsin̄wamde ediwak nditọete nnyịn ẹka iso ẹkwọrọ ikọ m̀mê ẹtetịm ẹsịn ifịk ẹkwọrọ ikọ ke mme itie emi ọsọn̄de ndikwọrọ ikọ.

DA KPUKPRU IFET KWỌRỌ IKỌ

Ndibụp nnennen mbụme ke ini ikwọrọde ikọ esinyene ufọn. Usenubọk kiet, Amalia ama okụt ete kiet okotde n̄wedmbụk n̄kpọntịbe ke itie unọ idem inemesịt. Enye ama asan̄a okobụp ete oro m̀mê enye okụt eti mbụk ndomokiet. Ke ini enye ọkọdọhọde ke idụhe, Amalia ama ọdọhọ ke imada eti mbụk Obio Ubọn̄ Abasi isọk enye. Ama ọdọn̄ ete oro ndikop, enye ama onyụn̄ enyịme ndikpep Bible. Amalia ama ọtọn̄ọ ukpepn̄kpọ Bible ita do.

Janice esikwọrọ ikọ ke itieutom mmọ. Ke ini owo ukpeme ye nsan̄autom esie ẹkemade ibuotikọ kiet ke Enyọn̄-Ukpeme, enye ama ọdọhọ ke iyesida Enyọn̄-Ukpeme isọk mmọ. Enye ama ada n̄ko ọsọk owo itieutom mmọ emi akamade nsio nsio ibuotikọ emi ẹsidude ke Enyọn̄-Ukpeme ye Ẹdemede! Emi ama anam owo itieutom mmọ en̄wen ọdọhọ enye esitiene ọnọ imọ. Janice ọdọhọ ke ‘Jehovah ọdiọn̄ imọ etieti.’ Idahaemi enye enyene owo 11 ke itieutom mmọ emi enye esinọde magazine nnyịn.

KÛKPA MBA

Esenyịn oro asan̄ade-san̄a ọkọdọhọ mme asuanetop ete ke ini mmọ ẹkwọrọde ikọ ke ufọk ke ufọk, ke ndidọhọ enyeneufọk ke iyafiak idi usen en̄wen inyụn̄ itre nneme do ikemke. Utu ke oro, mmọ ẹkeme ndibụp enyeneufọk ẹte: “Ndi akpama n̄wụt fi nte isikpepde mme owo Bible?” mîdịghe, “Nso usen ke edinyene ini man idika iso ke nneme nnyịn?” Esenyịn oro ọdọhọ ke emi ama an̄wam nditọete ke esop kiet emi imọ ikakade ikese ẹtọn̄ọ ndikpep owo 44 Bible ke urua kiet.

Ndisọp mfiak n̄kese mbon oro ẹkemade etop Bible—idem ke usen kiet m̀mê iba ẹbede—ekeme ndinen̄ede nnyene ufọn. Ntak-a? Sia oro ediwụt ke enen̄ede ọdọn̄ nnyịn ndin̄wam mbon oro ẹnyenede eti esịt ẹfiọk Bible. Ke ini ẹkebụpde n̄wan kiet ntak emi enye ekenyịmede Mme Ntiense Jehovah ẹkpep enye Bible, enye ọkọdọhọ ete: “Mmọ ẹma ẹkere ẹban̄a mi ẹnyụn̄ ẹma mi ke ofụri esịt.”

Emekeme ndibụp enyeneufọk ete, “Ndi akpama n̄wụt fi nte isikpepde mme owo Bible?”

Esisịt ini ke Madaí ama ọkọnyọn̄ Ufọkn̄wed Utom Usiakusụn̄, enye ama enyene owo 15 emi  enye esikpepde Bible ke idemesie, afiak enyene owo 5 en̄wen emi enye akayakde ọnọ mme asuanetop en̄wen. Ndusụk mbon oro enye esikpepde Bible ẹma ẹtọn̄ọ ndidụk mbono esop kpukpru ini. Nso ikan̄wam enye enyene ediwak mbon emi enye esikpepde Bible? Ẹma ẹkpep enye ke ufọkn̄wed oro ke ọfọn ẹsifiak ẹka tutu ẹkụt mbon emi ẹkenyenede udọn̄. Eyenete en̄wen emi an̄wamde ediwak owo ẹdifiọk akpanikọ ọdọhọ ete, “Ikpanaha ikpa mba ndisifiak n̄ka mbịne mbon oro ẹyomde ndifiọk Jehovah. Akpan n̄kpọ emi edinamde in̄wam mmọ edi oro.”

Ndisisọp mfiak n̄kese mbon oro ẹkemade se ikenemede owụt ke imenen̄ede iyom ndin̄wam mmọ ẹfiọk Bible

Oyom inen̄ede isịn ukeme man ikeme ndinam mfiakn̄ka inyụn̄ inịm ukpepn̄kpọ Bible. Edi se ededi ukeme oro isịnde ikpetke-kpet ye ufọn oro idinyenede. Ndisịn idem n̄kwọrọ Obio Ubọn̄ Abasi ekeme ndinam in̄wam mbon en̄wen ‘ẹnyene nnennen ifiọk akpanikọ,’ ndien oro ekeme ndinam mmọ ẹnyene edinyan̄a. (1 Tim. 2:3, 4) Emi ekeme ndinam ikop uyụhọ onyụn̄ anam inen̄ede ikop idatesịt.