Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) APRIL 2014

Ndi Ama Ọfiọk?

Ndi Ama Ọfiọk?

Ke eyo Bible, owo ndikokoi n̄wak ọfọn̄idem esie okowụt nso?

N̄WED ABASI etịn̄ nsio nsio n̄kpọ oro ẹkesinamde mme owo ẹwak ọfọn̄idem mmọ. N̄kpọ emi ekeme nditie esen esen ke utọn̄ mme owo oro ẹkotde ẹban̄a emi mfịn. Edi mme Jew ẹkenam emi ke ntak edikpu, nnanenyịn, mfụhọ, esuene, m̀mê ọkpọsọn̄ iyatesit.

Ke uwụtn̄kpọ, Reuben ama “awak ọfọn̄idem esie” ke ini enye ekedide edifiọk ke ẹma ẹnyam Joseph eyenete esie, ndien ke ofụri ukeme oro imọ ikesịnde man inyan̄a Joseph akatatak. Ete mmọ Jacob, ama “awak ọfọn̄ esie” ke ini enye ekekerede ke idiọk unam awai Joseph. (Gen. 37:18-35) Job ama “awak anana-ubọk kod esie” ke ini ẹkedọhọde enye ke ẹma ẹwot kpukpru nditọ esie. (Job 1:18-20) Isụn̄utom kiet ama “awak ọfọn̄idem esie” onyụn̄ edi edidọhọ Akwa Oku Eli ke mbon Philistia ẹma ẹkan nditọ Israel, ẹwot nditọ Eli mbiba, ẹnyụn̄ ẹmen ekebe ediomi ẹnyọn̄. (1 Sam. 4:12-17) Ke ini Josiah okokopde nte ẹkotde n̄wed Ibet ẹnọ enye, onyụn̄ okụtde ndiọi n̄kpọ oro nditọ Israel ẹkenamde, enye ama “awak ọfọn̄idem esie.”—2 Ndi. 22:8-13.

Ke ini ẹkesụk ẹkpede ikpe Jesus, Caiaphas Akwa Oku ama “awak ewụra esie” ke ini enye ekekerede ke Jesus etịn̄ ikọ isụn̄i adian Abasi. (Matt. 26:59-66) Ibet mme Jew ọkọdọhọ ke owo ekededi oro okopde nte ẹtịn̄de ikọ isụn̄i ẹdian enyịn̄ Abasi ekenyene ndiwak ọfọn̄idem esie. Edi ibet en̄wen oro ẹkenyenede ke ẹma ẹkesobo temple Jerusalem ọkọdọhọ ke “owo oro okopde nte ẹtịn̄de ikọ isụn̄i ẹdian Enyịn̄ Abasi mfịn ikpenyeneke ndiwak ọfọn̄idem esie, edieke enye awakde, ọwọrọ enye ayawak ọfọn̄idem esie ama.”

Edi owo ndiwak ọfọn̄idem esie ikenyeneke ufọn ke enyịn Abasi edieke enye mîtuaha n̄kpọfiọk ke ofụri esịt. Ntem Jehovah ọkọdọhọ ikọt esie ete ‘ẹwai esịt mmọ, ẹkûwai ọfọn̄idem, ẹnyụn̄ ẹfiak ẹtiene imọ.’—Joel 2:13.