Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) MARCH 2014

Nte Akpan̄wamde Iman Fo Ẹkpep Akpanikọ

Nte Akpan̄wamde Iman Fo Ẹkpep Akpanikọ

JESUS CHRIST ọkọdọhọ ete kiet ete: “Nyọn̄ ufọk bịne mme iman fo, nyụn̄ tịn̄ nọ mmọ kpukpru n̄kpọ eke Jehovah anamde ọnọ fi ye nte enye akatuade fi mbọm.” Etie nte enye okodu ke Gadara, obio kiet ke usụk usụk edem usiahautịn Inyan̄ Galilee, etịn̄ ikọ emi ye ete kiet emi okoyomde ndidi mbet esie. Ikọ Jesus emi owụt ke enye ọdiọn̄ọ ke mme owo ẹsinen̄ede ẹma ndineme se mmọ ẹmade ye iman mmọ.—Mark 5:19.

Mme owo ẹsụk ẹmama ndinam oro mfịn. Edi mme owo ke ndusụk ebiet ẹsinam ẹkan mme owo ke mme ebiet en̄wen. Ntem, ke ini owo ekpepde akpanikọ onyụn̄ edide edifiọk ata Abasi, Jehovah, esidọn̄ enye ndineme se enye ekpepde ye iman esie. Edi didie ke enye akpanam emi? Enye edinam didie in̄wam iman esie ẹkpep akpanikọ, edide mmọ ẹsika ufọkabasi m̀mê isikaha? Bible owụt nti usụn̄ emi ẹkemede ndinam emi.

“NNYỊN IMOKỤT MESSIAH”

Ke ini Jesus okodude ke isọn̄, Andrew ekedi kiet ke otu mbon oro ẹkebemde iso ẹfiọk ke Jesus edi Messiah. Anie ke enye ekebem iso etịn̄ ọnọ? Bible ọdọhọ ete: “Owo emi [Andrew] ebem iso okụt Simon, eyeneka esiemmọ, onyụn̄ ọdọhọ enye ete: ‘Nnyịn imokụt Messiah’ (emi ọwọrọde Christ).” Andrew ama emen Simon Peter okowụt Jesus, ndien emi ama ọnọ Peter ifet ndikabade ndi mbet Jesus.—John 1:35-42.

Ke n̄kpọ nte isua itiokiet ẹma ẹkebe, ke ini Peter okodude ke Joppa, ẹma ẹdọhọ enye aka Caesarea okokụt Cornelius emi ekedide akwa owoekọn̄. Mmanie ke Peter okokụt ke ufọk Cornelius? Bible ọdọhọ ete: “Cornelius ama odori enyịn [ke Peter ye mbon emi ẹkesan̄ade ye enye ke ẹdi] onyụn̄ okot iman esie ye mme n̄kpet n̄kpet ufan esie  obon ọtọkiet.” Ntem, Cornelius ama ọnọ iman esie ifet ndikpan̄ utọn̄ n̄kop se Peter etịn̄de nnyụn̄ nda se mmọ ẹkopde mbiere se ẹdinamde.—Utom 10:22-33.

Nso ke ikeme ndikpep nto nte Andrew ye Cornelius ẹkenamde n̄kpọ ye iman mmọ?

Mmọ ndomokiet ikọdọhọke yak ikpọn̄ ke iman mmimọ ẹyebọ akpanikọ ini ama ekem. Andrew akadaha ke idemesie emen Peter okowụt Jesus, ndien Cornelius ama anam ndutịm man iman esie ẹsobo ye Peter ẹnyụn̄ ẹkop ukwọrọikọ esie. Edi Andrew ye Cornelius ikenyịkke-nyịk iman mmọ, ikonyụn̄ idaha n̄kari inam mmọ ẹkabade ẹdi mbet Christ. Anaedi emekpep n̄kpọ oto se mmọ ẹkenamde emi. Ọkpọfọn inam ntre n̄ko. Imekeme ndineme Ikọ Abasi ye iman nnyịn inyụn̄ inam n̄kpọ emi edinọde mmọ ifet ẹkpep akpanikọ Bible ẹnyụn̄ ẹsobo ye nditọete nnyịn. Kpa ye oro, ana ifiọk ke mmọ ẹnyene unen ndibiere se mmọ ẹdinamde, ndien ifọnke iyeyịre mmọ ikaha. Yak ineme iban̄a Jürgen ye Petra, ebe ye n̄wan emi ẹdude ke Germany, man ise nte ikemede ndin̄wam iman nnyịn.

Mme Ntiense Jehovah ẹma ẹkpep Petra Bible, ndien enye ama ana baptism nte ini akakade. Jürgen ebe esie ekedi akwa owoekọn̄. Jürgen ikamaha se n̄wan esie akanamde emi ke nsonso oro. Edi nte ini akakade, enye ama edikụt ke Mme Ntiense ẹkpep se isịnede ke Bible. Enye n̄ko ama ediyak idem ọnọ Jehovah. Enye edi ebiowo idahaemi ke esop mmọ. Nso item ke enye ọnọ mbon emi ẹyomde ndin̄wam iman mmọ ẹkpep akpanikọ?

Jürgen ọdọhọ ete: “Inaha iyeyịre iman nnyịn ikaha, inyụn̄ inaha iyom nditịn̄ kpukpru se idude ke Bible ke ebe kiet nnọ mmọ. Oro ekeme ndinam Ikọ Abasi odorode mmọ. Akpakam ọfọn ida mbufiọk ineme Ikọ Abasi nsịtnsịt ye mmọ. Imekeme n̄ko ndinam mmọ ẹsobo ye nditọete emi ẹdide n̄ka mmọ, emi ẹnyụn̄ ẹmade se mmọ ẹmade. Emi ekeme ndinam emem utom ndin̄wam mmọ.”

“Inaha iyeyịre iman nnyịn ikaha, inyụn̄ inaha iyom nditịn̄ kpukpru se idude ke Bible ke ebe kiet nnọ mmọ.”—Jürgen

Apostle Peter ye iman Cornelius ẹma ẹsọsọp ẹnyịme etop Bible oro mmọ ẹkekopde. Edi ama ada ini mbemiso mbon en̄wen oro ẹkekopde akpanikọ Bible ke eyo mmọ ẹnyịme ndituak ibuot nnọ ata Abasi.

NSO KABAN̄A NDITỌEKA JESUS?

Ke ini Jesus okodude mi ke isọn̄, ndusụk iman esie ẹma ẹnịm ke enye edi Messiah. Ke uwụtn̄kpọ, etie nte apostle James ye John ẹkedi nditọ eyeneka eka Jesus emi ekekerede Salome. Ndien ekeme ndidi Salome edi kiet ke otu iban “emi ẹkedade inyene mmọ ẹnam n̄kpọ ẹnọ” Jesus ye mme apostle esie.—Luke 8:1-3.

Edi ama ada ini mbemiso ndusụk iman Jesus ẹnịm ke enye edi Messiah. Ke uwụtn̄kpọ, isua kiet tọn̄ọ Jesus akana baptism, otuowo ẹma ẹbono ke ubet kiet ẹkpan̄ utọn̄ ẹkop ukwọrọikọ esie. “Edi ke ini iman esie ẹkopde ẹban̄a emi, mmọ ẹwọn̄ọ ẹka ndimụm enye, koro mmọ ẹdọhọde ẹte: ‘Ibuot ọbọhọ enye.’” Nte ini akakade, ke ini nditọeka Jesus ẹkebụpde enye ẹban̄a isan̄ oro enye akaduakde ndika, enye ikọbọrọke mmọ nnennen nnennen. Ntak-a? Koro “nditọeka esie ikọbuọtke idem ye enye.”—Mark 3:21; John 7:5.

Nso ke ikeme ndikpep nto nte Jesus akanamde n̄kpọ ye iman esie? Enye ikayatke esịt ke ini ndusụk mmọ ẹkedọhọde ke ibuot ebe enye. Idem ke ini enye ama akakpa onyụn̄ eset, enye ama owụt  James eyeneka esie idem man ekpesịn udọn̄ ọnọ enye ye iman esie eken. Enye ndiwụt James idem ama anam James ye nditọeka esie eken ẹnịm ke Enye edi Messiah. Ntem, mmọ ẹma ẹdu ye mme apostle ye mbon eken ke ubet enyọn̄ ke Jerusalem, ndien etie nte mmọ ẹma ẹtiene ẹbọ edisana spirit. Nditọeka Jesus en̄wen, James ye Jude, ẹma ẹdinyene ikpọ ifetutom nte ini akakade.—Utom 1:12-14; 2:1-4; 1 Cor. 15:7.

NDUSỤK OWO ISISỌPKE INYỊME AKPANIKỌ

“Oyom enyene ime. Ama akam enyene ime, n̄kpọ ọyọfọn.”—Roswitha

Kpa nte ekedide ke eyo Jesus, ndusụk owo mfịn isisọpke inyịme akpanikọ. Da Roswitha ke uwụtn̄kpọ. Enye ekedi ata owo Roman Catholic ke ini ebe esie akanade baptism akabade edi Ntiense Jehovah ke 1978. Roswitha ama ọbiọn̄ọ ebe esie sia ekekere ke imọ ikam ikpono ata Abasi. Edi nte ini akakade, enye ikenen̄ekede ibiọn̄ọ ebe esie aba sia enye ama edikụt ke Mme Ntiense Jehovah ẹkam ẹkpep akpanikọ. Enye ama ana baptism ke 2003. Nso ikanam enye okpụhọde? Ebe esie ikesiyatke esịt ye enye ke ini enye ọkọbiọn̄ọde enye, edi ama ọnọ n̄wan esie ifet ndikpụhọde ekikere. Nso item ke Roswitha ọnọ? Enye ọdọhọ ete, “Oyom enyene ime. Ama akam enyene ime, n̄kpọ ọyọfọn.”

Monika akana baptism ke 1974, ndien nditọ esie iba ẹna ke isua duop ẹma ẹkebe. Edi kpa ye emi Hans ebe esie mîkọbiọn̄ọke mmọ, enye ekedina baptism ke 2006. Ke ini ubon emi ẹtiede ẹkere ofụri se iketịbede, nso item ke mmọ ẹnọ? Mmọ ẹdọhọ ẹte: “Sọn̄ọ da ye Jehovah; kûdedei unam se enye akpande.” Edi mmọ ẹma ẹsinam Hans okụt ke mmimọ imenen̄ede ima enye ẹnyụn̄ ẹnen̄ede ẹnịm ke enye oyodụk esop Abasi usen kiet usen kiet.

YAK MMỌN̄ AKPANIKỌ ENENEM MMỌ

Isan̄ kiet, Jesus ama emen ikọ Abasi odomo ye mmọn̄ emi ekemede ndinam owo enyene nsinsi uwem. (John 4:13, 14) Nnyịn iyom mbịtmbịt edisana mmọn̄ akpanikọ enenem iman nnyịn. Ntre nnyịn idin̄wan̄ake mmọn̄ emi odudu odudu idọn̄ mmọ ke inua mbak idikpan̄a mmọ. Nte itịn̄de se nnyịn inịmde ke akpanikọ inọ mmọ ekeme ndinam mmọn̄ emi enenem mmọ mîdịghe akpakpan̄a mmọ. Bible ọdọhọ ke “esịt edinen owo etie ekere man ọbọrọ” ye nte ke “esịt owo ọniọn̄ anam inua esie osion̄o ikike, enye onyụn̄ adian mbukpek ke n̄kpọkinua esie.” Ikpasan̄a didie inam item emi?—N̄ke 15:28; 16:23.

Ekeme ndidọn̄ n̄wan ndineme se enye enịmde ke akpanikọ ye ebe esie. Edieke enye ‘etiede ekere man ọfiọk se ọkpọbọrọde,’ enye iditịn̄ke se ededi oro odụkde enye ibuot. Ikpanaha enye anam nte imọdiọn̄ọ n̄kpọ ikan ebe esie m̀mê ke imọfọn ikan enye. Ikọ emi enye ekerede-kere etịn̄ edinenem ebe esie onyụn̄ anam emem odu. Enye ekeme ndibụp idemesie ete, Ini ewe ke esinen̄ede enem ebe mi ndineme nneme? Nso ke enye akpama ndineme m̀mê ndikot mban̄a? Ndi enye esinen̄ede ama ifiọk ntaifiọk, mbre ukara, m̀mê mbre mbuba? Nso ke n̄kpanam man enye oyom ndifiọk n̄kpọ mban̄a Bible? Didie ke n̄kpanam emi ukpono ukpono, ke usụn̄ emi mîwụtke ke nyom ndibebiere n̄kpọ nnọ enye? Ndikere n̄kpọ ntem ekeme ndinam enye etịn̄ ikọ onyụn̄ anam n̄kpọ ye ikike.

Ndin̄wam iman nnyịn emi mîdịghe kan̄a Mme Ntiense ikụreke ke ndineme Ikọ Abasi ye mmọ ke ini ke ini. Ke adianade ye se ededi oro ikwọrọde inọ mmọ, ana idu eti uwem.

DU ETI UWEM

Jürgen emi iketịn̄de iban̄a ọkọdọhọ ete, “Tiene mme edumbet Bible ke kpukpru se anamde. Ata eti usụn̄ edi emi ndin̄wam iman fo okụt ke ọfọn ẹda mme edumbet N̄wed Abasi ẹdu uwem, okposụkedi emi enye mîdinyịmeke kpukpru se anamde.” Hans emi akanade baptism n̄kpọ nte isua 30 ke n̄wan esie ama akana enyịme ye se Jürgen etịn̄de. Hans ọdọhọ ete, “Enen̄ede ọfọn Christian odu eti uwem man iman esie ẹkụt ke akpanikọ enyene ufọn ke uwem esie.” Akpana idu uwem ke usụn̄ emi anamde iman nnyịn ẹkụt ke edieke nnyịn mîtieneke mmọ inam n̄kpọ, ọwọrọ ke n̄kpọ oro ọdiọk.

“Enen̄ede ọfọn Christian odu eti uwem man iman esie ẹkụt ufọn emi akpanikọ enyenede ke uwem esie.”—Hans

Apostle Peter ama eteme iban emi ebe mmọ mîdụhe ke esop Abasi ete: “Ẹsụk ibuot ẹnọ mme ebe mbufo, man, edieke ndusụk mmọ mîsụkke ibuot inọ ikọ Abasi, ẹkpedụri mmọ ẹda itoho ke editịn̄ ikọ edi oto ke edu uwem iban mmọ, koro mmọ ẹkụtde edisana edu uwem mbufo ọkọrọ ye ntotụn̄ọ ukpono. Ndien ẹkûyak mbanaidem mbufo edi enyọn̄ enyọn̄ edidọk idet ye edisịne n̄kpọmbana gold m̀mê edisịne ndiye ọfọn̄, edi ẹyak edi ndedịbe  owo eke esịt emi edide edisịnen̄kpọ eke mîkemeke ndibiara, kpa sụn̄sụn̄ ye ifụre ifụre edu, emi enen̄erede ọsọn̄ urua ke enyịn Abasi.”—1 Pet. 3:1-4.

Peter ọkọdọhọ ke n̄wan ndidu eti uwem ekeme ndinam ebe esie edi edituak ibuot ọnọ Jehovah. Eyenete an̄wan kiet emi ekerede Christa odomo ndinam item N̄wed Abasi emi tọn̄ọ enye akana baptism ke 1972 m̀mê ebe esie oyokụt oro edi edinam n̄kpọ Abasi. Ebe esie inyịmeke ndiyak idem nnọ Jehovah kpa ye edide enye ama ekpep Bible ye Mme Ntiense isan̄ kiet. Enye ama esidụk mbono esop ndusụk ini onyụn̄ emehe ye nditọete ke esop. Mmọ ẹma ẹdiọn̄ọ ke enye enyene unen ndibiere se enye edinamde. Christa edinam didie in̄wam ebe esie enyịme ndiyak idem nnọ Abasi?

Christa ọdọhọ ete: “Mmenen̄ede mbiere ndika iso nnam se Jehovah oyomde nnam. Ke adianade do, mmodomo ndida eti edu uwem ndụri ebe mi nda. Mmesidomo ndinam se ededi emi enye oyomde, ama akam edi ibiatke ibet Abasi. Mmọfiọk n̄ko ke enye enyene ndibiere se enye edinamde, mmonyụn̄ nyak kpukpru n̄kpọ nsịn Jehovah ke ubọk.”

Mbụk Christa owụt ke ifọnke owo ọsọsọn̄ ido m̀mê ọsọn̄ọ eyịre ke unen esie. Christa isidaha n̄kpọ Abasi ibre mbre; esidụk mbono esop kpukpru ini onyụn̄ esịn idem ọkwọrọ ikọ. Edi enye ekere aban̄a ebe esie, sia ọfiọkde ke akpana ika iso ima ebe imọ, isidu ye enye, isinyụn̄ ise enye enyịn. Inaha mbon emi iman mmọ mîdụkke kan̄a esop Abasi ẹsọsọn̄ ido m̀mê ẹsọn̄ọ ẹyịre ke unen mmọ. Bible ọdọhọ ke ‘ẹnịm ini ẹnọ kpukpru n̄kpọ.’ Emi esịne ini emi owo odude ye mbonubon esie, akpan akpan ye ebe m̀mê n̄wan esie emi mîdụhe ke esop Abasi. Ndidu ye mmọ ayanam mbufo ẹnen̄ede ẹnyene ini ẹneme nneme. Edieke owo esinemede nneme ye n̄wan m̀mê ebe esie emi mîdụhe ke esop Abasi, emi idiyakke n̄wan m̀mê ebe oro okop ndobo, ekere ke owo imaha imọ, m̀mê ọtọn̄ọ ndifịbe ufụp.—Eccl. 3:1.

KÛDUỌK IDOTENYỊN

Holger emi ete esie akanade baptism ke isua 20 ẹma ẹkebe tọn̄ọ mbon eken ke ubon mmọ ẹkena, ọkọdọhọ ete, “Ọfọn iwụt mmọ ke imama mmọ, ke imesinyụn̄ ibọn̄ akam isịn mmọ.” Christa ọdọhọ ke imọ ‘iduọkke idotenyịn, ke imenịm ke ebe imọ eyebiere ndiyak idem nnọ Jehovah nnyụn̄ nnam n̄kpọ esie.’ Akpana isinam n̄kpọ ye iman nnyịn emi mîdụhe ke esop ke usụn̄ emi owụtde ke imenen̄ede inịm ke mmọ ẹyedụk esop Abasi usen kiet usen kiet.

Nnyịn iyom ndikaka iso n̄kpere mbonubon nnyịn, ndinọ mmọ ifet ẹkpep akpanikọ, ndinyụn̄ nnam akpanikọ Bible otụk mmọ. Ndien akpana inam n̄kpọ ye mmọ ke “ifụre ifụre ido ye ntotụn̄ọ ukpono.”—1 Pet. 3:15.