Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JANUARY 2014

Obio Ubọn̄ Akara ke Isua 100—Didie ke Emi Ebehe Fi?

Obio Ubọn̄ Akara ke Isua 100—Didie ke Emi Ebehe Fi?

“Jehovah Abasi, kpa Ata Ọkpọsọn̄, mme utom fo ẹkponi ẹnyụn̄ ẹdi utịbe. Mme usụn̄ fo ẹnen ẹnyụn̄ ẹdi akpanikọ, nsinsi Edidem.”—EDI. 15:3.

1, 2. Nso ke Obio Ubọn̄ Abasi edinam, ndien ntak emi inen̄erede inịm ke enye eyedi?

KE INI utọ isua 31 E.N., Jesus Christ ama ekpep mme anditiene enye ke obot kiet emi ekperede Capernaum ete ẹbọn̄ akam ntem: “Yak obio ubọn̄ fo edi.” (Matt. 6:10) Ediwak owo ẹyịk mfịn m̀mê Obio Ubọn̄ emi oyosụk edi. Edi nnyịn imenen̄ede inịm ke ẹyeyere akam ofụri esịt oro isibọn̄de ite Obio Ubọn̄ Abasi edi.

2 Jehovah aduak ndida Obio Ubọn̄ emi nnam kpukpru nditọ esie ke heaven ye ke isọn̄ ẹdiana kiet nte ubon ofụri ekondo. Uduak Abasi emi oyosu. (Isa. 55:10, 11) Ke nditịm ntịn̄, Jehovah ama akakabade edi Edidem ke eyo nnyịn! Ndyọ ndyọ n̄kpọ oro ẹtịbede ke isua 100 emi ẹbede ẹwụt ke emi edi akpanikọ. Abasi ke anam ikpọ ye utịbe utịbe n̄kpọ ọnọ ediwak miliọn mme asan̄autom esie. (Zech. 14:9; Edi. 15:3) Edi Jehovah ndikabade ndi Edidem idịghe ukem ye edidi Obio Ubọn̄ Abasi emi Jesus ekekpepde nnyịn ete ibọn̄ akam iyom. Didie ke Abasi ndikabade ndi Edidem okpụhọde ye Obio Ubọn̄ Abasi ndidi, ndien didie ke emi ebehe nnyịn?

EDIDEM EMI JEHOVAH EMEKDE ỌTỌN̄Ọ NDINAM N̄KPỌ

3. (a) Ini ewe ke ẹkenọ Jesus ubọn̄ nte Edidem, ndien ke m̀mọ̀n̄? (b) Didie ke afo ekeme ndiwụt ke Obio Ubọn̄ ama ọtọn̄ọ ndikara ke 1914? (Se ikọ idakisọn̄.)

3 Esisịt ini mbemiso iduọk isua 1900, ntịn̄nnịm ikọ emi Daniel ekewetde ke n̄kpọ nte isua 2,500 emi ẹkebede ama ọtọn̄ọ  ndinen̄ede n̄n̄wan̄a ikọt Abasi. Enye ekewet ete: “Ke eyo ndidem oro, Abasi enyọn̄ oyowụk obio ubọn̄ eke owo mîdisoboke ifep tutu amama.” (Dan. 2:44) Nditọ Ukpepn̄kpọ Bible ẹma ẹkwọrọ ke ediwak isua ẹte ke 1914 edidi ata akpan isua. Ediwak mbon emi ẹkedude ini oro ẹkekere ke n̄kpọ ọyọfọn. Ewetn̄wed kiet ekewet ete: “Mme owo emi ẹkedude ke 1914 ẹma ẹnen̄ede ẹnyene idotenyịn ke ini iso ọyọfọn.” Edi ke ini akpa ekọn̄ ererimbot akasiahade isua oro, ntịn̄nnịm ikọ Bible ama osu. Akan̄, unyekisọn̄, ndiọi udọn̄ọ, ye mme ntịn̄nnịm ikọ Bible eken oro ẹkesude ẹma ẹnen̄ede ẹwụt ke Jesus Christ ama ọtọn̄ọ ndikara nte Edidem Obio Ubọn̄ Abasi ke heaven ke 1914. * Jehovah ama akabade edi Edidem ke usụn̄ en̄wen ke ndinọ Eyen esie ubọn̄ nte Edidem emi edide Messiah.

4. Nso ke obufa Edidem akanam ke ndondo oro ẹnọde enye ubọn̄, ndien nso ke enye akanam ke oro ebede?

4 Akpa n̄kpọ emi obufa Edidem emi Abasi emekde akanamde ekedi ndin̄wana ekọn̄ ye Satan, kpa akakan Asua Ete esie. Jesus ye mme angel esie ẹma ẹsio Devil ye mme demon esie ẹduọn̄ọ ke isọn̄. Emi ama anam heaven ẹnen̄ede ẹkop idatesịt, edi ekedi ini ata nnanenyịn ọnọ isọn̄. (Kot Ediyarade 12:7-9, 12.) Ke oro ebede, Edidem ama ọtọn̄ọ ndinam mme asan̄autom esie ke isọn̄ ẹsana, ọnọ mmọ ukpep, onyụn̄ etịm mmọ man ẹnam uduak Abasi. Ẹyak ineme nte mmọ nditiene ndausụn̄ Jesus enịmde eti uwụtn̄kpọ ọnọ nnyịn mfịn.

EDIDEM MESSIAH ANAM MME ASAN̄AUTOM ESIE ẸSANA

5. Mmanie ke ẹkenam asana ọtọn̄ọde ke 1914 esịm ntọn̄ọ ntọn̄ọ 1919?

5 Ke Edidem oro ẹnọde ubọn̄ ama okosio Satan ye mme demon esie ọduọn̄ọ ke isọn̄, Jehovah ama ọdọhọ Jesus ete ese onyụn̄ anam mme anditiene enye ke isọn̄ ẹsana. Prọfet Malachi ọkọdọhọ ke emi edi ndinam mmọ ẹsana man ẹdot ndinam n̄kpọ Abasi. (Mal. 3:1-3) Se iketịbede owụt ke Jesus akanam emi ọtọn̄ọde ke 1914 esịm ntọn̄ọ ntọn̄ọ 1919. * Ana isana man idot ndisịne ke ubon ofụri ekondo Jehovah. (1 Pet. 1:15, 16) Ana idian̄ade idem ikpọn̄ nsunsu ido ukpono m̀mê ukara ererimbot emi.

6. Didie ke ẹsinọ nnyịn udia eke spirit, ndien ntak emi enye edide akpan n̄kpọ?

6 Ekem Jesus ama ada odudu esie nte Edidem emek “ofụn emi anamde akpanikọ onyụn̄ enyenede ọniọn̄.” Ofụn emi enyene ndisinọ kpukpru mbon emi ẹnamde “otuerọn̄ kiet” ke idak Jesus eti udia eke spirit. (Matt. 24:45-47; John 10:16) Toto ke 1919, ekpri otu mbon oro ẹyetde aran mi ẹka iso ndinam akwa utom emi ẹnyụn̄ ẹnọ “mbonufọk” Jesus udia. Akpakịp udia eke spirit oro mmọ ẹnọde ọsọn̄ọ nnyịn idem onyụn̄ anam mbuọtidem nnyịn okpon. Emi anam nnyịn inen̄ede ibiere ndika iso nnam utuakibuot, edu uwem, ekikere, ye idem nnyịn asana. Udia eke spirit emi ekpep onyụn̄ etịm nnyịn idem ndinam ofụri ukeme nnyịn ke akakan utom oro ẹnamde ke isọn̄ mfịn. Ndi afo emesinen̄ede adia udia eke spirit emi?

EDIDEM ỌNỌ MME ASAN̄AUTOM ESIE UKPEP MAN ẸKWỌRỌ IKỌ KE OFỤRI ERERIMBOT

7. Nso akpan utom ke Jesus ọkọtọn̄ọ ke ini enye okodude ke isọn̄, ndien ẹdinam utom emi tutu ini ewe?

7 Ke ini Jesus ọkọtọn̄ọde utom ukwọrọikọ ke isọn̄, enye ama ọdọhọ ete: “Nnyene nditan̄a eti mbụk obio ubọn̄ Abasi  nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Ke ofụri isua ita ye ubak, Jesus akada utom emi nte iso utom esie. Enye eketeme mme mbet esie ete: “Nte mbufo ẹkade, ẹkwọrọ ẹte, ‘Obio ubọn̄ heaven ke asan̄a ekpere.’” (Matt. 10:7) Ke Jesus ama ekeset, enye ama ọdọhọ ke mme anditiene imọ ẹyetan̄a etop emi “tutu esịm ata utịt ikpehe isọn̄.” (Utom 1:8) Enye ama ọn̄wọn̄ọ ọnọ mmọ ke imọ iyan̄wam mmọ ke ata akpan utom emi tutu esịm eyo nnyịn.—Matt. 28:19, 20.

8. Didie ke Edidem ekesịn udọn̄ ọnọ mme asan̄autom esie ke isọn̄ ẹkwọrọ ikọ?

8 Etisịm 1919, “eti mbụk obio ubọn̄” ama edisịne n̄kpọ en̄wen. (Matt. 24:14) Edidem ke akakara ke heaven, ndien enye ama atan̄ ekpri otu oro ẹkenamde asana mi ke isọn̄ obon. Mmọ ẹma ẹnen̄ede ẹnam item Jesus emi: Ẹkwọrọ eti mbụk Obio Ubọn̄ emi ama ọkọtọn̄ọ ndikara ke ofụri isọn̄! (Utom 10:42) Ke uwụtn̄kpọ, se ikperede ndisịm owo 20,000 emi ẹdade ẹnọ Obio Ubọn̄ ẹma ẹsop idem ke mbono ofụri ererimbot ke Cedar Point, Ohio, U.S.A., ke September 1922. Kere nte esịt ekenemde mmọ ke ini Brọda Rutherford ọkọnọde utịn̄ikọ emi ibuotikọ ekedide “Obio Ubọn̄,” onyụn̄ ọdọhọ ete: “Sese, Edidem ada ubọn̄! Mbufo ẹdi mme ọnọ-ntọt esie. Mmọdo ẹtan̄a, ẹtan̄a, ẹtan̄a, Edidem ye obio ubọn̄ esie.” Ke ẹma ẹkenọ utịn̄ikọ oro, owo 2,000 ẹma ẹka ẹkekwọrọ ikọ, ndusụk owo ẹka ẹyom usụn̄ ẹkesịm n̄kpọ nte kilomita 72. Eyenete kiet emi eketienede odụk mbono oro ọdọhọ ete: “Tutu amama ndifreke nte ẹkedọhọde ẹtan̄a Obio Ubọn̄, ndinyụn̄ mfreke ifịk oro mme andidụk mbono ẹkenyenede!” Eketie ediwak owo ke idem ntre n̄ko.

9, 10. (a) Mme ufọkn̄wed ewe ke ẹda ẹnọ mme anditan̄a Obio Ubọn̄ ukpep? (b) Didie ke afo ọbọ ufọn oto ukpep emi?

9 Etisịm 1922, se ibede mme asuanetop Obio Ubọn̄ 17,000 ẹkesịn ifịk ẹkwọrọ ikọ ke idụt 58. Edi ama oyom ẹnọ mmọ ukpep. Ke eyo mme apostle, Edidem Oro Ẹmekde ama eteme mme mbet esie se ẹdikwọrọde, ebiet emi ẹdikwọrọde, ye nte ẹdikwọrọde. (Matt. 10:5-7; Luke 9:1-6; 10:1-11) Kpasụk ntre mfịn, Jesus okụt ete ke ẹnọ kpukpru owo emi ẹnamde utom edikwọrọ Obio Ubọn̄ ukpep ye mme n̄kpọ oro ẹdin̄wamde mmọ ẹnen̄ede ẹnam utom emi. (2 Tim. 3:17) Jesus ada esop Christian ekpep mme asan̄autom esie nte ẹkpekwọrọde ikọ. Usụn̄ kiet emi enye ọnọde mmọ ukpep edi Ufọkn̄wed Utom Ukara Abasi, emi ẹsinịmde ke se ibede esop 111,000 ke ofụri ererimbot. Se ibede mme ọkwọrọikọ miliọn itiaba emi ẹbọde ukpep emi ẹnen̄ede ẹdot ndikwọrọ ikọ nnyụn̄ n̄kpep “kpukpru orụk owo” n̄kpọ ke usụn̄ oro edin̄wamde mmọ.—Kot 1 Corinth 9:20-23.

 10 Ke adianade ye Ufọkn̄wed Utom Ukara Abasi, ẹsiak mme ufọkn̄wed ukpep Bible en̄wen ndida n̄kpep mbiowo, mme asiakusụn̄, nditọete emi mîdọhọ n̄wan, mme Christian emi ẹdọde ndọ, mbon Kọmiti N̄kọk Itieutom ye iban mmọ, mme esenyịn oro ẹsan̄ade-san̄a ye iban mmọ, ye mme isụn̄utom. * Otu kiet ke Ufọkn̄wed Ukpep Bible Eke Mme Christian Oro Ẹdọde Ndọ ẹketịn̄ ntem ndiwụt esịtekọm mmọ: “San̄asan̄a ukpep oro ẹkenọde nnyịn anam nnyịn inen̄ede ima Jehovah onyụn̄ anam nnyịn inen̄ede ifiọk ndin̄wam mme owo.”

11. Nso in̄wam mme ọkwọrọ Obio Ubọn̄ ẹka iso ẹkwọrọ ikọ kpa ye ubiọn̄ọ?

11 Satan, kpa asua, ke esese ukeme oro ẹsịnde ndikwọrọ Obio Ubọn̄ nnyụn̄ n̄kpep mme owo n̄kpọ. Enye oyom ndida usụn̄ ekededi mbiọn̄ọ eti mbụk Obio Ubọn̄ ye mme ọkwọrọ eti mbụk. Edi asua nnyịn idikanke. Jehovah etem Eyen esie ke itie “emi etịmde okon̄ akan kpukpru ukara ye odudu ye itie ubọn̄.” (Eph. 1:20-22) Sia Jesus edide Edidem, enye ada odudu esie ekpeme onyụn̄ ọnọ mme mbet esie ndausụn̄ man okụt ete ke ẹnam uduak Ete esie. * Ke ẹkwọrọ eti mbụk, ke ẹnyụn̄ ẹkpep ata ediwak mbon emi ẹnyenede eti esịt usụn̄ Jehovah. Nso akwa ifet ke inyene ntem nditiene nnam akwa utom emi!

EDIDEM ETỊM MME ASAN̄AUTOM ESIE MAN ẸNEN̄EDE ẸNAM UTOM

12. Tịn̄ ndusụk ukpụhọde oro ẹnamde ke nte ẹtịmde ikọt Abasi tọn̄ọ Obio Ubọn̄ ọkọtọn̄ọ ndikara.

12 Tọn̄ọ Obio Ubọn̄ ọkọtọn̄ọ ndikara ke 1914, Edidem esinam ukpụhọde ke nte ẹtịmde mme asan̄autom Abasi man ẹnam uduak Ete esie. (Kot Isaiah 60:17.) Ke 1919, ẹma ẹtọn̄ọ ndisimek eseutom ke esop kiet kiet man ada usụn̄ ke utom ukwọrọikọ. Ke 1927, ẹma ẹtọn̄ọ ndisika utom ukwọrọikọ eke ufọk ke ufọk ke Sunday. Ke 1931, ẹma ẹnen̄ede ẹsịn udọn̄ ẹnọ mme ọkwọrọ Obio Ubọn̄ ndinen̄ede nnam utom ke ini mmọ ẹkenyịmede ndikere enyịn̄ N̄wed Abasi emi—Mme Ntiense Jehovah. (Isa. 43:10-12) Ke 1938, ẹma ẹtre ndimenede ubọk mmek nditọete nnọ ifetutom ke esop, edi ẹmek ke ido ukara Abasi. Ke 1972, ẹma ẹtọn̄ọ ndimek otu mbiowo ẹse ẹban̄a esop utu ke ndinyene esenyịn kiet kpọt. Ẹma ẹsịn udọn̄ ẹnọ kpukpru mbon oro ẹdotde ndidi mbiowo ye mme asan̄autom unamutom ẹte ẹnyịme nditiene nse mban̄a esop Abasi. (1 Pet. 5:2) Ke 1976, ẹma ẹbahade Otu Ukara ẹsịn ke kọmiti itiokiet man ẹse ẹban̄a  utom Obio Ubọn̄ ke ofụri ererimbot. Edidem oro Jehovah emekde aka iso nditịm mme asan̄autom esie ke ido ukara Abasi.

13. Didie ke se Obio Ubọn̄ anamde ke isua 100 ebehe fi?

13 Kere ban̄a ofụri se Edidem emi edide Messiah anamde ke isua 100 oro enye akarade kan̄a. Enye anam mme owo ẹsana man ẹkere enyịn̄ Jehovah. Enye ọnọ ndausụn̄ man ẹkwọrọ eti mbụk Obio Ubọn̄ ke idụt 239 onyụn̄ ekpep ata ediwak owo usụn̄ Jehovah. Enye anam se ibede mme asan̄autom esie miliọn itiaba ẹdiana kiet ẹnyụn̄ ẹnyịme ndinọ idemmọ ndinam uduak Ete esie. (Ps. 110:3) Ke akpanikọ, se Jehovah adade Obio Ubọn̄ Messiah anam ẹkponi ẹnyụn̄ ẹnyene ndyọ. Se ikam ikande oro ẹyeda itie ke ini iso!

MME EDIDIỌN̄ EMI OBIO UBỌN̄ MESSIAH EDIDADE IDI KE INI ISO

14. (a) Nnyịn isidọhọ Abasi anam nso ke ini ibọn̄de akam ite: “Yak obio ubọn̄ fo edi”? (b) Nso idi ibuotikọ isua 2014, ndien ntak emi enye odotde?

14 Okposụkedi emi Jehovah ọkọnọde Jesus Christ Eyen esie ubọn̄ nte Edidem emi edide Messiah ke 1914, emi ikedịghe ọyọhọ ibọrọ akam emi isibọn̄de ite “yak obio ubọn̄ fo edi.” (Matt. 6:10) Ẹma ẹtetịn̄ ke Bible ke Jesus ‘ayaka akakan ke otu mme asua esie.’ (Ps. 110:2) Ukara owo emi esịnede ke idak Satan osụk ọbọbiọn̄ọ Obio Ubọn̄. Ke ini ibọn̄de akam ite Obio Ubọn̄ Abasi edi, nnyịn isiben̄e Abasi ite ayak Edidem emi edide Messiah ye mbon oro ẹdikarade ye enye ẹdi ẹditre ukara owo ẹnyụn̄ ẹsobo kpukpru mme andibiọn̄ọ Obio Ubọn̄ ke isọn̄. Ndinam emi oyosu se ẹwetde ke Daniel 2:44, ẹte ke Obio Ubọn̄ Abasi “ayanuak onyụn̄ osobo kpukpru mme obio ubọn̄ emi.” Enye oyosobo ukara owo sia mîmaha Obio Ubọn̄ Abasi. (Edi. 6:1, 2; 13:1-18; 19:11-21) Ẹmọn̄ ẹsọsọp ẹnam emi. Emi anam odot ibuotikọ isua 2014, kpa ọyọhọ isua 100 tọn̄ọ Obio Ubọn̄ Abasi ọkọtọn̄ọ ndikara ke heaven, edi Matthew 6:10: “Yak obio ubọn̄ fo edi”!

Ibuotikọ isua 2014:“Yak obio ubọn̄ fo edi.”—Matthew 6:10

15, 16. (a) Nso ndinem n̄kpọ ẹdida itie ke Tọsịn Isua Ukara Christ? (b) Nso ididi akpatre n̄kpọ emi Jesus edinamde nte Edidem emi edide Messiah, ndien nso ke ẹdinam inọ nditọ Abasi ke heaven ye ke isọn̄?

15 Ke Edidem emi edide Messiah ama okosobo mme asua Abasi, enye oyotop Satan ye mme demon esie ọdọn̄ ke editụn̄ọ ukpe ke tọsịn isua kiet. (Edi. 20:1-3) Sia mmọ mîdidụhe aba, Obio Ubọn̄ ọyọsọsọp anam mme owo ẹbọ ufọn uwa ufak Jesus, onyụn̄ etre ofụri se idiọkn̄kpọ Adam akadade edi. Edidem ayanam anana-ibat owo ẹset onyụn̄ anam ndutịm man ẹkpep mmọ n̄kpọ ẹban̄a Jehovah ke ofụri ererimbot. (Edi. 20:12, 13) Ofụri isọn̄ edidi Paradise nte In̄wan̄ Eden. Ẹyenam kpukpru owo oro ẹnamde akpanikọ ẹdi mfọnmma.

16 Ke utịt Tọsịn Isua Ukara Christ, Obio Ubọn̄ Messiah oyosu ofụri se Abasi akaduakde aban̄a isọn̄. Ini oro ndien ke Jesus ediyak Obio Ubọn̄ ọnọ Ete esie. (Kot 1 Corinth 15:24-28.) Owo idiyomke aba owo edi esịne-ufọt Jehovah ye nditọ esie mi ke isọn̄. Kpukpru nditọ Abasi ke heaven ye ke isọn̄ ẹyediana kiet ye Ete mmọ eke heaven nte ubon ofụri ekondo.

17. Nso ke afo ebiere ndinam kaban̄a Obio Ubọn̄?

17 Ndinem n̄kpọ emi ẹtịbede ke isua 100 emi Obio Ubọn̄ akarade anam nnyịn inen̄ede inịm ke Jehovah akara ye nte ke uduak esie kaban̄a isọn̄ oyosu. Nnyịn ikpakam ika iso idi mme asan̄autom esie emi ẹsọn̄ọde ẹda inyụn̄ itan̄a Edidem ye Obio Ubọn̄ esie. Inam emi ye ọyọhọ mbuọtidem nte ke Jehovah ọmọn̄ ọsọp ọbọrọ akam ofụri esịt emi isibọn̄de ite: “Yak obio ubọn̄ fo edi”!

^ ikp. eki. 10 Se Enyọn̄-Ukpeme eke September 15, 2012, page 13-17, “Mme Ufọkn̄wed Ukara Abasi—Uyarade Ima Jehovah.”

^ ikp. eki. 11 Edieke oyomde ndikot mban̄a ikpe oro ẹkekande ke nsio nsio idụt, se Enyọn̄-Ukpeme eke December 1, 1998, page 19-22.