Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  November 2013

Didie ke Ikeme Ndika Iso Nnyene “Edu Editie Mbet”?

Didie ke Ikeme Ndika Iso Nnyene “Edu Editie Mbet”?

“Nyenyene edu editie mbet.”—MIC. 7:7.

1. Nso ikeme ndinam nnyịn ikere ke Jehovah ebịghi akaha ndisobo editịm n̄kpọ Satan?

MME akpatre usen editịm n̄kpọ Satan ẹketọn̄ọ ke 1914 ke ini Obio Ubọn̄ Messiah ọkọtọn̄ọde. Ekọn̄ ama asiaha ke heaven, ndien emi ama anam Jesus osio Devil ye mme demon ọduọk ke isọn̄. (Kot Ediyarade 12:7-9.) Satan ọfiọk ke “ini imọ edi ibio.” (Edi. 12:12) Edi ‘ibio ini’ emi ekpere ndisịm isua 100, ndien ndusụk owo ẹkeme ndikere ke mme akpatre usen ẹbịghi ẹkaha. Edi ndi nnyịn ke idem nnyịn imekere ke Jehovah ebịghi akaha ndisobo editịm n̄kpọ Satan?

2. Nso ke ibuotikọ emi edineme?

2 Unana ime ọdiọk etieti sia enye ekeme ndinam owo anam n̄kpọ ke ibụmede. Didie ke ikeme ndika iso nnyene edu editie mbet? Ibuotikọ emi ayan̄wam nnyịn inam emi sia ọyọbọrọ mme mbụme emi ẹtienede mi. (1) Nso ke ikeme ndikpep nto uwụtn̄kpọ ime prọfet Micah? (2) Mme n̄kpọntịbe ewe ẹdiwụt ke utịt enen̄ede ekpere? (3) Didie ke ikeme ndiwụt esịtekọm mban̄a ime Jehovah?

NSO KE IKEME NDIKPEP NTO UWỤTN̄KPỌ MICAH?

3. N̄kpọ eketie didie ke Israel ke eyo Micah?

3 Kot Micah 7:2-6. Micah emi ekedide prọfet Jehovah ama okụt ke nditọ Israel ikanamke akpanikọ aba inọ Jehovah, ndien mmọ ẹma ẹdiọk ẹkesịm akpatre ke ini ukara idiọk Edidem Ahaz. Micah ekemen mmọ odomo ye “eto n̄kukịm” ye “ọkọ n̄kukịm.” Kpa nte eto n̄kukịm m̀mê ọkọ n̄kukịm ekemede ndinọ owo emi asan̄ade ekpere enye unan, ndiọi nditọ Israel oro ẹma ẹsinam owo ekededi emi adiande idem ye mmọ ibak. Mmọ ẹma ẹdiọk tutu eyeneka edifefehe eyeneka. Micah ama ọbọn̄ akam ọnọ Jehovah ke ofụri esịt sia enye ama okụt ke inyeneke se imọ ikemede  ndinam. Ekem enye ama enyene ime ebet Jehovah anam n̄kpọ aban̄a idiọk idaha oro. Enye ama enyene mbuọtidem ke Jehovah ọyọkọk mfịna emi ke edikem ini Esie.

4. Nso mfịna ke nnyịn inyene?

4 Nnyịn n̄ko idụn̄ ye mbon emi ẹmade idemmọ kpọt. Ata ediwak owo “ẹnana esịtekọm, inyeneke nsọn̄ọnda, [inyụn̄] inyeneke ndammana ima.” (2 Tim. 3:2, 3) Esifịna nnyịn ndikụt nte mme nsan̄autom, nditọ ufọkn̄wed, ye mbọhọidụn̄ nnyịn ẹmade idemmọ kpọt. Edi mfịna ndusụk mme asan̄autom Abasi akam okpon akan emi. Jesus ọkọdọhọ ke mme anditiene imọ ẹyesobo ubiọn̄ọ ke ubon, onyụn̄ etịn̄ ikọ emi ebietde se idude ke Micah 7:6 ndiwụt se etop imọ edinamde. Jesus ọkọdọhọ ete: “N̄kedi nditọ ubahade, nnam owo an̄wana ye ete esie, nnyụn̄ nnam eyenan̄wan an̄wana ye eka esie, nnyụn̄ nnam n̄wan eyen an̄wana ye eka ebe esie. Ke akpanikọ, mme asua owo ẹdidi mbonufọk esie.” (Matt. 10:35, 36) Esisọn̄ etieti ndiyọ nsahi ye ubiọn̄ọ iman nnyịn emi mînịmke ke akpanikọ! Edi ikpanaha iyak idem emem nnyịn edieke isobode utọ idomo emi. Utu ke oro, ikpenyene ndisọn̄ọ nda nnyụn̄ nnyene ime mbet Jehovah ọkọk mfịna emi. Edieke isikpede enye ubọk kpukpru ini ite an̄wam nnyịn, enye ọyọnọ nnyịn ukeme ye ọniọn̄ ndiyọ mfịna emi.

5, 6. Didie ke Jehovah ọkọdiọn̄ Micah, edi nso ke Micah mîkodụhe ikụt?

5 Jehovah ama ọdiọn̄ Micah ke ntak emi enye ekenyenede ime. Micah ama okụt utịt Edidem Ahaz ye utịt idiọk ukara esie. Enye ama odu ke ini eyen Ahaz, eti Edidem Hezekiah, akadade ubọn̄ onyụn̄ afiakde ọtọn̄ọ edisana utuakibuot. Se Jehovah ọkọdọhọde Micah etịn̄ aban̄a Samaria ama onyụn̄ osu ke ini mbon Assyria ẹkesobode obio ubọn̄ edem edere Israel.—Mic. 1:6.

6 Edi Micah ikodụhe ikụt nte kpukpru ntịn̄nnịm ikọ emi Jehovah ọkọnọde enye odudu spirit etịn̄ osude. Ke uwụtn̄kpọ, Micah ekewet ete: “Ke mme akpatre usen, obot ufọk Jehovah ọyọsọn̄ọ owụhọ okon̄ akan enyọn̄ ikpọ obot, ẹyenyụn̄ ẹmenede enye okon̄ akan n̄kpri obot; ndien mme owo ẹyebụn̄ọ ẹka do. Ndien ediwak idụt ẹyeka ẹkedọhọ ẹte: ‘Mbufo ẹdi, ẹyak nnyịn idọk ke obot Jehovah.’” (Mic. 4:1, 2) Micah ama akpa ata anyan ini mbemiso ntịn̄nnịm ikọ emi okosude. Kpa ye oro, enye ama ebiere ndisọn̄ọ nda ye Jehovah idem ekpededi ẹyom ndiwowot enye, inamke n̄kpọ m̀mê mbon eken ẹkedu didie uwem. Enye ekewet ete: “Kpukpru owo ẹyesan̄a ke enyịn̄ abasi mmọ; edi nnyịn idisan̄a ke enyịn̄ Jehovah Abasi nnyịn ke nsinsi nsinsi.” (Mic. 4:5) Micah ama enyene ime ebet Jehovah ke ini n̄kpọ mîkọfọnke koro enye ama enyene ọyọhọ mbuọtidem ke Jehovah oyosu kpukpru se Enye ọkọn̄wọn̄ọde. Anam-akpanikọ prọfet emi ama eberi edem ke Jehovah.

7, 8. (a) Ntak emi ikpọbuọtde idem ye Jehovah? (b) Nso idinam etie nte ke ini ebe usọp usọp?

7 Ndi nnyịn imọbuọt idem ye Jehovah nte Micah ọkọbuọtde? Imenyene eti ntak ndibuọt. Nnyịn imokụt nte ntịn̄nnịm ikọ Micah osude. Ke “mme akpatre usen” emi, ediwak miliọn owo ke kpukpru idụt ye esien ye usem ke ẹdọk ẹdi “obot ufọk Jehovah.” Kpa ye emi mmọ ẹtode nsio nsio idụt emi mîdụhe ke emem ye kiet eken, mmọ ẹda “akan̄kan̄ mmọ ẹdom n̄kpọ ufụn̄isọn̄,” inyụn̄ “ikpepke aba ekọn̄.” (Mic. 4:3) Edi ata akwa ifet ọnọ nnyịn ndisịne ke otu ikọt Jehovah emi ẹdide mbon emem!

8 Kpukpru nnyịn imoyom Jehovah ọsọsọp osobo idiọk editịm n̄kpọ emi. Edi edieke anade inyene ime ibet Jehovah, ana ise n̄kpọ nte enye esede. Enye  enịm usen emi enye aduakde ndida Jesus Christ, kpa “owo emi enye emekde,” n̄kpe ikpe nnọ ubonowo. (Utom 17:31) Edi mbemiso ini oro, Abasi ọnọ kpukpru orụk owo ifet ndinyene “nnennen ifiọk akpanikọ” nnyụn̄ nnam n̄kpọ ekekem ye ifiọk emi man ẹkpenyan̄a mmọ. Ediwak owo ẹkeme nditaba uwem mmọ. (Kot 1 Timothy 2:3, 4.) Edieke isịnde idem in̄wam mme owo ẹnyene nnennen ifiọk ẹban̄a Abasi, iditiehe nnyịn nte ke ini emi osụhọde mbemiso Jehovah ebiere ikpe ebịghi akaha; edikam itie nte ke ini ebe usọp usọp. Ke mîbịghike—ke ini nnyịn mîkam idorike enyịn—utịt eyedi. Ndien ama edi, esịt ayadat nnyịn nte ke ima inen̄ede isịn idem ikwọrọ etop Obio Ubọn̄.

MME N̄KPỌNTỊBE EWE ẸDIWỤT KE UTỊT ENEN̄EDE EKPERE?

9-11. Ndi 1 Thessalonica 5:3 osu? Nam an̄wan̄a.

9 Kot 1 Thessalonica 5:1-3. Mme idụt ẹmọn̄ ẹtan̄a “Emem ye ifụre!” ke mîbịghike. Ana “itaba idap inyụn̄ inyene ikike” edieke nnyịn mîyomke se ẹtan̄ade emi otụn nnyịn usụn̄. (1 Thess. 5:6) Ẹyak ineme esisịt iban̄a mme n̄kpọntịbe emi ẹwụtde ke ẹmọn̄ ẹsọp ẹtan̄a Emem ye ifụre.

10 Mme owo ẹma ẹnen̄ede ẹyom emem ke akpa ekọn̄ ererimbot ama okokụre ye ke udiana ekọn̄ ererimbot ama okokụre n̄ko. Ke akpa ekọn̄ ererimbot ama okokụre, ẹma ẹtọn̄ọ Esop Ediomi Mme Idụt ẹnyụn̄ ẹdori enyịn ke enye ayada emem edi. Ekem, ke ini udiana ekọn̄ ererimbot okokụrede, ẹma ẹtọn̄ọ Edidiana Mme Idụt emi mme owo ẹkenen̄erede ẹdori enyịn ke eyesịn emem ke isọn̄. Ukara ye mme adaiso ido ukpono ẹnen̄ede ẹnịm ke esop mbiba emi ẹyenam ubonowo ẹnyene emem. Ke uwụtn̄kpọ, Edidiana Mme Idụt ẹma ẹtan̄a ẹte ke 1986 edi Isua Emem Ofụri Ererimbot. Mme andikara ye mme adaiso ido ukpono emi ẹtode ediwak idụt ẹma ẹdiana ye adaibuot Ufọkabasi Catholic ke Assisi ke Italy ẹbọn̄ akam man emem odu.

 11 Edi nditan̄a emem ye ifụre emi m̀mê mmọ eken emi ẹtiede ntem isụhu ntịn̄nnịm ikọ oro ke 1 Thessalonica 5:3. Ntak-a? Koro ‘nsobo ibuatke’ mme owo nte ẹketịn̄de ke itien̄wed oro.

12. Nso ke nnyịn idiọn̄ọ iban̄a editan̄a “Emem ye ifụre”?

12 Mmanie ẹditan̄a “Emem ye ifụre!” emi? Ndi mme adaiso ido ukpono Christendom ye eke mme ido ukpono eken ẹyetiene ẹtan̄a n̄kpọ emi? Didie ke ukara ẹditan̄a “Emem ye ifụre”? N̄wed Abasi itịn̄ke inọ nnyịn. Edi se idiọn̄ọde edi ke inamke n̄kpọ m̀mê ẹditan̄a didie n̄kpọ emi, m̀mê oyonyụn̄ enen̄ede etie nte ke ẹtịn̄ akpanikọ, enye edidi ata nsu. Satan edisụk ikara akani editịm n̄kpọ emi. Ererimbot emi abiara ekesịm akpatre, ndien edisụk itie ntre. Ọkpọdiọk etieti edieke owo nnyịn ndomokiet ekpenịmde nsu Satan emi onyụn̄ ọtọn̄ọ ndisịn idem ke n̄kpọ ererimbot emi!

13. Ntak emi mme angel ẹmụmde ofụm nsobo ẹkama?

13 Kot Ediyarade 7:1-4. Ke adan̄aemi ibetde 1 Thessalonica 5:3 osu, mme okop-odudu angel ke ẹmụm ofụm nsobo akwa ukụt ẹkama. Nso ke mmọ ẹbet? Apostle John etịn̄ akpan n̄kpọ kiet emi mmọ ẹbetde—oro edi, edifịk “ifịn Abasi nnyịn” oro ẹyetde aran akpatre idiọn̄ọ. * Mme angel ẹyesana ofụm nsobo ẹyak ke ndondo oro ẹkụrede ndifịk ifịn Abasi idiọn̄ọ emi. Nso iditịbe ke oro ebede?

14. Nso iwụt ke utịt Akwa Babylon enen̄ede ekpere?

14 Ẹyenọ Akwa Babylon, oro edi, ofụri nsunsu ido ukpono, utịp oro ekemde ye enye. “Mme owo ye otuowo ye mme idụt ye mme usem” idikemeke ndinen̄ede n̄n̄wam enye. Nnyịn imọtọtọn̄ọ ndikụt ke utịt esie enen̄ede ekpere. (Edi. 16:12; 17:15-18; 18:7, 8, 21) Ke nditịm ntịn̄, imokụt emi ke mme mbụk n̄kpọntịbe, emi mme owo ẹtịn̄de nte mmimọ isuade ido ukpono ye mme adaiso ido ukpono. Kpa ye emi, mme adaiso Akwa Babylon ẹkere ke inyeneke se idinamde mmimọ. Mmọ ẹbian̄a idem. Ke ini ẹditan̄ade “Emem ye ifụre!” ukara ererimbot Satan ẹyen̄wana inikiet inikiet ye nsunsu ido ukpono ẹnyụn̄ ẹsobo enye ẹfep. Akwa Babylon ididụhe aba tutu amama! Ke akpanikọ, odot inyene ime ibet utọ n̄wọrọnda n̄kpọntịbe emi.—Edi. 18:8, 10

DIDIE KE IKEME NDIWỤT ESỊTEKỌM MBAN̄A IME ABASI?

15. Ntak emi Jehovah enyenede ime?

15 Kpa ye emi mme owo ẹsuenede enyịn̄ Jehovah, enye enyene ime ebet nnennen ini ndisobo ererimbot emi. Jehovah iyomke owo ndomokiet emi enyenede eti esịt atak. (2 Pet. 3:9, 10) Ndi nte onyụn̄ etiede nnyịn n̄ko ke idem edi oro? Mbemiso usen Jehovah edide, imekeme ndiwụt esịtekọm mban̄a ime esie ke mme usụn̄ emi ẹtienede mi.

16, 17. (a) Ntak emi akpanade in̄wam mbon emi mîwọrọke an̄wautom aba? (b) Ntak emi akpanade mbon emi mîwọrọke an̄wautom aba ẹsọsọp ẹnyọn̄ ẹbịne Jehovah?

16 N̄wam mbon emi mîwọrọke an̄wautom aba. Jesus ọkọdọhọ ke idara esikpon ke heaven ke ini ẹkụtde erọn̄ kiet emi okosopde. (Matt. 18:14; Luke 15:3-7) Emi owụt ke Jehovah enen̄ede ekere aban̄a mbon emi ẹwụtde ke imama enye, idem ekpededi mmọ isịnke idem inam n̄kpọ esie idahaemi. Ke ini in̄wamde mme utọ owo oro ẹfiak ẹnyọn̄ ẹdi esop, nnyịn imetiene inam Jehovah ye mme angel ẹkop idatesịt.

17 Ndi afo edi kiet ke otu mbon emi mîsịnke aba idem inam n̄kpọ Abasi?  Ekeme ndidi ọkọkpọn̄ esop Jehovah ke ntak emi eyenete akanamde se ibiakde fi. Sia ekemede ndidi ebighi emi eketịbe, bụp idemfo ete: ‘Ndi uwem ọfọn onyụn̄ enem mi idahaemi akan nte ekedide? Ndi Jehovah ekedue mi, m̀mê anana-mfọnmma owo ekedue? Ndi akanam Jehovah anam mi ibak?’ Imọfiọk ke Jehovah ọfọfọn ye nnyịn kpukpru ini. Enye esiyak nnyịn idia ufọn nti n̄kpọ emi enye ọnọde, idem ekpededi nnyịn iduhe uwem ekekem ye uyakidem nnyịn. (Jas. 1:16, 17) Usen Jehovah ọmọn̄ edi ke mîbịghike. Ini edi emi ndifiak nnyọn̄ mbịne edima Ete nnyịn eke heaven ye esop esie—kpa n̄kukụre ebiet ubọhọ ke mme akpatre usen emi.—Deut. 33:27; Heb. 10:24, 25.

Ikọt Jehovah ẹnam ofụri se mmọ ẹkekeme man ẹn̄wam mbon emi mîwọrọke an̄wautom aba ẹfiak ẹnyọn̄ ẹbịne Jehovah (Se ikpehe ekikere 16, 17)

18. Ntak emi ikpeberede ye mbon emi ẹmekde ẹte ẹda usụn̄?

18 Ka iso bere ye mbon emi ẹdade usụn̄. Jehovah esida nnyịn usụn̄ onyụn̄ ekpeme nnyịn sia enye edi eti ekpemerọn̄. Enye emek Eyen esie ete edi Etubom Ekpemerọn̄. (1 Pet. 5:4) Mbiowo emi ẹdude ke se ibede esop 100,000 ẹsise ẹban̄a erọn̄ Abasi kiet kiet. (Utom 20:28) Nnyịn isiwụt esịtekọm inọ Jehovah ye Jesus ke ofụri se mmọ ẹnamde ẹnọ nnyịn ke ini ikade iso ibere ye mbon emi ẹmekde mi ẹte ẹda usụn̄.

19. Didie ke ikeme ndisịk n̄kpere kiet eken?

19 Ẹdiana ye kiet eken. Nso ke emi ọwọrọ? Ke ini mbonekọn̄ emi ẹtịmde ẹnọ ukpep ẹkụtde nte asua edide en̄wan, mmọ ẹsisịk ẹkpere kiet eken. Ntem, esisọn̄ ndibe ndụk n̄n̄wana ye mmọ. Satan etetịm an̄wana ye ikọt Abasi. Idịghe ini edi emi ndin̄wana ke otu idem nnyịn. Ini edi emi ndisịk n̄kpere kiet eken, mfre mban̄a unana mfọnmma nditọete nnyịn, nnyụn̄ mberi edem ke Jehovah.

Ini edi emi ndidiana kiet n̄n̄wana ye Satan ye mme demon (Se ikpehe ekikere 19)

20. Nso ke inyene ndinam idahaemi?

20 Ẹyak inen̄ede ikpere Jehovah inyụn̄ inyene edu editie mbet. Ẹyak inyene ime itie ibet ini emi ẹditan̄ade “Emem ye ifụre!” ye ini emi ẹdifịkde mbon emi ẹmekde akpatre idiọn̄ọ. Ke oro ebede, angel inan̄ oro ẹyesana ofụm nsobo ẹyak, ndien ẹyesobo Akwa Babylon. Ke adan̄aemi itiede ibet mme n̄kpọntịbe emi, ẹyak itiene ndausụn̄ mbon emi ẹmekde ẹte ẹda usụn̄ ke esop Jehovah. Ẹyak idiana kiet in̄wana ye Devil ye mme demon! Ini edi emi ndinam item andiwet psalm emi: “Ẹnyene uko, ẹnyụn̄ ẹsọn̄ esịt, kpukpru mbufo emi ẹbetde Jehovah.”—Ps. 31:24.

^ ikp. eki. 13 Edieke oyomde ndifiọk nte edifịk mme Christian oro ẹyetde aran akpa idiọn̄ọ okpụhọrede ye edifịk mmọ akpatre idiọn̄ọ, se Enyọn̄-Ukpeme eke January 1, 2007, page 30-31.