Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) OCTOBER 2013

Ndi Emekeme Ndinen̄ede Ndụri Mme Owo Utọn̄?

Ndi Emekeme Ndinen̄ede Ndụri Mme Owo Utọn̄?

Ata edinem fim emi ẹkotde A Trip Down Market Street ama owụt nte n̄kpọ eketiede ke San Francisco ke U.S.A. ke ntọn̄ọ ntọn̄ọ iduọk isua 1900. Owo itịn̄ke ikọ ke fim emi. Mme andinam fim emi ẹkekama ukwak usio ndise ẹsịne ke ekpri tren emi awatde ke urụk ke ufụmenyọn̄ ẹsio kpukpru se ikade iso ke efak. Ẹma ẹsio ukpatn̄kpọ emi enan̄-mbakara odụride ye mme ata akpa nsiondi ubomisọn̄, mbon udep ye mme anyam n̄wedmbụk n̄kpọntịbe emi ẹnamde se ibehede mmọ.

Se ikanamde fim emi enen̄ede anam owo mbọm edi ke etie nte ẹkenam enye ke April 1906, usen ifan̄ mbemiso enyene-ndịk unyekisọn̄ ye ikan̄ emi okobụberede ke ntak unyekisọn̄ oro ke April 18, emi okowotde se ibede tọsịn owo ita onyụn̄ ekperede ndisobo edem kiet obio oro mfep. Ekeme ndidi ndusụk owo oro ẹkesiode ke fim oro ẹkedu uwem usen ifan̄ kpọt tọn̄ọ ẹkenam fim oro. Scott Miles, eyeyen owo kiet ke otu mme andikanam fim oro, ọdọhọ ete: “Mmokụt mme owo oro do, edi mmọ ifiọkke se iditịbede inọ mmimọ ke mîbịghike. Idụhe nte mbọm mmọ mîkpanamke fi.”

Sia owo mîkọtọtke mme owo, unyekisọn̄ 1906 ye ikan̄ emi okobụberede ke ntak oro ama ata ata akamba ikpehe ufọt obio San Francisco

Ukem n̄kpọ emi ọmọn̄ onyụn̄ etịbe ke eyo nnyịn. Mbọm mbọhọidụn̄ nnyịn anam nnyịn n̄ko. Mmọ ke ẹnam se ibehede mmọ ke usen ke usen, edi ifiọkke afanikọn̄ emi edisịmde mmọ ke mîbịghike—oro edi, nsobo idiọk ererimbot emi. Edi sia nsobo emi mîtiehe nte unyekisọn̄ emi owo mîfiọkke ke eyetịbe, esisịt ifet odu ndidụri mbọhọidụn̄ nnyịn utọn̄ mban̄a usen ubiereikpe Jehovah. Ekeme ndidi emesisio ifet kpukpru urua ada anam utom ukwọrọikọ to ke enyịnusụn̄ sịm enyịnusụn̄, edi ndi emekeme ndinen̄ede ndụri mme owo utọn̄?

JESUS AMA ESIKWỌRỌ IKỌ KPUKPRU INI

Odot ikere iban̄a uwụtn̄kpọ Jesus sia enye ama esikwọrọ ikọ kpukpru ini. Enye ama esikwọrọ ikọ ọnọ kpukpru owo oro enye okosobode, edide ọbọ a-tax emi enye okosobode ke usụn̄ m̀mê n̄wan emi enye okokụtde ke obube mmọn̄ ke ini nduọkodudu uwemeyo. (Luke 19:1-5; John 4:5-10, 21-24) Idem ke ini Jesus okoyomde ndiduọk odudu, enye ama enyịme nditre nduọkodudu oro man ekpep mme owo n̄kpọ. Mbọm mbọhọidụn̄ esie ama anam enye enen̄ede esịn ifịk ọkwọrọ ikọ. (Mark 6:30-34) Didie ke ẹkpebe ifịk Jesus mfịn?

MMỌ ẸDA KPUKPRU IFET ẸKWỌRỌ IKỌ

Melika odụn̄ ke ufọk oro mbon ukpeme mîsiyakke ẹdụk nte ẹmama. Ediwak mbọhọidụn̄ esie ẹdi nditọ ufọkn̄wed emi ẹtode isenidụt, emi ẹnyenede  akama-ke-ubọk telefon ndien nọmba fon ye enyịn̄ mmọ isịneke ke n̄wed. Enye ama san̄asan̄a ifet oro enye enyenede ndisitọn̄ọ nneme Bible ye mbọhọidụn̄ esie ke barakọn̄ ye ke n̄kpọ umen owo ndọk ufọkenyọn̄. Enye ọdọhọ ete: “Mmekeme ndidọhọ ke efakutom mi edi oro.” Melika esikama n̄wed ke ediwak usem, ndien ediwak owo ẹsibọ tract ye magazine. Enye esimen mmọ n̄ko owụt ikpehe Intanet nnyịn, emi edide jw.org. Enye ọtọn̄ọ ediwak ukpepn̄kpọ Bible.

Sonia n̄ko esidu ke mben̄eidem ndikwọrọ ikọ nnọ owo ekededi, edieke enye ekemede. Enye anam utom ke ufọkibọk owo, ndien utịtmbuba esie edi ndikwọrọ ikọ nnọ kpukpru nsan̄autom esie. Akpa, enye ama ada ini odụn̄ọde ọfiọk se owo kiet kiet oyomde onyụn̄ amade. Ekem, enye ada ini nduọkodudu aka ebịne mmọ owo kiet kiet man ekenyene nneme Bible ye mmọ. Emi ama anam enye ọtọn̄ọ ukpepn̄kpọ Bible iba. Enye odiomi n̄ko ndida ndusụk ini ke ini nduọkodudu esie n̄kwọrọ ikọ nnọ mbon oro ẹtiede ẹbet abiausọbọ.

DA KPUKPRU IFET ORO ENYENEDE KWỌRỌ IKỌ

Owo kiet emi ọkọbọhọde unyekisọn̄ 1906 oro okokot enye “ndiọkn̄kan unọmọ oro akanam esịmde stet m̀mê obio ekededi.” Edi ke mîbịghike, kpukpru unọmọ ididịghe n̄kpọ ndomokiet ke ini ẹmende ẹdomo ye usen emi ẹdidade usiene ẹsọk “mmọ eke mîfiọkke Abasi.” (2 Thess. 1:8) Jehovah enen̄ede oyom mme owo ẹkabade esịt ẹnyụn̄ ẹnam ntọt oro Mme Ntiense esie ẹnọde mmọ.—2 Pet. 3:9; Edi. 14:6, 7.

Ndi emekeme ndida kpukpru ifet oro enyenede n̄kwọrọ ikọ ke adan̄aemi anamde mbubehe fo ke usen ke usen?

Afo emenyene ifet ndinam mme owo ẹfiọk ke idu ke ndiọkeyo nnyụn̄ n̄n̄wam mmọ ẹkpọn̄ udọn̄ idemmọ man ẹkpeyom Jehovah. (Zeph. 2:2, 3) Ndi emekeme ndida kpukpru ifet oro enyenede n̄kwọrọ ikọ nnọ nsan̄autom, mbọhọidụn̄, ye mbon oro osobode ke usen ke usen? Ndi emekeme ndinen̄ede ndụri mme owo utọn̄?