Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) SEPTEMBER 2013

Mme Mbụme Oro Mme Andikot Ẹbụpde

Mme Mbụme Oro Mme Andikot Ẹbụpde

Ntak emi Jesus akatuade mbemiso anamde Lazarus eset, nte ẹwụtde ke John 11:35?

Nnyịn imesitua eyet ke ini owo nnyịn akpade, sia imọfiok ke nnyịn idikwe enye aba. Jesus ama enen̄ede ama Lazarus, edi idịghe n̄kpa Lazarus akanam enye atua. Mbụk oro owụt ke mbọm iman ye mme ufan Lazarus emi ẹkefụhọde n̄kpa esie akanam Jesus atua.—John 11:36.

Ke ini Jesus okokopde ke Lazarus ọdọdọn̄ọ, enye ikefeheke ika ufọk mme Lazarus ikanam idem ọsọn̄ enye. Bible ọdọhọ ete: “Ke ini [Jesus] okopde ete [Lazarus] ọdọdọn̄ọ, enye aka iso odu usen iba ke ebiet emi enye okodude.” (John 11:6) Ntak emi Jesus akabiatde ini? Enyene se ikanamde enye anam ntre. Jesus ọkọdọhọ ete: “Udọn̄ọ emi idịghe udọn̄ọ n̄kpa, edi edi man ayarade ubọn̄ Abasi, man okpoto ke enye ẹnọ Eyen Abasi ubọn̄.” (John 11:4) Udọn̄ọ Lazarus ikedịghe udọn̄ọ n̄kpa. Jesus okoyom ndida n̄kpa Lazarus ‘nyarade ubọn̄ Abasi.’ Didie? Ke ndinam ata n̄woronda utịben̄kpọ, oro edi, ndinam edima ufan esie eset.

Ke ini Jesus ekenemede n̄kpọ emi ye mbet esie, enye ekemen n̄kpa odomo ye idap. Oro akanam enye ọdọhọ ke ‘imọn̄ ika do man ikedemede Lazarus ke idap.’ (John 11:11) Jesus akada ndinam Lazarus eset nte ete m̀mê eka ndidemede eyen ke idap. Ntre ufọn ikodụhe enye ndikpokop ubiak n̄kpa Lazarus.

Ntak emi Jesus akatuade ndien? Mme ufan̄ikọ eken ẹbọrọ mbụme emi. Ke ini Jesus okosobode ye Mary eyeneka Lazarus onyụn̄ okụtde nte enye ye mbon eken ẹtuade, enye ama “omụm mmụm ke spirit, esịt onyụn̄ etịmede enye.” Jesus ndikụt nte n̄kpa emi abiakde mmọ ama afịna enye tutu enye “omụm mmụm ke spirit.” Oro akanam “Jesus atua eyet.” Jesus ama enen̄ede ofụhọ ke ini okokụtde nte ndima ufan esie ẹfụhọde ntre.—John 11:33, 35.

Mbụk emi owụt ke Jesus enyene odudu ye ukeme ndinam mbon nnyịn emi ẹkpade ẹset ẹdikop nsọn̄idem ke obufa ererimbot. Emi n̄ko anam nnyịn ifiọk ke mbon oro owo mmọ akpade ke ntak idiọkn̄kpọ Adam esinam Jesus mbọm. N̄kpọ en̄wen oro ikpepde ito mbụk emi edi ke akpana mbon oro ẹfụhọde n̄kpa owo mmọ ẹnam nnyịn mbọm.

Jesus ama ọfiọk ke imọ iyanam Lazarus eset. Kpa ye oro, ima oro enye akamade mme ufan esie ye mbọm mmọ ama anam enye atua. Kpasụk ntre, mbọm ekeme ndinam nnyịn ‘ituan̄a ye mmọ emi ẹtuan̄ade.’ (Rome 12:15) Nditua ke ini owo akpade iwọrọke ke owo inyeneke mbuọtidem ke mme owo ẹyeset ke n̄kpa. Ntem, odot nte Jesus ekenịmde uwụtn̄kpọ editua mbon emi owo mmọ akpade mbọm ke nditua ke ofụri esịt, idem ke ini enye ọkọfiọkde ke imọn̄ inam Lazarus eset.