Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) AUGUST 2013

Kûdedei ‘Uyat Esịt ye Jehovah’

Kûdedei ‘Uyat Esịt ye Jehovah’

“Ndisịme ido owo abiat usụn̄ esie, ndien enye ayat esịt ye Jehovah.”—N̄KE 19:3.

1, 2. Ntak emi nnyịn mîkpọdọhọke ke Jehovah edi ntak mfịna ubonowo? Nọ uwụtn̄kpọ?

YAK idọhọ ke ọmọdọ ndọ ke ediwak isua idahaemi onyụn̄ enen̄ede okop inem ndọ fo. Ndien usen kiet, ke ini ọnyọn̄de se akakade edi, afo okụt ke ufọk fo edidi n̄kpọ en̄wen. Ẹma ẹbiat kpukpru n̄kpọ. Ata ediye ufọk fo edibiet ebiet emi oto-obot afanikọn̄ ọnọmọde. Ndi okpobụmede obụp ete, “Nso inam n̄wan mi anam utọ n̄kpọ emi?” Mîdịghe ndi okpobụp ete, “Anie anam utọ n̄kpọ emi?” Imọfiọk ke ọyọhọ iba emi ke okpobụp. Ntak-a? Sia ọmọfiọk ke edima an̄wan fo ikemeke ndinam utọ ibak oro.

2 Mfịn, usabaden̄kpọ, afai, ye oburobụt ido ẹbiat isọn̄. Sia idide nditọ ukpepn̄kpọ Bible, imọfiọk ke idịghe Jehovah edi ntak mfịna emi. Enye okobot isọn̄ ete edi ediye Paradise. (Gen. 2:8, 15) Jehovah edi Abasi ima. (1 John 4:8) N̄wed Abasi anam nnyịn ifiọk owo emi edide ntak ediwak mfịna ererimbot. Owo oro edi Satan kpa Devil, “andikara ererimbot emi.”—John 14:30; 2 Cor. 4:4.

3. Didie ke ikeme ndinyene ukwan̄ ekikere mban̄a mfịna nnyịn?

3 Nte ededi, nnyịn ikemeke ndidọhọ ke Satan edi ntak kpukpru mfịna nnyịn. Ntak-a? Sia ndudue nnyịn edi ntak ndusụk mfịna nnyịn. (Kot Deuteronomy 32:4-6.) Imekeme ndidọhọ ke imenịm emi. Edi sia idide mme anana mfọnmma, imekeme nditọn̄ọ ndinyene ukwan̄ ekikere mban̄a mfịna nnyịn, ndien oro ekeme ndida afanikọn̄ ndi. (N̄ke 14:12) Didie? Utu ke ndiduọhọ idem nnyịn m̀mê Satan ke mfịna oro esịmde nnyịn, imekeme nditọn̄ọ ndiduọhọ Jehovah. Imakam ikeme ‘ndiyat esịt ye Jehovah.’—N̄ke 19:3.

4, 5. Didie ke Christian ekeme ‘ndiyat esịt ye Jehovah’?

4 Ndi imenen̄ede ikeme ‘ndiyat esịt ye Jehovah’? Ke akpanikọ, oro ọkpọwọrọ ikpîkpu. (Isa. 41:11)  Nso ikpedi udori nnyịn? Ewet uto kiet ọkọdọhọ ete: “Ubọk fo omụhọ akaha nditọ Abasi ita.” Ekeme ndidi nnyịn idisioho itịn̄ ke imayat esịt ye Jehovah. Edi Mme N̄ke 19:3 ọdọhọ ke ndisịme ido owo “abiat usụn̄ esie, ndien enye ayat esịt ye Jehovah.” Ẹkeme nditọn̄ọ ndikụt emi ke nte owo anamde n̄kpọ. Owo ekeme ndinam n̄kpọ emi etiede nte ndisịn Jehovah ke esịt. Oro ekeme ndinam owo inen̄ekede isịn idem ke utom Jehovah m̀mê etre nditiene esop ntuak ibuot nnọ enye.

5 Nso ikeme ndinam nnyịn ‘iyat esịt ye Jehovah’? Didie ke ikeme ndifep afia oro? Ọfọn ifiọk mme ibọrọ mbụme emi, koro emi abuana itie ufan nnyịn ye Jehovah Abasi!

NSO IKEME NDINAM NNYỊN ‘IYAT ESỊT YE JEHOVAH’?

6, 7. Ntak emi nditọ Israel eyo Moses ẹketọn̄ọde ndikụni mban̄a Jehovah?

6 Nso ikeme ndinam anam-akpanikọ asan̄autom Jehovah ọtọn̄ọ ndiduọhọ Abasi ke esịt esie? Ẹyak ineme n̄kpọ ition inyụn̄ idụn̄ọde mme uwụtn̄kpọ ke Bible emi ẹwụtde nte ndusụk owo ke eset ẹkeduọde ke afia emi.—1 Cor. 10:11, 12.

Ndikpan̄ utọn̄ nnọ idiọk ikọ ekeme ndibiat fi (Se ikpehe ekikere 7)

7 Idiọk ikọ mbon en̄wen ekeme ndinam nnyịn inam se mîfọnke. (Kot Deuteronomy 1:26-28.) Ikebịghike nditọ Israel ẹkewọrọ ke ufụn ke Egypt. Jehovah ama amia idụt oro ẹkefịkde ikọt esie do ufen duop, ekem osobo Pharaoh ye udịmekọn̄ esie ke Ididuot Inyan̄. (Ex. 12:29-32, 51; 14:29-31; Ps. 136:15) Ikọt Abasi ẹma ẹben̄e idem ndidụk Isọn̄ Un̄wọn̄ọ. Edi kpa ini oro ke mmọ ẹketọn̄ọ ndiduọhọ Jehovah. Nso ikanam mmọ ẹnana mbuọtidem ntem? Idiọk etop oro ndusụk mbon oro ẹkekade ndiyep Isọn̄ Un̄wọn̄ọ ẹkedade ẹdi akanam idem enyek mmọ. (Num. 14:1-4) Nso ke emi akada edi? Abasi ikayakke ofụri emana oro ẹdụk “eti isọn̄.” (Deut. 1:34, 35) Nso ke ikeme ndikpep nto emi? Idiọk ikọ mbon en̄wen ekeme ndinam nnyịn imem ke mbuọtidem onyụn̄ anam itọn̄ọ ndikụni mban̄a nte Jehovah anamde n̄kpọ ye nnyịn.

8. Nso ikanam ikọt Abasi ke eyo Isaiah ẹtọn̄ọ ndiduọhọ Jehovah ke se ikọwọrọde mmọ?

8 Nsọn̄ọn̄kpọ ye afanikọn̄ ẹkeme ndinam idem emem nnyịn. (Kot Isaiah 8:21, 22.) N̄kpọ ama enen̄ede ọsọn̄ ye mbon Judah ke eyo Isaiah. Mme asua ẹma ẹkan mmọ ẹkụk. Biọn̄ ama ọdọn̄ ata ediwak owo sia udia mîkodụhe. Edi enyene mfịna emi akakam okponde akan biọn̄—oro edi, akan̄ eke spirit. (Amos 8:11) Edi utu ke mmọ ndibuọt idem ke Jehovah man an̄wam mmọ ẹyọ mme mfịna emi, mmọ ẹma ‘ẹsụn̄i’ edidem ye Abasi mmọ. Ọwọrọ mmọ ẹkeduọhọ Jehovah ke mfịna mmọ. Kpasụk ntre, edieke afanikọn̄ m̀mê mfịna en̄wen esịmde nnyịn, imekeme nditọn̄ọ ndiduọhọ Jehovah inyụn̄ idọhọ ke esịt nnyịn ite, ‘Jehovah okodu m̀mọ̀n̄ ke ini n̄koyomde enye?’

9. Ntak emi nditọ Israel ke eyo Ezekiel ẹkekerede ke usụn̄ Jehovah inenke?

9 Nnyịn isifiọkke kpukpru n̄kpọ iban̄a se itịbede. Sia nditọ Israel ke eyo Ezekiel mîkọfiọkke kpukpru n̄kpọ iban̄a se iketịbede, mmọ ẹkekere ke usụn̄ Jehovah ‘inenke.’ (Ezek. 18:29) Eketie nte n̄kpọ eke mmọ ẹkerede ke se mmimọ idade nte unenikpe ọfọn akan se Jehovah adade nte unenikpe, ẹnyụn̄ ẹda esisịt ifiọk mmọ ẹbiere ikpe ẹnọ Abasi. Edieke mbụk Bible m̀mê se iwọrọde nnyịn mînen̄ekede in̄wan̄a nnyịn, ndi nnyịn iyekere ke esịt nnyịn ke se Jehovah anamde inenke?—Job 35:2.

10. Didie ke owo ekeme nditiene idiọk uwụtn̄kpọ Adam?

 10 Nnyịn isinyịmeke idiọkn̄kpọ ye ndudue nnyịn. Adam emi edide akpa owo emi ẹkebotde ọkọduọhọ Abasi ke idiọkn̄kpọ emi enye akanamde. (Gen. 3:12) Okposụkedi emi Adam ọkọfiọkde se iditịbede okonyụn̄ okoide-koi abiat ibet Abasi, enye ọkọduọhọ Jehovah. Eketie nte n̄kpọ eke enye ọdọhọde ke Jehovah ọkọnọ imọ idiọk an̄wan. Toto ke ini oro, mbon en̄wen ẹtiene Adam ẹduọhọ Abasi ke ndudue mmọ. Ọkpọfọn ibụp idem nnyịn ite, ‘Ndi nyayak ndudue mi m̀mê idotenyịn mi ndikpa mfụhọ anam n̄kere ke ibet Jehovah etie ukpan ukpan akaha?’

11. Nso ke ikeme ndikpep nto Jonah?

11 Nnyịn imesikere iban̄a idem nnyịn ikaha. Prọfet Jonah ikamaha nte Jehovah akatuade mbon Nineveh mbọm. (Jonah 4:1-3) Ntak-a? Etie nte enye ama ekere aban̄a idemesie akaha onyụn̄ okop bụt sia owo mîkosoboke Nineveh nte enye akatan̄ade. Jonah ama ekere aban̄a nte mbon en̄wen ẹdidade imọ akan mbọm oro akpakanade enye atua mbon Nineveh emi ẹkekabarede esịt. Ndi nnyịn n̄ko imekeme ndikere mban̄a idem nnyịn tutu iyat esịt ye Jehovah ke ntak emi enye mîsoboke ererimbot emi kan̄a? Edieke edide imọkwọrọ ke ediwak isua ite ke usen Jehovah ekpere, ndien mbon en̄wen ẹtọn̄ọ ndisak nnyịn sia usen oro mîdịghe kan̄a, ndi iyayat esịt ite ke Jehovah anam ubịghi?—2 Pet. 3:3, 4, 9.

SE IKPANAMDE MAN ‘IKÛYAT ESỊT YE JEHOVAH’

12, 13. Edieke itọn̄ọde ndikere ke se Jehovah anamde inenke, nso ke mîkpanaha ifre?

12 Nso ke ikpanam edieke itọn̄ọde ndikere ke se Jehovah anamde inenke? Ti ete ke ifọnke ndikere ntre. Mme N̄ke 19:3 eti nnyịn ete ke ndisịme ido nnyịn ekeme ndinam iduọhọ Jehovah ke mfịna emi edide nnyịn isịn idem  nnyịn. Ntem, ẹyak ikere iban̄a n̄kpọ ition emi ẹdin̄wamde nnyịn ikûyak se iwọrọde nnyịn anam iyat esịt ye Jehovah.

13 Kûfre itie ufan fo ye Jehovah. Edieke idide ufan Abasi, nnyịn idiyatke esịt ye enye. (Kot Mme N̄ke 3:5, 6.) Ana ibuọt idem ye Jehovah. Inaha ida idem nnyịn ke owo ọniọn̄ m̀mê ikere iban̄a idem nnyịn kpọt. (N̄ke 3:7; Eccl. 7:16) Edieke inamde item emi, nnyịn ididuọhọke Jehovah ke ini ndiọi n̄kpọ ẹtịbede.

14, 15. Nso idin̄wam nnyịn ikûyak idiọk ikọ mbon en̄wen abiat nnyịn?

14 Kûyak idiọk ikọ mbon en̄wen abiat fi. Nditọ Israel emi ẹkedude ke eyo Moses ẹma ẹnyene ekese ntak ndinịm ke Jehovah ayada mmimọ odụk Isọn̄ Un̄wọn̄ọ. (Ps. 78:43-53) Edi ke ini mbon uyep duop oro mîkanamke akpanikọ ẹkedade idiọk etop ẹnyọn̄ ẹdi, nditọ Israel ‘iketịghi ubọk esie’—oro edi, mmọ iketịghi se Jehovah akanamde ọnọ mmọ. (Ps. 78:42) Edieke itiede ikere mme edinam Jehovah, itide kpukpru nti n̄kpọ oro enye anamde ọnọ nnyịn, emi ayanam idọdiọn̄ isan̄a ikpere enye. Ntem, nnyịn idiyakke idiọk ekikere mbon en̄wen adian̄ade nnyịn ọkpọn̄ Jehovah.—Ps. 77:11, 12.

15 N̄kpọ en̄wen emi ekemede ndidian̄ade nnyịn n̄kpọn̄ Jehovah edi ndinam n̄kpọ ye nditọete nnyịn ke idiọk usụn̄. (1 John 4:20) Ke uwụtn̄kpọ, ke ini ẹkemekde Aaron akwa oku, nditọ Israel ẹma ẹtọn̄ọ ndisụk uyo. Edi Jehovah akada ke imọ ke mmọ ẹsụk uyo oro. (Num. 17:10) Kpasụk ntre, edieke ikụnide inyụn̄ isụkde mbon oro Jehovah adade ọnọ ndausụn̄ ke ikpehe esop esie eke isọn̄ uyo, emi ọkpọwọrọ ndisụk Jehovah uyo.—Heb. 13:7, 17.

16, 17. Nso ke ana iti ke ini isobode mfịna?

16 Ti ete ke idịghe Jehovah edi ntak mfịna nnyịn. Kpa ye oro nditọ Israel ke eyo Isaiah ẹma ẹkekpọn̄ Jehovah, Enye okosụk oyoyom ndin̄wam mmọ. (Isa. 1:16-19) Ke ini inyenede mfịna mfịn, ọfọn iti ke Jehovah osụk ekekere aban̄a nnyịn onyụn̄ oyom ndin̄wam nnyịn. (1 Pet. 5:7) Ke nditịm ntịn̄, enye ọn̄wọn̄ọ ndinọ nnyịn ukeme oro iyomde man ika iso iyọ.—1 Cor. 10:13.

17 Job ama okụt ndutụhọ kpa ye oro enye akanamde akpanikọ ọnọ Jehovah. Ke ini ndutụhọ esịmde nnyịn, ọkpọfọn iti ke idịghe Jehovah edi ntak mfịna nnyịn. Jehovah isimaha ndikụt mme owo ẹbọde ufen; enye amama edinen ido. (Ps. 33:5) Nnyịn ikpakam itịn̄ nte Elihu ufan Job ite: “Nsa-o ata Abasi ndinam se idiọkde, Ata Ọkpọsọn̄ ndinyụn̄ nnam se mînenke!” (Job 34:10) Jehovah ọnọ nnyịn “kpukpru nti enọ ye kpukpru enọ eke ẹfọnde ẹma.” Idịghe enye edi ntak mfịna nnyịn.—Jas. 1:13, 17.

18, 19. Ntak emi nnyịn mîkpedehedei iyịk Jehovah? Nọ uwụtn̄kpọ.

18 Kûdedei uyịk Jehovah. Abasi ọfọn ama, ndien ekikere esie okon̄ akan eke nnyịn. (Isa. 55:8, 9) Ntre akpana isụhọde idem inyịme ke nnyịn ifiọkke kpukpru n̄kpọ. (Rome 9:20) Nnyịn isiwakke ndifiọk kpukpru n̄kpọ mban̄a se itịbede. Anaedi omokụt nte n̄ke emi edide akpanikọ: “Owo emi ebemde iso etịn̄ ikọ ke itie ikpe edi edinen; nsan̄a esie odụk edi onyụn̄ odụn̄ọde enye ese.”—N̄ke 18:17.

19 Edieke edima ufan nnyịn anamde n̄kpọ emi mîn̄wan̄ake nnyịn ke akpa m̀mê n̄kpọ emi mîbietke enye, ndi nnyịn iyọsọsọp idọhọ ke enye anam idiọk? Mîdịghe ndi ikpekere ke enyene se inamde enye anam utọ n̄kpọ  oro, akpan akpan edieke edide imọfiọk enye ke ediwak isua? Edieke ikpanamde ntem ye ufan nnyịn emi mîfọnke ima, n̄wan̄wadise Ete nnyịn eke heaven, emi usụn̄ ye ekikere esie ẹnen̄erede ẹkon̄ ẹkan eke nnyịn!

20, 21. Ntak emi ọfọnde iduọhọ nnennen owo emi edide ntak mfịna?

20 Duọhọ nnennen owo emi edide ntak mfịna. Ntak emi ikpanamde emi? Sia ekeme ndidi nnyịn idi ntak ndusụk mfịna nnyịn. Edieke nnyịn idide ntak, oyom inyịme oro. (Gal. 6:7) Kûduọhọ Jehovah ke mfịna oro. Ntak emi mîwụtke ifiọk ndiduọhọ Jehovah? Kere ban̄a uwụtn̄kpọ emi: Ubomisọn̄ ekeme ndisọp etieti. Edi ndi akpana ẹduọhọ owo oro akanamde ubomisọn̄ oro ke ini andiwat awatde ọsọp akaha ke n̄wọn̄ọde usụn̄ tutu ekenyene unọmọ? Baba-o! Kpasụk ntre, Jehovah okobot nnyịn ye ifụre ndimek se iyomde ndinam. Edi enye ọnọ nnyịn ndausụn̄ n̄ko ke nte ikpanamde nti ubiere. Ntre, ntak emi ikpọduọhọde Andibot nnyịn ke ini inamde ndudue?

21 Edi idịghe ndudue ye idiọk edinam nnyịn ẹdi ntak kpukpru mfịna nnyịn. Ndusụk ẹsito “ini ye n̄kpọntịbe unana idotenyịn.” (Eccl. 9:11) Edi inaha ifre ke Satan kpa Devil edi akpan owo emi edide ntak idiọkido. (1 John 5:19; Edi. 12:9) Enye edi asua nnyịn, idịghe Jehovah!—1 Pet. 5:8.

KÛYAK N̄KPỌ ADIAN̄ADE FI ỌKPỌN̄ JEHOVAH

Jehovah ama ọdiọn̄ Joshua ye Caleb sia mmọ ẹkebuọtde idem ye enye (Se ikpehe ekikere 22)

22, 23. Nso ke ikpeti edieke idem ememde nnyịn ke ntak mfịna nnyịn?

22 Ke ini nsọn̄ọn̄kpọ ye afanikọn̄ ẹsịmde fi, ti uwụtn̄kpọ Joshua ye Caleb. Mmọ iketiehe nte mbon uyep duop eken, edi ẹkeda eti mbụk ẹnyọn̄ ẹdi. (Num. 14:6-9) Mmọ ẹma ẹbuọt idem ye Jehovah. Kpa ye oro, mmọ ẹma ẹtiene nditọ Israel eken ẹyo ke wilderness isua 40. Ndi Joshua ye Caleb ẹma ẹkụni m̀mê ẹyat esịt, ẹdọhọ ke ifọnke ndiyak mmimọ itiene ibọ ufen? Baba. Mmọ ẹma ẹberi edem ke Jehovah, enye onyụn̄ ọdiọn̄ mmọ. Ofụri emana oro ẹma ẹkpan̄a ke wilderness, edi Joshua ye Caleb ẹma ẹdụk Isọn̄ Un̄wọn̄ọ. (Num. 14:30) Kpasụk ntre, Jehovah ọyọdiọn̄ nnyịn edieke nnyịn “mîkpaha mba” ke edinam uduak esie.—Gal. 6:9; Heb. 6:10.

23 Nso ke akpanam edieke idem ememde fi ke ntak mfịna, unana mfọnmma mbon en̄wen, m̀mê unana mfọnmma fo? Wụk ntịn̄enyịn ke nti edu Jehovah. Kere ban̄a idotenyịn oro Jehovah ọnọde fi. Bụp idemfo ete, ‘Mîkpedịghe Jehovah, uwem mi ekpetie didie?’ Ka iso san̄a kpere enye, kûnyụn̄ uyat esịt ye enye!