Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme (Eke Ukpepn̄kpọ)  |  July 2013

“Anie Ndien Edi Ofụn Emi Anamde Akpanikọ Onyụn̄ Enyenede Ọniọn̄?”

“Anie Ndien Edi Ofụn Emi Anamde Akpanikọ Onyụn̄ Enyenede Ọniọn̄?”

“Anie ndien edi ofụn emi anamde akpanikọ onyụn̄ enyenede ọniọn̄ emi eteufọk esie ekemekde ete ese aban̄a mbonufọk imọ?”—MATT. 24:45.

1, 2. Anie ke Jesus ada ọnọ nnyịn udia eke spirit mfịn, ndien ntak emi oyomde ifiọk enye?

“NDITỌETE, n̄kemeke ndibat ini emi ẹwetde n̄kpọ emi nyomde ke ata nnennen ini oro nyomde.” Ntem ke eyenete an̄wan kiet ekewet ke leta ọnọ ẹsọk nditọete oro ẹnamde utom ke ibuot itieutom ofụri ererimbot nnyịn. Ndi akanam etie fi ntre n̄ko? Esitie ediwak nnyịn ntre. Ndi oro akpa nnyịn idem? Ikpaha.

2 Ekemini udia eke spirit oro isibọde edi uyarade ke Jesus, kpa Ibuot esop, ke ọnọ udia eke spirit nte enye ọkọn̄wọn̄ọde. Anie ke enye ada anam emi? Ke ini Jesus ọkọnọde idiọn̄ọ edidu esie, enye ọkọdọhọ ke imọ idida “ofụn emi anamde akpanikọ onyụn̄ enyenede ọniọn̄” inọ mbonufọk imọ “udia ke nnennen ini.” * (Kot Matthew 24:45-47.) Ofụn emi anamde akpanikọ do ke Jesus ada ọnọ ata mme anditiene enye udia ke utịt ini emi. Enen̄ede oyom ifiọk ofụn emi anamde akpanikọ. Ofụn emi anam nnyịn isọn̄ idem ke n̄kan̄ eke spirit inyụn̄ inen̄ede isan̄a ikpere Abasi.—Matt. 4:4; John 17:3.

3. Nso ke ikesiwet ke mme n̄wed nnyịn iban̄a uwụtn̄kpọ oro aban̄ade ofụn emi anamde akpanikọ?

3 Edi uwụtn̄kpọ oro Jesus ọkọnọde aban̄a ofụn emi anamde akpanikọ akpan̄wan̄a nnyịn didie? Ke ini edem, ima iwet se itienede emi ke mme n̄wed nnyịn. Ke Pentecost 33 E.N., Jesus ama emek ofụn emi anamde akpanikọ ete ese aban̄a mbonufọk esie. Ofụn oro ada aban̄a kpukpru mme Christian oro ẹyetde aran, emi ẹdude ke isọn̄ ke ini ekededi toto ke ini oro. Mbonufọk ẹdi owo kiet kiet ke otu mbon oro ẹyetde aran do. Ke 1919, Jesus ama emek ofụn emi anamde akpanikọ “ete ese aban̄a kpukpru inyene esie”—kpukpru inyene Obio Ubọn̄ ke isọn̄. Edi nte itịn̄de enyịn idụn̄ọde N̄wed Abasi inyụn̄ ibọn̄de akam itie ikere,  imedikụt ke oyom ikpụhọde nte ikọ Jesus oro aban̄ade ofụn emi anamde akpanikọ onyụn̄ enyenede ọniọn̄ an̄wan̄ade nnyịn. (N̄ke 4:18) Ẹyak ineme uwụtn̄kpọ emi inyụn̄ ise nte enye ebehede nnyịn, edide inyene idotenyịn ndika heaven m̀mê ndidụn̄ ke isọn̄.

INI EWE KE UWỤTN̄KPỌ EMI OSU?

4-6. Ntak emi ikemede ndidọhọ ke uwụtn̄kpọ oro Jesus ọkọnọde aban̄a ofụn emi anamde akpanikọ ọkọtọn̄ọ ndisu ke mme akpatre usen ẹma ẹketọn̄ọ ke 1914?

4 Mme ufan̄ikọ en̄wen ke Matthew ibuot 24 ẹwụt ke uwụtn̄kpọ oro aban̄ade ofụn emi anamde akpanikọ onyụn̄ enyenede ọniọn̄ ikọtọn̄ọke ndisu ke Pentecost 33 E.N., edi ke osu ke utịt ini emi. Ẹyak ise nte N̄wed Abasi anamde nnyịn idọhọ ntre.

5 Uwụtn̄kpọ oro aban̄ade ofụn emi anamde akpanikọ edi ubak ntịn̄nnịm ikọ oro Jesus eketịn̄de aban̄a “idiọn̄ọ edidu [esie] ye eke akpatre ini editịm n̄kpọ emi.” (Matt. 24:3) Akpa ikpehe ntịn̄nnịm ikọ oro, emi ẹwetde ke Matthew 24:4-22, osu ikaba—akpa, ọtọn̄ọde ke isua 33 E.N. tutu esịm 70 E.N., ndien ọyọhọ iba, osu ke ata akamba usụn̄ ke eyo nnyịn. Ndi emi ọwọrọ ke ikọ Jesus oro aban̄ade ofụn emi anamde akpanikọ edisu ikaba n̄ko? Baba.

6 Ọtọn̄ọde ye ikọ oro ẹwetde ke Matthew 24:29, Jesus eketịn̄ akpan akpan aban̄a mme n̄kpọ oro ẹditịbede ke eyo nnyịn. (Kot Matthew 24:30, 42, 44.) Ke ini Jesus eketịn̄de aban̄a se iditịbede ke akwa ukụt, enye ọkọdọhọ ke mme owo “ẹyekụt Eyen owo asan̄ade ke obubịt enyọn̄ edi.” Ekem, enye ama etịn̄ ikọ oro edinyenede ufọn inọ mbon oro ẹdude ke mme akpatre usen. Enye ekesịn udọn̄ ọnọ mmọ ẹdu ke ukpeme, ete: ‘Mbufo ifiọkke usen eke Ọbọn̄ mbufo edidide” ye, “Ke hour emi mbufo mîkereke, Eyen owo eyedi.” * Ke Jesus ama eketịn̄ aban̄a mme n̄kpọ oro ẹditịbede ke mme akpatre usen ke enye ọkọnọ uwụtn̄kpọ ofụn emi anamde akpanikọ. Ke ntre, nnyịn imekeme ndidọhọ ke ikọ esie oro aban̄ade ofụn emi anamde akpanikọ ọkọtọn̄ọ ndisu ke mme akpatre usen ẹma ẹketọn̄ọ ke 1914. Emi esịne ifiọk. Ntak-a?

7. Nte ini ukpen̄e ọkọtọn̄ọde, akpan mbụme ewe ekedemerede, ndien ntak-a?

7 Kere esisịt ise ban̄a mbụme emi: “Anie ndien edi ofụn emi anamde akpanikọ onyụn̄ enyenede ọniọn̄?” Ke eyo mme apostle, ufọn ikodụhe ndibụp utọ mbụme oro. Nte ikokụtde ke ibuotikọ oro ekebede, mme apostle ẹma ẹsịnam utịben̄kpọ ẹnyụn̄ ẹnọ mme owo utịbe utịbe enọ ndiwụt ke Abasi odu ye mmimọ. (Utom 5:12) Ntre ufọn ikodụhe owo ndomokiet ndibụp m̀mê anie ke Christ ekemek ete ada usụn̄. Edi ikedịghe ntre ke 1914. Ẹma ẹtọn̄ọ ukpen̄e ke isua oro. Ini ama edikem ndisat mbiet nsion̄o ke wheat. (Matt. 13:36-43) Nte ini ukpen̄e ọkọtọn̄ọde, akpan mbụme emi ama edemede: Sia nsunsu mme Christian emi ẹdọhọde ke idi ata mme anditiene Jesus ẹwakde ntem, ikeme ndisan̄a didie mfiọk mbon emi ẹdide wheat—oro edi, mme Christian oro ẹyetde aran? Uwụtn̄kpọ oro aban̄ade ofụn emi anamde akpanikọ ama ọbọrọ mbụme emi. Mme anditiene Christ oro ẹyetde aran ẹdidi mbon oro ẹdiade ẹyụhọ ke n̄kan̄ eke spirit.

ANIE EDI OFỤN EMI ANAMDE AKPANIKỌ ONYỤN̄ ENYENEDE ỌNIỌN̄?

8. Ntak emi odotde ofụn emi anamde akpanikọ edi mme Christian oro ẹyetde aran?

8 Ana ofụn emi anamde akpanikọ edi mme Christian oro ẹyetde aran ke isọn̄. Ẹkot mmọ “mme oku emi ẹdide ndidem” ẹnyụn̄ ẹdọhọ mmọ “‘[ẹtan̄a] nti ido’ enye emi okokotde [mmọ] osio ke ekịm esịn ke utịbe un̄wana esie.” (1 Pet. 2:9) Odot mbon oro ẹdide “mme oku emi ẹdide ndidem” ẹnyene ubọk nnennen nnennen ke ndikpep ekemmọ mme  andinịm ke akpanikọ Ikọ Abasi.—Mal. 2:7; Edi. 12:17.

9. Ndi kpukpru mbon oro ẹyetde aran ẹdi ofụn emi anamde akpanikọ? Nam an̄wan̄a.

9 Ndi kpukpru mbon oro ẹyetde aran ke isọn̄ ẹdi ofụn emi anamde akpanikọ? Baba. Se idude edi ke idịghe kpukpru mbon oro ẹyetde aran ẹsitiene ẹnọ ekemmọ mme andinịm ke akpanikọ ke ofụri ererimbot udia eke spirit. Odu nditọete emi ẹyetde aran, emi ẹdide mme asan̄autom unamutom m̀mê mbiowo ke esop mmọ. Mmọ ẹsikpep mme owo n̄kpọ ke ufọk ke ufọk ye ke esop mmọ, ẹsinyụn̄ ẹsọn̄ọ ẹda ẹtiene ndausụn̄ oro ibuot itieutom ẹnọde. Edi mmọ isitieneke inọ nditọete ke ofụri ererimbot udia eke spirit. Nditọete iban emi ẹsụhọrede idem ẹsịne n̄ko ke otu mbon emi ẹyetde aran, ndien mmọ idehedei idomo ndidi mme andikpep ke esop.—1 Cor. 11:3; 14:34.

10. Anie edi ofụn emi anamde akpanikọ onyụn̄ enyenede ọniọn̄?

10 Anie ndien edi ofụn emi anamde akpanikọ onyụn̄ enyenede ọniọn̄? Sia Jesus ekesidade ibat ibat owo ọnọ ediwak owo udia, ofụn oro edi ekpri otu nditọete iren emi ẹyetde aran emi ẹnyenede ubọk nnennen nnennen ke nditịm nnyụn̄ nnọ udia eke spirit ke ini edidu Christ. Ke mme akpatre usen emi, nditọete oro ẹyetde aran mi, emi ẹdide ofụn emi anamde akpanikọ ẹnam utom ọtọkiet ke ibuot itieutom. Ẹda Otu Ukara Mme Ntiense Jehovah nte ofụn emi. Fiọk ete ke okposụkedi emi ofụn emi mîdịghe owo kiet, ke uwụtn̄kpọ oro Jesus ọkọnọde, ẹtịn̄ ẹban̄a enye nte n̄kpọ eke edide ofụn kiet. Ntem, Otu Ukara ẹsidiana kiet ẹnam ubiere.

MMANIE ẸDI MBONUFỌK?

11, 12. (a) Nso ye nso ke ẹmek ofụn emi anamde akpanikọ onyụn̄ enyenede ọniọn̄ ẹte ese aban̄a? (b) Ini ewe ke Jesus ekemek ofụn emi anamde akpanikọ onyụn̄ enyenede ọniọn̄ ete ese aban̄a mbonufọk imọ, ndien mmanie ke enye ekemek?

11 Akpan n̄kpọ en̄wen ke uwụtn̄kpọ Jesus edi ke ẹmek ofụn emi anamde akpanikọ onyụn̄ enyenede ọniọn̄ ikaba ẹte ese aban̄a n̄kpọ. Akpa, ẹmek enye ẹte ese aban̄a mbonufọk eteufọk esie; udiana, ẹmek enye ẹte ese aban̄a kpukpru inyene eteufọk esie. Sia uwụtn̄kpọ emi osude ke utịt ini emi kpọt, ọwọrọ ke ana Jesus ọtọn̄ọ ndikara ke 1914 mbemiso ẹmek ofụn emi ẹte ese aban̄a n̄kpọ mbiba emi.

12 Ini ewe ke Jesus ekemek ofụn emi anamde akpanikọ ete ese aban̄a mbonufọk esie? Man ibọrọ mbụme emi, ana iti se iketịbede ke 1914—kpa ntọn̄ọ ini ukpen̄e.  Nte ima ikokụt, ediwak otu ido ukpono ẹkedọhọ ke mmimọ idi Christian. Ewe otu ke Jesus okosio onyụn̄ emek nte ofụn emi anamde akpanikọ? Ẹkebọrọ mbụme oro ke enye ye Ete esie ẹma ẹkedi ẹdise temple, m̀mê ndutịm oro ẹnamde man ẹtuak ibuot ẹnọ Abasi, ọtọn̄ọde ke 1914 tutu esịm ntọn̄ọ ntọn̄ọ 1919. * (Mal. 3:1) Mmọ ẹma ẹdat esịt ẹban̄a ekpri otu Nditọ Ukpepn̄kpọ Bible emi ẹkesọn̄ọde ẹda, ẹnyụn̄ ẹwụtde ke mmimọ imama Jehovah ye Ikọ esie. Nte ededi, ama osụk oyom ẹnam mmọ ẹsana, ndien mmọ ẹma ẹsụhọde idem ẹbọ ukpep oro ẹkenọde mmọ. (Mal. 3:2-4) Mme anam-akpanikọ Nditọ Ukpepn̄kpọ Bible oro ẹkedi wheat, oro edi, ata mme Christian. Ke 1919, kpa ini emi ẹkefiakde ẹsịn ifịk ke n̄kpọ Abasi, Jesus ama osio nditọete iren oro ẹyetde aran, emi ẹdotde ke otu mmọ ete ẹdi ofụn emi anamde akpanikọ onyụn̄ enyenede ọniọn̄, onyụn̄ emek mmọ ete ẹse ẹban̄a mbonufọk imọ.

13. Mmanie isịne ke otu mbonufọk, ndien ntak-a?

13 Mmanie ndien ẹdi mbonufọk? Ke nditịn̄ ibio ibio, mmọ ẹdi mbon oro ẹdiade udia eke spirit. Ke ntọn̄ọ ntọn̄ọ mme akpatre usen, kpukpru mbonufọk ẹkedi mbon oro ẹyetde aran. Nte ini akakade, akwa otuowo emi ẹdide mme erọn̄ en̄wen ẹma ẹdidiana ye mmọ. Idahaemi mme erọn̄ en̄wen ẹwak ẹkan ke “otuerọn̄ kiet” emi ẹdude ke idak Christ. (John 10:16) Otu mbiba emi ẹdia ukem udia eke spirit oro ofụn emi anamde akpanikọ ọnọde ke edikem ini. Nso kaban̄a mbon Otu Ukara emi ẹnamde ofụn emi anamde akpanikọ onyụn̄ enyenede ọniọn̄ mfịn? Ana nditọete emi ẹdia udia eke spirit n̄ko. Ntem, mmọ ẹsụhọde idem ẹnyịme ke mmimọ owo kiet kiet idi mbonufọk kpa nte kpukpru ata mme anditiene Jesus eken ẹdide.

Edide inyene idotenyịn ndika heaven m̀mê ndidụn̄ ke isọn̄, kpukpru nnyịn idi mbonufọk imonyụn̄ iyom ukem udia eke spirit oro ẹnọde ke edikem ini

14. (a) Ewe utom ke ẹnọ ofụn emi anamde akpanikọ, ndien nso ke emi esịne? (b) Didie ke Jesus okodụri ofụn emi anamde akpanikọ onyụn̄ enyenede ọniọn̄ utọn̄? (Se ekebe oro “Edieke Ofụn Oro Akabarede Ọdiọk”)

14 Jesus ama ọnọ ofụn emi anamde akpanikọ onyụn̄ enyenede ọniọn̄ akamba utom. Ke eyo Bible, ofụn, m̀mê akama-ukpọhọde, oro ẹkemede ndiberi edem ekesise aban̄a ufọk. (Luke 12:42) Ntem, ẹnọ ofụn emi anamde akpanikọ onyụn̄ enyenede ọniọn̄ utom edise mban̄a mbonufọk Abasi. Emi esịne ndise mban̄a inyene, utom ukwọrọikọ, n̄kpri ye ikpọ mbono, ye ndida Bible n̄wet mme n̄wed man ikọt Abasi ẹda ẹkwọrọ ikọ, ẹkpep n̄kpọ ke ufọk ye ke esop. Ofụn emi ọnọ mbonufọk Jesus ofụri udia eke spirit emi mmọ ẹdiade.

 INI EWE KE ẸMEK OFỤN ORO ẸTE ESE ABAN̄A INYENE ETEUFỌK ESIE?

15, 16. Ini ewe ke Jesus emek ofụn emi anamde akpanikọ ete ese aban̄a kpukpru inyene esie?

15 Ini ewe ke Jesus emek ofụn oro ete ese aban̄a “kpukpru inyene esie”? Jesus ọkọdọhọ ete: “Ofụn oro oyokop inemesịt edieke eteufọk esie ke edide edisịm okụt enye anamde ntre! Ke akpanikọ ke ndọhọ mbufo nte, Enye eyemek enye ete ese aban̄a kpukpru inyene esie!” (Matt. 24:46, 47) Ndi omokụt ke Jesus emek ofụn emi ete ese aban̄a kpukpru inyene esie ke ini enye edide edisịm onyụn̄ okụtde nte ofụn emi “anamde ntre,” oro edi, akade iso ọnọ udia eke spirit? Ntre ini eyebe tọn̄ọ ẹkemek ofụn emi ẹte ese aban̄a mbonufọk Jesus ye ini emi ẹmekde enye ẹte ese aban̄a kpukpru inyene esie. Man ifiọk ini emi Jesus emekde ofụn emi ete ese aban̄a kpukpru inyene esie ye nte enye anamde emi, ana ifiọk n̄kpọ iba: ini emi enye edide edisịm ye se isịnede ke inyene esie.

16 Ini ewe ke Jesus edi edisịm? Mme ufan̄ikọ en̄wen ke Matthew 24 anam ifiọk. Ti ete ke ini ufan̄ikọ 30, 42, ye 44 ẹtịn̄de ẹban̄a ‘edidi’ Jesus, ke edidi emi aban̄a ini emi enye ebierede ikpe ke utịt editịm n̄kpọ emi onyụn̄ anamde se enye ebierede. * Ntem, Jesus ‘ndidi ndisịm’ m̀mê ‘ndidi’ oro ẹtịn̄de ẹban̄a ke uwụtn̄kpọ oro aban̄ade ofụn emi anamde akpanikọ edi ke akwa ukụt.

17. Nso n̄ko isịne ke inyene Jesus?

17 Nso n̄ko isịne ke “kpukpru inyene” Jesus? Ke ini Jesus eketịn̄de aban̄a “kpukpru” inyene esie, idịghe inyene esie eke isọn̄ kpọt ke enye eketịn̄ aban̄a. Ke nditịm ntịn̄, Jesus enen̄ede enyene odudu ke heaven. Enye ọkọdọhọ ete: “Ẹnọ mi ofụri odudu ke heaven ye ke isọn̄.” (Matt. 28:18; Eph. 1:20-23) Idahaemi inyene esie esịne Obio Ubọn̄ Messiah, emi ẹkenọde enye toto ke 1914, emi enye edinyụn̄ ibuanade ye  mme anditiene enye oro ẹyetde aran.—Edi. 11:15.

18. Ntak emi esịt edidatde Jesus ndimek ofụn emi anamde akpanikọ ete ese aban̄a kpukpru inyene esie?

18 Nso ke ikpep ito ofụri se inemede emi? Ke ini Jesus edide ndibiere ikpe ke akwa ukụt, enye oyokụt nte ofụn emi anamde akpanikọ osụk ọnọde mbonufọk esie udia eke spirit ke edikem ini. Esịt ayadat Jesus ndimek enye ete ese aban̄a kpukpru inyene esie. Mbon emi ẹnamde ofụn emi anamde akpanikọ ẹdibọ edidiọn̄ emi ke ini mmọ ẹbọde utịp mmọ ke heaven ẹnyụn̄ ẹtienede Christ ẹkara.

19. Ndi utịp emi ẹnọde ofụn emi anamde akpanikọ ke heaven okpon akan enye oro ẹnọde mbon eken emi ẹyetde aran? Nam an̄wan̄a.

19 Ndi utịp emi ẹnọde ofụn emi anamde akpanikọ ke heaven okpon akan enye oro ẹnọde mbon eken emi ẹyetde aran? Baba. Ẹkeme n̄ko ndinọ mbon en̄wen n̄kpọ emi ẹken̄wọn̄ọde ndinọ ekpri otu kiet. Ke uwụtn̄kpọ, kere ban̄a se Jesus eketịn̄de ye mme anam-akpanikọ apostle esie 11 ke okoneyo oro ekesierede usen emi enye akakpade. (Kot Luke 22:28-30.) Jesus ama ọn̄wọn̄ọ ọnọ owo ifan̄ oro ke iyọnọ mmọ ata eti utịp ke ntak emi mmọ ẹsọn̄ọde ẹda ye imọ. Enye ọkọdọhọ ke mmọ ẹyetiene imọ ẹkara. Edi ediwak isua ke ukperedem, enye ama owụt ke kpukpru owo 144,000 ẹyetie ke ebekpo ẹnyụn̄ ẹtiene imọ ẹkara. (Edi. 1:1; 3:21) Kpasụk ntre, nte ẹtịn̄de ke Matthew 24:47, enye ama ọn̄wọn̄ọ ke iyemek irenowo ifan̄—nditọete iren emi ẹyetde aran, emi ẹnamde ofụn emi anamde akpanikọ—ite ẹse ẹban̄a kpukpru inyene imọ. Edi ke nditịm ntịn̄, kpukpru owo 144,000 ẹyetiene enye ẹkara ke heaven.—Edi. 20:4, 6.

Kpukpru owo 144,000 ẹyetiene Jesus ẹkara ke heaven (Se ikpehe ekikere 19)

20. Ntak emi Jesus ekemekde ofụn emi anamde akpanikọ, ndien nso ke afo ebiere ndinam?

20 Jesus ada ofụn emi anamde akpanikọ onyụn̄ enyenede ọniọn̄ anam kpa nte enye ekesinamde ke eyo mme apostle—ada ibat ibat owo ọnọ ediwak owo udia. Enye ekemek ofụn emi anamde akpanikọ man okụt ete ke ẹka iso ẹnọ ata mme anditiene imọ—edide mbon oro ẹyetde aran m̀mê mme erọn̄ en̄wen—udia eke spirit ke mme akpatre usen. Ẹyak ibiere ndiwụt esịtekọm ebe ke ndibere ye nditọete nnyịn oro ẹyetde aran, oro ẹnamde ofụn emi anamde akpanikọ onyụn̄ enyenede ọniọn̄.—Heb. 13:7, 17.

 

^ ikp. eki. 2 Ikpehe Ekikere 2: Mbemiso ini emi, Jesus ama ọnọ ukem uwụtn̄kpọ emi onyụn̄ okot “ofụn” emi “akama-ukpọhọde,” okot “mbonufọk” “otu asan̄autom.”—Luke 12:42-44.

^ ikp. eki. 6 Ikpehe ekikere 6: “Edidi” (Greek, er′kho·mai) Christ idịghe ukem ye “edidu” (pa·rou·si′a) esie. Edidu esie oro enyịn mîkwe ọtọn̄ọ mbemiso enye edi ndibiere ikpe.

^ ikp. eki. 12 Ikpehe ekikere 12: Se ibuotikọ oro “Sese! Ami Ndodu ye Mbufo Kpukpru Usen” ke page 10-12, ikpehe ekikere 5-8, ke nsiondi emi.

^ ikp. eki. 16 Ikpehe ekikere 16: Se ibuotikọ oro “Sian Nnyịn, Ini Ewe ke Mme N̄kpọ Emi Ẹditịbe?” ke page 7-8, ikpehe ekikere 14-18, ke nsiondi emi..