Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME (EKE UKPEPNKPỌ) JUNE 2013

Mbiowo—Ndi Ẹyesịn Udọn̄ Ẹnọ “Ukpọn̄ Oro Akpade Mba”?

Mbiowo—Ndi Ẹyesịn Udọn̄ Ẹnọ “Ukpọn̄ Oro Akpade Mba”?

Idem ke enyek Angela * emi ebede isua 30 mînyụn̄ idọhọ ebe. Enye etie ebet mbiowo. Nso ke mmọ ẹdidọhọ enye? Edi akpanikọ ke enye afiak mbono esop ifan̄, edi enye esikpa mba ke ini ọnyọn̄de utom edi sia enye esise aban̄a mbonusọn̄. Ke adianade ye mme mfịna esiemmọ eke usen ke usen, udọn̄ọ eka esie enen̄ede afịna enye.

Edieke ekpedide afo aka ndise Angela, didie ke ekpesịn udọn̄ ọnọ “ukpọn̄ oro akpade mba” mi? (Jer. 31:25) Akpa kan̄a, didie ke ekpetịm idem man anam utom ubọkerọn̄ oro enemde owo?

KERE BAN̄A MME IDAHA NDITỌETE FO

Ndusụk ini, kpukpru nnyịn imesikpa mba ke ntak utom idịbi udia m̀mê eke esop Abasi. Ke uwụtn̄kpọ, prọfet Daniel ama ‘akpa mba’ ke ini enye okokụtde n̄kukụt emi mîfiọkke se ọwọrọde. (Dan. 8:27) Ẹma ẹn̄wam enye ke ini angel Gabriel okowụtde enye idem. Angel emi ama anam n̄kukụt emi an̄wan̄a Daniel, anam enye ọfiọk ke Jehovah ama okop akam esie, onyụn̄ ọdọhọ enye ke enye osụk edi “owo emi ẹmade etieti.” (Dan. 9:21-23) Nte ini akakade, angel en̄wen ama ada nti ikọ ọsọn̄ọ Daniel idem.—Dan. 10:19.

Mbemiso akade ekese eyenete, da ini kere ban̄a idaha esie

Kpasụk ntre, mbemiso akade ekese eyenete emi akpade mba m̀mê emi idem ememde, da ini kere ban̄a mme idaha esie. Nso mfịna ke enye enyene? Didie ke mme mfịna emi ẹkeme ndinam idem emem enye? Nso nti edu ke enye enyene? Richard emi edide ebiowo ebe isua 20 ọdọhọ ete: “Nsiwụk ntịn̄enyịn ke  nti edu nditọete mi. Ke ini nnen̄erede ntie n̄kere mban̄a mme idaha mmọ mbemiso n̄kade n̄kese mmọ, esinen̄ede emem mi utom ndinọ nsịnudọn̄ oro ekemde ye mme idaha mmọ.” Edieke ebiowo en̄wen edisan̄ade ye afo, ẹsụhọde ẹtie kiet ẹkere ẹban̄a idaha eyenete oro ẹyomde ndika n̄kese.

NAM EMEM NDITỌETE FO UTOM NDITỊN̄ NTE ETIEDE MMỌ KE IDEM

Afo ọmọfiọk ke esinam owo bụt nditịn̄ nte etiede enye ke idem. Ke uwụtn̄kpọ: Ekeme ndisọn̄ eyenete ndineme nneme ye mbiowo oro ẹdide ẹdise enye. Do, didie ke afo ekeme ndinam enye ekeme ndineme nneme? Edieke asakde ata imam ye mmọ onyụn̄ etịn̄de ikọ nsịnudọn̄, emi ekeme ndin̄wam mmọ. Ke ini Michael emi edide ebiowo ebe isua 40 akade ndise nditọete, enye esiwak nditọn̄ọ ikọ esie ntem: “Omokụt, kiet ke otu ata nti ifet emi ebiowo enyenede edi ndisika n̄kese nditọete esie ke ufọk mmọ man enen̄ede emehe ye mmọ. Ntre, n̄ketetie mbet mfịn emi.”

Emekeme nditọn̄ọ nneme emi ye akam. Ke akam emi apostle Paul ọkọbọn̄de, enye ama etịn̄ aban̄a mbuọtidem, ima, ye ime nditọete esie. (1 Thess. 1:2, 3) Edieke etịn̄de nte amade nti edu eyenete fo, ọwọrọ ke afo emetịm esịt fo ye esie man ẹkpenyene inem inem nneme. Ikọ fo ekeme n̄ko ndidọn̄ enye esịt. Ray ọdọhọ ete: “Ndusụk ini, kpukpru nnyịn imesifre nti n̄kpọ oro inamde. Ntre, ke ini owo etide nnyịn aban̄a mmọ, emi esisịn udọn̄ ọnọ ukpọn̄ nnyịn oro akpade mba.”

NỌ ENỌ EKE SPIRIT

Ukem nte Paul, afo emekeme ndinọ eyenete “enọ eke spirit” ebe ke ndineme N̄wed Abasi, ọkpọkọm ufan̄ikọ kiet kpọt, ye enye. (Rome 1:11) Ke uwụtn̄kpọ, eyenete emi okopde ọkpọsọn̄ mfụhọ ekeme ndikere ke imọ iwọrọke n̄kpọ ndomokiet, ukem nte andiwet psalm emi ekemende idemesie odomo ye “ekpeme ikpa emi  nsụn̄ikan̄ an̄wande.” (Ps. 119:83, 176) Ke ama ekeneme esisịt aban̄a ikọ oro, emekeme ndidọhọ ke imọ imọfiọk ke eyenete oro ‘ifreke’ mme ewụhọ Abasi.

Kpasụk ntre, ndi ukereke ke uwụtn̄kpọ oro aban̄ade okụk drachma kiet oro okosopde ekeme ndinen̄ede n̄n̄wam eyenete an̄wan emi ọfiọrọde ọkpọn̄ esop m̀mê emi etekde ke ifịk? (Luke 15:8-10) Ekeme ndidi okụk oro ekedi kiet ke otu ediwak mbak silver emi ẹkedade ẹnam n̄kpọitọn̄. Edieke enemede uwụtn̄kpọ emi, emi ekeme ndin̄wam enye okụt ke imọ idi kiet ke otu mme andibuana ke esop Abasi oro enyenede ufọn. Ke ama ekeneme oro, emekeme nditịn̄ nte Jehovah amade enye nte kiet ke otu n̄kpri erọn̄ esie.

Nditọete nnyịn ẹsima ndineme itie Bible emi mmọ ẹkotde. Ntre, kûtịn̄ kpukpru n̄kpọ ikpọn̄! Ama okot ufan̄ikọ emi ebehede mmọ, emekeme ndimek ọkpọikọ m̀mê udịmikọ onyụn̄ ọdọhọ mmọ ẹtịn̄ ekikere mmọ. Ke uwụtn̄kpọ, ke ini ebiowo okotde 2 Corinth 4:16, enye ekeme ndibụp ete, “Ndi akanam afo omokụt nte Jehovah anamde fi afiak edi obufa?” Ndinam ntem ekeme ndinam mbufo ẹnen̄ede ‘ẹsịn udọn̄ ẹnọ kiet eken.’—Rome 1:12.

Nditọete nnyịn ẹsima ndineme itie Bible emi mmọ ẹkotde

Emekeme ndisịn udọn̄ nnọ eyenete n̄ko ke ndineme mban̄a owo emi ẹsiakde ke Bible emi idaha esie ebietde eke eyenete oro. Ekeme nditie owo emi enen̄erede ofụhọ nte eketiede Hannah m̀mê Epaphroditus, emi ẹkesikopde mfụhọ ndusụk ini, edi Abasi osụk enen̄ede ama mmọ. (1 Sam. 1:9-11, 20; Phil. 2:25-30) Neme ndusụk nti uwụtn̄kpọ ke Bible edieke odotde.

KA ISO NYENE UDỌN̄ KE IDEM NDITỌETE

Emekeme ndiwụt ke emenen̄ede ekere aban̄a nditọete fo ke ndika iso nnyene udọn̄ ke idemmọ ke ama akaka ekese mmọ. (Utom 15:36) Mbemiso ọnyọn̄de, ekeme ndifọn ndidiomi ndisan̄a ye enye ke an̄wautom. Ke ini Bernard, ebiowo emi enyenede mbufiọk, afiakde osobo ye eyenete emi mîbịghike enye akaka ekese, enye ekeme ndida mbufiọk mbụp mban̄a item emi enye ọkọnọde ete, “Edi didie, ndi ama enyene ufọn?” Edieke owụtde ke emenyene udọn̄ ntem ke idem eyenete, emi ayanam fi ọfiọk m̀mê oyom ẹka iso ẹn̄wam eyenete oro.

Enen̄ede oyom ẹse ẹban̄a, ẹma, ẹnyụn̄ ẹfiọk nte etiede nditọete nnyịn ke idem idahaemi. (1 Thess. 5:11) Ntem, mbemiso akade utom ubọkerọn̄ ọnọ eyenete fo, da ini kere ban̄a idaha esie. Sịn n̄kpọ emi ke akam. Mek itie N̄wed Abasi oro odotde. Adan̄a oro ke edinyene nnennen ikọ ndida nsịn udọn̄ nnọ “ukpọn̄ oro akpade mba”!

^ ikp. eki. 2 Ẹkpụhọ mme enyịn̄.